Casoeual - Jean Monnet Modules FHF

Në kuadër të Modulit Jean Monnet CASOEUAL, Fakulteti i Historiografisë dhe Filologjisë në Universitetin e Tiranës organizoi Shkollën Verore dy-ditore me temën “Reforma në Drejtësi në Shqipëri dhe Procesi i Integrimit në BE”, e zhvilluar më 25-26 Qershor 2025. Qëllimi i aktivitetit ishte promovimi i angazhimit akademik dhe inkurajimi i dialogut kritik mes studentëve mbi ndikimin e reformave institucionale në procesin e anëtarësimit të Shqipërisë në Bashkimin Europian.

Sesioni i pare i shkollës verore u mbajt nga Prof. Dr. Artan Hoxha, Rektor i Universitetit të Tiranës dhe ish-Kryetar i Grupit të Ekspertëve të Lartë që udhëhoqën hartimin e reformës në drejtësi të Shqipërisë gjatë periudhës 2015–2016. Prof. Hoxha e paraqiti reformën si një nga shtyllat kryesore për avancimin e negociatave me BE-në, duke theksuar rolin e saj në hapjen dhe mbylljen e përkohshme të katër grupeve të negociatave. Shqipëria pritet të mbyllë dy grupet e mbetura deri në vitin 2027. Ai gjithashtu foli për arritjet kryesore të reformës, si ndryshimet në 21 artikuj të Kushtetutës, shtimin e 40 dispozitave të reja, miratimin e 7 ligjeve të reja në fushën e drejtësisë dhe ndryshime në rreth 100 akte ligjore, që kontribuan në përmirësimin e sundimit të ligjit, të drejtave të njeriut dhe pavarësisë së sistemit gjyqësor.

Një sesion i dytë leksionesh tematike u mbajtën nga Prof. Dr. Mark Marku, Dekan i Fakultetit të Historiografisë dhe Filologjisë, me temën “Dialog i Strukturuar mbi Lirinë e Mediave në Shqipëri dhe Procesi i Integrimit në BE”. Në këtë ligjëratë, ai trajtoi sfidat aktuale për lirinë e mediave, përfshirë kushte të pasigurta pune për gazetarët, mungesën e pavarësisë editoriale në transmetuesit publikë (p.sh., RTSH), autonominë e kufizuar të organeve rregullatore (p.sh., AMA), mungesën e transparencës në pronësinë e mediave dhe përqendrimin e lartë të pasurive mediatike në duar të një numri të vogël aktorësh. Liria e mediave mbetet një nga kriteret kyçe në procesin e integrimit të Shqipërisë në BE dhe do të jetë një nga temat kryesore në Raportin e Progresit të Komisionit Europian për vitin 2025 (tetor). Për këtë arsye, është krijuar një Grup Pune për Dialog të Strukturuar mbi Lirinë e Mediave, që përbëhet nga profesionistë të medias, përfaqësues të shoqërisë civile dhe ekspertë të politikave të BE-së. Ky grup po përgatit rekomandime konkrete politike dhe legjislative për të mbështetur përputhshmërinë e ligjeve të Shqipërisë me standardet e BE-së dhe për të përshpejtuar përparimin në kapitujt përkatës të negociatave.

Për më shumë mbi aktivitetet e shkollës verore ndiqni postimet e projektit në Facebook 

(https://www.facebook.com/people/Casoeual-Jean-Monnet-Modules-FHF/61552172045506/) 

Në kuadër të modulit Jean Monnet “Challenges of social dimensions of the European Integration Process in Albania” (#CASOEUAL), u organizua një vizitë studimore në Kuvendin e Shqipërisë. Takimi u realizua nga Instituti Parlamentar dhe Sekretariati Teknik i Këshillit Kombëtar të Integrimit Evropian, me synimin për të forcuar njohuritë praktike të studentëve mbi rolin e Kuvendit në procesin e integrimit evropian.

