History

Ti panunot ti maysa nga ubing ket mamuli babaen ti panagserrek na iti pagadalan isu nga ti pagadalan wenno pageskwelaan ket kasapulan unay tapno maisuro kadagiti ubbing ti nasayaat nga adal, umno nga wagas ti panagbasa, panagsurat ken panagkwenta nga isu ti kalasagda nga mangitunda ti narang-ay nga masakbayan.

Idi un-unana nga panawen ti pagadalan ditoy nga barangay ket masarakan diay Liwek. Naaramid daytoy iti galva ken table ti agsit na. Grado I agingga iti grado IV laeng idi ti adda ditoy. Idi tawen 1980’s napasamak ti gulo gapu ti New Peoples Army (NPA). Nagbakwit amin nga tattao ditoy Ganzano ket napan da nagnaed iti kabangibang nga barangay kas iti Dummun, Sta Maria, ken Nassiping.

Idi nalpasen ti gulo, nagsusubli dagiti tattao ditoy barangay. Nagpatakder da iti temporary nga pageskwelaan nga galva ken bulo ditoy nagtetengngaan ti barangay . Naglukat ngarud ti grado I ken II ket ni Maam Maribeth Dela Cruz ti maestra.

Ti panaglabas ti tawen, immadu ti populasyon daytoy nga barangay. Naipatakder ti baro ken congreto nga pageskwelaan idi tawen 1996. Ni Maam Merlyn B. Martin ti immuna nga nagisuro ditoy a kas multigrade teacher idi tawen 1997. Sumaruno nga tawen, nanayunan ti maestra isu ni Maam Remedios Dele Cruz .Isunan ti nangisuro ti Grado I ken II. Idi naidistino nga supervisor ni Maam Salvacion Catral ditoy Laud nga Distrito ti Gattaran ket nanayunan manen iti Grado V ken VI ket ni Maam Lerma B. Martinez ti immune nga nangisuro kadagitoy nga grado. Nagbalin ngarud nga Elementarya daytoy nga pagadalan ket in-inut nga immadu ti populasyon ken pasdek na.

Idi tawen 2008 naikkan daytoy ti Juan Ponce Enrile ( JPE ) nga pasdek nga addaan ti tallo nga kuarto babaen ti panangsubaybay ni Maam Eleanor A. Ursua nga isu ti agdama idi nga Teacher In- Charge ditoy a pagadalan.

Naipatakderan met ti RCN nga pasdek babaen ti panangted ni Mayor Mathew Nolasco, anak ni dati nga Mayor Ramon C. Nolasco ngem itan ket agdama nga Conressman iti umuna nga distrito ti probinsya ti Cagayan. Naaramid daytoy babaen met ti panangsubaybay ni Maam Merlyn M. Basilio nga isu ti agdama id inga school head iti daytoy nga pagadalan.

Idi tawen 2018 naikkan manen ti pasdek nga addaan ti dua nga kuarto. Daytoy nga pasdek ket naggapo ti DPWH. Ti agdama nga principal ket ni Maam Jemazel S. Ignacio.

Itan ket kumpleton ti pasdek nga usaren dagiti agad-adal ken mangisursuro ditoy pagadalan ti barangay Ganzano.