İşlədiyi qurumlar və vəzifələr:

• 2016-2017-ci tədris illərindən, Misirin Qahirə Universitetinin Ədəbiyyat fakültəsində Azərbaycan dili müəllimi və fakültənin Şərq dilləri və Ərəb dili kafedrasında elmi rəhbərdir. 2024-cü ilə qədər 1500-dən çox misirliyə Azərbaycan dilini tədris etmişdir.

• Ümumdünya Fətva Qurumları Baş Katibliyinin xarici əlaqələr üzrə müşaviri.

• Misir-Azərbaycan Dostluq Cəmiyyətinin idarə heyətinin sədri

• Misirdə Azərbaycan Diasporunun sədri.

• Halqa Fondunun icraçı direktoru.

Elmi nailiyyətlər:

• 25 ildən çoxdur ki, ərəb mənbələrində Azərbaycanla bağlı tədqiqat aparır. 250-dən çox əslən azərbaycanlı olan alimlər haqqında iki kitab ərəbcə yazmışdır.

• Ərəb mənbələrində azərbaycanlı alim və ədiblər əsəri, Azərbaycan dilində 2022-ci ildə çap olunmuşdur.

• Misir kitabxanalarında yüzlərlə azərbaycanlı alimin əlyazma əsərlərini üzə çıxarmışdır.

• 15-dən çox elmi və publisist məqalərəri ərəb ölkələri və Azərbaycan jurnallarında ərəb və Azərbaycan dillərində dərc olunmuşdur.

• Dünyanın müxtəlif ölkələrində 20-dən çox beynəlxalq konfranslarda iştirak edərək çıxışlar etmişdir.    

Seymur Rahim oğlu Nəsirov 12 noyabr 1976-cı ildə Astara rayonunun Şüvi kəndində anadan olmuşdur. 1994-cü ildə A. İbrahimov adına Şüvi kənd orta məktəbini, 1998-ci ildə Bakı İslam Universitetini, 2002-ci ildə isə Əl-Əzhər Universitetinin İslamşünaslıq və Ərəb dili fakültəsini bitirmişdir. 2006-cı ildə Misir Fətva İdarəsində dörd illik təhsilini başa vurmuş və keçmiş SSRİ ölkələri arasında ilk dəfə fətva vermək icazəsi almışdır.

2011-ci ildə Qahirədə Açıq Amerika Universitetində Ərəb dili və ədəbiyyatı ixtisası üzrə magistratura təhsilini fərqlənmə ilə tamamlamışdır. Onun magistr dissertasiyası Azərbaycanda ərəb dili və ədəbiyyatının öyrənilmə tarixinə həsr olunmuşdur.

2020-ci ildə həmin universitetdə doktorluq təhsilini fərqlənmə ilə bitirmişdir. Tədqiqat mövzusu "Ərəb elminə xidmətdə azərbaycanlı alimlərin səyləri" olmuşdur. Seymur Nəsirovun elmi işinə Əl-Əzhər Universitetindən dəvət olunmuş tanınmış alimlər rəhbərlik etmişdir.

Seymur müəllim artıq 30 ilə yaxındır ki, Misirdə yaşayır. O, 1998-ci ildən ərəb mənbələrində Azərbaycan və azərbaycanlılar haqqında könüllü tədqiqatlar aparır. Bu müddət ərzində Misir kitabxanalarından 250-dən çox azərbaycanlı alimlərin əlyazmalarını üzə çıxarmış və onlar haqqında kitablar nəşr etdirmişdir.

2003-cü ildən Misirdə xarici ölkələrdən təhsil almaq üçün gələn tələbələrə rəhbərlik edir. Hal-hazırda dünyanın 65 ölkəsindən 2000-dən çox tələbəsi vardır.

