ໜ້າຫຼັກ

ສະຖິຕິການສ້າງຄູ

ເອກະສານຕ່າງໆ

ບຸກຄະລາກອນ

ກອງປະຊຸມດັດປັບກອບສະມັດຖະພາບດ້ານປັນຍາປະດິດ (AI) ເຂົ້າໃນມາດຕະຖານສະມັດຖະພາບດ້ານ ICT ສຳລັບຄູໃນ ສປປ ລາວ

ໃນວັນທີ 03 - 07 ພະຈິກ 2025 ກົມສ້າງຄູ ຮ່ວມກັບຄູ່ຮ່ວມພັດທະນາ UNESCO Bangkok ໄດ້ຈັດກອງປະຊຸມດັດປັບກອບສະມັດຖະພາບດ້ານປັນຍາປະດິດ (AI) ເຂົ້າໃນມາດຕະຖານສະມັດຖະພາບດ້ານ ICT ສຳລັບຄູໃນ ສປປ ລາວ ທີ່ ໂຮງແຮມເດີແກຣມລີເວີຊາຍ 02, ເມືອງວັງວຽງ ແຂວງວຽງຈັນ. ໃຫ້ກຽດເປັນປະທານໃນຄັ້ງນີ້ ແມ່ນ ທ່ານ ຮສ ນ. ວົງເດືອນ ໂອໃສ ຫົວໜ້າກົມສ້າງຄູ ແລະ ທ່ານ ນິນີ ທັອງ, ຊ່ຽງຊານໂຄງການ, ອຸຍແນສໂກບາງກອກ. ກອງປະຊຸມຄັ້ງນີ້ໄດ້ຈັດເປັນເວລາ 5 ວັນ ເຊິ່ງມີຜູ້ເຂົ້າຮ່ວມທັງໝົດ 44 ທ່ານ, ຍິງ 14 ທ່ານ, ເຊີ່ງໃນນັ້ນມາຈາກ ກົມສ້າງຄູ, ສະຖາບັນຄົ້ນຄວ້າວິທະຍາສາດການສຶກສາ, ຄູສອນ ICT ຈາກສະຖາບັນສ້າງຄູ 10 ແຫ່ງ (ຄະນະສຶກສາສາດ 2 ແຫ່ງ ແລະ ວິທະຍາໄລຄູ 8 ແຫ່ງ), ຜູ້ອໍານວຍການ ແລະ ຄູຈາກໂຮງຮຽນອະນຸບານສາທິດ ດົງຄໍາຊ້າງ, ໂຮງຮຽນປະຖົມ ໂສກປ່າຫຼວງ, ໂຮງຮຽນມັດທະຍົມສົມບູນວຽງຈັນ, ໂຮງຮຽນມັດທະຍົມສົມບູນສາທິດຫຼວງພະບາງ, ໂຮງຮຽນມັດທະຍົມຕອນປາຍສົງປາກເຊ, ຄະນະຮັບຜິດຊອບຈາກອົງການອຸຍແນສໂກບາງກອກ ແລະ ຄະນະຊ່ຽວຊານຈາກ ອົງການອຸຍແນສໂກບາງກອກ ຄະນະສຶກສາສາດ ມະຫາວິທະຍາໄລສິລະປະກອນ ປະເທດໄທ (ເຂົ້າຮ່ວມເປັນຄູຝຶກ).

ຈຸດປະສົງຂອງກອງປະຊຸມໃນຄັ້ງນີ້ ປະກອບມີ:

ເພື່ອທົບທວນ ແລະ ປັບປຸງກອບສະມັດຖະພາບດ້ານປັນຍາປະດິດ (ICT-AI) ສຳລັບຄູໃນ ສປປ ລາວ;
ເພື່ອພັດທະນາໂມດູນການຝຶກອົບຮົມຄູປະຈຳການທີ່ອີງໃສ່ກອບສະມັດຖະພາບດ້ານປັນຍາປະດິດ.

ກອງປະຊຸມຝືກອົບຮົມຄູສອນ ສາຍສ້າງຄູປະຖົມ ກ່ຽວກັບການນຳໃຊ້ ຄູ່ມືແນະນຳການຈັດການຮຽນການສອນໃນຮູບແບບ LCA ສຳລັບໃນສະຖານການສ້າງຄູ

ໃນວັນທີ 04 - 08 ພະຈິກ 2025 ໄດ້ຈັດກອງປະຊຸມຝຶກອົບຮົມຄູສອນ ສາຍສ້າງຄູປະຖົມ ກ່ຽວກັບການນຳໃຊ້ ຄູ່ມືແນະນຳການຈັດການຮຽນການສອນໃນຮູບແບບ LCA ສຳລັບໃນສະຖານການສ້າງຄູ ທີ່ ວິທະຍາໄລຄູ ບ້ານເກິນ, ເມືອງທຸລະຄົມ ແຂວງວຽງຈັນ. ໃຫ້ກຽດເປັນປະທານໃນຄັ້ງນີ້ ແມ່ນ ທ່ານ ຮສ. ນາງ ວົງເດືອນ ໂອໃສ ຫົວໜ້າກົມສ້າງຄູ ກອງປະຊຸມຄັ້ງນີ້ໄດ້ຈັດເປັນເວລາ 5 ວັນ ເຊິ່ງມີຜູ້ເຂົ້າຮ່ວມທັງໝົດ 59 ທ່ານ, ຍິງ 34 ທ່ານ, ເຊີ່ງໃນນັ້ນມາຈາກ ກົມສ້າງຄູ ກະຊວງສຶກສາທິການ ແລະ ກິລາ, ກົມການເງິນ, ສູນພັດທະນາຄູ ແລະ ວິທະຍາໄລຄູ 8 ແຫ່ງເຊິ່ງປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ ແລະ ວຄ ປາກເຊ.

ຈຸດປະສົງຂອງກອງປະຊຸມໃນຄັ້ງນີ້ ປະກອບມີ:

ເພື່ອນໍາສະເໜີບັນດາທິດສະດີ, ວິທີການຈັດການຮຽນການສອນ ແລະ ທັກສະການສອນ ໃນຮູບແບບທີ່ເນັ້ນຜູ້ຮຽນເປັນໃຈກາງ ( LCA) ;
ເພື່ອແນະນຳຄູສອນສາຍສ້າງຄູປະຖົມສຶກສາ ກ່ຽວກັບການນຳໃຊ້ ຄູ່ມືແນະນຳການຈັດການຮຽນການສອນໃນຮູບແບບ LCA;
ເພື່ອແນະນຳການແຕ່ງບົດສອນ ແລະ ຝຶກການຮຽນການສອນ ໃນຮູບແບບ LCA.

ກອງປະຊຸມ ປັບປຸງ ແລະ ຮຽບຮຽງເນື້ອໃນ

ຄູ່ມືແນະນຳການສອນ ສໍາລັບສາຍສ້າງຄູປະຖົມສຶກສາ

ໃນວັນທີ 30 ກັນຍາ - 2 ຕຸລາ 2025 ໄດ້ຈັດກອງປະຊຸມ ປັບປຸງ ແລະ ຮຽບຮຽງເນື້ອໃນຄູ່ມືແນະນຳການສອນ ສໍາລັບສາຍສ້າງຄູປະຖົມ ທີ່ ສູນຝຶກອົບຮົມຜູ້ບໍລິຫານການສຶກສາ, ເມືອງວັງວຽງ ແຂວງວຽງຈັນ. ໃຫ້ກຽດເປັນປະທານໃນຄັ້ງນີ້ ແມ່ນ ທ່ານ ຮສ. ນາງ ວົງເດືອນ ໂອໃສ ຫົວໜ້າກົມສ້າງຄູ ກອງປະຊຸມຄັ້ງນີ້ໄດ້ຈັດເປັນເວລາ 4 ວັນ ເຊິ່ງມີຜູ້ເຂົ້າຮ່ວມທັງໝົດ 42 ທ່ານ, ຍິງ 23 ທ່ານ, ເຊີ່ງໃນນັ້ນມາຈາກ ກົມສ້າງຄູ ກະຊວງສຶກສາທິການ ແລະ ກິລາ, ກົມການເງິນ, ສູນພັດທະນາຄູ ແລະ ວິທະຍາໄລຄູ 8 ແຫ່ງເຊິ່ງປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ ແລະ ວຄ ປາກເຊ.

