Ngayong pandemya, sinamantala ng mga kaguruan ng Linao Elementary School ang maluwag-luwag na panahon at oras sa pamamagitan ng pagsulong ng paghahalamang-gulay upang matulungan ang sariling bulsa at maging ang mga ibang pamilya sa lugar.

Sa pamumuno ni G. Rowel T. Ronquillo, unti-unting naisakatuparan ang hangaring makapagtanim at makapag-ani ng gulay, hindi lamang sa loob ng paaralan kundi mismo pa sa mga mumunting simbahan ng Linao Proper at ng Sitio Cacaluan.

Sikreto ng punong-guro ang maayos na pakikipagkapwa sa mga magulang at mga opisyal ng barangay. Aniya, malaki ang nagagawa kung tayo’y mamuhay na parang magkakapitbahay. Nagtutulungan sa mga simpleng gawain gaya ng paglilinis sa ating harapan na hindi na dapat inaatupag pa ng konseho ng barangay.

Sa unang anim na buwan ng punong-guro sa paaralan ay nakapag-develop siya ng mga halamanan sa mga sulok ng paaralan. Una, ang Silangang bahagi na pinag-anihan ng okra, patola at sitao. Sadyang sinubok nga lang ng panahon sapagkat binaha ito sa kasagsagan ng pamumunga ng mga tanim. Pangalawa, sa kanlurang bahagi na tinirikan ng mga katuray sa likurang ng Grade 3 at 4. Sa likuran ng grade 5 naman ay ginawang bed para iwas-baha ang itinanim na pechay. At sa likuran ng grade 6 ay inayos ang mga nakalaang mga lumang gulong, dinagdagan ng matabang lupa nang matamnan ng patola, cowpea at okra. At, pangatlo, ang bahaging timog ng paaralan na pawang mga pechay ang pinaglaanan.

Samantala, habang hinihintay ang pag-mature ng mga unang itinanim ay nag-extend pa sa labas ang proyektong paghahalaman ng paaralan sa buwang kasalukuyan. Sa pakikiisa ni G. Ronquillo sa mga kabataan, nakapagtanim din sila ng patola, amplaya at okra sa mismong paikot ng Linao Catholic Chapel. At ngayong nakaraang linggo lamang, ay nakapag-develop din ng munting gulayan ang Sitio Cacaluan sa pakikiisa ni G. Ronquillo sa mga kabataan , mga magulang at mga kapanampalataya niya sa lugar.