Ikastetxea

Koldo Mitxelenan ikasten den lehen gauza da euskara Euskal Herriko ezaugarririk behinena dela. Horregatik, mundu zabalean hainbat kultura galtzeko arriskuan dauden garaiotan buru-belarri jarduten gara gure hizkuntza berreskuratzeko asmoz. Euskaltasunetik begiratzen diogu munduari.

Izan ere, adi egoten begira gara, ez baitugu nahi bakarturik egon ikasgela bateko pareten artean. Hortaz, sarritan mundua bera ekartzen dugu ikastetxera haren bazterretako berri jakiteko, gatazkak eta katramilak aztertu begi zorrotzez, eta lezio garrantzizko bat ikastearren, hau da, Herri eta gizaki guztiak berdinak direla duintasunaren aldetik. Atera ere ateratzen gara institututik, sinesten baitugu irteerak eta txangoak aberasgarriak direla oso gure ikasleen heziketarako.

Neska-mutil arduratsuak nahi ditugunez erantzukizuna euren gain hartzeko moduan tratatzen ditugu. Nagusikeriarik gabeko harreman gertuko eta bizi-biziak nahi genituzke ikasle-irakasleen artean. Elkarbizitzan gertatzen diren arazoak, berriz, hezitzeko aukera ezinhobeak bihurtzen zaizkigu geure hezitzaile ikuspegitik. Berehalaxe ohartzen dira ikasleak gure ikastetxean badutela zer esanik, aintzakotzat hartzen ditugula eta ikasketetan eurak direla protagonistak.

Askotarikoak dira gure ikasleak, izaeraz bezala pentsakeraz, eta dituzten gaitasunei dagokienez ere bai. Beraz, gure hezitzaile lana beraiek behar dutenetik abiatzen dugu eta ikasketa prozesua pertsonalizatzen saiatzen gara gure esku dauden baliabide pedagogiko berritzaileak erabiliz.