مع زيادة الهجمة الأمنية على مختلفي/ات التوجه الجنسي والهوية الجندرية، وبالذات عن طريق يوقعوا ناس من برامج ومواقع المواعدة المختلفة ويعملوا كمين أمني عشان يقبضوا عليهم/ن، عشان كده بقى ضروري إننا نتكلم عن بعض النصائح والتحذيرات الأمنية لكل واحد فينا وبالأخص، مستخدمي/ات البرامج والمواقع دي.

نصايح عامة:

1- أكتر الناس على برامج ومواقع المواعدة دي كويسة، ولكن لسه فيه بعض الخطر ممكن نتعرض ليه ولازم ناخد حذرنا وإحنا بنقابل الناس.

2- الشات بيكون عندك وعند الطرف التاني، ما تفتحش في الكلام غير لما تطمن للشخص إللي قدامك.

3- المعلومات الشخصية مش ضروري نتشاركها مع إللي بنكلمه/ها.

الصور:

4- لو هتبعت صور، يا ريت ما تكونش صور لوشك أو صور عارية لجسمك.(ممكن تصور على البحر أحسن من إنك تتصور في الحمام)

5- ممكن كمان تتكلموا فيديو على الإيمو أو برامج تانية، لو رافض موضوع الصور. ولكن إعرف إن فيه حاجة مش مضبوطة.

6- المقابلة من غير ما تعرف شكل إللي قدامك أو تشوف صورته/ها بتعرضك للخطر، خلي بالك!

7- لو رحت قابلت/ي حد وطلع الصور مش صوره، إعرف/ي إن فيه خطر ولازم تسيبه/ها فوراً.

القانون المصري:

8- القانون الجنائي المصري، بيعاقب تحت مسمى "الفجور" العلاقات الجنسية بين الرجالة سوى بالتراضي (يعني من غير فلوس) أو بفلوس. الإتنين بيتقبض عليهم/ن.

9- ماتدخلش في تفاصيل كتيرة، زي مثلاً هتعمل إيه في السرير أو هتلبس إيه أو هتاخد فلوس كام؟

قبل المقابلة:

10- خد رقم تليفونه/ها ودور على الرقم في تروكولر، الفيس بوك والسوشيال ميديا قبل ما تقابله.

11- قبل ما تنزل تقابل الشخص، تمسح كل الصور "الخاصة" من موبايلك، والشات بينك وبين شركائك/ شريكاتك الجنسيين، والشات في برامج المواعدة. المفروض تعمل كده على طول! لو مش هتقدر، يبقى تشتري موبايل صغير تحط فيه خطك وتروح المقابلة.

12- إحفظ رقم كام واحد صاحب ثقة أو إكتبهم على ورقة في محفظتك، وسيب إسمك الكامل مع واحد من صحابك.

13- يا ريت، تقول لواحد صاحبك ثقة إنك رايح تقابل حد جديد قبل ما تقابله، وتسيب رقم موبايل الشخص ده عنده.

خلال المقابلة:

14- لما تروح تقابل حد، أحسن حاجة إنك تكون قاعد في مكان وتستناه أو تكون جوة مكان مقفول زي مول أو غيره. ما تستناش في الشارع، وبالأخص في الأماكن دي حوالين ميدان التحرير أو شارع جامعة الدول. (قبضوا على ناس كتير بالشكل ده في أماكن كتير، زي قدام المتحف المصري أو قدام عصائر فرغلي أو ناصية مكرم عبيد على شارع النصر).

15- لو المقابلة طلعت كمين شرطة أو عصابة أو حسيت بخطرإجري! إجري! إجري! لو ماعرفتش/ ماعرفتيش، صرخ/ي ولم/ي الناس، عشان يكون فيه شهود إنك إتقبض عليك/ي في الشارع لوحدك. كده كده بقيت في خطر، فالسكوت أو الخوف من الفضيحة مش هتنفعك.

لو إتقبض عليك،

16- لما تتاخد على قسم الشرطة، هيتعمل لك في كل الأحوال محضر وهتكون قضية. ماتعترفش/ ماتعترفيش بأي حاجة، الإجابات الوحيدة:

"ماعرفش" – "مش فاكر/ة" – "ماحصلش" – "مش حاجتي"

17- ممكن يحاولوا يبينوا تعاطف معاك عشان تعترف أو يساوموك لو بلغت على حد عشان تطلع، دي كلها ألاعيب عشان تعترف وتثبت التهمة عليك/ي.

18- بأي شكل حاول توصل لحد من صحابك/ صاحباتك وتقول لهم/ن إنت/ي فين عشان يلحق المحامي يكون معاك/ي في النيابة بعد الظهر أو تاني يوم الصبح.

19- كمان في النيابة، إنكر كل حاجة تماماً. مفيش حد هيتعاطف معاك ولا هيطلعك لو قلت/ي، دي آخر مرة وهبطل أعمل كده تاني.

20- لو إتعرضت لضرب أو مضايقات في قسم الشرطة من ضباط التحقيق أو المساجين قول ده في النيابة وأطلب إثباته وكتابته في المحضر.

21- مش من حق الضابط يصورك أو يجي صحافي يصورك، وأرفض ده تماماً!

صحتك برضه مهمة،

22- حافظ على صحتك، ودايماً إستعمل الواقي الذكري في كل علاقاتك الجنسية. فيروس نقص المناعة البشري (الإيدز) مش بيفرق بين الغني والفقير.

23- ماتحاولش تشرب حاجة إنت مش عارفها أو تاخد أي قرص، حتى لو الشخص التاني خد منها.

24- العلاقات الجنسية بالتراضي (بالرضى)، ماتخليش حد يعمل لك حاجة غصب عنك!

خلوا بالكم/ن من نفسكم/ن!