الجزء 01

القصه حقيقيه ولا تمد للخيال ب اي صله

الليله حابه احكي ليكم قصه او مأساه لاني ب الجد شايفاها مأساه مابتمناها ل عدو زاتو ..

حأكيها بلسان بطله الروايه ( رغد )

طبعا قصتي بدت من انا عمري زي ٣سنين كده ابوي اتوفى فجاءه وامي يحليلا انصدمت وماقدرت تتحمل الخبر حق وفاه ابوي وكانت بتحبو شديد بعدو ب اسبوع اتوفت هي زاتا وانا الوقت داك ماعارفه اي شي ماعارفه البحصل حوليني شنو حبوبتي ام امي قالت انا بربيها اصلا اهل ابوي ماكنت بعرفم مافي زول كان بجينا بعرف عندي عمه واحده في امريكا اسمها شنو زاتو مابعرف ..المهم اخدتني حبوبتي اعيش معاها كان عندها جزء حقها براها فيه اوضتين وبرنده ومطبخ وحمام وحوش صغير كده.. نظام بيوت زمان الكبيره دي وعندها ولدين بانين معاها في الحوش مديه كل واحد قسم .. وعشت مع حبوبتي يحليلا مع انها كبيره شويه في السن بس كانت بتراعيني شديد .. وبتخاف علي شديد مادايراني احس ب اي شي ناقصني دايره تعوضني حنان امي الانحرمتا منو .. وفعلا قدرت تعوضني ..

عشتا معاها ايام حلوه شديد اي شي بطلبو بتنفذ ..

وكنت زي اي شافعه بحب العب ف كنت بطلع الحوش الكبير العب مع بنات واولاد خيلاني مرات بلعبوني معاهم ومرات بتساغلو علي .. شغالين ع كيفم .. بس مابشتغل بيهم كان لعبوني بلعب مالعبوني بقعد اتفرج فيهم وبكون مبسوطه وقت الغدا طبعا مابعرف انو دا وقت اكل ولا لا بقومو حريم خيلاني كل زول ينادي اولادم واحد وراء التاني عشان ياكلوهم وانا قاعده مافي زول بعبرني منهم لانهم اصلا مابحبوني .. تجيني حبوبتي العسل تناديني يارغد تعالي حبيبتي دا وقت الغدا اكلي واستحمي وغيري هدومك دي وارجعي العبي تاني معاهم .. بقول ليها حاضر يا حبوبه وفعلا بمشي اعمل الكلام القالتو لي .. بقيت ع دا الحال حبوبتي حلوه معاي وحريم خيلاني كل مره يشاكلوني ويدقوني وكان واحد من اولادم ولا بناتم غلط علي ودقاني وانا ابكي بتجي امو تدقني زياده بت مدلعه وقت ماقدر اللعب بتلعبي مالك .. زي مابقولو باكلا في حناني وبسك .. وخيلاني الاتنين من النوع البسمع كلام مرتو ماليهم اي شخصيه في البيت .. البتقولو مرتو خلاص هو اللبمشي مرتو قالت انتي غلطانه خلاص غلطانه .. كبرتا ع دا الموال ودخلت المدرسه حبوبه كل يوم تعمل لي الحشوات امشي بيها اجي من المدرسه القى هدومي نظيفه والاكل جاهز اغير واقعد اكل معاها .. بنات خيلاني مامعاي في نفس المدرسه بمشي مع بت جيرانا وبجي ..

يوم مرضتا شديد .. حمتي زادت حبوبتي بقت خايفه علي شديد مشت دقدقت لي اولادا الي هم خيلاني .. فتح واحد في شنو يمه مالك بتدقي الباب قدر دا ..

اليمه ماوقتك رغد دي عيانه لازم اوديها للدكتور من قبيل بعمل ليها في كمادات مادايره تنزل الحمه ارح ودينا ..

جات مرت خالي مارقه بعد ماسمعت الكلام ..

يوديك وين دا وقت راحتو ي دوب جاء من الشغل داير يرتاح وياكل ليه لقمه بعدين بت بتك دي بتتدلع ساي ما قبيل كانت نصيحه تنطط مع الشفع ..

