大約八點半，大部分的公司行號、人客就會開始營業叫貨，這時頭家就會開始接訂單，順紲看庫存量敢有夠，若是較有銷路ê貨，庫存量就要留較濟一點，銷路較無好ê，就囥一兩項就會使矣。

　　若是庫存無夠，就愛用簿子紀錄，趕緊佮頂流聯絡，廠商大約愛中晝過後才會送貨過來，所以頭家猶是下晡才會開始送貨，也就是講五金的行業內底，逐个營業模式(時間)差不多。

　　延續第二代ê模式，毋過五金種類比以豐富，更加複雜。

　　現今賣場 、平台ê市場大，這款傳統五金行優勢著是品質好，物件歹去揣會著人修理，別位無這款sa-bí-suh，傳統五金行也會使按照使用者ê需求、感受來販賣五金。

　　逐家一般看到的秤磅，可能攏是菜市仔彼種磅魚、磅肉、磅菜的青色磅仔。但是這間五金行有超過一甲子的五金秤磅，日本當地製造販賣，自第一代頭家開始就有矣！已經無咧做，所以這馬已經是國寶等級的傳家寶。

　　佮一般秤磅無仝，伊是用指針刻度佮標準重雙重比較計算出來，而且佇60年前彼咧時代到這馬，伊的標準猶原佮正確的重量差無偌濟，會當看出這台日本製的秤磅是真實的好功夫矣！

　　這馬若是問少年人窗弓是啥物，凡勢攏講無聽過，猶毋過這個小家私卻是以早厝內袂當無ê物件。早前若是愛開窗仔門ê時陣，無親像這馬ê窗仔門遮爾方便，愛用這個「窗弓」共窗仔門定著，窗仔門才袂曉黑白振動。這馬隨著無仝ê窗仔門出現，窗弓嘛越來越少使用，古厝共古蹟較常使用。