ຈຸດປະສົງຂອງກອງປະຊຸມໃນຄັ້ງນີ້ ປະກອບມີ:

ເພື່ອທົບທວນຄືນດ້ານເນື້ອໃນຄູ່ມືແນະນຳການຈັດການຮຽນການສອນ ໃນຮູບແບບທີ່ເນັ້ນຜົນການຮຽນຂອງຜູ້ຮຽນເປັນຫຼັກ LCA (Learner Center Approach), ສໍາລັບ ສາຍສ້າງຄູປະຖົມ;ທີ່ໄດ້ພັດທະນາຂຶ້ນ ຄັ້ງຜ່ານມາ;
ເພື່ອຈັດລຽງຄືນບັນດາ ປະໂຫຍກ, ຄໍາສັບ, ເນື້ອໃນຄູ່ມື,ວິທີສິດສອນໃຫ້ສອດຄ່ອງ, ເໝາະສົມ ແລະ ເປັນເອກະພາບກັນ;
ກະກຽມແລະສ້າງແຜນຝຶກອົບຮົມຄູຝຶກໃນກອງປະຊຸມຕໍ່ໄປ .

ກອງປະຊຸມປຶກສາຫາລື ເພື່ອກຳນົດຂອບຄວາມຮູ້ ແລະ ເນື້ອໃນ ຄູ່ມືແນະນຳການຈັດການຮຽນການສອນ ໃນຮູບແບບ LCA ສຳລັບສາຍສ້າງຄູປະຖົມສຶກສາ ໃນສະຖານການສ້າງຄູ

ໃນວັນທີ 1 - 5 ກັນຍາ 2025 ໄດ້ຈັດກອງປະຊຸມ ປຶກສາຫາລື ເພື່ອກຳນົດຂອບຄວາມຮູ້ ແລະ ເນື້ອໃນ ຄູ່ມືແນະນຳການຈັດການຮຽນການສອນ ໃນຮູບແບບ LCA ສຳລັບສາຍສ້າງຄູປະຖົມສຶກສາ ໃນສະຖານການສ້າງຄູ ທີ່ ສູນຝຶກອົບຮົມຜູ້ບໍລິຫານການສຶກສາ, ເມືອງວັງວຽງ ແຂວງວຽງຈັນ.

ໃຫ້ກຽດເປັນປະທານໃນຄັ້ງນີ້ ແມ່ນ ທ່ານ ຮສ. ນາງ ວົງເດືອນ ໂອໃສ ຫົວໜ້າກົມສ້າງຄູ ກອງປະຊຸມຄັ້ງນີ້ໄດ້ຈັດເປັນເວລາ 5 ວັນ ເຊິ່ງມີຜູ້ເຂົ້າຮ່ວມທັງໝົດ 42 ທ່ານ, ຍິງ 21 ທ່ານ, ເຊີ່ງໃນນັ້ນມາຈາກ ກົມສ້າງຄູ ກະຊວງສຶກສາທິການ ແລະ ກິລາ, ກົມການເງິນ, ສູນພັດທະນາຄູ ແລະ ວິທະຍາໄລຄູ 8 ແຫ່ງເຊິ່ງປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ ແລະ ວຄ ປາກເຊ.

ຈຸດປະສົງຂອງກອງປະຊຸມໃນຄັ້ງນີ້ ປະກອບມີ:

ເພື່ອພັດທະນາເນື້ອໃນ ຄູ່ມືແນະນຳການຈັດການຮຽນການສອນໃນຮູບແບບ LCA;
ເພື່ອທົບທວນຄືນບັນດາເນື້ອໃນ ແລະ ຮູບແບບການອນທີ່ກ່ຽວຂ້ອງກັບ LCA ພ້ອມທັງວາງແຜນການຈັດຕັ້ງປະຕິບັດໃນຕໍ່ໜ້າ.

ກອງປະຊຸມຜ່ານ ແລະ ຮັບຮອງ ຮ່າງ ປະເມີນ ມາດຕະຖານການສອນຂອງຄູ ໃນຊັ້ນມັດທະຍົມສຶກສາ

ໃນວັນທີ 25 - 26 ມິຖຸນາ 2025 ໄດ້ຈັດກອງປະຊຸມ ຜ່ານ ແລະ ຮັບຮອງ ຮ່າງ ປະເມີນ ມາດຕະຖານການສອນຂອງຄູ ໃນຊັ້ນມັດທະຍົມສຶກສາ ທີ່ ວິທະຍາໄລຄູບ້ານເກິນ, ເມືອງທຸລະຄົມ ແຂວງວຽງຈັນ.

ໃຫ້ກຽດເປັນປະທານໃນຄັ້ງນີ້ ແມ່ນ ທ່ານ ປອ. ນາງ ດາລາວອນ ກິດຕິພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ. ກອງປະຊຸມຄັ້ງນີ້ໄດ້ຈັດເປັນເວລາ 2 ວັນ ເຊິ່ງມີຜູ້ເຂົ້າຮ່ວມທັງໝົດ 58 ທ່ານ, ຍິງ 18 ທ່ານ, ເຊີ່ງໃນນັ້ນມາຈາກ ກົມສ້າງຄູ ກະຊວງສຶກສາທິການ ແລະ ກິລາ, ກົມສາມັນສຶກສາ, ກົມການເງິນ, ກົມຈັດຕັ້ງ ແລະ ພະນັກງານ, ກົມປະກັນຄຸນນະພາບການສຶກສາ, ກົມການສຶກສາຊັ້ນສູງ, ຄະນະສຶກສາສາດ ມຊ, ຄະນະສຶກສາສາດ ມຂ, ສະຖາບັນຄົ້ນຄວ້າວິທະຍາສາດການສຶກສາ, ຫ້ອງການໂຄງການ EESPD, ໂຮງຮຽນມັດທະຍົມສາທິດ 5 ແຫ່ງ ແລະ ວິທະຍາໄລຄູ 8 ແຫ່ງເຊິ່ງປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ ແລະ ວຄ ປາກເຊ.

ຈຸດປະສົງຂອງກອງປະຊຸມໃນຄັ້ງນີ້ ປະກອບມີ:

ເພື່ອສະເໜີຜ່ານເນື້ອໃນ ມາດຕະຖານການສອນສຳລັບຄູ ໃນຊັ້ນມັດທະຍົມສຶກສາ;
ເພື່ອປະກອບຄຳເຫັນໃສ່ ມາດຕະຖານການສອນສຳລັບຄູ ໃນຊັ້ນມັດທະຍົມສຶກສາ;
ເພື່ອຜ່ານ ແລະ ຮັບຮອງ ມາດຕະຖານການສອນສຳລັບຄູ ໃນຊັ້ນມັດທະຍົມສຶກສາ.