ينط فيك يا يمه عفريت قولي امين لمن اتكلم مع ولدي انتي ما تتدخلي سامعه ولا لا مره عديمه تربيه ..

مرت خالي قامت تجوط انا عديمه تربيه وانا وانا وخالي واقف وماقادر يرد وبقول ليهم خلاص اسكتو ماتكوركو يا امي خلاص.. ..

حبوبتي هاجت فيه .. انتي يايمه ولاده سجم بس بدل تكورك في مرتك وتنهرا وتقول ليها ماتعلي صوتك ع امي قاعد لي شحط كده مامنك فايده طير امشي ارتاح انا بودي بتي براي امرق لي قروش المستشفى ..

يا امي ماعندي هسي قروش انتي دبريها انا برجعا ليك ..

الساعه الحبوبتي قامت ليك فيه ادبرا لي شايفني شغاله ولا شغاله ولا القروش بتجيني من السماء زي المطر وقامت تجوط ومرتو ب هناك شغاله تحمر ليها وغازه يدا في وسطا مستنيه بس تهبشا تاني..

اصلا مامحترماها لانو راجلا زاتو ما محترماهو ولا بتسمع ليه كلمه ..

المهم حبوبتي شافت المحفظه في جيبو قلعتا منو قلع وشالت القروش الفيها كلها ومشت .. اصلا حبوبتي ب طبعها شخصيتا قويه شديد .. ومشت اجرت امجاد وودتني المستشفى اطمنت علي حتى رجعنا .. واحنا راجعين جات مرت خالي سمعت كركبه الباب جات ناطه.. اطمنتي ع المحروسه خلاص يلا جيبي باقي قروش راجلي .. الساعه الحبوبتي شالت طوبه قداما فنتا بس مرت خالي قفلت الباب طوالي ماحصلتا .. ههههه ..

عليك الله عان المره المعولقه القليله الادب دي بس مابلوما مدام الشحط ولدي سامح ليها تعمل العمايل دي كلها فيني وهو ساكت الله بياخد لي حقي بس .. ودخلتا البيت .. عديت لي كم يوم كده وبقيت كويسه ..

المهم يوم كنت بلعب مع اولاد خالي قمتا فزتا ع صهيب الود الكبير كان اكبر مني .. انحرق مني قام قال لي امشي يا شؤم انتي فزتي زاتو الليله كيف مابعرف انتي شؤم تفوزي كيف .. ببرائه قلتا ليه شؤم يعني شنو قال لي امي قالت انتي من جيتي ع الدنيا دي كتلتي ابوك وامك يعني انتي شؤم .. انا الوقت داك ماعارفه حصل لي شنو بقيت ابكي وجريت ع بيت حبوبتي اي نعم عمري ٦سنين بس بعرف وبحس الدنيا⁩ لفت بي .. بقيت افكر ياربي انا السبب يعني في موت امي وابوي .. انا اصلا مفروض ما اجي ع الدنيا دي وببكي لحده ما نمت وصحيت وعيوني مورمه ..حبوبه تسال فيني مالك يابت .. وانا شغاله مافي حاجه ياحبوبه ..

كنتي بتبكي ي رغد موش وريني مالك الزعلك منو حريم خيلانك في وحده كلمتك زعلتك ولا دقتك .. اقول ليها لا ..

طيب اولادم زعلوك ..

برضو شغاله لا .. بقيت ع دا الموال كل يوم اتذكر كلام صهيب وابكي لحده ما انوم اكل زي الناس ما باكل بقيت مابطلع العب معاهم .. دخلت في نفسيات عارفين يعني شنو وحده او شافعه عمرها ٦سنين تدخل في نفسيات .. انا بقيت ع دا الحال لمده ٣شهور ..

٣شهور وانا ع دا الحال لا اكل زي الناس لا لعب لا اي حاجه بس كل يوم انا ببكي ب الليل لمن انوم حبوبتي يوم جات ب الليل ماشه الحمام اظن سمعت البكاء طوالي دخلت علي ..

بت رغد سجمي مالك بتبكي .. في شنو يابت .. بسم الله وتشيل وتحضن فيني وانا ازيد في البكا .. وتسالني وانا مابرد نهائي .. بقت تقراء لي قران لحده مانمت .. اول ماصحينا طوالي مشت لي خيلاني قالت من بطلت لعب مع الشغع معناتو في زول شاكلا من العيال ..

