An Parasurat Bikolnon na bisto man sa apod na PB Writers sarong kasararoan  nin mga parasurat na nagtutulod kan tataramon asin panurat Bikolnon. Minukna ini kan Abril 17, 2010 ninda Buboy Aguay, Issa Redburn, Irvin Sto. Tomas, Jerome Hipolito, Jusan Misolas, saka Jan Kevin De  Quiroz.

An mga katuyuhan kan PB iyo an maitulod an pagpangataman asin pagpatalubo kan manlainlain  na tataramon na Bikolnon sa paagi nin mga pag-adal, publikasyon, akademya, asin tri-media sagkod elektronikong mga paagi; magin lindong nin mga organisasyon kan mga indibidwal na parasurat asin kasararoan  nin mga parasurat bilang sarong dalan para sa mga pangangaipo kan mga ini sa pagpaurog kan mga panurat panliteratura, pangmatalingkas na pagpahayag, pampag-adal asin pan-relihiyon sa manlainlain na tataramon na Bikol; makahaman nin mga programa asin mga gibo-gibo para sa mga prasurat na Bikolnon na matiripon-tipon para sa pagpaurog kan saindang mga kabatiran sagkod kan manlain-lain na tataramon na Bikolnon; saka maipadagos an danay na relasyon sa ibang lokal asin pangkinaban na mga kasararoan nin mga parasurat.

Nabisto an Parasurat Bikolnon sa tulong bagay: (1) Saringsing National Writers Workshop, (2) Patiribayan sa Pagsurat Rawitdawit, saka (3) Publikasyon.

1. Saringsing National Writers Workshop- An Saringsing National Writers Workshop o bisto sa apod na Saringsing iyo an pinakahaloy na writers workshop na ginigibo sa Kabikolan kun sain tinatabangan an mga nagpupuruon na parasurat na mapamarhay an saindang panurat katuwang an iba ibang sektor kan kumunidad. Pinunan an Saringsing kan 2011 sa CBD Resto Bar sa Naga City. Piggibo an ikaduwa kan 2012 sa Palestina Pili, Camarines Sur, an ikatulo kan 2013 sa Blue Room kan Naga City Hall, an ikaapat kan 2014 sa CBSUA-Pili, an ikalima kan 2015 sa  Palestina Pili, Camarines Sur, an ikaanom kan 2016 sa Roco Public Library, Naga City, an ikapito kan 2017 sa Pasacao, Camarines Sur, an ikawalo kan 2018, sa Buhi, Camarines Sur, an ikasyam kan 2019 sa Virac, Catanduanes, an ikasampulo kan 2021 ginibong online, asin an ika-onse kan 2023 Disyembre 20-22, 2023 sa La Caseria, Canaman, Camarines Sur. 

2.  Patiribayan sa Pagsurat kada Bulan-An Patiribayan sa Pagsurat kada Bulan ginigibo online kun sain pigtatawan onra an pinakamahusay na rawitdawit kan bulan.