2007-ci ildə "İrsi canlandırma və yerli inkişaf üzrə Halqa Fondunun təsisçilərindən biri və baş direktorudur. 2008-ci ildən "Qavafil əl-Xeyr və əl-Əməl" xeyriyyə cəmiyyətində xarici tələbələrin işi üzrə baş rəhbərdir. 2011-ci ildən, Misir əl-Xeyr fondunun xarici tələbələrin işi üzrə baş rəhbəridir. 2017-ci ildən, Qahirə Universitetinin Ədəbiyyat fakültəsində Azərbaycan dili müəllimidir. 2017-ci ildə, təsis etdiyi "Vətənpərvər"- Azərbaycaycanın Misirdə Diaspor Təşkilatları Birliyinin sədri olub. 2019-cu ildə, təşəbbüskarı və təsisçilərindən biri olduğu "Misir-Azərbaycan Dostluq Cəmiyyətinin" sədridir.

S. Nəsirovun Azərbaycan mədəniyyətinə gətirdiyi əsas töhfələrdən biri Qurani-Kərimdə "Azərbaycan" sözünün və Bakı neftinin yer aldığını elmi əsaslarla sübut etməsidir. Nizaminin Azərbaycanın Gəncə şəhərindən olduğunu göstərən dəlilləri də ərəb mənbələrində ilk araşdıran məhz Seymur Nəsirov olub. Həmçinin, o, Xəmsənin 6 əlyazma nüsxəsini Misir kitabxanalarında aşkarlamışdır. Orta şərqi, O cümlədən Tunisdən Yəmənə qədər böyük bir ərazini işğaldan azad edən və bir neçə əsr sultanı olmuş Əyyubilərin əslən azərbaycanlı olduğunu da ərəb mənbələrində üzə çıxarmış və ermənilərin Əyyubilərin özlərinə nisbət edib yazdıqları məqalələrdəki istinad etdikləri 10 cildlərlə ensiklopedik mənbələri yenidən araşdıraraq, onların yalanını ifşa etmişdir.

Bundan başqa, tədqiqatçı dəfələrlə konfrans, simpozium və forumlarda bu mövzularda mühazirələr etmişdir. Bunlara 2011-ci ildə Misirin Aynu-şəms Universitetinin Ədəbiyyat fakültəsində "Azərbaycanla Misir arasında tarixi əlaqələr" mövzusunda keçirilən konfransı, 2011-ci ildə Qahirə Universitetinin Ədəbiyyat fakültəsində təşkil olunmuş "Azərbaycanı tanı" mövzulu simpoziumu, 2012-ci ildə Əzhər Universitetində "Azərbaycan ilə Misir arasında diplomatik əlaqələrin qurulmasının 20 illiyi: nailiyyətlər və perspektivlər" və 2014-cü ildə Qahirə Universitetinin Siyasi elmlər və İqtisadiyyat fakültəsində "Azərbaycanın bu günü və gələcəyi" konfransı, 2017-ci il Ərəb Ölkələri Liqası,  UNESCO və Əl-Əzhər Universitetinin birgə təşkil etdiyi "Radikalizmlə birgə mübarizə və dialoqun gücləndirilməsi" beynəlxalq forumu misal göstərmək olar.

2016–2017-ci illərdə Qahirə Universitetinin Ədəbiyyat fakültəsində Azərbaycan dilinin tədrisinə başlayıb.2017–2023-cü illərdə 1400-dən çox misirli tələbəyə Azərbaycan dilini tədris etmişdir. Hər il yüzlərlə tələbəyə Azərbaycan dilini tədris edir. 2020-ci ildə Qahirə Universitetinin Ədəbiyyat fakültəsində tədris etdiyi tələbələrdən birinə elmi rəhbərbər təyin olunmuşdur. Hədəfi misirlilər arasında Azərbaycan dilini tədris edə bilən mütəxəssislər yetişdirməkdir. 2014-cü ildə təsis etdiyi Azərbaycan diasporu mərkəzində, Azərbaycan dili ilə yanaşı müxtəlif fənnlər tədris olunur. Hal-hazırda dünyanın müxtəlif ölkələrindən yüzlərlə tələbə, aralarında azərbaycanlılar da olmaqla ödənişsiz təhsil alır.