مشت لقتم كلهم بلعبو بره في الحوش مسكتم ليك ..

سووورعه الشاكل رغد منو ولا الدقاها ولا السمعا كلام منو سريع وماسكه مفراكتا .. عارفين هم دق المفراكه كيف ومجربنها بدقهم ولا شغاله ب امهاتم وابهاتم .. بقت تحمر ليهم وماسكه المفراكه سووورعه قلتا ليكم ب نهره كده لمن جو خيلاني وحريمم طالعين وحده فيهم بقت تقول ..

مالك يا حجه هايجه فينا من الصباح كده خيررر ..

ردت ليها حبوبتي ..

هو البشوفك بجيه خير طيري مني كده ولا كده ..

ورجعت للشفع سرعه السال رغد منووو

مرت خالي التانيه قالت ليها ..

وهي رغد دي زاتا منو عشان تهرشي لينا اولادنا كده ..

مدت ليها المفراكه في وشها ..

انا لمن اسالك جاوبيني ماشغلتك انا بتكلم مع اولاد اولادي امشي من وشي عشان ما تجيك طقه هسي في نص راسك .. والجوطه قامت ..

وحبوبتي مافايقه ليها همها بس تعرف الزعلني منو بخليني كل يوم ابكي كده .. بس ولد خالي الاصغر من صهيب مهند قال ليها يا حبوبه انا عارف الزعل رغد منو ..

نادتو قالت ليه تعال ..

اها احكي لي .. منو الزعلا ..

قال ليها زعلا صهيب لانو من اخر مره قال ليها كده هي بكت وتاني بقت ما بتلعب معانا ..

اها طيب وصهيب قال ليها شنوو ..

صهيب فك الزوغه ناشتو ليك ب المفراكه عترت ليه .. نياشه الحجه هههههه .. قالت لي ابوه امسكو لي .. وامو طبعا ماعاجبا الوضع وتشيل وتهرج .. وحبوبتي ماشغاله بيها او مافاضيه ليها هسي ..

انا..

يا مهند قول صهيب قال ليها شنو ..

كنا بنلعب قامت رغد فازت ع صهيب قام قال ليها انتي بتفوزي علي كيف انتي اصلا شؤم امي قالت من جيتي امك وابوك اتوفو عشان انتي شؤم علينا ..

طوالي قالت ل ولدا جيبو لي صهيب دا ومسكتو ب المفراكه دقتو دق وصهيب يشيل ويكورك والله ماقصدي ودي امي قالت لي كده وووو المهم بعد فترت منو قبلت ع امو مرت ولدا .. انتي مامربيه انتي ماعندك ادب .. دي افكار شنو البترسخيها لي اولاد شفع زي ديل البت عمرها ٦سنين تجيبي ليها نفسيات .. دي تربيه ليك تفو عليك وع تربيتك .. ودايره تقبل قامت مره خالي ردت ليها رد حار ها المره المخرفه دي جايه تتكلمي في تربيتي ل اولادي .. عاينت حبوبتي ل ولدا قالت ليه والله انا الماعرفت اربي ينبزو في امك وانت في ارجل لي لو مره .. ولدا زعلتو الكلمه قام اتنفض في مرتو والكلام سخن اداها كف ..

وكان اول مره في حياتو يديها كف ..وقامت مرتو تجوط وتكورك لمن قرب يطلقا حبوبتي وقفتو ..و

حبوبتي مبسوطه اخيرا ولدا اترجل لو مره في حياتو اي عجبا الكف لي مرت ولد لاكن برضو مابهون عليها تخرب بيت اولادا وخالي التاني ومرتو صانين ساي .. وبعد خلص من مرتو مسك ولدو دق دق لمن قال بس ..

حبوبتي قالت ليه كفاهو بتكتلو ..

يحليلا حبوبتي حنينه ..

مسكت ولدو منو ..

قالت ليه انا الدق دا ما بجيب معاي نتيجه البت صغيره قدر دا تجيبو ليها النفسيات انا بس مابعرف زي ما ولدك جاب ليها نفسيات تتحمل انت وتوديها دكتور نفساني يعالجا وتتحمل تكاليفا ..

