大益疊蓆行

佇哈瑪星ê鼓山一路有一間無蓋顯目ê疊蓆行，經過五十幾ê年頭，猶原穩穩ê徛踮這个充滿歷史文化ê哈瑪星一帶，伊就是—大益塌塌米。這款傳統文化佇現代是愈來愈少，這間店是按怎來徛起和保存這手工藝？

走離失傳ê命運

當初，日本人共榻榻米產業介紹來台灣，彼時陣膨床猶未流行，榻榻米是上濟人買轉去做眠床，睏起來是誠好勢。第一代老頭家綴著日本師傅學製作技術，開一間店號作大益，大益這字已經揣沒原本ê意義，可能是榻榻米對身心健康有幫助才來號這店號。原本舊厝佇倚北爿面ê台電大樓邊仔ê一間細間鐵厝，後來為著擱較大ê空間佮省租金就換過來這馬ê所在，舊厝這馬嘛已經予人拆掉矣。

第二代頭家接手經營，這馬做起來是越做越好，這佮頭家過去ê工作經驗ê累積有關係。頭家毋是自榻榻米開始做起，一開始考著B級ê駕駛執照踮佇車廠做試車手，想欲考過需要路試三關，(1)超安，愛佇80公里以上變換車道，包括60公里以上車速通過大S彎道；(2)車擋，佇時速120公里以上共車擋起來；(3)高速，佇160公里以上ê車速走兩輪，無過正南北向袂當偏移傷濟。彼時考場是透大風、車速需要現場看是順風抑是逆風做調整，車ê新舊嘛是會影響著控制。頭家說一開始選擇這個頭路ê原因是好耍，彼當陣佇車廠有袂䆀ê表現。了後頭家因為結婚，佇父母ê壓力下搬轉去厝，紲落擱去電子業食頭路，比起原本做試車手ê頭路，做電子業負責做品管ê工時較長，壓力嘛較大，毋過薪水煞無比人加若濟。辛苦了2-3年了後，電子公司拄著關門ê危機，厝內老一輩又擱咧催頭家轉去接手榻榻米店，命運安排這个時機，頭家無想遐濟就共店面接落來。

頭家彼當時了解榻榻米產業閣有真濟需要改進ê所在，譬如引進機器加工生產，毋過這項決定佇當時嘛予老一輩反對，了後因為產品ê品質變好，所以銷量嘛賣了愈來愈好，才予阿爸認同伊ê做法。這馬，榻榻米店因為頭家ê用心，用他所得到ê經驗，駛著箱仔車東西南北走遍全台灣咧載榻榻米，共材料ê品質囥第一，共市場發展到國外去，保存著這間老店嘛傳承這項工藝

綴時代會著ê傳統工藝

自逐家開始睏膨床了後，台灣ê榻榻米市場是愈來愈䆀，店是一間一間咧倒，堅持落來ê榻榻米店用幾支指頭仔就算會出來。頭家相信製作過程本來著愛進步到機器化，做起來較工整，手工製作主要是做甲較幼路抑是有特殊(ti̍k-sû)外型需求ê時陣，一片手工製作ê 榻榻米製作時間，機器ê會使作足濟片。通常無換ê原因是因為老一輩ê觀念，若無就是空間佮成本咧阻擋，機器對日本進口真正是貴參參，佇台灣擱無經銷商通好修理，攏是愛靠家己。其他行業用手工做無的確較斟酌，毋過榻榻米用手工做無一天手就攏酸了，而且產品ê品質嘛會變䆀。

頭家上注重「材料ê品質」，攏就愛揀符合要求ê原料，傳統榻榻米蓆底 ê原料只有稻草(tiū-tsháu)，席面 ê材質傳統攏是鹹草織ê。稻草ê產地主要踮雲林、嘉義，草料收割(siu-kuah)了後愛曝日七工，期間袂使落雨，紲落來入庫發酵(huat-kànn)一年，一般分作新草舊草，新草只有發酵半年，舊草就比新草擱較韌。傳統ê有邊榻榻米是兩邊用有花草ê布料加一層襯紙車起來，另外有一款無爿榻榻米，對日本琉球傳過來，貼起來是閣較好看，毋過技術要求較嚴，因為毋免用布邊包起來，四爿就愛切閣較準，袂使有公差。

店內引入足濟種榻榻米 ê材質，分作天然和合成(ha̍p-sîng)材料，天然材料愛注意天氣變化以免變質(piàn-tsit)，頭家接手了後就加裝抽風機，時時刻刻注意濕度變化，傳統店家較毋這方面ê觀念，定定就會生蟲生菇。木質纖維鉼加一層保麗龍ê蓆底有毋驚挵ê效果，擱一款蓆底有一層發泡材佮一層塑膠材料，有防水ê效果毋過就較貴，佇台灣較無銷，對芳味有要求ê人客嘛有檜木ê材質通揀。若無小心捙倒水入去榻榻米內底，天然材料較愛緊手共水拭予焦，莫予水洩入去甲榻榻米內底，稻草就會爛起，若是合成材料就毋驚水。

