ZIANOTIPIA TEKNIKAREKIN ESPERIMENTATZEN

2023-24 ikasturteko 3. hiruhilekoan, Etxalarko Landagain eskolako HH 1 gelako ikasleek, tailer berezi bat burutzeko aukera izan dute. Tailer hau zianotipia teknikaren ingurukoa izan da.

Honela, kamararik gabeko argazkigintzari buruzko esperimentu bat burutzeko parada izan dute ikaskide baten gurasoen eskutik. 

Hasiera batean, eguraldia lagun izanik, eskolako parkera atera eta bertan, gustoko dituzten loreak eta hosto desberdinak bildu dituzte. Ondoren psikomotrizitate gelara sartu dira. Bertan bakoitzak, bere egurrezko ohol txikiaren gainean, aurretik produktu kimiko berezi batekin tratatutako kartulina zatitxo bat jarri dut, zeina kolore berdekoa den. Honen gainean bakoitzak nahi duen hosto eta loreekin konposizio bat sortu du eta berehala, metakrilato xafla batekin estali eta pintza batzuekin eutsi dute.

ZENTZUMENEN TAILERRA

Landagain eskolako LH 6 ikasmailako ikasleek prestatu duten “Zentzumenen tailerrean” parte hartzeko aukera izan dute HH-ko ikasle guztiek.

Bikoteka elkartuta, zentzumen bakoitza nola erakutsiko zieten pentsatu eta antolatu zuten. Kontuan hartuta, eskolako gazteenentzat esperientzia esanguratsua eta motibagarria izan behar zuela, beraien adinerako aproposak ziren zaporeak, usainak, abestiak, etab. aukeratu zituzten. Gainera, plastikako saioan, sari gisa domina batzuk prestatu zituzten. 

Jolasak burutu baino 2-3 egun lehenago, ikasleen eskutik, beraiek antolatutako jardueran parte hartzeko gonbitea jaso zuten HH-ko tutoreek eta proposatu zizkieten denbora tarteen artean, egokiena iruditu zitzaiena aukeratu zuten.

Hitzorduaren eguna eta ordua iritsi zenean, LH-ko 6. mailako ikasleak txikienengana hurbildu ziren beraien bidelagun izateko. 

Ondoren, beraiek erabakiak zituzten taldeak kontuan harturik, pixkanaka, bakoitza egokitutako zentzumenaren txokora joan zen. Honela, ikasleak DASTAMENA, IKUSMENA, ENTZUMENA, USAIMENA eta UKIMENAren txokoetara joan ziren. Bertan, eskolako zaharrenek prestatutako jarduerak burutu zituzten. 

                       IKUSMENA                                                            DASTAMENA                                            ENTZUMENA

                UKIMENA                                                                                                           USAIMENA

Jarduerari bukaera emateko gure eskolako txikienek domina bana jaso zuten zaharrenen eskutik.

Erran behar da ikasle guztiek hagitz ongi pasatzen ari zirela trasmititu zutela, alaitasun eta lasaitasun aurpegiak ikusten ziren. Txikiak joan-etorrian lasai eta babestuak sentitu zirela uste dugu eta aldi berean zaharrenak bidelagun eta arduratsu. Bertzelako jardueretan ere prozedura honekin jarraitzea positibotzat ikusi zen.

ESKERRIK ASKO GUZTIEI, BATZUEI ANTOLATU ETA BIDELAGUN IZATEAGATIK ETA BERTZEEI HAIN ONGI PARTEHARTZEAGATIK!!

"ASTEKO PROTAGONISTA" EGITASMOA

Etxalarko Landagain eskola publikoa “Asteko Protagonista” egitasmoan murgilduta dago bururu-belarri. Egitasmoa hau Ikastetxeko Hezkidetza Planean (IHP) txertaturik dago eta landu nahi den helburua 3. ikaskuntza-helburua da: ahalduntzea, aintzindaritza eta erabakiak hartzeko gaitasuna lantzea da eta Skolae programaren barne proposatzen den "Identitatea eta konfidantza" jardueran oinarritzen da.

