Літаратурны web-квэст
"Ехаў казачнік Бай..."
Прывітанне, дарагія дзеці і паважаныя дарослыя!
Запрашаем Вас прыняць удзел у вэб-квэсце, які прысвечаны творам беларускай мастацкай літаратуры і фальклору для дзяцей дашкольнага ўзросту.
Eхаў казачнік Бай
Цераз сёлы і гай.
Нёс ён казачак мех
Песень, вершаў і ўцех.
Як па сёлах хадзіў,
Недзе мех там згубіў.
Каб не сціх дзетак смех,
Мы шукаем той мех.
Зрабіце ласку, памажыце,
У вэб-квэсце ўдзел прыміце.
Кожны з нас з маленства ведае і любіць казачніка Бая. Ён, як добры чарадзей, спявае дзецям песенькі і калыханкі, расказвае цікавыя казкі і вершы. Казачнік Бай шмат вандруе, у дарозе з ім часта адбываюцца неверагодныя гісторыі. Вось і гэты раз не стаў выключэннем. А сталася так, што Бай згубіў усе свае пажыткі, а галоўнае, ён згубіў свой казачны мех. І цяпер ён вельмі сумуе, што не можа трапіць у госці да дзяцей са сваімі казкамі.
Мы можам дапамагчы казачніку Баю адшукаць яго мех і даведацца, што ў ім ляжыць, калі выканаем заданні вэб-квэсту. Самыя ўважлівыя, кемлівыя, начытаныя і старанныя атрымаюць падарунак ад казачніка.
Жадаем Вам поспехаў!