Matua Dion's Website

Ka tū atu nei ki runga i te tihi o Ruapekapeka te pā tūwatawata o ngā tūpuna.

Ruapekapeka titiro ki Mōtatau tū te ao tū te pō

Mōtatau titiro ki Hikurangi ngā kiekie whāwhā nunui o Uenuku.

Hikurangi titiro ki Pouerua ki te tīmatanga o Ngāpuhi i a Tāhūhū nui o Rangi

Pouerua titiro ki Tokerau Matakā e matakā i te ao, e māpurapura i te pō

Matakā titiro ki Maiki te poronga o te pouhaki kia tū tonu te mana motuhake o Ngāpuhi

Maiki titiro ki Rākaumangamanga e tū mai rā i te marangai

Rākaumangamanga titiro ki Kapowai homai he kaponga wai ki a au hei inu.

Kapowai titiro ki Puketohunoa ki te pā tatari i tau ai te rongomau.

Puketohunoa titiro ki Pakaru ki te Rangi te puiatanga mai o Pouerua i nehe.

Pakaru ki te Rangi titiro ki Puketūtū ki te pūmanawa o Ngāti Hine.

Puketūtū titiro ki Ruapekapeka

Ehara aku maunga i te maunga nekeneke he maunga tū tonu 

Koia tēnei ko te rohe o Te Pei o te Whairangi

Ko tātou ngā uri whakaheke o aua maunga

Tihewa Mauriora