Argazki honetan, HH 1. mailako familia baten ekarpena biltzen duen irudia ageri da. Bertan aita batek zuzendutako paseotxo bat eman zuten herriko bazterretan barna. Ondoren adinari egokitutako “Altxorraren bila” jolasa burutu zuten. Bukatzeko beraien etxeko lorategian jolas librerako denbora tarte bat izan zuten.

Hau burutzeko prozesuari dagokionez, lehendabizi, ikasgelako ikasturteko bilera orokorrean famili berriei egitasmo honen inguruko azalpenak ematen zaizkie eta gainontzekoei, egitasmo honekin jarraitzeko asmoa adierazten zaie. Gero, familiei parte hartzeko gonbidapena bidaltzen zaie eta beraiek zein garaitan eta nolako ekarpenarekin parte hartu nahiko luketen adierazten digute. Jasotako erantzunen arabera, ikasturtean zehar jarraituko ditugun txandak egiten dira eta familiak informatzen ditugu. Datak hurbildu ahala familia eta tutorearen arteko koordinazioak hasten dira.

Gauza jakina da ikasle bakoitza, bakarra, berezia dela, baina egitasmo honen izenak berak adierazten duen bezala HH 1. mailatik hasi eta LH 6. maila bitarte, astean zehar protagonista bat izaten dugu gelan eta jarduera desberdinak burutzen dira zeinetan protagonista dagokion ikaslea den: izendapena, marrazkiak egin, ipuinez hornitutako motxila etxera eraman,... Honela bada ikasle guztiek izaten dute beraien aste berezia, nahiz eta ikasmailaz goiti joan ahala, jarduera kopurua gutxitzen den.

Jarduera hauez gain, familien bisita ere hor izaten dugu. Borondatezko jarduera izanik ez dira ikasle guztien familiak etortzen eta Haur Hezkuntza familia anitzen bisita izaten dugun bezala, LHko azken ikasmailetan ez dira hainbertze bertaratzen. Kasu hauetan beraien ekarpena etxean prestatzen dute eta ondoren gelakideekin partekatzen dute. Ateratzen ditugun argazkiak familiekin partekatzen ditugu Drive bidez eta bereziki familien bisita egunean taldearen argazkia ateratzen dugu familiarekin burututako jardueraren laburpena biltzen duen dokumentu batean txertatzen dugu.

Ondoren dokumentu guztiak inprimitzen ditugu liburuxka bat osatzeko eta, egitasmoari bukaera emateko, ikasle, familia zein irakasleei galdetegi bat pasatzen zaie eta balorazioa egiten da.

Jarraian txertatuko argazkian, HH 1. mailako ikasle baten familiaren bisita ageri da. Haurren gustokoa suertatu zen ipuina kontatu zigun amak eta ondoren, etxetik ekarritako eta alabari hainbertze gustatzen zaizkion jokuekin jolasteko aukera izan genuen.

Ahal den heinean, berdintasunaren bidean aintzinera jarraitzeko egiten dituzten pausoak dira hauek.

Ekarpen hauek eta bertze batzuei bukaera emateko, familikideekin ateratzen dituzte argazkiak.

Eskertzekoa da familiek agertzen duten prestutasuna, egitasmoa aitzinera ateratzeko ezinbertzekoa da eta.

MARTXOAK 8 EGUNA

Martxoaren 8an, Emakumeen Nazioarteko eguna izan zen. Landagain eskola publikoko ikasleek, egun horrek dakarrena landu zuten.

Astean zehar, gelaka, adinari egokitutako lanketa egin zuten. Egunean bertan, kalera atera eta egunak dakarren erreibindikazio ekitaldia burutu genuen Eskola Komunitatea osatzen dugun ikasle, irakasle eta familiak elkartuta.