قال ليها حاضر .. وجاء علي يراضيني ..

رغد يابتي كيف ..

كان اول مره يجيني ويطبطب علي ويقعد جنبي ويسال من حالي ..

ماتزعلي يابتي من الود الاهبل دا دا عوير ساي .. انتي جيتينا وجبتي لينا البهجه والفرح والسرور انتي جيتك كانت زي يوم العيد .. وامك وابوك الله يرحمم دا يومم ربنا كاتب ليهم كده والموت مافي يد زول حاول يطلعني شويه من الانا فيه ..

المهم سمعتا كلامو كلو ولا رديت عليه ..

بعد يومين قال لي حبوبتي حجزتا ليها عند دكتوره نفسانيه للاطفال جهزيها حاجي اسوقا ..

كان ظريف شديد الفتره الفاتت ومرتو عامله زعلانه .. ماشغال بيها ..

المهم مشيت عند الدكتوره والوقت داك لاعارفه دي دكتوره ولا اي حاجه بس شالوني وقعدوني عندها .. بقت تتونس معاي وتلعبني وتحكي لي حكايات .. كل يوم بمشي ليها لمده ساعتين ..

كنت بنبسط⁩ لمن امشي ليها كنت برتاح ليها شديد وكل مره امشي ليها تجيب لي اللعبات والشوكلت والشبس وتسالني اها يومك كيف والمدرسه واحكي لي عن صحباتك وكنت بتونس معاها .. شبه اتحسنت ..

حبوبتي فرحانه شديد ب تحسني رجعتا ليها رغد بتها البتعرفا .. والدكتوره ماقصرت معاي ورتني انو ما كل الناس كعبه لانو كنت بشكي ليها من حريم خيلاني واولادم وورتني انو الحياه دي حلوه وانو اهم شي مافي شي اسمو انا شؤم .. عديت الفتره دي الحمد الله ورجعتا زي ما انا ب ضحكتي المابتفارقني .. واهم شي شوفه حبوبه مبسوطه .. ورجعتا العب معاهم تاني لانو الدكتوره علمتني ما اكره زول الزول البغلط علي انا اسامحو وما اكرهو .. صهيب كان شاميني شديد عشان دقو عشاني بقى مابلعب معاي ..

بس برضو رجعو حريم خيلاني يضايقوني شديد ب الزات بعد الشكله الحصلت معاهم بسببي .. وبنات خيلاني كان نفسي وحده فيهم تجي تقيف معاي تقول بت عمتي دي مسكينه انا مابرضى فيها وانتو بتعملو ليها كده لي .. بس يا خساره مالقيت .. شكلو كلام امهاتم مأثر فيهم كتير وطابعين ليهم فكره سيئه عني ..

خيلاني انا ما بلومم والله لاني لمن اعاين في عيونم كنت بحس بيهم بقولو لي مامتمنين انو اتعامل كده بس غصب عنهم ..

عدت الايام والسنين .. وانا ع دا الموال .. المصبرني حبوبتي بس وصحبتي وبت جيرانا سلمى البمشي معاها المدرسه ..

حبوبتي بقت تمرض كتير .. وحيلا انهدا ع قولم..

بقيت اخاف كتير عليها ..

وحريم خيلاني مستغلين مرضا مناشبني في اي حته وع الطالعه والنازله لازم اسمع كلام فارغ ..

حبوبتي يحليلا بقت تقول لي رغد الله كريم .. الله بياخد ليك حقك .. الله ما بنسى زول .. الله شايف عمايلم دي بياخد ليك حقك .. انتي بس ادعي ربنا دا وصلي يابتي ماتنسي صلاتك .. وانتي خلي بالك من نفسك .. وخليك من ربنا وما بتجيك عوجه .. وانا ببكي .. شكلها كانت حاسه انها حتودعني وتموت بتوصي فيني ..

عدت كم يوم ولسه هي كل يوم بتمرض زياده .. خيلاني قالو المرض زاد نوديها المستشفى وجرو بيها ع المستشفى قلتا ليهم ماشه معاكم .. خالي الكبير قال لي لا اقعد هنا احنا هسي بنجي قعدتا ابكي .. واكورك حبوبتي مابخليها عايزه امشي معاها ..