ກອງປະຊຸມຮຽບຮຽງ ແລະ ຜ່ານຮັບຮອງ ເຄື່ອງມືບົດທົດສອບຜົນການຮຽນຮູ້ຂອງນັກສຶກສາຄູປີສຸດທ້າຍ

ໃນວັນທີ 23-24 ມິຖຸນາ 2025 ໄດ້ຈັດກອງປະຊຸມ ຮຽບຮຽງ ແລະ ຜ່ານຮັບຮອງ ເຄື່ອງມືບົດທົດສອບຜົນການຮຽນຮູ້ຂອງນັກສຶກສາຄູປີສຸດທ້າຍ ທີ່ ວິທະຍາໄລຄູບ້ານເກິນ, ເມືອງທຸລະຄົມ ແຂວງວຽງຈັນ.

ໃຫ້ກຽດເປັນປະທານໃນຄັ້ງນີ້ ແມ່ນ ທ່ານ ຮສ ນາງ ວົງເດືອນ ໂອໃສ ວ່າການແທນຫົວໜ້າກົມສ້າງຄູ. ກອງປະຊຸມຄັ້ງນີ້ໄດ້ຈັດເປັນເວລາ 2 ວັນ ເຊິ່ງມີຜູ້ເຂົ້າຮ່ວມທັງໝົດ 56 ທ່ານ, ຍິງ 21 ທ່ານ, ເຊີ່ງໃນນັ້ນມາຈາກ ກົມສ້າງຄູ ກະຊວງສຶກສາທິການ ແລະ ກິລາ, ກົມສາມັນສຶກສາ, ກົມການເງິນ, ກົມຈັດຕັ້ງ ແລະ ພະນັກງານ, ກົມປະກັນຄຸນນະພາບການສຶກສາ, ກົມການສຶກສາຊັ້ນສູງ, ຄະນະສຶກສາສາດ ມຊ, ຄະນະສຶກສາສາດ ມຂ, ສະຖາບັນຄົ້ນຄວ້າວິທະຍາສາດການສຶກສາ, ຫ້ອງການໂຄງການ EESPD, ວິທະຍາໄລຄູ 8 ແຫ່ງເຊິ່ງປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ ແລະ ວຄ ປາກເຊ.

ຈຸດປະສົງຂອງກອງປະຊຸມໃນຄັ້ງນີ້ ປະກອບມີ:

ເພື່ອສະເໜີຜ່ານເນື້ອໃນບົດທົດສອບການຮຽນຮູ້ຂອງນັກສຶກສາຄູປີສຸດທ້າຍ;
ເພື່ອປະກອບຄຳເຫັນໃສ່ເນື້ອໃນບົດທົດສອບການຮຽນຮູ້ຂອງນັກສຶກສາຄູປີສຸດທ້າຍ;
ເພື່ອຜ່ານ ແລະ ຮັບຮອງເນື້ອໃນບົດທົດສອບການຮຽນຮູ້ຂອງນັກສຶກສາຄູປີສຸດທ້າຍ.

ກອງປະຊຸມທົບທວນເນື້ອໃນມາດຕະຖານ ແລະ ແບບຟອມການຕິດຕາມ ແລະ ປະ ເມີນຜົນການຈັດຕັ້ງປະຕິບັດມາດຕະຖານການສອນສຳລັບຄູ ໃນສະຖານການສ້າງຄູ

ໃນວັນທີ 1-5 ກໍລະກົດ 2024 ໄດ້ຈັດກອງປະຊຸມ ທົບທວນເນື້ອໃນມາດຕະຖານ ແລະ ແບບຟອມການຕິດຕາມ ແລະ ປະເມີນຜົນການຈັດຕັ້ງປະຕິບັດມາດຕະຖານການສອນສຳລັບຄູໃນສະຖານການສ້າງຄູທີ່ ວິທະຍາໄລຄູບ້ານເກິນ, ເມືອງທຸລະຄົມ ແຂວງວຽງຈັນ.

ໃຫ້ກຽດເປັນປະທານໃນຄັ້ງນີ້ ແມ່ນ ທ່ານ ຮສ ນາງ ວົງເດືອນ ໂອໃສ ຮອງຫົວໜ້າກົມສ້າງຄູ. ກອງປະຊຸມຄັ້ງນີ້ໄດ້ຈັດເປັນເວລາ 5 ວັນ ເຊິ່ງມີຜູ້ເຂົ້າຮ່ວມທັງໝົດ 24 ທ່ານ, ຍິງ 6 ທ່ານ, ເຊີ່ງໃນນັ້ນມາຈາກ ກົມສ້າງຄູ ກະຊວງສຶກສາທິການ ແລະ ກິລາ, ກົມແຜນການ, ກົມປະກັນຄຸນນະພາບການສຶກສາ, ກົມການສຶກສາຊັ້ນສູງ, ຄະນະສຶກສາສາດ ມຊ , ວິທະຍາໄລຄູ 8 ແຫ່ງເຊິ່ງປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ ແລະ ວຄ ປາກເຊ.

ຈຸດປະສົງຂອງກອງປະຊຸມໃນຄັ້ງນີ້ ປະກອບມີ:

ເພື່ອຄົ້ນຄວ້າຄືນເນື້ອໃນມາດຕະຖານການ ແລະ ແບບຟອມການຕິດຕາມ ແລະ ປະເມີນຜົນການຈັດຕັ້ງປະຕິບັດມາດຕະຖານການສອນສຳລັບຄູ ໃນສະຖານການສ້າງຄູ (ທຽບໃສ່ຄຳເຫັນຂອງຊຽວຊານ)
ເພື່ອປັບປຸງເນື້ອໃນມາດຕະຖານ ແລະ ແບບຟອມການຕິດຕາມ ແລະ ປະເມີນຜົນການຈັດຕັ້ງປະຕິບັດມາດຕະຖານການສອນສຳລັບຄູ ໃນສະຖານການສ້າງຄູ
ເພື່ອວາງແຜນວຽກໃນຕໍ່ໜ້າ.

ກອງປະຊຸມຄັ້ງທີ 1: ການພັດທະນາໂມດູນການສອນວິຊາ "ICT ສຳລັບການພັດທະນາວິຊາຊິບຄູ" ຂອງຫຼັກສູດສ້າງຄູ ທຸກຊັ້ນ-ທຸກສາຍ ໃນ ສປປ ລາວ

ໃນວັນທີ 24-28 ມິຖຸນາ 2024 ກົມສ້າງຄູ ຮ່ວມກັບຄູ່ຮ່ວມພັດທະນາ UNESCO Bangkok ໄດ້ຈັດກອງປະຊຸມຄັ້ງທີ1: ການພັດທະນາໂມດູນການສອນວິຊາ "ICT ສຳລັບການພັດທະນາວິຊາຊິບຄູ" ທີ່ ສູນຝຶກອົບຮົມຜູ້ບໍລິຫານການສຶກສາ, ເມືອງວັງວຽງ ແຂວງວຽງຈັນ.

ໃຫ້ກຽດເປັນປະທານໃນຄັ້ງນີ້ ແມ່ນ ທ່ານ ເກດ ພັນລັກ ຫົວໜ້າກົມສ້າງຄູ. ກອງປະຊຸມຄັ້ງນີ້ ມີຜູ້ເຂົ້າຮ່ວມທັງໝົດ 29 ທ່ານ, ຍິງ 6 ທ່ານ, ເຊີ່ງໃນນັ້ນມາຈາກ ກົມສ້າງຄູ ກະຊວງສຶກສາທິການ ແລະ ກິລາ, ອົງການອຸຍເນດໂກບາງກອກ, ຄະນະສຶກສາສາດ ມະຫາວິທະຍາໄລແຫ່ງຊາດ, ຄະນະສຶກສາສາດ ມະຫາວິທະຍາໄລສຸພານຸວົງ ແລະ ວິທະຍາໄລຄູ 8 ແຫ່ງເຊິ່ງປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ ແລະ ວຄ ປາກເຊ.