Goizeko 10:30ak inguruan denak eskolako atarian elkartu ginen. Kolore moreko arropak, puxikak eta M8 EGUNERO lelopean egindako kartelaren laguntzaz herriari, musikaz alaituriko itzulia eman genion, ikasle zein irakasleek, familiez jarraiturik. Bekolandan eskolako ikasle eta irakasleek prestatutako dantza dantzatu genuen eta kalejirarekin plazaraino joan ginen.

Plazan berriz ere dantza dantzatu genuen, bigarren aldi honetan familiek ere parte hartu zutelarik. Eskola Komunitatea osatzen dugun kideen arteko argazki kolektiboarekin bukatu genuen herriko itzulia eta eskolara bueltatu ginen.

Eskola Komunitatea elkartuz eta hurbiltasuna sendotzeko balio izan zuelarik.

Eta horretaz gain...

BETI GAZTE SOKA-TIRA TALDEAREN BISITA

2. hiruhilabete honetan bisita berezia izan dugu eskolan. Karmele Pikabea Lesakako Beti Gazte taldeko sokatiralaria etorri zaigu Iñigo Altzugarai lagun zuela.

Karmele eskolako bi nesken ama bezala ezagutzen badugu ere, oraingoan indarra eta erresistentzia eskatzen duen kirolari bezala ezagutu dugu. Gainera, ez orokortua dagoen kirol bateko kirolari bezala, baizik eta herri kirolen munduan txertaturik dagoen soka-tiran. Izan ere futbola, pilota,... ohikoagoak izaten dira eta ondorioz, horiek praktikatzeko eta ezagutzeko errazagoak dira. Hau gutxi ez balitz, bere taldearekin batera, aurtengo otsailean munduko txapelketan parte hartu ondoren, txapeldun suertatu dela jakin dugu.

Eskolako ikasleria bi taldetan banatu dugu, batetik HH guzia eta LH 1-2 mailak bertzetik LH 3-4-5 eta 6 mailak. Modu honetara, denok Karmeleren ibilbidea, motibazioak, entrenamendu errutinak,... ezagutzeko aukera izan dugu. Ikasleek arreta jarri dute bere azalpenak aditzean eta galderak eginez, sokatirarekiko interesa agertu dute. Txapelketetan parte hartzen dutenean erabiltzen dituzten kamisetak, oinetakoak esku artean edukitzeko aukera izan dugu. Testura desberdinak, usaia, pisua,... aztertu ditugu eta bertzetik munduko txapelketatik ekarritako sariak, dominak eta txapelak ikusteko aukera izan dugu. Gainera, bertan bizitako esperientzia biltzen duten argazkiak, bideoak gurekin partekatu dituzte. Honela, beraien arteko tiraldiak eta taldeko kideen arteko bizikidetza nolakoa den ikusi ahal izan dugu.

Beraiek erabiltzen duten soka ere bertan zegoenez, pixka bat praktikatzeko modua izan dugu. Egunari bukaera emateko, eskolako belardian ikasle zein irakasleak nahastuz, tiraldi batzuk egin ditugu eguraldi ona aprobetxatuz.

Egitasmo hagitz polita izan da, ESKERRIK ASKO KARMELE ETA IÑIGORI SOKATIRAREN MUNDURA ETA BERAIEN ESPERIENTZIETARA HURBILTZEAGATIK!!

ETXALARKO ESKOLA KOMUNITATEA ZUHAITZAK LANDATZEN

Martxoak 7a ortzegunean, Landagain eskolako eskola komunitate guztiak “Axeri Lepo”inguruan zuhaitzak landatu genituen. Ohiturari jarraituz, Eskola Komunitatea osatzen dugun kideek; ikasleek, irakasleek eta familiek, udalaren laguntzaz, “ zuhaitzaren eguna “ ospatzeko aukera izan genuen.

Goizeko 9:00etan eman genion hasiera egunari. Lehen Hezkuntzako ikasle eta irakasleak, kirol pistan elkartu eta poliki poliki Axeri Leporantz abiatu ginen. Bidean, Meakako iturriaren magalean hamaiketakoa egiteko geldialditxo bat egin genuen eta bertan dagoen iturrian ura bete ondoren azken txanparantz abiatu ginen.

