01 - Hyrje

Objektivat

Seminari ka për qëllim vlerësimin e njohurive të marra mbi evoluimin e gjuhëve të programimit, gjuhës C, si dhe integrimin e një metodologjie të re programimi të njohur si programim i strukturar.

Gjithashtu, studenti prezantohet me procesin e plotë të ndërtimit të zgjidhjes së një problemi në C përmes ushtrimeve të zgjidhura, duke njohur në këtë mënyrë bazat e një mjedisi tipik në gjuhën C.     

Lista e objektivave

• • Programimi i Strukturar,

  • Bazat e një mjedisi tipik C.

Hyrje

Programimi në kompjuter ka ecur në faza të ndryshme në varësi të përparimeve teknologjike në fushën e kompjuterit. Edhe sot përdoren këto mënyra të programimit: Gjuhët e brendshme e makinës, Gjuhët asembler, Gjuhët e nivelit të lartë.

Referencë Leksion 1.

Pyetje

1. Çfarë është një gjuhë programimi?

Përgjigje

Gjuhë programimi quhet një gjuhë artificiale e cila është e dizenjuar për të komunikuar me makinën(kompjuterin) përmes instruksioneve. 

2. Përse lindi nevoja e përdorimit të një metode të re pune të njohur si programim i strukturuar?

Përgjigje

Rreth viteve 1960 lindi nevoja për të patur një programim të strukturar që do të thoshte:

   1. Lehtesi në kuptimin e kodit 

   2. Lehtësi në kapjen dhe korrigjimin e gabimeve.

Rezutatet e para të kësaj metodologjie nisën me krijimin e gjuhës Pascal dhe më tej me gjuhën C që plotësonte shumë mungesa që kishte Pascal.

3. Listoni të paktë 3 gjuhë programimi që bazohen në metodën e prgramimit të strukturuar.

Përgjigje

Gjuhe të cilat bazohen në metodën e programimit të strukturuar janë si, Pascal, C, C++, Java, etj.

Ushtrim 1

Ndërtoni një program në gjuhën C, i cili afishon në ekran mesazhin Miresevini ne gjuhen C!.

Zgjidhje

Sqarime

Procesi i ndërtimit të një programi në gjuhën C, kërkon përgatitjen e dy komponenteve të rëndësishme që janë: 

 a.  Mjedisi i punës,

 b. Konceptimi i zgjidhjes së problemit.

 A. Mjedisi i punës në gjuhën C, i referohet përdorimit të një editori teksti, ku do të shkruhet kodi(programi) dhe ruhet më tej në disk. 

    Shënim Në ushtrimet ilustruese në seminaret e këtij kursi do të përdorim editorin DevCpp.

    Editori i instaluar në kompjuter, gjatë zgjidhjes së ushtrimit do të shërbejë për 1) Shkrimin dhe ruajtjen e zgjidhjes, 2) Preproçesimin dhe kompilimin e kodit, 3) Ekzekutimin dhe marrjen e rezultatit.

 B. Konceptimi i zgjidhjes së problemit, nënkupton: 1) Përcaktimin e problemit, 2) Përcaktimin e rezultateve, 3) Copëzimin e programit në hapa logjike( përcaktimi i të dhënave hyrëse nëse ka) 4) Ndërtimin e algoritmit 5) Kontrollin e rezultatit(A i jep zgjidhje algoritmi i ndërtuar problemit të dhëne?).  

Kodi

/*ushtrimi im i pare ne C*/

#include <conio.h>

#include <stdio.h>

int main(){

printf("Miresevini ne gjuhen C!");

getch();

return 0;

}

Interpretimi i kodit

1. /* ushtrimi im i pare ne C*/ - koment në gjuhën C.

2. #include <conio.h>, #include<stdio.h> - Direktiva preporcesimi që kujdesen për ngarkimin e librarive përkatese të funksioneve që perdorim në program.

3. int main() - Fjala kyçe main e ndjekur nga () është funksion. Main është funksioni kryesor që duhet të përmbahet në çdo program në C.

4. { , } - Kllapat gjarpërueshe {,} tregojnë fillimin dhe fundin e bllokut që përmban kodin burim.

5. printf("Miresevini ne gjuhen C"); - Funksioni printf afishon në ekran mesazhin e vendosur brenda thonjëzave dyshe.

6. getch() - Funksioni getch() përdoret për të mbajtur në ekran rezultatin deri në momentin që përdoruesi shtyp një vlerë nga tastjera.

7. return 0 - Funksioni main kthen një vlerë numerike(fjala kyçe int), return kthen vlerën 0 për main.

8. ; - Tregon fundin e një instruksioni(veprimi).

Skedarët në gjuhën C ruhen me prapashtesën .c