靠訂單食飯

目前店面ê所在對榻榻米產業較好，因為附近人較少、地閣大，對於貨物出入較方便，店面毋是真好找，kha̋ng-páng嘛無蓋吸引人，完全是一間工廠。附近ê發展嘛無什啥物影響，本底就毋是欲予來哈瑪星𨑨迌ê人入來踅，來訂單多從香港佮全台灣來，香港ê客戶大部份是好額人，起別莊會用到榻榻米來裝潢，台灣ê客戶大部分是建商。

之前對面ê空地欲起大樓著被真濟人反對落尾起無成，毋過這碼做了一條輕軌，雖然可能對沿海一帶交通有改善，毋過平常時坐ê人數少，實際ê功效有限，嘛造成塞車ê現象。

經營大益是誠無閒，若有需求才會做，不論啥物要求只要做得出來攏會當做。目前已到穩定期，訂單是滿滿是。頭家擱佮高雄文化局合作，製作特殊產品，毋過無親像開發藝術性彼款ê文創市場。看著誠濟人開始做文創，頭家很有信心共阮講，會需要到賣文創商品賺錢代表生意已經足䆀，若是有時間去做彼个就欲哭矣。

猶毋過頭家嘛是有配合家己ê興趣製作特殊產品，親像這馬賣足好ê貓仔墊仔，內底加入貓草，擺在膨椅邊仔會當吸引貓到墊子上，貓草ê氣味嘛有幫助緩和貓ê情緒。

針穿草，線繃蓆

一、過去按怎做?

批來ê蓆底原料囥佇工作檯面頂，先用磨甲利劍劍ê大隻鋼刀切蓆底，兩爿頭尾就愛切予齊用線紩固定，擱來用蓆面包起來繃絚(ân )，以早愛共蓆面繃予絚無遐爾簡單，兩爿愛用(角仔)墊懸，中央出力予蓆底凹落去，蓆面囥好了後才予蓆底恢復，就會當予蓆面繃予穩觸觸。紲落來用鑽仔固定紩起來，擱來共布邊包踮另外兩爿紩起來，上尾用兩種鉤仔來搝線，一根搝線一根搝蓆底，愛用著全身ê力落去共線搝予絚，手會捆一條布以免傷著手。榻榻米製作ê手路確實幼工，經過如此複雜ê工序才會當變成一塊榻榻米。

二、這馬按怎做?

榻榻米要求逐一塊接面是袂使有空縫，而且接面ê角度嘛有要求，引進機器佮大型電動針車來切蓆底，遮ê機器算是一个協助工具，一寡工作嘛是愛手工落去做，毋過，引入機器一定是幫助加速製作時間，嘛予榻榻米ê品質維持統一。

好壞運攏會來拄著

佮生產過程比起來，經營大益是擱較辛苦，拄著較濟困難。做一途週轉金一定要攢夠，因為錢是足歹收，雖然一般攏是先一手交錢一手交貨，毋過無逐工攏咧過年，嘛是會拄著一寡漚客。有一擺，一間細間裝潢公司自舊年9月訂貨，叫頭家較緊做，拖足久到今年9月猶未付錢，牽拖著𪜶ê客戶裝潢猶未做好煞來雄雄走單，無彩工頭家冗早趕咧共𪜶ê訂單先做好，尾仔是了誠濟錢。

頭家擱講著尚驚去拄著ê奧客，有人客認為榻榻米就是愛用天然ê，會生菇攏是店家ê問題。有一擺是頭家到一个查某老師ê厝內底，窗仔門開出去是細條巷仔，予房間濕氣傷重，建議莫貼傳統ê 榻榻米煞無咧管待，不到一个禮拜，查某老師就佇三更半暝拚死敲電話，尾仔頭家寄一塊新ê過去才解決；另外一个嘛是無愛聽建議煞來用布攄仔撸榻榻米，規个榻榻米生菇予跤去感染著，人客行到店內底大細聲，尾仔頭家是送一塊防水ê材質才處理好勢。

頭家講會當著獎和開發新ê產品，做會到別人做袂到ê，是做這行尚有成就感ê代誌。頭家ê核心理念是：「共做予人客ê物件當作是加己欲用ê」，所以才共榻榻米做好較好。頭家尚有成就ê代誌是得到市政府頒發ê國家品質金牌獎，這个獎是看店家材料來源、管理、製作遮ê工夫，比別人較好才會當得獎。因為過去食頭路所累積ê經驗，材料品管、駛車送貨佮做榻榻米攏做到變熟手，無一定賰手工一條路通好行，傳統工藝綴著時代嘛是會當得到逐家ê肯定。