3. Mga Publikasyon-Pinunan kan PB an Saringsing : Pangkasararoan na Palagdaan nin mga Panurat kan Parasurat Bikolnon o bisto sa Saringsing na saro sarong publikasyon kan mga rawitdawit kan mga miyembro kan PB na pinunan kan Abril 17, 2010, aldaw man kan pagkamukna kan organisasyon. Sinundan ini kan Hunyo, Hulyo. Septeymbre, Oktobre 2013 asin Enero 2017. Ipinagpublikar man an Mga Labod sa Daghan kan Bulod (2011) ninda Marissa Redburn asin Jocelyn Bisuña asin TULA.K.ARATULA (2011) ni Bernardo Miguel Aguay, Jr., an ikatulong isyu kan An Tambobong nin Literaturang Bikolnon folio Desyembre kan 2011, Posporo, Kan Mag-ati an Tubig sa Dagat, For-Guy, asin Pulitika ng Paghuhubad ni Aguay. Siring man nahaman kan organisasyon an Antabay sa Ortograpiya nin Bikol Sentral kan Abril 25, 2012 sa panginginot ni Irvin Sto. Tomas. Kan 2016 asin 2017, nagpublikar nin manlainlain na mga chapbook sa Better Living Through Xeroxography Naga (BLTX Naga) an mga myembro kan organisasyon.  Durungan na ibinungsod ni Anthony Diaz an Pataratarapadi (mga rikas-usipon), Kitil (mga tula) asin Kuyan (mga rawitdawit) sagkod Dai taka na padangat taka pa (mga rawitdawit). Siring man an koleksyon nin mga rawitdawit na Padangat ni Jerome Hipolito, Gapo ni Elbert Baeta,Taragoan Bingkay ni Aguay, Makot nin mga Rawitdawit ni Julius Bulahan, KAAYUPAN ni Ryan Cuatrona, #lapigotpa asin Bungkaras, ika na man ni Sto. Tomas, Ginisang Poesia asin Ginisang Poesia 2: mga pinirilian na rawitdawit) ni Sto. Tomas, Diaz asin Ian Kenneth Orasa, asin iba pang mga publikasyon. 

Kan 2020, Panahon kan Pandemya pigbunsod kan Parasurat Bikolnon an PB Writers Series. Sa series na ini may anum na chapbook na nakasurat sa Bikol-Sentral sagkod Bikol-Rinconada. Sa Padangat ni Jerome M. Hipolito takad alagad nagsusup’ay an manlain-lain na porma nin pagpadangat. Saro sana an titulo kan saiyang mga rawitdawit. Sarong pagpadangat, manlain-lain na porma. Sa inot na chapbook ni Eilyn L. Nidea na Pangaturogan garung mga butnol nin pisi an saiyang mga rawit mantang naglilipot ini mas nagpupusog. Pinapapiyong kita ni Eilyn sa pagsusuog sa mga ruta kan pagkamoot. Midbid nya an mga dalan na ini. Sa Dai Ko Pa Midbid An Sadiring Hawak tinatawanan kita ni Edwin S. Breva nin panduwang mata nganing hilingon an mga ordinaryong bagay sa bagong lente. Yaon sa kinaban kan mga simpleng bagay an kusog kan mga rawit na ini. Namimidbidan ta an sadiring hawak sa pagsansan sa mga saradit na parte kaini.  Nagsasaralakan an tataramon sa mga rawit ni Froy P. Beraña sa Inulog-ulog na Puso. Maisog an saiyang Rinconada alagad may ranga an saiyang Bikol-Sentral. Garung nag-iimuso si Froy sa mga rawit nya makulog alagad may paglaom. Sa Ika-duwang chapbook ni Elbert O. Baeta nagbabalik sya sa saiyang tataramon na Rinconada. Matarom alagad may pagmangno an saiyang mga rawit. Pagkarampag an saiyang mga rawit huli ta labi na kita kananok sa panahon na ini ni karibarawan.Sa ika-anom na chapbook na mabilog sa series na ini pinaparumdom kita ni Irvin Sto. Tomas na dai mo pagtulaan an gabos.  Sarong eksplorasyon an mga rawit ni Irvin sa minsan mamundo alagad  makangangalas na buhay kan sarong parasurat sagkod an saiyang maulyas na musa. Makalwag an mga rawit sa katipunan na ini alagad turuhok na paghiling ini. Pinublikar man an Himolaon, sarong online na publikasyon kan PB na piggibo kan 2011 hasta 2012.

Notes:

Parasurat Bikolnon. (2023, June 8). In Wikipedia. https://bcl.wikipedia.org/wiki/Parasurat_Bikolnon 

Parasurat Bikolnon. (2023). In Webs.

https://parasuratbikolnon.webs.com/uusipon

Parasurat Bikolnon. (2023). In Webs. 

https://parasuratbikolnon.webs.com/saringsing-online

Saringsing National Writers Workshop. (2022, October 26). In Wikipedia. https://bcl.wikipedia.org/wiki/Saringsing_National_Writers_Workshop