Viðfangsefni: lestur, orðaforði og ritun

Tungumál: danska (og enska)

Hinn sígildi og sívinsæli Anders And er á netinu og þar kennir ýmissa grasa. Ásamt því að láta nemendur lesa brandara, gátur, myndasögur eða fara í spurningaleiki getur kennari látið nemendur útbúa sína eigin myndasögu á vefnum. Síðan býður upp á fjölbreytt úrval af leikjum, ýmsan fróðleik um félagana úr Andabæ; "Duckipedia", mataruppskriftir ásamt öðru skemmtilegu sem hægt er að nýta í dönskukennslu. Gestir síðunnar eru hvattir til að skilja eftir brandara fyrir aðra lesendur og vera virkir í að taka þátt í ýmsum þrautum. Öll útgefnu Andrésar andar myndasögublöðin eru á vefnum en til þess að fá aðgang að þeim þarf að kaupa áskrift.

Síðan býður upp á að vera þýdd yfir á ensku með Google translate fyrir þá sem eiga í erfiðleikum með dönsku eða eru ekki byrjaðir að læra tungumálið en langar að fylgjast með þessum skemmtilegu persónum.

Viðfangsefni: lestur og hlustun

Tungumál: danska, íslenska og fleiri 

Atlantbib er bókaverkefni þar sem nemendur og kennarar skrifa ókeypis fagbækur til afnota í öllum skólum. Bækurnar eru rafbækur með áherslu á það sem er ólíkt og líkt á Norðurlöndunum og Baltísku löndunum í sambandi við sögu, landafræði, tungumál og menningu. 

Ef kennarar vilja gera meira en að láta nemendur skoða, lesa og hlusta á bækur þá er hægt að taka þátt í bókaverkefninu.

Nemendur taka þátt í að rannsaka, skrifa, þýða og talsetja bækurnar áður en þær eru gefnar út. Verkefnið er opið öllum, svo allir skólar geta skrifað og þýtt bækur. 

Viðfangsefni: bókagerð

Book Creator er einfalt tæki þar sem nemandi skapar verkefnið sitt í bókarformi. Bækurnar geta verið einstaklingsverkefni eða samvinnuverkefni en hægt er að sameina bækur nemenda eða leyfa mörgum að vinna í einni bók. Hægt er að skrifa, hlaða inn myndum eða myndböndum sem nemandi tekur sjálfur eða nær í af netinu. Nemandi getur teiknað myndir og búið til teiknimyndasögu og einnig er hægt með einföldum hætti að gera hljóðupptöku. Nemandi getur valið fjölbreytta bakgrunna og þemu á blaðsíðurnar sínar og skreytt og skapað að vild.  

Ef skóli kaupir aðgang fást t.d. 1.000 bækur og möguleiki að búa til 10 bókasöfn, t.d. 1. bekkur, 2. bekkur, 3. bekkur o.s.frv. Kennari getur valið hvort nemendur sjá sína bók eða bók allra í bókasafninu. 

Hér má finna myndband sem leiðir þig áfram í að búa til bók í Book Creator.

Viðfangsefni: margs konar

Flipgrid er forrit á netinu sem gerir kennurum kleift að búa til umræðusvæði fyrir nemendur. Umræðurnar fara í gegnum stutt myndbönd sem hver notandi tekur upp og setur á umræðusvæði sem sitt innlegg í umræðuna. Kennarar geta sett fram spurningar til hópsins og nemendur senda þá inn svör við spurningunni í formi stutts myndbands. Flipgrid getur hjálpað nemendum að æfa sig við að útskýra það sem þeir lærðu, sagt hvernig það tengist fyrri reynslu sinni og beðið um nánari útskýringar á viðfangsefninu. Nemendur geta skoðað innlegg annarra nemenda í hópnum. 

Viðfangsefni: málfræði og orðaforði

Tungumál: enska

Freerice er ókeypis leikur á netinu og í formi spurningaleikja þar sem unnið er með orðaforða og málfræði. Hægt er að velja alls kyns flokka af spurningum til að vinna með t.d. málfræði, bókmenntir, fána veraldar, lönd, fræga listmálara og fleira. Einnig er hægt að velja þyngdarstig.

Leikurinn hefur góðan boðskap en fyrir hvert rétt svar í leiknum fer andvirði tíu hrísgrjóna til "World Food Programme" sem notuð eru til að bjarga og bæta líf margra. Nemandi getur fylgst með hve mörgum hrísgjónum hann safnar fyrir verkefnið sem ætti að vera talsverð hvatning til að gera sitt besta í leiknum.

Viðfangsefni: leikur

Tungumál: enska

Games to learn English er einfaldur og gagnlegur leikur á netinu til að læra og þjálfa enskt tungumál. Viðfangsefni leiksins eru fjölbreytt og nær yfir málfræði, ritun, stafsetningu, orðaforða, hlustun og framburð. Leikurinn er ætlaður til að hjálpa nemendum að muna merkingu erfiðra orða og styrkja málfræði með aðstoð góðra mynda og endurtekninga. Hægt er að hlaða niður lista yfir allan orðaforðann sem notað er í leiknum. 