ຈຸດປະສົງຂອງກອງປະຊຸມໃນຄັ້ງນີ້ ປະກອບມີ:

ເສີມຂະຫຍາຍຄວາມເຂົ້າໃຈຂອງຜູ້ເຂົ້າຮ່ວມກ່ຽວກັບການປະຕິຮູບການຝຶກອົບຮົມຄູໂດຍອີງໃສ່ສະມັດຖະພາບ ແລະ ຄວາມສຳຄັນຂອງການເຊື່ອມໂຍງວິທີການສິດສອນທີ່ນຳໃຊ້ ICT ເຂົ້າໃນລະບົບການສຶກສາຂອງ ສປປ ລາວ.
ເພື່ອໃຫ້ຜູ້ເຂົ້າຮ່ວມມີຄວາມຄຸ້ນເຄີຍ ກັບ ICT-CST ແລະ ການເຊື່ອມໂຍງ ICT-CST ເຂົ້າໃນຫຼັກສູດສ້າງຄູ ແລະ ການຝຶກອົບຮົມຄູ.
ເພື່ອໃຫ້ຜູ້ເຂົ້າຮ່ວມມີຄວາມຮູ້ພາກປະຕິບັດ, ເຄື່ອງມື ແລະ ຍຸດທະສາດທີ່ຈຳເປັນໃນການອອກແບບໂມດູນການສອນວິຊາ ICT ສໍາລັບການພັດທະນາວິຊາຊີບຄູ ຢ່າງມີປະສິດທິພາບ.
ເພື່ອຮ່ວມມືກັນພັດທະນາໂມດູນການສອນວິຊາ ICT ສຳລັບການພັດທະນາວິຊາຊີບຄູ ໃຫ້ສອດຄ່ອງກັບ ICT-CST ແລະ ຫຼັກສູດລາຍວິຊາໃໝ່.
ເພື່ອສ້າງແຜນການຈັດຕັ້ງປະຕິບັດຢ່າງຈະແຈ້ງ ສໍາລັບການເຜີຍແຜ່ລາຍວິຊາ ICT ສໍາລັບການພັດທະນາວິຊາຊີບຄູ ລວມເຖິງວິທີການຕິດຕາມ, ປະເມີນ ແລະ ຕິດຕາມຜົນກະທົບຕໍ່ຄວາມສາມາດຂອງຄູ.

ຈຸດປະສົງການຮຽນຮູ້

ຫຼັງຈາກເຂົ້າຮ່ວມກອງປະຊຸມຄັ້ງນີ້, ຜູ້ເຂົ້າຮ່ວມຈະສາມາດ:

ເຂົ້າໃຈການປະຕິຮູບການພັດທະນາຄູໂດຍອີງໃສ່ສະມັດຖະພາບ ແລະ ຄວາມສໍາຄັນຂອງການເຊື່ອມໂຍງ ICT ແລະ ວິທີການສິດສອນເຂົ້າໃນລະບົບການສຶກສາຂອງ ສປປ ລາວ.
ມີຄວາມຄຸ້ນເຄີຍກັບ ICT-CST ທີ່ໄດ້ຮັບການຮັບຮອງ ແລະ ການນຳ ICT-CST ເຂົ້າໃນຫຼັກສູດສ້າງຄູ ແລະ ການຝຶກອົບຮົມຄູ.
ຮ່ວມມືກັນອອກແບບ ແລະ ສ້າງໂຄງປະກອບໂມດູນການສອນວິຊາ ICT ສຳລັບການພັດທະນາວິຊາຊີບຄູ ທີ່ສອດຄ່ອງກັບ ICT-CST ແລະ ຫຼັກສູດລາຍວິຊາ ICT ສຳລັບການພັດທະນາວິຊາຊີບຄູ ໃໝ່.
ເຂົ້າໃຈວິທີການນໍາໃຊ້ເຄື່ອງມື ICT, ແອັບພລິເຄຊັນ, ແລະ ຊັບພະຍາກອນທີ່ຈະສອນໃນລາຍວິຊາ ICT ສໍາລັບການພັດທະນາວິຊາຊີບຄູ.
ນຳໃຊ້ຍຸດທະສາດ, ເຄື່ອງມື ແລະ ການປະຕິບັດທີ່ດີທີ່ສຸດສຳລັບການອອກແບບໂມດູນການສອນວິຊາ ICT ສໍາລັບການພັດທະນາວິຊາຊີບຄູ.
ເຂົ້າໃຈຂັ້ນຕອນ ແລະ ການພິຈາລະນາທີ່ກ່ຽວພັນກັບການສ້າງແຜນຈັດຕັ້ງປະຕິບັດຢ່າງຈະແຈ້ງ ສຳລັບການເຜີຍແຜ່ລາຍວິຊາ ICT ສຳລັບການພັດທະນາວິຊາຊີບຄູ, ລວມເຖິງວິທີການຕິດຕາມ, ປະເມີນຜົນ ແລະ ການຕິດຕາມຜົນກະທົບຕໍ່ຄວາມສາມາດຂອງຄູ.

ຜົນໄດ້ຮັບຂອງກອງປະຊຸມ

ໂດຍພິຈາລະນາຈຸດປະສົງຂອງກອງປະຊຸມ, ຜົນໄດ້ຮັບທີ່ຄາດຫວັງປະກອບມີ:

ຮ່າງໂມດູນການສອນວິຊາ ICT ສໍາລັບການພັດທະນາວິຊາຊີບຄູ ລວມທັງແຜນການສອນທີ່ສອດຄ່ອງກັບ ICT-CST ເພື່ອສະໜັບສະໜູນຫຼັກສູດສ້າງຄູທີ່ເຊື່ອມໂຍງກັບ ICT ໂດຍອີງໃສ່ສະມັດຖະພາບຂອງຄູ.
ແຜນວຽກເພື່ອເຮັດໃຫ້ການພັດທະນາໂມດູນການສອນສຳເລັດ ແລະ ຜ່ານການຮັບຮອງ ກ່ອນການຝຶກອົບຮົມ ແລະ ກິດຈະກຳສ້າງຂີດຄວາມສາມາດໃຫ້ແກ່ຄູໃນສະຖານການສ້າງຄູທີ່ກ່ຽວຂ້ອງ.
ຜູ້ເຂົ້າຮ່ວມມີຄວາມເຂົ້າໃຈເພີ່ມຕື່ມກ່ຽວກັບຂະບວນການສ້າງໂມດູນການສອນໂດຍອີງໃສ່ຫຼັກສູດແຫ່ງຊາດທີ່ສອດຄ່ອງກັບລະດັບຄວາມສາມາດທີ່ແຕກຕ່າງກັນຂອງ ICT-CST.
ສະຖານການສ້າງຄູມີຄວາມສາມາດເພີ່ມຂຶ້ນໃນການຫັນປ່ຽນ ICT-CST ແລະ ຫຼັກສູດທີ່ກ່ຽວຂ້ອງໄປສູ່ໂມດູນການສອນ.

