暗 暝的七賢三路，充滿異國風情猶閣有歡喜的笑聲，若親像一个花花世界……

　　1950年代，韓戰爆發，美國派軍隊協防臺灣，高雄變成美軍度假的所在。因為地緣的關係，高雄市鹽埕區的七賢三路變做美軍落船了後，享受夜生活的場所。台灣人為欲趁美金，開誠濟酒吧，成做出名的酒吧街，佇彼个政治無安定的時代，創造「台灣奇蹟」。美軍的進駐(tsu3)，除了推動鹽埕區產業的發展以外，同時嘛因為船艦(lam7)的入港，所以有船隻補給的需要，產業順這个勢來發展。

    　民國六十年代是臺灣的經濟起飛，彼个時陣因為石油危機，全世界的經濟攏無好，佇這種的情形下，政府推動「十大建設」，為著改善臺灣的基礎建設，推動經濟猶閣有社會的進步。1973年中國造船廠佇高雄港設立，負擔著航運、貿易、國防的基本任務。高雄廠是一个有造船生產線的廠區，一年上大的產出是十隻百萬噸載重的船，佇臺灣重工業的發展當中非常重要。伊見證了臺灣船業的興旺，代表一个輝煌的時代。

    　毋過，花較紅艷總有落塗時，時代較奢颺嘛會來衰微……

   　1978年，中國開始推動改革開放，其中有一項「對外開放」，予足濟海外的企業會使入去中國市場，中國的企業仝款嘛會當開發海外的市場。政府為著鼓勵對外的經濟合作佮技術的交流，所以予外商佇開放的十四个沿海港口城市優待。這款的做法，打擊了臺灣的商港，原本合作的對象轉去佮中國合作，港口的稀微嘛造成了船業的沒落。

     時 代會變，產業的結構嘛會撨摵(tshiau5 tshik8)，這馬今仔出社會的少年人第一份工課通常是服務業抑是科技業，大部分攏袂選擇傳統產業，逐家甘願坐佇辦公室內底嘛無愛佇外口曝日頭做工課，造成這馬做工的人愈來愈少，傳統產業嘛漸漸稀微的狀況。毋過，少年頭家也是接手頂一代鋼索行的工作，自頭去學習欲按怎管理規間公司、提供上好的零件佮服務，繼續共這間老店的好名聲傳承落去。

    　其實佇產業的結構內底，傳統產業猶原是非常重要的部分，佮其他的行業攏有相牽連，就親像一台機器內底的螺絲，每一个零件攏是足重要的，若是減一項物件，機器就袂振動。少年頭家就是有一个承擔傳統產業的責任感，為著予國家的經濟繼續運作，伊也是選擇這份足少人願意做的行業，無論有偌辛苦，景氣是好抑是bai2，伊攏會繼續認真共做落去，完成伊的使命。希望佇未來，傳統產業會當繼續傳承落去，共老行業的手路好好仔保存，予逐家攏會當知影，遮的老行業佇歷史內底的貢獻佮價值。