Þetta er fjórði dagurinn og fyrsta vikan okkar þar sem við vinnum eftir nýjum áherslum í sóttvörnum. Í lok hvers dags er fundað og farið yfir skipulagið með það að markmiði að gera enn betur.

Við viljum losa nemendur og starfsfólk sem mest við að nota grímur samfleytt, en það reynist nemendum íþyngjandi að bera grímur allan daginn. Með það í huga færðum við nemendur í 6. bekk í safnaðarheimilið í Ólafsvík, 8. bekk í 10. bekkjar stofurnar og 10. bekkina í stofur 6. og 8. bekkja. Með þessum skipulagsbreytingum tryggjum við 2 metra fjarlægð á milli nemenda og því eiga nemendur ekki að þurfa að vera með grímur í bóklegum tímum. Þá fannst okkur að nemendur, sem ekki eru í sama bekk, hittast of mikið fyrir utan skólastofurnar. Því gripum við til þess ráðs að skipuleggja WC ferðir nemenda og hólfa svæðin fyrir bekkina í frímínútum.

Nemendur mega ekki vera í boltaleikjum í frímínútum og því höfum við verið að leiðbeina þeim að finna leiki sem þeir geta farið í á skólalóðinni fram til 17. nóvember. Við höfum orðsendingu sóttvarnyfirvalda til hliðsjónar sem hljóðar svo:

“Íþrótta- og tómstundastarf barna á leik- og grunnskólaaldri innan og utan skóla er óheimilt. Þetta er m.a. gert tímabundið þar sem íþróttamannvirki, sundlaugar, líkamsræktarstöðvar og íþróttahús eru aðstaða þar sem ólíkir hópar koma saman. Til þess að ná markmiðum sóttvarnayfirvalda er skipulögðum kennslustundum í skólaíþróttum og -sundi frestað.

Skólum er aðeins heimilt að skipuleggja útivist og hreyfingu nemenda á skólatíma sé ýtrustu sóttvörnum fylgt og þá komið í veg fyrir blöndun hópa nemenda, s.s. útihlaup, göngur eða aðra virkni þar sem komið er í veg fyrir snertingu og hægt að halda nálægðarmörk.

Leikskólabörn og nemendur í 1.-4. bekk

Nálægðarmörk og grímunotkun gilda ekki um börn fædd árið 2011 eða síðar. Þau geta notað útileiktæki óhindrað í sínum 50 barnahópum. Sé þess kostur skal sótthreinsa búnað á milli hópa.

Nemendur í 5.-10. bekk

Nemendur verða að halda minnst 2 metra fjarlægð í útiveru/hreyfingu utandyra, ellegar nota grímur. Þess skal gætt að hópar blandist ekki og allir sameiginlegir snertifletir séu sótthreinsaðir milli hópa.“

Helstu breytingar sem við höfum gert:

Varðandi frímínútur og útiveru:

• Gilda áfram sömu reglur um fjarlægðarmörk og grímunotkun hjá 5.-10. bekk

• Ekki má nota leiktæki nema þau séu sprittuð á milli – boltaleikir ekki leyfðir

• Áhersla er lögð á að nemendur komist út og hreyfi sig eins og aðstæður leyfa og nú er bara að hugsa í skapandi lausnum😉

Óbreytt á Lýsu

Hellissandur:

• Stýrðar WC ferðir

• Tvískiptur matartími

• Tvískipt útivera - skólalóð skipt í svæði

Ólafsvík:

Markmiðið er að nemendur séu sem minnst með grímur

• Nemendur á miðstigi hafa val hvort þeir fara út í frímínútum, hver bekkur á sitt svæði úti

• Unglingastigið er inni í frímínútum

• Skipulagðar WC ferðir

• Val í 8.-10. bekk og pólsku kennsla falla niður

• 6. bekkur færist út í safnaðarheimili

• 8. og 10. bekkur fara í aðrar stofur

• Setja upp vaska í stofum nr. 5,7,8, 9.

Starfsfólk skólans hefur staðið sig frábærlega vel við þessar aðstæður, að fara eftir og framfylgja ströngum sóttvarnareglum. Það hefur sýnt mikla þrautseigju, lausnamiðun, jákvæðni og samstöðu. Stjórnendur vilja létta grímuskyldunni á starfsfólki eins og kostur er, eins að hvetja það til að sinna eigin líðan, líkamlegri og andlegri. Með það að markmiði þá léttum við viðveruskyldu af fólki í næstu viku.

Við viljum hrósa nemendum fyrir að sína þrautseigju og jákvæðni sem þeir hafa sýnt í þessari viku. Þeir hafa lagt sig fram um að fara eftir þeim reglum sem gilda og hlýtt fyrirmælum starfsfólks, nær undantekningalaust. Foreldrar eiga þakkir skyldar fyrir að undirbúa börn sín og standa við bakið á okkur. Kærar þakkir.

Gerum þetta saman, við erum öll almannavarnir.

Verum dugleg að minna hvert annað á að viðhalda 2 metra reglunni, annars að nota grímur, handþvott eða sprittun, góða loftun og almennt hreinlæti.

Ef eitthvað kann að orka tvímælis eða er óljóst er fólki velkomið að senda skólastjóra tölvupóst á netfangið hilmara@gsnb.is

Skólastjórnendur GSnb