ກອງປະຊຸມການພັດທະນາຂີດຄວາມສາມາດໃນການຫັນປ່ຽນ ຫຼັກສູດ ແລະ ວິ ທີການສິດສອນ ໃຫ້ແກ່ ບັນດາຄູ ແລະ ຄູໃນສະຖານການສ້າງຄູ ຂອງກະຊວງສຶກສາທິການ ແລະ ກິລາ ໃນ ສປປ ລາວ

ປະຊຸມຄັ້ງທີ 2: ການກໍານົດຂອບເຂດແລະລາຍລະອຽດ ແລະ ຮ່າງຫຼັກສູດ (19-23 ກຸມພາ 2024)

ໃນວັນທີ 19-23 ກຸມພາ 2024 ກົມສ້າງຄູ ຮ່ວມກັບຄູ່ຮ່ວມພັດທະນາ UNESCO Bangkok ໄດ້ຈັດກອງປະຊຸມຄັ້ງທີ2: ການພັດທະນາຂີດຄວາມສາມາດໃນການຫັນປ່ຽນ ຫຼັກສູດ ແລະ ວິທີການສິດສອນ ໃຫ້ແກ່ ບັນດາຄູ ແລະ ຄູໃນສະຖານການສ້າງຄູ ຂອງກະຊວງສຶກສາທິການ ແລະ ກິລາ ໃນ ສປປ ລາວ, ກອງປະຊຸມຄັ້ງນີ້ຈະເປັນການນໍາເອົາຜົນສໍາເລັດຈາກໄລຍະການຮຽນທາງໄກ ແລະ ນໍາມາຮວບຮວມເຂົ້າກັນ ທີ່ເມືອງວັງວຽງ ແຂວງວຽງຈັນ.

ໃຫ້ກຽດເປັນປະທານໃນຄັ້ງນີ້ ແມ່ນ ທ່ານ ເກດ ພັນລັກ ຫົວໜ້າກົມສ້າງຄູ, ປະທານຮ່ວມ ທ່ານ ປອ ສິລິນທອນ ສັກລໍຄຳ, ຫົວໜ້າກົມຮ່ວມມືກັບຕ່າງປະເທດ ກະຊວງສຶກສາທິການ ແລະກິລາ ແລະ ທ່ານ ນາງ ຟໍລເຣນສ໌ ເຊີຣີໂອ (Dr. Florence Ssereo) ຫົວໜ້າທີມ IBE

ກອງປະຊຸມຄັ້ງມີຜູ້ເຂົ້າຮ່ວມທັງໝົດ 53 ທ່ານ, ຍິງ 28 ທ່ານ, ເຊີ່ງໃນນັ້ນມາຈາກກົມສ້າງຄູ ກະຊວງສຶກສາທິການ ແລະ ກິລາ, ອົງການອຸຍເນດໂກບາງກອກ, ຄະນະສຶກສາສາດ ມະຫາວິທະຍາໄລແຫ່ງຊາດ, ຄະນະສຶກສາສາດ ມະຫາວິທະຍາໄລສຸພານຸວົງ ແລະ ວິທະຍາໄລຄູ 8 ແຫ່ງເຊິ່ງປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ ແລະ ວຄ ປາກເຊ.

ຈຸດປະສົງຂອງກອງປະຊຸມໃນຄັ້ງນີ້ ປະກອບມີ:

ເກັບກໍາຜົນສໍາເລັດໃນການຮຽນຮູ້: ຜູ້ເຂົ້າຮ່ວມຝຶກອົບຮົມ ແລະ ຜູ້ຊ່ຽວຊານ ຈະນໍາສະເໜີ, ທົບທວນຄືນ ແລະ ໃຫ້ຄວາມຄິດເຫັນກ່ຽວກັບ ກິດຈະກໍາ ແລະ ຜົນໄດ້ຮັບໃນການຮຽນທາງໄກ.
ຜູ້ຊ່ຽວຊານ IBE ແລະ ຜູ້ເຂົ້າຮ່ວມເຝຶກອົບຮົມ ສັງລວມຜົນສໍາເລັດ ແລະ ກໍານົດຊ່ອງຫວ່າງ, ເຈາະເລີກປະເດັນຫຼັກສູດສະເພາະສໍາລັບຄູ ແລະ ຄູໃນສະຖານການສ້າງຄູ ທີ່ເປັນບູລິມະສິດເຊິ່ງໄດ້ຮັບການກໍານົດໄວ້, ເພິ່ມຄວາມເຂົ້າໃຈກ່ຽວກັບຜົນຮັບທີ່ຕາມມາສໍາລັບຄູ ໃນຂະບວນການຫຼັກສູດດັ່ງທີ່ມີໃນບັນດາໂມດຸນຫົວຂໍ້ທັງຫົກຫົວຂໍ້ຂອງ CRP 2023: ປຶ້ມຄູ່ມື.
ຜູ້ເຂົ້າຮ່ວມ ແລະ ຜູ້ຊ່ຽວຊານ/ຄູເຝຶກ ຂອງ IBE ຈະກໍານົດປະເດັນຫົວຂໍ້ທີ່ເປັນບູລິມະສິດ ທີ່ຈະຕ້ອງໄດ້ເອົາໃຈໃສ່ເປັນພິເສດໃນລະຫວ່າງ ໄລຍະການຮຽນທາງໄກ ແລະ ວາງແຜນສໍາລັບໄລຍະການຮຽນທາງໄກພາກສຸດທ້າຍ.

ກອງປະຊຸມຄັ້ງທີ1: ການພັດທະນາໂມດູນການສອນວິຊາ ICT ໃນການຮຽນການສອນຂອງຫຼັກສູດສ້າງຄູ ທຸກຊັ້ນ-ທຸກສາຍ ໃນ ສປປ ລາວ

ໃນວັນທີ 25-29 ຕຸລາ 2023 ກົມສ້າງຄູ ຮ່ວມກັບຄູ່ຮ່ວມພັດທະນາ UNESCO Bangkok ໄດ້ຈັດກອງປະຊຸມຄັ້ງທີ1: ການພັດທະນາໂມດູນການສອນວິຊາ ICT ໃນການຮຽນການສອນຂອງຫຼັກສູດສ້າງຄູ ທຸກຊັ້ນ-ທຸກສາຍ ໃນ ສປປ ລາວ ທີ່ວິທະຍາໄລຄູຫຼວງພຣະບາງ, ນະຄອນຫຼວງພະບາງ, ສປປ ລາວ.

ໃຫ້ກຽດເປັນປະທານຂອງ ທ່ານ ອຈ ເກດ ພັນລັກ ຫົວໜ້າກົມສ້າງຄູ ກະຊວງສຶກສາທິການ ແລະກິລາ, ປະທານຮ່ວມ ທ່ານ ອຈ ຫຸມພັນ ຄອນສະຫັວດ ຜູ້ອຳນວຍການ ວິທະຍາໄລຄູຫຼວງພະບາງ ແລະ ທ່ານ ນາງ ນັນທະວັນ ຮາຍ ຜູ້ປະສານງານໂຄງການ ຈາກ UNESCO Bangkok

ກອງປະຊຸມຄັ້ງມີຜູ້ເຂົ້າຮ່ວມທັງໝົດ 31 ທ່ານ, ຍິງ 5 ທ່ານ, ເຊີ່ງໃນນັ້ນມາຈາກກົມສ້າງຄູ ກະຊວງສຶກສາທິການ ແລະ ກິລາ, ອົງການອຸຍເນດໂກບາງກອກ, ຄະນະສຶກສາສາດ ມະຫາວິທະຍາໄລແຫ່ງຊາດ, ຄະນະສຶກສາສາດ ມະຫາວິທະຍາໄລສຸພານຸວົງ ແລະ ວິທະຍາໄລຄູ 8 ແຫ່ງເຊິ່ງປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ ແລະ ວຄ ປາກເຊ.

