臺中市111學年度本土語言文學創作徵文比賽得獎名單
一、閩南語組
(一)小說
1.教師組（合併社會組）
黃瑞嬌 回甘 第二名
(二)散文
1.教師組（合併社會組）
黃瑞嬌 驚貓 佳作
3.國小高年級組
楊芷怡(六年四班) 愛著騎鐵馬 第一名 (黃瑞嬌老師指導)
林俐妡(六年一班) 失志的一工 第二名 (黃瑞嬌老師指導)
林亮彤(五年二班) 我的狗仔朋友 佳作 (黃瑞嬌老師指導)
(三)詩
1.教師組（合併社會組）
魏燕河 臺中好所在真美麗 佳作
臺中市 111 學年度本土文學創作徵文比賽
閩南語小說 教師(社會)組第二名---黃瑞嬌老師
回甘(節錄)
透早四點外，外口猶暗漠漠，嘛有淡薄仔冷，石磯仔「啾-伊、啾-伊」飛來飛去叫袂停。路燈微微的光線照出露水溡溡的雺霧，猶遮爾早，信子翁仔某就出門欲去園裡挖蘆筍矣。
翁婿阿聰跤骨無方便，信子共伊偝起去鐵馬，予伊扞椅苴仔，坐佇鐵馬後座，閣共一寡作穡的家私，囥入去加薦仔，鋤頭坦橫捆縛佇鐵馬，物件攏款好勢矣，信子共笠仔戴好，包袱巾仔崁頂懸，佇下頦拍結拍好，才牽鐵馬沓沓仔向園裡行去。
好佳哉阿聰瘦閣薄板，信子自細漢粗重工課做慣勢矣，手骨不止仔有力，毋過，這个畫面總是予人看著真毋甘。
採收白蘆筍就是愛早，趁蘆筍猶有露水的濕氣來割，日頭出來，蘆筍出青，就賣無好價數。
這坵干焦九厘爾爾的田園是信子唯一的希望，種蘆筍三冬矣，舊年收成欲五百公斤，信子感覺今年收六百應該無問題。蘆筍真𠢕大，一工就有通大較長一指，所以毋管透風落雨，逐工都愛來採收。
信子跪佇田溝，攑黜仔對蘆筍小可仔吐頭的所在挖落去，白閣直的蘆筍就親像少女的跤腿，一枝一枝看現現，一欉總是有通挖著四五枝。......
閩南語散文 教師(社會)組佳作---黃瑞嬌老師
驚貓(節錄)
這馬是動物真予人疼痛的時代，啥物怪奇的動物都有人咧飼，「毛小孩」毋但坐佇奶母車予主人捒來捒去咧散步，閣定期送去寵物美容店洗身軀，修剪身軀的毛，妝娗甲媠噹噹，主人若出國無人通顧，嘛會使開錢送去寵物旅館，真正比人較好命。
毋過古錐的寵物有人愛，嘛有人袂佮意，甚至是驚惶。
若講著會予人驚惶，逐个人攏有伊無想欲拄著、看著、想著抑是聽著的動物。
我捌聽講有漢草真好的查埔人，看著虼蚻驚甲哀哀叫，走甲遠遠遠，就愛 某來拍虼蚻，嘛捌佇電視頂看著細粒子閣幼秀的查某囡仔，肩胛頭揹一隻比手骨較粗的蟒蛇，看起來閣涼勢仔涼勢，予人看甲喙開開，規身軀起雞母皮，替伊真緊張，所以啥物人驚啥物動物，實在是無啥物道理的。......
閩南語詩 教師(社會)組佳作---魏燕河老師
臺中好所在真美麗 (節錄)
你若準有時間 一定愛來臺中行行踅踅
遊覽觀光 好𨑨迌的景點是真正濟
逢甲鬧熱的夜市仔 大路小巷攏是遊客
你擠我𤲍 一路上食袂停那行那坐
新社花毯節 真濟花草美景目睭看甲花花花
想欲食果子 東勢的水梨仔佮甜柿是甜閣脆
合歡山景緻媠 寒流來的時 好運會當看著落雪
高美的湳仔地 花鮡佮砂馬仔 一直佮你覕相揣
海邊的水鳥 規陣佇天頂四界颺颺飛
.......
臺中市第八屆本土語言文學創作徵文比賽
閩南語散文教師組第一名---黃瑞嬌老師
看戲(節錄)
聽講這馬上時行相借問的話是 「你今天追劇了沒 」 。
因為網路的發達佮普遍， 真濟人愛看外國的戲齣。毋但因為電腦、平板、手機仔遮的家私真利便，嘛因為對外國文化的新鮮感佮好玄 。
有人愛看文藝愛情劇，看緣投閣媠的男女主角談情說愛，看悲苦的戀情是毋是會當行透尾，看複雜的三角戀情欲按怎收煞，順紲學習人的妝娗佮穿插；若是生理場的戲齣，有的是頂司凌治下跤手人，抑是相爭職位共人創空的劇情，看這會當學一寡仔做生理的手段佮和人盤撋的鋩角；若是看愛激頭腦的推理劇，一面看一面臆，心情綴劇情的變化起起落落，敢若咧擘洋蔥仝款，最後的結局有時會予人料想袂到；閣有真濟人愛看服裝佮建築攏真奢颺的宮廷劇，看皇宮內查埔人奪權鬼扛鬼，查某人相爭皇帝的寵倖鬥心機，了解皇宮的生活食食佮朝代的替換......。
閩南語小說教師、社會組第一名---黃瑞嬌老師
冬節大代誌(節錄)
「這个風風雨雨的社會，欲怎樣開花，少年家怎樣落地，咱攏是為著愛情來浪流連 。 我已經決定，欲做一个善良的歹囝，薰莫閣食，酒袂閣焦。想你的彼暗，佇恁兜的亭仔跤，想你的彼暗，佇恁兜的窗仔外， 想你的彼暗，佇恁兜的亭仔跤，想你的彼暗，佇恁兜的窗仔外，其實我生活甲無好，我家己攏知影，恁攏了解我會掩崁我的軟汫，平凡的、歹命的，咱拚死做，當做講笑詼，攏是白賊話……。」
工場內當咧放送茄仔卵樂團的歌聲，銘仔一面無閒手裡的工課，一面綴咧唱 。
9月母語日活動-教師節-寫予老師的詩