Gjatë vizitës, studentët u njohën me funksionet e Kuvendit në përafrimin e legjislacionit me atë të BE-së, mekanizmat e mbikëqyrjes së reformave, si dhe bashkëpunimin me institucionet homologe të BE-së. Në sesionin e diskutimeve, ata ngritën pyetje mbi sfidat e integrimit, ndikimin e euroskepticizmit dhe mënyrat e përfshirjes së të rinjve në proces.

Transformimi digjital në BE, Deklarata Evropiane për të drejtat digjitale, parimet mbi të cilat mbështetet ky proces, digjitalizimi i shërbimeve publike në Shqipëri dhe rëndësia e zhvillimit të aftësive digjitale për mësuesit e ardhshëm ishin disa nga çështjet e diskutuara me studentët në leksionin e mbajtur, në kuadrin e Jean Monnet Module “Sfidat e dimensioneve sociale të procesit të integrimit Evropian në Shqipëri”.

Më 12 Mars kuadër të Projektit CASOEUAL, patëm kënaqësinë të prisnim Ambasadorin e Republikës Federale të Gjermanisë, Z. Karl Bergner!

Ambasadori Bergner bisedoi me studentë përvojën gjermane në përballjen me të kaluarën naziste pas Luftës së Dytë Botërore dhe rolin e vendit të tij në Bashkimin Europian. Ambasadori diskutoi me studentët rrugëtimin e Shqipërisë në integrimin në Bashkimin Europian,

 duke e konsideruar procesin e e integrimit si një procesit të vazhdueshëm transformimesh dhe konsolidimi të demokracisë dhe shtetit të së drejtës për vendin tonë.

Në kuadrin e Modulit Jean Monnet "Challenges of social dimensions of the European Integration Process in Albania" u zhvillua një vizitë studimore e studentëve në Ministrinë për Evropën dhe Punët e Jashtme për të kuptuar në praktikë funksionimin e procesit të integrimit, strukturën e ministrisë dhe institucionet kryesore të përfshira në proces. Gjatë vizitës studentët u pritën nga Drejtoresha e BE znj. Admira Jorgji dhe Drejtori i Akademisë Diplomatike Z. Florian Nova. Znj. Jorgji mbajti një leksion mbi aspekte praktike të procesit të integrimit të Shqipërisë në Bashkimin Evropian, hapjen e kapitujve dhe ecurinë e mëtejshme të procesit. Rritja e bashkëpunimit mes universitetit dhe administratës publike u theksua si një aspekt shumë i rëndësishëm për të siguruar mbarëvajtjen dhe suksesin e procesit të integrimit dhe të ardhmen e Shqipërisë në BE. 

Më 30 tetor 2024 stafi i projektit CASOEUAL zhvilloi një takim në Tiranë me znj. Olga Martin Gonzales nga zyra qendrore e projekteve evropiane "Jean Monnet", me seli në Bruksel. Takimi kishte në fokus monitorimin, sfidat dhe zhvillimin e mëtejshëm të projektit.  

Gjatë vizitës së saj, znj. Gonzales mori pjesë edhe në një leksion hyrës mbi projektin, tashmë në vitin e tij të dytë, ku u mirëpritën studentë të rinj. Leksioni u shoqërua nga një bashkëbisedim i frytshëm me studentët mbi sfidat dhe perspektivat e procesit të integrimit europian.  

Në kuadrin e modulit Jean Monnet 2023-2026, "Sfidat e dimensioneve sociale të procesit të integrimit Evropian në Shqipëri" u zhvillua leksioni mbi qytetarinë digjitale. Në të u trajtuan aspekte të transformimit digjital në BE, Deklarata Evropiane për të drejtat digjitale, parimet, mbi të cilat mbështetet transformimi digjital dhe masat e marra në Shqipëri në lidhje me digjitalizimin e shërbimeve publike. U trajtua gjithashtu edhe rëndësia e zhvillimit të aftësive dhe kompetencave digjitale tek studentët e programit të mësuesisë si dhe e sensibilizimit për garantimin e mbrojtjes së të drejtave themelore online apo sigurinë e mjedisit digjital.