ຈຸດປະສົງຂອງກອງປະຊຸມໃນຄັ້ງນີ້ ປະກອບມີ:

ເພື່ອເສີມສ້າງຄວາມເຂົ້າໃຈກ່ຽວກັບການຫັນປ່ຽນໄປສູ່ການຝຶກອົບຮົມຄູທີ່ເນັ້ນສະມັດຖະພາບ ແລະ ຄວາມສໍາຄັນຂອງການປະສົມປະສານການສອນທີ່ນໍາໃຊ້ ICT ເຂົ້າໃນລະບົບການສຶກສາລາວ
ເພື່ອທໍາຄວາມຄຸ້ນເຄີຍກັບມາດຕະຖານສະມັດຖະພາບດ້ານ ICT ຂອງຄູ (ICT-CST) ແລະ ການສອດແຊກເຂົ້າໃນຫຼັກສູດສ້າງຄູ
ເພື່ອສ້າງຄວາມພ້ອມທາງດ້ານຄວາມຮູ້ໃນພາກປະຕິບັດ, ບັນດາເຄື່ອງມື ແລະ ຍຸດທະສາດ ໃນການສອນວິຊາ “ICT ໃນການຮຽນການສອນ” ຢ່າງມີປະສິດທິຜົນ ໃຫ້ແກ່ຄູອາຈານໃນສະຖານການສ້າງຄູທົ່ວປະເທດ.
ເພື່ອພັດທະນາໂມດູນການສອນວິຊາ ICT ໃນການຮຽນການສອນ ທີ່ສອດຄ່ອງກັບ ICT-CST ແລະ ໂຄງຮ່າງລາຍວິຊາ
ເພື່ອກໍານົດແ”ຜນທີ່ຊັດເຈນ ໃນການຈັດຕັ້ງປະຕິບັດຫຼັກສູດວິຊາ “ICT ໃນການຮຽນການສອນ” ພ້ອມດ້ວຍແນວທາງການປະເມີນ ແລະ ຕິດຕາມຜົນຮັບຕໍ່ກັບສະມັດຖະພາບຂອງຄູ.

ໄລຍະການດຳເນີນນກອງປະຊຸມໃນຄັ້ງນີ້ ໄດ້ມີການ ນໍາສະເໜີຄວາມສໍາຄັນຂອງການນໍາເອົາ ໄອຊີທີ ເຂົ້າໃນການຈັດການຮຽນການສອນ, ແນະນໍາຮູບແບບ ແລະ ວິທີການທີ່ສໍາຄັນ ທີ່ກ່ຽວຂ້ອງກັບເນື້ອໃນບົດຮຽນ; ຄົ້ນຄວ້າເປັນກຸ່ມ ໂດຍກໍານົດບັນດາຫົວຂໍ້ຫຼັກ ແລະ ຫົວຂໍ້ຍ່ອຍເຂົ້າໃນໂຄງຮ່າງລາຍວິຊາ ໂດຍສະເພາະວິຊາ “ICT ໃນການຮຽນການ

ກອງປະຊຸມຮ່າງຄູ່ມືແນະນຳການສອນ

ຫຼັກສູດສ້າງຄູມັດທະຍົມສຶກສາ ລະດັບ ປະລິນຍາຕີ ໃນ 6 ສາຂາວິຊາ

ໃນວັນທີ 16-22 ຕຸລາ 2023 ຜ່ານມາ ກົມສ້າງຄູ ໄດ້ຈັດກອງປະຊຸມຮ່າງຄູ່ມືແນະນໍາການສອນ ຫຼັກສູດສ້າງຄູມັດທະຍົມສຶກສາ ລະດັບປະລິນຍາຕີ ໃນ 6 ສາຂາວິຊາ ທີ່ ລີສອດນາປ່າກວາງ, ເມືອງແກ້ວອຸດົມ ແຂວງ ວຽງຈັນ.

ໃຫ້ກຽດເປັນປະທານຂອງ ທ່ານ ເກດ ພັນລັກ ຫົວໜ້າກົມສ້າງຄູ ກະຊວງສຶກສາທິການ ແລະ ກິລາ. ກອງປະຊຸມຄັ້ງນີ້ມີຜູ້ເຂົ້າຮ່ວມທັງໝົດ 70 ທ່ານ, ຍິງ 17 ທ່ານ ທີ່ມາຈາກກົມສ້າງຄູ, ສະຖາບັນຄົ້ນຄວ້າວິທະຍາສາດການສຶກສາ, ຊ່ຽວຊານຈາກໂຄງການ EESDP ແລະ ສະຖານການສ້າງຄູ 16 ແຫ່ງເຊິ່ງປະກອບມີ ຄສສ ມຊ, ຄສສ ມສ, ຄສສ ມຂ, ຄສສ ມຈ, ວຄ ສົງອົງຕື້, ວຄ ສົງຈໍາປາສັກ, ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ, ວຄ ປາກເຊ , ວລ ພະລະສຶກສາ ແລະ ວລ ສິລະປະສຶກສາ.

ການຈັດກອງປະຊຸມຮ່າງຄູ່ມືແນະນຳການສອນຫຼັກສູດສ້າງຄູມັດທະຍົມສຶກສາ ລະດັບປະລິນຍາຕີ ໃນ 6 ສາຂາວິຊາ ໃນຄັ້ງນີ້ ຈຸດປະສົງດັ່ງນີ້:

1. ເພື່ອກໍານົດຮູບແບບຂອງຄູ່ມື່ແນະນໍາການສອນຫຼັກສູດສ້າງ ຄູມັດທະຍົມສຶກສາ;

2. ເພື່ອກໍານົດຫົວຂໍ້ຫຼັກ ແລະ ຫົວຂໍ້ຍ່ອຍ ໃນຄູ່ມືແນະນໍາການສອນຫຼັກສູດສ້າງຄູມັດທະຍົມສຶກສາ;

3. ເພື່ອກໍານົດບາງຫຼັກການ ກ່ຽວກັບການຈັດການຮຽນການສອນ ສໍາລັບຫຼັກສູດສ້າງຄູມັດທະຍົມສຶກສາ ລະດັບປະລິນຍາຕີ ໃນ 6 ສາຂາວິຊາ (ຄະນິດສາດ, ຟີຊິກສາດ, ເຄມີສາດ, ຊີວະສາດ, ພາສາລາວ ແລະ ພາສາອັງກິດ).

ໄລຍະການດໍາເນີນນກອງປະຊຸມໃນຄັ້ງນີ້ ໄດ້ມີການ ນໍາສະເໜີ ຮ່າງ ແລະ ຫົວຂໍ້ຫຼັກຂອງຄູ່ມື່ແນະນໍາການຈັດຕັ້ງປະຕິບັດຫຼັກສູດສ້າງຄູມັດທະຍົມສຶກສາ ລະດັບປະລິນຍາຕີ ໃນ 6 ສາຂາວິຊາ (ຄະນິດສາດ, ຟີຊິກສາດ, ເຄມີສາດ, ຊີວະສາດ, ພາສາລາວ ແລະ ພາສາອັງກິດ); ແລະ ໄດ້ແບ່ງອອກເປັນ 7 ກຸ່ມຕາມສາຂາວິຊາ ເພື່ອຄົ້ນຄວ້າກ່ຽວກັບການກໍານົດຮູບແບບ, ຫົວຂໍ້ຫຼັກ ແລະ ຫົວຂໍ້ຫຍ່ອຍແລະ ກໍານົດບາງຫຼັກການ ກ່ຽວກັບການຈັດການຮຽນການສອນ ຂອງຄູ່ມື່ແນະນໍາການສອນຫຼັກສູດສ້າງຄູມັດທະຍົມສຶກສາ, ຮັບຟັງຜົນການຄົ້ນຄວ້າ ຂອງແຕ່ລະກຸ່ມ ພ້ອມທັງຮັບຮອງເອົາຮ່າງ ແລະ ຫົວຂໍ້ຫຼັກຂອງຄູ່ມື່ແນະນໍາການສອນ. ພ້ອມດຽວກັນນີ້ຍັງໄດ້ມີການສະ ເໜີແຜນວຽກໃນຕໍ່ໜ້າ.