Seymur Nəsirov 1998-ci ildən bəri ərəb mənbələrində Azərbaycan və azərbaycanlılar haqqında könüllü tədqiqat aparır. Bu müddətdə yüzlərlə əslən azərbaycanlı olan alimlərin əlyazmalarını Misir kitabxanalarında üzə çıxarmağa müvəffəq olmuşdur. Onun bu araşdırmalarından ərsəyə gəlmiş, "Ərəb mənbələrində azərbaycanlıların həyat və yaradıcılıqları" adlı ilk əsəri çap edildikdən sonra Misirin tanınmış universitetlərində təqdimatı keçirilmişdir. Onun ilk kitabında yüz azərbaycanlı alim və ədiblər haqqında yazmışdır. Təlif etdiyi ikinci kitabında isə yüz əlli azərbaycanlı alim haqqında yazmışdır. Seymur Nəsirovun bu mövzuda, müxtəlif qəzetlərdə, elmi və publisistik jurnallarda, ərəb və Azərbaycan dillərində çoxsaylı məqalələri dərc olunmuşdur.

O, Misirdə Azərbaycan diasporunun rəhbəri və Misir-Azərbaycan Dostluq Cəmiyyətinin sədridir. Həmçinin Dünya Azərbaycan Alimlər Birliyinin həmtəsisçisi və həmsədridir. Qahirə Universitetinin doktorudur və orada Azərbaycan dilini tədris edir. Universitetin həm Şərq dilləri, həm də Ərəb dilləri fakültələrində elmi rəhbər vəzifəsində çalışır.

Seymur Nəsirov 2003-cü ildən bəri Misirdə 100-dən çox ölkədən təhsil almağa gələn 1000-lərlə tələbəyə rəhbərlik etmiş və onların vasitəsilə Azərbaycan həqiqətlərini dünyada çatdırmışdır.  O, bu xidmətlərinə görə çoxsaylı mükafatlara və medallara layiq görülmüşdür:

• Azərbaycan diasporunun inkişafı sahəsindəki xidmətlərinə görə "Tərəqqi" medalı ilə təltif edilmişdir.

• Misirlə Azərbaycan arasında mədəni və elmi əlaqələrin inkişafında göstərdiyi müstəsna xidmətlərə görə 2018-ci il 18 iyul tarixində "Misir Təhsil Nazirliyinin medalı" ilə təltif olunmuşdur.

• 2020-ci ildə ölkəmizin diaspor siyasətinə verdiyi töhfələrə görə "Diaspor fəaliyyətində xidmətə görə" medalı ilə təltif edilmişdir.

• 2024-cü ildə Əl-Əzhər Universitetində təhsil alan Ərəb Ölkələri Tələbələr Birliyi (ƏÖTB) tərəfindən fəxri mükafatla təltif olunmuşdur.

• 2024-cü ildə Azərbaycançılıq ideyasının həyata keçirilməsində, dünya azərbaycanlılarının həmrəyliyinin möhkəmləndirilməsində xidmətlərinə görə "Heydər Əliyevin 100 illiyi (1923-2023)" yubiley medalı ilə təltif edilmişdir.

2025-ci il sentyabrın 3-də Misir Prezidenti Əbdülfəttah Əs-Sisi tərəfindən birinci dərəcəli "Elm və fənlər" ordeni ilə təltif edilib. Seymur Nəsirov Misirdə yaşayan əcnəbilər arasında bu ordenlə təltif olunan ilk şəxsdir.

2025-ci il oktyabrın 1-də Misir Ərəb Respublikası ilə Azərbaycan Respublikası arasında elmi-mədəni əlaqələrin inkişafında xidmətlərinə görə Misir Təhsil Nazirliyinin medalı ilə təltif olunub və Bakıda Misir Mədəniyyət Mərkəzi tərəfindən təşəkkürnamə ilə mükafatlandırılıb.