Tula
12
Ni Nino Rafael Zerna
August 2, 2022
Source: From the Studio Ghibli Movie "Whisper of the Heart"
Palapit na ang hating gabi
Bagong araw, bagong mga pagsubok, bagong mga karanasan
Punto kung kailan ang ngayon ay magiging kahapon
Hindi madaling ikubli
Takot na hatid sa atin ng kinabukasan
Takot sa pagguho ng nakasanayan at sa pagdating ng pagbago
May mga humihiling
Na maudlot ang mga hiwalayan. Sana habang buhay
Na ang mga pagsasama'y manatiling ganito
Pag-alala sa nakaraan, pag-alala sa mga pinagdaanang
Nagdala ng ligaya sa ating mga mukha
Kasama ang ating mga kalakbay at kaibigan
Pagkakaibigang maaaring... alaala nalang talaga ngayon?
Ang mga boses nila'y naririnig ko pa
Mga tawanan, kuwentuhan, pati na rin ang mga kalokohang
Naghahatid sa amin sa gitna ng misa
Para makatanggap ng sermon at leksyon
Minsan... ang sakim talaga ng mundo
Nanakawin nalang ang natitirang panahong
Dapat na kasama sila
Pero wala... wala na
Dalawang taong nawalang parang bula
Mga pagkakataong ‘di na mauulit kailan man
Nakabibitin... bitin na bitin
Mga sandaling dapat sa amin
Pero ngayo'y ‘di na kayang anhin
Ubos na ang buhangin...
Kung bibigyan ako ng pagkakataon
Kamay ng orasa’y aking kukunin
Pabalik na iikutin
Pabalik sa mga panahong ‘di pa watak
Pabalik sa mga panahong masasabing hindi pa wala ang lahat
Kung bibigyan lang ako ng pagkakataon
Wala pang alas dose, ramdam ko na
Ang pag-agnas ng mga lumang litratong
Parang kahapo'y bago pa lamang
Ang sakim talaga ng mundo
-----------------------------------------