ກອງປະຊຸມພັດທະນາເນື້ອໃນມາດຕະຖານການສອນ ຂອງຄູໃນສະຖານການສ້າງຄູ

ໃນວັນທີ 28-30 ກັນຍາ 2023 ທີ່ຜ່ານມາ ກົມສ້າງຄູ ໄດ້ຈັດກອງປະຊຸມພັດທະນາເນື້ອໃນມາດຕະຖານການສອນ ຂອງຄູໃນສະຖານການສ້າງຄູ ທີ່ຫ້ອງປະຊຸມສະໂມສອນໄຟຟ້າ, ເມືອງແກ້ວອຸດົມ ແຂວງ ວຽງຈັນ.

ໃຫ້ກຽດເປັນປະທານຂອງ ທ່ານ ເກດ ພັນລັກ ຫົວໜ້າກົມສ້າງຄູ ກະຊວງສຶກສາທິການ ແລະກິລາ. ກອງປະຊຸມຄັ້ງນີ້ມີຜູ້ເຂົ້າຮ່ວມທັງໝົດ 34 ທ່ານ, ຍິງ 7 ທ່ານ ທີ່ມາຈາກກົມສ້າງຄູ, ກົມຈັດຕັ້ງ ແລະ ພະນັກງານ, ກົມການສຶກສາຊັ້ນສູງ, ກົມປະກັນຄຸນນະພາບ, ສະຖາບັນຄົ້ນຄວ້າວິທະຍາສາດການສຶກສາ, ຄະນະສຶກສາສາດ ມຊ ແລະ ວິທະຍາໄລຄູ 8 ແຫ່ງເຊິ່ງປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ ແລະ ວຄ ປາກເຊ.

ຈຸດປະສົງກອງປະຊຸມພັດທະນາເນື້ອໃນມາດຕະຖານການສອນຂອງຄູ ໃນສະຖານການສ້າງຄູໃນຄັ້ງນີ້ປະກອບມີ:

1. ເພື່ອທົບທວນຄືນບັນດາຫົວຂໍ້ທີ່ໄດ້ກໍານົດໄວ້ໃນຮ່າງມາດຕະຖານການ ສອນ ສໍາລັບຄູໃນສະຖານການສ້າງຄູ;

2. ເພື່ອພັດທະນາເນື້ອໃນ ມາດຕະຖານການສອນ ສໍາລັບຄູໃນສະຖານການ ສ້າງຄູ;

3. ເພື່ອກໍານົດຈຸດປະສົງ ແລະ ຄາດໝາຍຂອງກິດຈະກໍາໃນບາດກ້າວຕໍ່ໄປ.

ໄລຍະການດຳເນີນນກອງປະຊຸມໃນຄັ້ງນີ້ ໄດ້ມີການ ນໍາສະເໜີຮ່າງມາດຕະຖານການສອນ ສໍາລັບຄູໃນສະຖານການສ້າງຄູ; ຄົ້ນຄວ້າເປັນກຸ່ມ ໂດຍກໍານົດລະດັບ ແລະ ຄໍາອະທິບາຍຫົວຂໍ້; ເພື່ອພັດທະນາເນື້ອໃນມາດຕະຖານການສອນທີ່ຕອບສະໜອງກັບຄວາມຕ້ອງການໃນບໍລິບົດຂອງສະຖານການສ້າງຄູ ໃນ ສປປ ລາວ; ຮັບຟັງຜົນການຄົ້ນຄວ້າ ຂອງແຕ່ລະກຸ່ມ ໃນການພັດທະນາມາດຕະຖານການສອນ ສໍາລັບຄູໃນສະຖານການສ້າງຄູ ແລະ ສະ ເໜີແຜນວຽກໃນຕໍ່ໜ້າ.

ກອງປະຊຸມຝຶກອົບຮົມການນຳໃຊ້ໂມດູນການສອນວິຊາ ICT ພື້ນຖານຂອງຫຼັກສູດສ້າງຄູ ທຸກຊັ້ນ-ທຸກສາຍ ໃນ ສປປ ລາວ (ຄັ້ງທີ 2)

ກອງປະຊຸມດັ່ງກ່າວໄດ້ ເລີ່ມຂຶ້ນແຕ່ວັນທີ 25-29 ກັນຍາ ທີໂຮງແຮມທະວີສຸກ, ເມືອງວັງວຽງ, ແຂວງວຽງຈັນ, ເຊີ່ງມີຜູ້ເຂົ້າຮ່ວມທັງໝົດ 43 ທ່ານ, ຍິງ 11 ທ່ານ ໃນນັ້ນມາຈາກກົມສ້າງຄູ ກະຊວງສຶກສາທິການ ແລະ ກິລາ, ອົງການອຸຍເນັສໂກບາງກອກ ແລະ ສະຖານການສ້າງຄູ 8 ແຫ່ງ. ປະກອບມີ ວຄ ຫຼວງພະບາງ, ວຄ ຄັງໄຂ, ວຄ ສະຫວັນນະເຂດ, ວຄ ສາລະວັນ, ຄະນະສຶກສາສາດ ມະຫາວິທະຍາໄລ ສຸພານຸວົງ, ຄະນະສຶກສາສາດ ມະຫາວິທະຍາໄລ ແຫ່ງຊາດ, ວິທະຍາໄລສິລະປະສຶກສາ ແລະ ວິທະຍາໄລພະລະສຶກສາ.

ໃຫ້ກຽດເປັນປະທານໃນຄັ້ງນີ້ແມ່ນທ່ານ ຮສ ນາງ ວົງເດືອນ ໂອໄສ ຮອງຫົວໜ້າກົມສ້າງຄູ ກະຊວງສຶກສາທິການ ແລະກິລາ ແລະ ປະທານຮ່ວມ ທ່ານ ນາງ ນັນທະວັນ ຮາຍ ຜູ້ປະສານງານໂຄງການ UNESCO Bangkok.

ຈຸດປະສົງຂອງກອງປະຊຸມໃນຄັ້ງນີ້ແມ່ນ:

1. ເພື່ອເສີມຂະຫຍາຍຄວາມເຂົ້າໃຈກ່ຽວກັບພັດທະນາການຂອງການຝຶກອົບຮົມຄູທີ່ເນັ້ນສະມັດຖະພາບ ແລະ ຄວາມສໍາຄັນຂອງການປະສົມປະສານການສອນທີ່ນໍາໃຊ້ ICT ເຂົ້າໃນລະບົບການສຶກສາລາວ

2. ເພື່ອທໍາຄວາມຄຸ້ນເຄີຍກັບມາດຕະຖານສະມັດຖະພາບດ້ານ ICT ຂອງຄູ (ICT-CST) ແລະ ການສອດແຊກເຂົ້າໃນຫຼັກສູດສ້າງຄູ

3. ເພື່ອສ້າງຄວາມພ້ອມທາງດ້ານຄວາມຮູ້ໃນພາກປະຕິບັດ, ບັນດາເຄື່ອງມື ແລະ ຍຸດທະສາດ ໃນການສອນວິຊາ ICT ພື້ນຖານ ຢ່າງມີປະສິດທິຜົນ ໃຫ້ແກ່ຄູອາຈານໃນສະຖານການສ້າງຄູທົ່ວປະເທດ.

