佇咧民國七十年

　　講著福全這間冰店是按怎來徛店，就愛講到民國七十年。彼个時陣，有一个真好食e5新產品拄好出來，就是這間店e5招牌（khang35 pang51）頂懸所寫e5「布丁豆花」，閣拄好中山大學嘛開設，兩个拄好，就加盟矣，然後一直開甲這馬。

在　地　人

　　少年頭家e5阿公阿媽本底是蹛佇台南e5南鯤鯓，毋過佇老頭家細漢e5時陣，也就是日本時代就搬過來哈瑪星矣，所以對少年頭家佮老頭家來講，𪜶（in1）就是在地人。毋過，佇哈瑪星確實有真濟台南人，若是𪜶（in1）有做伙轉去南鯤鯓，通常攏是王爺生日e5時陣。佇開福泉進前，老頭家是走船e5，老頭家娘是旗津人，兩人是相親熟似e5。

變　化

　　較早以前，中山大學彼个所在是動物園；這馬e5阿珠の店較早是興發精米所；後壁遐，是這馬已經無咧營業毋過閣會當去看覓e5鼓山魚市仔；閣有日本時代是市役所，日本時代結束了後北門人買地起e5代天宮。若是講店有啥物變化，就是疫情𤆬來e5衝擊，外國人客沒法度來、逐个無法度有休閒e5生活。

傳　承

　　講著這間行過四十外冬e冰店，佇經營e5想法頂懸，兩代頭家之間e5衝突主要著是佇科技產品e5使用。老頭家感覺毋是蓋重要，毋是足想欲用遮e5高科技產品，毋過少年頭家煞是用佮有聲有影，佇少年輩e5心內感覺電腦遮e科技產品是一定愛e5。

　　佇傳承店面e5方面，老頭家一開始感覺講少年家有家己e想法，無共伊勉強。少年頭家一開始佇外口想欲自己拍拚看覓，猶毋過想著厝內序大攏有歲了，加上轉來接冰店算是家己做頭家，過較自由，會使放手落去拚，所以著決定欲轉來做。

●○●冰角佮料e5來源●○●

　　有真濟人叫是講，哈瑪星附近開遮爾濟冰店，是因為附近開製冰工場，其實毋是按呢。遐e5冰佮咱食e5冰無仝款，工場e5冰是用來冰魚仔e5，袂當食，會當啉e5水才會使挈來作礤冰角。其實以前無遐爾濟賣冰e5，干焦渡船頭、萊爾富佮廟口遐有賣過冰。

　　若是按呢，冰角按怎來？做礤冰角e5機器足大，欲做大量e5就需要大工場，若無應付袂來，基本上冰店e5冰角是請外面e5工場做。福泉攏是佮固定e5廠商配合，有礤冰角、雪花冰角。

　　冰內底e5料大部分攏是福泉家己準備，像紅豆、綠豆、芋仔、薏仁、塗豆、圓仔、珍珠這款會當定定看到e5料攏是家己煮e5。有一寡物件e5店會直接用好，毋過福泉家己煮較濟，頭家講：「按呢較是阮e5味！」

　　另外，布丁豆花嘛是工場做e5。講到布丁豆花，西子灣e5福泉當時是全臺灣第一間加盟這間豆花e5！無毋對，福泉本來是一間加盟e5豆花店，毋過原本e5「福泉」已經改名矣，逐个這馬會當揣到上老e5福泉，就是西子灣這間。賣冰是等到海之冰流行起來才有e5。以前e5人客攏是來食豆花，中山大學e5學生轉來亦攏是欲食豆花，毋是欲吃冰。

●○●攢料e5詳細●○●

　　頭家講，基本上逐工攏愛煮料，但是無一定攏愛煮共款e5物件。這馬保存條件較好，若是冰箱有夠冷就會使囥兩三工無問題，袂像以前沒地冰，只會當煮一寡寡仔著擲掉。

　　平常時佮歇睏時仔攢料需要e5時間無仝 ，若是歇睏時仔可能規工攏愛煮，因為煮一个紅豆就差不多愛兩點鐘，塗豆就可能要八、九點鐘，綠豆較快，毋過薏仁嘛要時間，沒法度一擺全部煮了。所以無閒e5話就是規工，若是知影拜六、禮拜較無閒，拜四、拜五就加煮一寡料，才袂遐爾趕。

　　數量就是煮一个差不多，較歹攢e5是水果。像豆仔彼款物件就會使一改煮較多，然後冰起來，品質較固定。水果若是還沒熟就冰lueh就袂熟矣，愛囥到差不多欲熟矣，才會當冰，有時陣嘛會熟過頭，實在真歹控制，所以水果就逐工攏愛買，有e5一改買較濟，價數會較好看，像檨仔那款e5水果可能就是濟攢一寡，好e5就留咧，䆀e5就擲掉。有e5水果愛去菜市仔家己選，比如講檨仔就是有配合e5店，貨毋是產地直送，愛經過中盤商送過來。頭家通常會希望中盤商會使替𪜶（in1）把關品質，毋過中盤商嘛是有𪜶（in1）e5壓力，袂當攏只揀好看e5，而且𪜶（in1）閣欲賣予較俗，所以𪜶（in1）著攏愛收，除非家己去提。

●○●開店e5時間●○●

福泉差不多下早仔十點開店，但是八點就要開始準備，有親像煮珍珠、攢料、切水果等等e5工課欲做。

　　平常時仔攏開到咧欲暗時十一點，有時陣甚至會開到十二點外。以前閣較晚，會到一兩點才關店，彼時陣學生較多，暗時仔社團結束了後攏佇店內開講。後來頭家感覺有一點仔傷晚，才共關店e5時間提早。

●○●拄著e5問題●○●

　　頭家講，做食e5店上大e5問題其實無啥，就是人客濟猶是少。冰店e5生理佇平常時仔攏無啥物變化，主要是佮天氣較有關係，天氣較冷抑是落雨、天氣䆀就人客較少，天氣較熱、天氣好就較有人。

　　普通人講到生理抑是經濟會想到e5景氣，顛倒影響無遐爾大，因為礤冰毋是啥物足貴e5產品，寒天嘛是有人會想欲食冰，比如講寒天e5時陣，店猶是愛開，就會賣草莓（tshau2-m5）、燒仙草、紅豆湯等等。毋過肺炎疫情發生了後生理就有明顯e5改變，疫情發生到這馬，本地人毋敢出門，嘛無外國人客，商家e5生理應該減了有五成。