📢 2018年5月5日 正式開館

        「台語文創意園區」徛佇咱彰化市八卦山的山坪，伊自底是國防部的「成功營區」，佮「生活美學館」相交敆。地頭風景媠、所在闊、營舍濟，是台灣目前唯一的台語文園區，佇遮，咱欲共成做台語文發展的基地。

        聯合國教科文組織UNESCO捌提出嚴重的警告，台灣各種本土語言攏面對著流失的危機。原住民佮客語，因為受著政府的專責單位保護，佇台灣各有29个佮20个文化中心抑是園區，族群上大的台語煞無受著應該愛有的重視。

        本園區原本是成功炮兵營區，1991年，當時的縣長極力共國防部爭取，得著原部長孫震核准來收歸縣有。早期，是委託彰化縣立藝術高中代管。2017年財團法人關懷文教基金會周清玉董事長建議設立「台語文園區」，伊嘛受命擔任籌備處主任委員。籌備期間，教育部長、行政院長親臨視察，表達支持佮鼓勵。2018年5月，總統蔡英文𤆬頭揭牌，台灣唯一的「台語文創意園區」成立，成做研究、復振、發展的重要基地。現今由關懷文教基金會受託管理。

        本土語言主流化是當前的世界潮流，台語文的保存是咱的責任，向望全國士、農、工、商仝心徛同齊，期待台語文會當佇國際上閣再發光 。