ກອງປະຊຸມກວດແກ້ ແລະ ຜ່ານ - ຮັບຮອງ ເນື້ອໃນໂຄງຮ່າງລາຍວິຊາຫຼັກສູດສ້າງຄູມັດທະຍົມສຶກສາ ລະດັບປະລິນຍາຕີ ໃນ 6 ສາຂາ (ສາຂາຄູຄະນິດສາດ, ຟີຊິກສາດ, ເຄມີສາດ, ຊີວະສາດ, ພາສາລາວ ແລະ ສາຂາຄູພາສາອັງກິດ)

ກອງປະຊຸມດັ່ງກ່າວໄດ້ ເລີ່ມຂຶ້ນແຕ່ວັນທີ 19-22 ກັນຍາ 2023 ຢູ່ທີ່ສູນຝຶກອົບຮົມຜູ້ບໍລິຫານການສຶກສາ ເມືອງ ວັງວຽງ ແຂວງ ວຽງຈັນ.

ເຊີ່ງມີຜູ້ເຂົ້າຮ່ວມທັງໝົດ 101 ທ່ານ, ຍິງ 23 ທ່ານ ໃນນັ້ນມາຈາກກົມສ້າງຄູ, ກົມການສຶກສາຊັ້ນສູງ, ກົມຈັດຕັ້ງ ແລະ ພະນັກງານ, ກົມປະກັນຄຸນນະພາບ, ກົມສາມັນສຶກສາ, ສວສ, ສູນພັດທະນາຄູ ແລະ ສະຖານການສ້າງຄູ 16 ແຫ່ງ. ປະກອບມີ ວຄ ຫຼວງນ້ຳທາ, ວຄ ຫຼວງພະບາງ, ວຄ ຄັງໄຂ, ວຄ ບ້ານເກິນ, ວຄ ດົງຄຳຊ້າງ, ວຄ ສະຫວັນນະເຂດ, ວຄ ສາລະວັນ, ວຄ ປາກເຊ, ວຄ ສົງອົງຕື້, ວຄ ສົງຈຳປາສັກ, ຄະນະສຶກສາສາດ ມະຫາວິທະຍາໄລ ສຸພານຸວົງ, ຄະນະສຶກສາສາດ ມະຫາວິທະຍາໄລ ແຫ່ງຊາດ, ຄະນະສຶກສາສາດ ມະຫາວິທະຍາໄລ ສະຫວັນນະເຂດ, ຄະນະສຶກສາສາດ ມະຫາວິທະຍາໄລ ຈຳປາສັກ, ວິທະຍາໄລສິລະປະສຶກສາ ແລະ ວິທະຍາໄລພະລະສຶກສາ.

ໃຫ້ກຽດເປັນປະທານໃນຄັ້ງນີ້ແມ່ນ ທ່ານ ເກດ ພັນລັກ ຫົວໜ້າກົມສ້າງຄູ ກະຊວງສຶກສາທິການ ແລະກິລາ.

ຈຸດປະສົງຂອງກອງປະຊຸມໃນຄັ້ງນີ້ແມ່ນ:

1. ເພື່ອລາຍງານຜົນການຄົ້ນຄວ້າ ການປັບປຸງເນື້ອໃນໂຄງຮ່າງລາຍວິຊາ ຫຼັກສູດສ້າງຄູມັດທະຍົມສຶກສາ ລະດັບປະລິນຍາຕີ ໃນ 6 ສາຂາ (ສາຂາຄູຄະນິດສາດ, ຟີຊິກສາດ, ເຄມີສາດ, ຊີວະວິທະຍາ, ພາສາລາວ ແລະ ສາຂາຄູພາສາອັງກິດ);

2. ເພື່ອຜ່ານ ແລະ ຮັບຮອງເນື້ອໃນໂຄງຮ່າງລາຍວິຊາ ຫຼັກສູດສ້າງຄູມັດທະຍົມສຶກສາ ລະດັບປະລິນຍາຕີ ໃນ 6 ສາຂາ (ສາຂາຄູຄະນິດສາດ, ຟີຊິກສາດ, ເຄມີສາດ, ຊີວະວິທະຍາ, ພາສາລາວ ແລະ ສາຂາຄູພາສາອັງກິດ) ສະບັບປັບປຸງ.

ກອງປະຊຸມ ຝຶກອົບຮົມການນໍາໃຊ້ໂມດູນການສອນວິຊາ ICT ພື້ນຖານ ຂອງຫຼັກສູດສ້າງຄູ ທຸກຊັ້ນ-ທຸກສາຍ ໃນ ສປປ ລາວ

ໃນລະຫວ່າງວັນທີ 12-16/9/2023 ທີ່ເມືອງວັງວຽງ ແຂວງວຽງຈັນ, ກົມສ້າງຄູ ໂດຍຮ່ວມມືກັບ ອຸຍແນສໂກ ບາງກອກ ໄດ້ຈັດກອງປະຊຸມ ຝຶກອົບຮົມການນໍາໃຊ້ໂມດູນການສອນວິຊາ ICT ພື້ນຖານ ຂອງຫຼັກສູດສ້າງຄູ ທຸກຊັ້ນ-ທຸກສາຍ ໃນ ສປປ ລາວ ໃຫ້ແກ່ຄູອາຈານໃນບັນດາສະຖານການສ້າງຄູ 8 ແຫ່ງ ຂອງກຸ່ມທີ 1 (ກຸ່ມທີ 2: 8 ແຫ່ງ ຈະຈັດໃນລະຫວ່າງວັນທີ 25-29/9/2023).

ໃຫ້ກຽດເປັນປະທານໃນຄັ້ງນີ້ແມ່ນ ທ່ານ ນ ຮສ ວົງເດືອນ ໂອໃສ, ຮອງຫົວໜ້າກົມສ້າງຄູ ຮ່ວມກັບທ່ານ ນ ນັນຕາວັນ ຮາຍ, ຜູ້ປະສານງານໂຄງການ, ອຸຍແນສໂກ ບາງກອກ. ຜູ້ເຂົ້າຮ່ວມປະກອບມີບັນດາຄູຝຶກ ແລະ ສໍາມະນາກອນ ທີ່ເປັນຄູອາຈານຈາກບັນດາສະຖານການສ້າງຄູ 8 ແຫ່ງ ແລະ ຄະນະຮັບຜິດຊອບຈາກກົມສ້າງຄູ, ລວມທັງໝົດ 40 ທ່ານ.

ຈຸດປະສົງແມ່ນເພື່ອ:

ເສີມຂະຫຍາຍຄວາມເຂົ້າໃຈກ່ຽວກັບພັດທະນາການຂອງການຝຶກອົບຮົມຄູທີ່ເນັ້ນສະມັດຖະພາບ ແລະ ຄວາມສໍາຄັນຂອງການປະສົມປະສານການສອນທີ່ນໍາໃຊ້ ICT ເຂົ້າໃນລະບົບການສຶກສາລາວ
ທໍາຄວາມຄຸ້ນເຄີຍກັບມາດຕະຖານສະມັດຖະພາບດ້ານ ICT ຂອງຄູ (ICT-CST) ແລະ ການສອດແຊກເຂົ້າໃນຫຼັກສູດສ້າງຄູ
ສ້າງຄວາມພ້ອມທາງດ້ານຄວາມຮູ້ໃນພາກປະຕິບັດ, ບັນດາເຄື່ອງມື ແລະ ຍຸດທະສາດ ໃນການສອນວິຊາ ICT ພື້ນຖານ ຢ່າງມີປະສິດທິຜົນ ໃຫ້ແກ່ຄູອາຈານໃນສະຖານການສ້າງຄູທົ່ວປະເທດ.

Page updated

Google Sites

Report abuse