History

Ti Pakasaritaan ti Dibalio Elementary School

Dagiti nagkauna a panglakayen iti daytoy a lugar ket mamatida la unay ti pagsasao nga “ Ti edukasion isu ti tulbek ti kinatalged ken panagrang-ay ti maysa a kumunidad.

Tapno masigurado nga maaddaan kinatalged ken kinaprogreso iti daytoy a barangay dagiti panglakayen ket nangaramidda ti pamuspusan tapno mapaada ti maysa a pasdek a mabalin nga usaren dagiti ubbing a pagbasaan.

Idi taoen 1941 isu ti umuna a panaglukat ti Dibalio Community School. Daytoy a pagadalan ket maysa a balay nga naikkan partision tapno agbalin nga dua a kuarto. Ti umuna a kuarto ket para kadagiti ubbing iti umuna a tukad ket ti maikaddua a kuarto ket para kadagiti ubbing iti maikaddua a tukad. Daytoy a pagadalan ket indaoluan ti nagagaet ken naanus a manursuro nga ni Miss Casil a taga Sanchez Mira, Cagayan.

Babaen ti pinagkikinnammayet dagiti bumarangay, nagprogeso daytoy a pagadalan. Daydi nanumo a balay a naaramat a pagsakduan ti adal ket nagbalin a maysa a natibker a pasdek . Bayat ti pinagtulid ti panawen nanayunan pay daytoy ti sumagmamano a pasdek.

Gapu ti pinagdakkel ti populasion ti barangay , nagbalin a Dibalio Primary School daytoy a pagadalan idi 1962. Nanayunan ti dua a grado, Nagbalin nga uppat a grado nga addaan dua a manursuro.

Dagiti bumarangay ken dagiti manursuro ket intultuloyda a pinarang-ay daytoy nga pagadalan ket idi taoen 1991 nagbalin daytoy a Dibalio Elementary School. Ni Mrs Filomena Gameng ti nagbalin nga Teacher In-Charge. Immadu ti bilang ti manursuro, bilang ubbing, kasta met ti bilang ti grado. Ni Mrs Agnes Libunao ti nagbalin a maestra iti umuna a tukad. Ti maikaddua a tukad ket ni Mrs. Benedicta Baris, iti maikatlo ken maikapat a tukad ket ni Mrs Filomena Gameng. Ti maikalima a tukad ket ni Mr. Florencio Arizabal ket ti maikanem a tukad ket ni Mrs. Phoebe Gameng.

Nagtultuloy ti kinarang-ay daytoy a pagadalan aginga nga nagbalin a solido amin a grado.