Viðfangsefni: spurningaleikur

Kahoot er spurningaleikur á netinu sem hentar vel í skólastofunni eða í heimanámi. Leikinn er auðvelt að búa til, spila og deila. Á vefnum er hægt að finna þúsundir tilbúinna spurningaleikja sem fólk víðsvegar að úr heiminum hefur búið til. 

Þátttakendur fara inn á kahoot.it til að taka þátt eða nota smáforritið. Bæði er hægt að spila leikinn “live” þar sem leiknum er varpað upp á stóran skjá og nemendur svara í sínum tækjum eða hver og einn svarar í sínu tæki á þeim hraða sem þeim hentar. Hægt er að hafa leikinn bæði fyrir einstaklinga eða lið. Eftir hvern spurningaleik fær kennarinn senda skýrslu með niðurstöðum þar hann getur metið árangur nemenda sinna og séð hvaða atriðum þeir hafa náð og hvaða atriði þarf að þjálfa betur.  

Hver skóli getur stofnað aðgang og búið til sameiginlegan leikjabanka með þeim spurningaleikjum sem kennarar skólans hafa útbúið.

Viðfangsefni: tímaritagerð

Madmagz er vefsíða sem gerir nemendum kleift að útbúa tímarit en það er í anda skapandi skila. Það er í boði ókeypis form auk þess sem hægt er að kaupa margvísleg form (template). Vefsíðan er afar einföld í notkun.

Margrét Þóra Einarsdóttir útbjó tímaritið Danska í skóla og daglegu lífi í kennslu sinni við Brekkuskóla haustið 2017 og gaf okkur leyfi til að deila því fyrir aðra til að fá hugmyndir.

Viðfangsefni: spurningaforrit og svörun

Mentimeter er vefsíða þar sem auðvelt er að varpa fram spurningum, spyrja um skoðun á einhverju eða biðja fólk að skrifa orð. Niðurstöður er hægt að birta t.d. í súluriti eða fá orðaský.

Þátttakendur fara inn á menti.com og slá inn kóða til að svara könnun sem lögð hefur verið fyrir.

ISLEX er margmála orðabók á vefnum. Grunnmálið er íslenska og markmálin eru danska, sænska, norskt bókmál, nýnorska, færeyska og finnska. 

Snara býður upp á tugi orðabóka og uppflettirita.  Þar geta kennarar og nemendur flett upp á nokkrum tungumálum.

Viðfangsefni: lesskilningur og lestur

Tungumál: enska

ReadTheory eru skemmtileg lesskilningsverkefni sem byggjast upp á framvindu nemandans í náminu. Við fyrstu innskráningu fer nemandi í gegnum stöðumat sem staðsetur hann í námsefninu og eftir það fær nemandinn texta við sitt hæfi. Textinn er í formi fræðigreina og fylgja honum nokkrar spurningar, krossaspurningar og ein opin spurning. Forritið tekur alltaf mið af því hvernig nemandanum gekk í fyrra verkefni áður en hann fær úthlutað nýju verkefni. Ef nemandi skráir vitlaust svar fær hann alltaf útskýringu á því af hverju hann hélt að svarið væri rétt og einnig útskýringu á rétta svarinu. Nemandi og kennari geta fylgst náið með framvindu nemandans þar sem ýmis gröf koma eftir hvert unnið verkefni sem skýra frá stöðu nemandans. 

Viðfangsefni: bókagerð

Story Jumper er bókagerðarforrit sem býður nemendum upp á tækifæri til að skrifa, búa til og birta sínar eigin sögur. Þessi síða býður upp á einföld tæki til að virkja sköpunarhæfileika barna við sögugerð. 

Nemendur geta myndskreytt og lesið inn á bókina með einföldum hætti, valið ýmsar persónur fyrir bókina sína, sögusvið og fleira. Ef nemandi les inn á bókina getur hann sett tónlist á bak við lesturinn og einng sett inn alls konar hljóðbrellur. Auk sögusviða sem fylgja forritinu getur nemandi einnig náð í myndir á netið til að nota sem sögusviðið sitt. Síðan getur hann sett inn alls konar persónur, dýr og fleira inn á sögusviðið. 

Með því að kaupa aðgang að síðunni opnast fleiri möguleikar en ókeypis efnið býður þó upp á marga möguleika sem duga vel við bókagerð. Hægt er að deila bókum innan bekkjarans eða með nemendum um allan heim. Einnig er sá möguleiki fyrir hendi að panta bókina sína og fá hana innbundna. 

Hér er að finna auðveldar leiðbeiningar fyrir kennara til að útbúa fyrsta verkefnið í Story jumber. Leiðbeiningarnar leiða kennarann skref fyrir skref hvernig hann setur upp svæðið sitt og nemenda sinna.