活動規劃及情境營造

低年級童話故事改編

今仔日多謝譜生老師佇五十二甲ê生態導覽

𤆬逐家那行那介紹真濟野鳥

有海徛仔[hái-khiā-á]、金翼仔[kim-si̍t-á]、芒噹丟仔[bâng-tang-tiuh/tiú-á]、尖喙仔[tsiam-tshuì-á]

尾仔運氣真好閣看著魚鷹[hî-ing]

嘛多謝逐家做伙來參加活動

感謝！

來講台語ê故事

春季走讀 04/09/2022 - 蘇澳大坑罟

早起天公伯仔就真捀場，鬥相共來共日頭叫出門。

今仔日有影是一个郊外行踏ê好日子。

才拄到位爾，主講黃逸樹老師就已經佇咧紹介大坑罟ê環境、以及玄天上帝ê信仰文化。

聽候逐家集合ê時，老師閣講著遮ê先民渡海來台了後，佇宜蘭定居。傳說中分做兩路，拄好一南一北，北爿是宜蘭頭城ê大坑罟，南爿就是蘇澳這个大坑罟，兩位攏號仝名。

今仔日嘛有提起著頂擺佇武荖坑普生老師介紹ê地方俗語

『武荖坑大石鼓、阿兼城水查某、大坑罟臭魚脯』。

然後老師介紹伊當初社區營造，投入袂少心血才完成做ê地景。邊仔ê詩句就是咧講大坑罟ê歷史佮在地文化。頂頭ê「大坑罟」三个大字，是彼陣社區內百捅歲ê阿婆親手剪ê字。

阮閣去大玄廟後看人咧做船仔，聽講干焦是附近ê岳明國小（無確定...）。老師介紹著內底掛咧壁邊ê七十二角風吹，講著「九月九，風吹滿天吼。」這句節氣ê俗語。原來較早做ê風吹，放去天頂是真正會吼--ê！

煞落來是這擺囡仔上佮意ê手工。

嘛是當地大漢ê另外兩位老師𤆬[tshuā]逐家用林投葉做鼓吹，號做「林投鼓吹」。

主要是揀適合ê林投幼葉做鼓吹舌仔，較硬ê老葉來編做鼓吹身佮固定ê圈仔。逐家作甲真趣味，閣攏誠𠢕[gâu]歕[pûn]、歕了盡大聲！

後面一路就不時會聽著有人咧歕鼓吹～

逐家做鼓吹做甲毋知時間，好佳哉老師提醒才請逐家繼續後頭ê導覽。伊𤆬[tshuā]阮行對海邊仔去。來到一座廢棄ê大砲陣地，是較早國民政府起來防守海岸ê。袂少人攏軁入去參觀。

行到海邊仔進前經過一个水拹仔[tsuí-hia̍p-á]。我愛耍，煞去濺著邊仔ê細漢囡仔，共驚一下哭出來，閣著愛換衫，實在是真歹勢。

老師𤆬[tshuā]逐家行到海邊ê時，講著有鳥仔會佇沙埔做岫[siū]孵卵。

敢若是叫做東方環頸鴴(華語)。因為沙埔傷燙，鳥仔驚講卵熟--去，閣會去用汫水共毛搵澹來共卵ê溫度降--落來。實在真巧！

今仔日大坑罟ê導覽，黃逸樹老師介紹足濟歷史、文化，閣聽伊講著在地營造佮家己佇遐大漢ê小故事。真正足精彩閣講袂煞。

而且閣𤆬[tshuā]逐家做林投鼓吹，予囡仔轉來厝了後心肝頭攏是伊家己做ê鼓吹。😆

----

大坑罟 Tuā-khenn-koo

𤆬 tshuā：華語「帶領」

𠢕 gâu：華語「很會、很厲害、做得很好」

歕 pûn：華語「吹氣」

水拹仔 tsuí-hia̍p-á：華語「汲水器」

岫 siū：華語「巢」