Barnasáttmálinn
Verkefnalýsing
Nemendur velja reglu undir barnasáttmálanum og teikna mynd á A4 karton (velja 1-3 eftir fjölda nemenda). Númer greinarinnar er uppi í vinstra horninu og qr kóðinn verður settur í það hægra. Nafnið á reglunni er skrifað neðst og mynd í miðjunni. reglurnar eru settar á mislituð blöð þannig barnasáttmálinn sem er hengdur upp verður litríkur. Það er sett límband á milli greinanna.
Næst búa nemendur til google site síðu. Þeir fá grunn inn á classroom þar sem þeir fylla út upplýsingar um regluna sína. Þeir byrja á því að segja frá henni og bæta svo við þeirra eigin skoðun á málefninu. Þeir þurfa að finna mynd sem passar við þeirra efni. Þegar þeir eru búnir þá er verkefninu deilt með því að ýta á "publish". Þá er gott að leyfa því að vera "public" svo það verða engin vandamál að opna verkefnið.
Næst búa nemendur til qr kóða sem þeir setja neðst inn á vinnuskjalið í google site. Það er linkur inn á classroom þar sem þeir geta afritað og límt vefslóðina til þess að fá qr kóða. https://www.qr-code-generator.com/
Kennarinn prentar qr kóðann út sem nemandinn límir á spjaldið sitt.
Google site
Nemendur fá grunn þar sem þeir fylla út upplýsingar, fyrst setja þeir inn nafnið og númerið á reglunni, útskýra hana fyrir neðan og geta notað heimasíðu barnasáttmálans til að hjálpa sér. https://www.barnasattmali.is/
Næst svara þeir fjórum spurningum þar sem þeir mynda sínar eigin skoðanir á málefninu:
Finnst þér þetta mikilvæg regla? Af hverju/af hverju ekki?
Finnst þér farið vel eftir þessari reglu á Íslandi?
Heldur þú að það sé farið vel eftir þessari reglu alls staðar í heiminum? Rökstuddu.
Heldur þú að öll börn í heiminum búi yfir sömu réttindum og þú? Taktu dæmi.
Nemendur finna myndir sem passa við textann sinn.
Hæfniviðmið
Að nemandi geti:
Sýnt fram á skilning á mikilvægum gildum, svo sem kærleika, mannhelgi, félagslegu réttlæti. Umhyggju fyrir öðrum mönnum og öllu lífi.
Viðmið um árangur: Verkefni vel unnið og ígrundað, reglan vel útskýrð og myndin vönduð.
Nefnt dæmi um gildi jafnréttis og mannréttinda í samfélaginu og rætt áhrif staðalímynda.
Viðmið um árangur: Verkefni vel unnið og ígrundað, spurningum um þeirra eigin skoðun vel svarað.
Tekið þátt í samræðu um stöðu sína sem þátttakandi í samfélaginu, réttindi og skyldur, sýnt ábyrgð í samskiptum og átti sig á réttindum sínum samkvæmt alþjóðasáttmálum.
Viðmið um árangur: Kynnir regluna/reglurnar sínar fyrir öðrum og getur svarað spurningum um sína eigin skoðun á efninu.