Ka dawt i ka ngaihmi ka unaule hna, Bawipa chung i nan nunnak ah cu bantuk cun fek tein dir ko u, nannih cu kaa lawmhnak le ka suiluchin nan si, ka dawtle hna.

Herhbau in um kha zeidah a lawh ti ka hngalh; cun a hlei a hluat in ngeih kha zeidah a lawh ti zong kha ka hngalh. Cucaah khuazeika hmanh ah, zeitik caan paoh ah, ka paw a khim ah siseh, ka rawl a tam ah siseh, tam tuk ka ngeih ah siseh, tlawm tuk ka ngeih ah siseh, lungsi hnangam tein um kha ka thiam cang.

Tthawnnak a ka petu Khrih thawngin thil zei paoh ka tuah khawh ko hna.

Bawipa chung i nan nunnak ah khan i lawm zungzal ko, ti kan duh hna. I lawm ko u, tiah ka nolh tthan rih ko lai.

Zei thil kong hmanh ah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u.

Cun Pathian daihnak, minung hngalhnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai.

Thil pakhat ka tuahmi cu hnulei thil kha philh i hmailei thil banh i zuam kha a si.

Cucaah kawltung leiah cun laksawng hmuh awkah khan ka tli i cu laksawng cu Pathian nih Khrih Jesuh thawngin cunglei nunnak i a kan kawh hi a si.

A donghnak ah ka u le ka nau hna, nan lungthin kha a tthami le thangthat awk a tlakmi in khahter hna u; a taktak a simi thil, a sunglawimi thil, aa dawhmi thil le upat awk a tlakmi thil khan khahter hna u.

Keimah sinin nan hngalhmi le nan hmuhmi kha tuah i zuam hna u.

Daihnak a kan petu Pathian nih cun an umpi hna lai.