مرتو قالت ليه هوي سوقا معاك الفقر دي ما قادره استحمل كواريكا دي .. قال ليها انتي ماماشه معانا ..

بري ماماشه امشو انتو شوفو بقولو ليكم شنو ووروني كان الموضوع خطير بجي ..

اداها ليك عين بس هي الموضو ماخطير عندها .. وساقني ومشى معانا خالي الصغير .. وع المستشفى ..

وانا شغاله بس ابكي وحبوبه حتخليني ل منو لانو ب الجد كانت لي سد وكنت بتقوه بيها في الحياه القاسيه دي كان راحت حريم خيلاني واولادم اول شي حيلعبو بي لعب وحبوبه مالا وبدعي ربي حبوبه مايحصل ليها حاجه ..

لحده ما جاء الدكتور طالع ..

قال ليهم للاسف ماحاقدر اعمل حاجه اكتر من كده .. ادعو ليها بس ..

وهي طالباكم خشو ليها ..

اول ماسمعت كلام الدكتور جري ع غرفه حبوبتي بقيت ماسكه ليها راسا ويدها وابوس فيها حبوبه عليك الله ماتخليني براي حبوبه انتي عارفه انا بحبك شديد ماتبعدي مني ..

جاء خالي الكبير الصادق .. حضني عليه .. يابت ياعويره مالك بتبكي حبوبه مافيها حاجه هسي بتبقى كويسه وتمشي معانا البيت انتي بس بطلي بكا عشان حبوبه ما تزعل منك ..

كانو حنينين علي شديد اليوم دا ..

ومشو خيلاني الاتنين عند حبوبتي ..

ماتخافي ياحجه الدكتور طمنا عليك وقال كم يوم بس تقعدي معاهم وتطلعي بيتك تنوري ..

ماتكذبو علي انا عارفه ما حاقوم تاني .. بس دايره اوصيكم ع رغد بت اختكم دي ختوها في عيونك البت يتيمه وماعندها غيري وانا متاكده انتو ما بتدوها عوجه بس حريمكم الله يهديهم .. بس كلمتكم دايريني اموت وانا رضيانه عليكم خلو بالكم من بت اختكم دي ..

ياحجه دا كلام شنو مافيك شي انتي بتقومي ب السلامه وتهتمي بيها انتي زاتك .. كانو عاملين قوين وببتسمو ليها ما دايرين يحسسوها ب شي ..

وانا قاعده جنبهم وسامعه الكلام وهمي كلو حبوبه ماتمش تخليني ..

عاينت لي كده قالت لي تعالي يارغد ..

جيتا حضنتني شديد وبقت توصي فيني في صلاتي ما اقطعا وابعد من اي غلط عشان ربنا مايزعل مني ..

وانا في حضنها وبسمع كلاما .. شويه وقفت كلام ..

حبوبه .. حبوبه .. حبوبه مالك وقفتي كلام .. حاضر حاسمع الكلام القلتي كلو ومابزعل ربنا .. انتي بس ارجعي لي .. عاينت ليها لقيتا مفتحه عيونا وبتعاين لي ..

حبوبه انتي سامعاني .. حبوبه ..

خيلاني طوالي قالو لي خلاص اطلعي ..

وانا اقول ليهم لا عايزه اقعد مع حبوبه .. انتو ماعايزني اقعد لي .. شويه خالي الصغير مشى غطا ليها عيونا ب يدو ..

لي عملتا ليها كده خليها صاحيه انا دايراها تتكلم معاي وقعدت ابكي واكورك ..

خالي لقى مافي حل غير يكلمي لانو هو زاتو متضايق وداير يبكي ..

قال لي رغد بس خلاص حبوبه ماتت مشت ل ربها .. وقعدو الاتنين يبكو ..

الوقت داك اول مره اعرف كلمه موت .. يعني حبوبه ماتت خلاص ..

حبوبه ماتت وانا عمري ١٢سنه ..

دا الكنت⁩ خايفه منو دا اليوم الكنت ما دايراهو يجي نهائي واهو جاء ..