Lainopean zegoen Ibarbürüko lepotik abiatu gara, Zuberoan, Ahüzkiko iturritik gertu. Ikusmira lausotua gorabehera, giro bikaina dago ibiltzeko eta gartsuki heldu diogu Maule eta Donibane Garazi arteko 3. etapari. Laster utzi ditugu atzean Ibarbürüko lepoko aterpea eta Bürdüñolhatzeko lepoa.

Gu bezalaxe eguzkia ere goiz hasi da lanean eta, poliki-poliki, xurgatu ditu hemen goiko lainoak. Orduan hasi gara lainoak ezkutatzen zituenak ikusten eta miresten. Espektakulu zoragarria benetan, galeperren kantu eta guzti!

Ez dago asti handirik begira egoteko. Eskaleta mendira hurbiltzen ari gara eta maldak zailtzen hasi zaizkigu. Aldapan gora goazela, une batean, pagadi eder bat zeharkatu dugu, hango itzalaren gerizpean. Bide gozoa dugu, gure oinen gozagarri.

Egia esan, Eskaleta mendiak badu eskailera baten antza, mailaz maila igotzen baita; tarte batzuetan aldapa tenteak egokitu zaizkigu, beste batzuetan, berriz, gune lauago eta errazagoak. Ibilaldiko igoerarik gogorrenetako bat, dudarik gabe.

Zeharbide gozo hau da lehen esandakoaren adibide garbia. Eskaleta mendira igotzeko aurreikusitako aukera baztertu dugu, besteak beste bide argirik ikusten ez zelako, Lepo txipi aldera doan beste bide leunago hau hartuz. Eguneko gunerik garaienetara hurbiltzen ari gara.

Lepo Txipian, jada 1.400 metrotik gora gabiltza eta hantxe egin dugu mendira etorritakoen argazkia, atzealdean Orhi mendi dotorea dugula (2.019 m). Gero taldea bitan banatu da, eta, talde nagusiak aurrera egin duen bitartean, taldetxo bat Eskaleta mendiko gailurrera igo da (1.477 m).

Gure Txindokik baino garaiera handiagoa duten mendietan gabiltza. Hurrengo mendia Arthanolatze izan dugu (1.531 m), eguneko gunerik garaiena, eta hantxe elkartu da berriro talde osoa. Handik jaitsi eta jarraian Xardeka tontorra (1.440 m) zapaldu dugu. Berebizikoak dira hemen goitik ikusten diren amildegi eta sakanak.

Goi hauetan ez gaude bakarrik, ordea. Gu inguratzean, amildegi horietara jauzi egin eta hegan hasi dira argazkiko saiak. Ez dira amildegien beldur, gure beldur baizik. Ingurutik igaro garenean, haiek utzitako aztarnak ikusi ditugu harkaitzetan eta harkaitz ondoetan.

Xardeka atzean eta saiak hegan utzi, eta hurrengo mendi tontorrerantz abiatu gara. Hantxe egin dugu azken ahalegina malda estu eta tente batean, Mendibeltz mendira (1.411 m) heldu aurretik. Zuberoa eta Nafarroa Beherea artean dagoen Harsüdürra mendilerroko mendiak dira hauek guztiak.

Azken tontor horretatik ederki ikusten da Iratiko soroa izeneko gunea. Gaur, ordea, ez goaz hara eta mendian behera egin dugu helmugara bidean. Laster bistaratu zaigu autobusa Burdinkurutxetako lepoan eta hara heldu gara 4 ordu eta erdiko ibilaldiaren ondoren. Jarraian Donibane Garazira joan gara bazkaltzera (Cafe Ttipia jatetxea).

Paisaia zoragarri hauetaz gozatu nahi duenak, klikatu beheko Argazkiak laukitxoan. Ez da damutuko.