Гісторыка - краязнаўчы музей “Спадчына”
Калі лёсам нашай вёсачкі Вы зацікаўлены,
І гісторыю краю Вам хочацца ведаць бліжэй, -
Што тады, спадары і спадарыні, зробіце?- Правільна!
Вы хадою ўпэўненай пойдзеце прама ў школьны музей.
А ў Кашалеўскім музеі “Спадчына”
Вас сустрэнуць здабыткі і скарбы сівой даўніны –
Адгалоскі былога жыцця ў дамах і паселішчах,
Рарытэтныя сведкі гісторыі, разбурэнняў і жахаў вайны.
Немагчыма выхаваць сапраўдных патрыётаў без павагі да памяці продкаў. Наш школьны музей – гэта не проста матэрыялы аб гісторыі вёскі і ветэранах, не толькі стварэнне экспазіцый,- гэта шматгранная дзейнасць, накіраваная на павышэнне якасці адукацыі, выхаванне патрыятызму, фарміраванне гістарычнай свядомасці вучняў. Мы хочам, каб будучае пакаленне разумела, якая цана заплачана за цяперашні мірны час.
У школьным музеі працуе экспазіцыя, якая раскрывае важнейшыя падзеі Вялікай Айчыннай вайны і ўтрымлівае шэраг разнастайных і каштоўных музейных прадметаў. Захоўваюцца звесткі аб 120 жыхарах сельскага савета, якія ваявалі на франтах Вялікай Айчыннай вайны і не вярнуліся дадому. Карпатлівай працай многіх педагогаў, вучняў і іх бацькоў сабраны матэрыялы, прысвечаныя ветэранам вайны – жыхарам Кашалеўскага сельсавета, партызанскаму руху і дзейнасці падпольшчыкаў, успаміны нашых землякоў аб гадах акупацыі, аб перыядзе вызвалення і вяртання да мірнага жыцця. На асобным стэндзе утрымліваецца шэраг разнастайных і каштоўных прадметаў, якімі карысталіся партызаны, падпольшчыкі, а таксама ўдзельнікі баявых дзеянняў: каскі савецкіх воінаў, кацялкі і пляшкі нашых гераічных партызан, фрагменты салдацкай зброі.
Найбольш унікальны экспанат музея- нумар газеты “Звязда”, які датуецца чэрвенем 1942 года. Цікава, што гэта першы нумар газеты, якая пачала друкавацца Мінскім гаркамам КПБ (б) у гады акупацыі. На пажоўклых старонках- весткі з франтоў, зварот да партызанаў, партызанскія навіны. Важнае месца сярод музейных прадметаў заняў макет даваеннай вёскі Каменка, спаленай фашыстамі 17 мая 1943 года. Дадзены музейны аб’ект быў зроблены сіламі настаўнікаў і вучняў у 2022 годзе. Таксама ў мінулым годзе адзін з міні- стэндаў папоўніўся новым актуальным матэрыялам: копіяй следчай справы здрадніка-паліцая з г. Навагрудка Канапацкага І.С. Гэтыя дакументы, звязаныя з генацыдам беларускага народа, былі перададзены нашай школе супрацоўнікамі раённай пракуратуры.
Экспазіцыя “Побыт сялян у канцы 19 - пач.20 ст.” прадстаўляе сабой беларускую вясковую хату. У невялікім пакоі сабраны прылады працы і прадметы быту сялян:сякера, сярпы, цапы для абмалоту зерня, ухваты, драўляны ганчарны круг, кубелец, плецены з лазы кошык, прас, мышалоўка і інш. Наша сялянская хата багата і прыладамі, якія выкарыстоўваліся пры прадзенні і ткатцтве: калаўрот, грабяні для часання ільну, матавілы, сукалы, ніценкі, бёрды і чаўнакі.
Пачэснае месца ў вясковай хаце займае покуць са сталом і лавамі, дзіцячай калыскай і мастацкімі вырабамі. Насупраць прадстаўлена разнастайная калекцыя ганчарнага посуду і прадметаў, вытканых на простым ткацкім станку: нацыянальныя мужчынскі і жаночы касцюмы, посцілкі, абрусы, ручнікі, паясы.
У школьным музеі нашымі юнымі выхаванцамі ваенна-патрыятычнага клуба “Даследчыкі” праводзіцца шэраг тэматычных экскурсій: “І помніць свет выратаваны”; “Нам родную зямлю наканавана зберагчы”; “Адкрываючы старонкі Афганскай вайны…”; “Беларуская вёска: побыт і традыцыйная культура”. Змест усіх форм работы: разнастайных і пазнавальных экскурсій, лекцый, выстаў, праектаў і музейных урокаў адаптаваны для наведвальнікаў розных узроставых катэгорый, пачынаючы з самых малодшых школьнікаў.
Гісторыка-краязнаўчы музей “Спадчына” Кашалеўскай базавай школы чакае паважаных гасцей на працягу ўсяго навучальнага года кожны дзень з 9.00 да 16.00, нядзеля - выхадны.
Экспазіцыя 1. "Наш край у гады Вялікай Айчыннай вайны"
Макет вёскі Каменка
120 загінуўшых землякоў
Прысяга партызан
Асабовы лісток Мазура Я.А
Газета "Звязда" №1
Архіўны дакумент (копія)
Ліхтарык чыгуначны
Экспазіцыя 2. "Побыт і традыцыі сялян у канцы 19 ст. - пачатку 20 ст. "
Прадметы побыту
Калыска (люлька)
Дэкаратыўна-прыкладное мастацтва
Ганчарныя вырабы
Ільняная вышыўка
Экспазіцыя 3. "Афганістан - наш боль"
Ліст дадому І.Пісарука
Камсамольскі білет Івана Пісарука
Адрас:
Гродзенская вобл., Навагрудскі р-н., в. Кашалева,
вул. Цэнтральная, 36
тэл.: 80159742529
e-mail: nov_koschelevo@yonovogrudok.by
Графік работы:
Кожны дзень з 9.00 да 16.00
Нядзеля - выхадны.