Bitartean, HHko ikasleak eskolan egon ziren eta LHko ikasleak hamaiketakoa egiten ari ziren bitartean, familien laguntzaz kotxeetan Axeri Lepora igotzen hasi ziren. HH-koek egunaz gozatu ahal izateko, familien laguntza ezin bertzekoa dugu; beraiek baitira ikasleak garraitzen arduradunak.

11:30ak inguruan, LH-ko ikasleak iritsi, motxilak kendu eta ur pixka bat edan ondoren, udal langilearengana gerturatu ginen. Eskolako ikasle eta irakasle guztiak lurrean eserita genundela eta familiak gure inguruan zeudela, udal langileak Landaketaren inguruko xehetasunak eman zizkigun eta 50 pago zuhaitz inguru landatuko genituela adierazi zigun.

Adierazpenak entzun ondoren, ikasleak eta irakasleak 9 taldeetan banatu ginen: HH-ko 3 talde eta LH-ko 6 talde sortuz. Talde guztietan adin ezberdinetako ikasleak nahasita zeudelarik. Talde bakoitzak, landatzen zituen zuhaitzetan jartzeko adierazgarriak zituen. Era horretara, norberak landatutako zuhaitzak zeintzuk direneta zer nolako bilakaera izanen duten jakiteko. Familiak taldeetan txertatu ziren eta landatzen lagundu gintuzten.

13:00etan landatzez bukatu eta bazkaltzera joan ginen. Axeri Lepoko magalean denak elkartuta edo taldeetan, bazkaldu genuen. Jolasteko denbora izan genuen baita bertako parajeaz gozatzeko aukera ere, eguraldi ederra izan bait genuen.

14:15etan itzultzeko ordua iritsi zen. HH-ko ikasleak etorritako kotxeetan sartu eta eskolarantz itzuli ziren. LH-koak berriz, etorritako bidetik eskolara bueltatu ziren.

Egun zoragarria izan zen. Horrelako ekintzak egiten jarraitu behar dugu, honek, eskola komunitatearen harremana indartzeko balio baitu eta.

ARTROPODOAK LH3 eta 4ko GELAN!

Lehen Hezkuntzako 3. eta 4.mailako ikasleak artropodoen inguruan lanean aritu gara. Ikasitakoarekin dokumental bat sortu dugu, argazki, musika eta bideoak sortuz. 

Espero dugu gustatzea eta asko ikastea!

LH3-4ko ikasleak.

LIBURUTEGI BERRIA DUGU!

Landagain eskolako 6. mailako ikasleok liburutegi bat egin dugu. 

Txoko hau guztiok gozatzeko helburuarekin sortu dugu. Banaka, taldetxoetan edo gela osoa elkarrekin joan zaitezkete.

Dakizuen bezala, irakurketaren bidez, gauzak ikasi eta mundu berriak ezagutzen ditugu. Bide berri horiek ireki ahal izateko, ezinbestekoa izango da irudimena martxan jartzea, ezarritako arauak puskatzea, denak berdinak garela ikustea, akatsak onartzea eta noski, gozatzea eta ongi pasatzea.

Eskolako txoko berri honetaz gozatzea espero dugu!

Azaroak 13 astelehenean, Landagain eskolako ikasle eta irakasleek, Usategietara txangoa egin genuen.

Jakin dakigun bezala, Etxalar herriak ospea baldin badu, bere Usategiengatik da. Udazken garaia iristen denean, Euskal herriko txoko askotan ehiza postuak ikusten dira. Etxalarren ehiza postuak ikusteaz gain, usoak ehizatzeko sareak ikusten dira.

Sare hauei esker, Etxalarko usazaleek iparraldetik hegoaldera joaten diren usoak “korneta, txatarra eta palak” tresnak erabiliz, ehizatzen dituzte.