送   神  文/莊雅雯

　　早期，佇台灣，便到年尾有一个日子一定愛會記得，彼就是「送神」。「送神」每一年的舊曆十二月二四，只要是攑香的，這工愛共厝裡服侍的神明，尤其是灶神送轉去天庭，予神明向玉皇大帝報告這一冬伊所記錄的結果。古早人相信玉皇大帝會遣派神明去每一个人家兜，一方面保庇這个人家兜的大大細細；一方面觀察、記錄這口灶所做的好歹代，來成做上天欲賜福抑是處罰īn的根據，所以每一年年尾送神這日世俗人攏會拜拜，答謝神明一冬的看顧，也向望神明轉去天庭以後，會當替īn講好話，予新的一年有好的運途。

　　若按呢，拜拜是愛拜啥物，神明才會替咱講好話呢？供品通常會有四果、冬瓜條、生仁、圓仔或者是麻糍。當然嘛愛有三色金、雲馬、炮仔……等等，予神明有所費通用、有雲馬會當緊送īn回轉天庭。逐項鋪排甲夠，希望眾神歡喜，有食著甜，喙嘛會甜甜。

　　會記得細漢的時，阮母仔咧做洋裁，佇成衣猶無發達的年代，大部份的人，衫攏是剪布去予人做。大人囡仔過年攏愛穿新衫，所以過年前彼兩個月上大月，用阮母仔講的話講：「無閒甲放尿都袂赴攏褲，哪有時間去款拜拜、摒內底。」所以送神拜拜遮的工課攏是阮俺媽咧發落。送神的前一工，阮俺媽早早就會喊（hiàm）阮遮囡仔去睏，講隔轉工愛較早起來，有足濟代誌愛鬥無閒，毋通予人叫規晡叫袂起來。送神—雖罔講只是一个拜拜的儀式，佇阮兜卻是過年這个大工程的開始，代表欲開始準備過年矣！人講：「送神早，接神晏。」阮俺媽是足照古例的，祖公祖媽按怎教，伊一定照咧做，一項都袂拍交落得。送神一般分做送「灶神」佮送「眾神」，因為灶神佇灶跤，主神佇神明廳，兩爿無仝位，所以會分開拜。

　　平常時，神明佇厝裡坐，尪架桌頂的物件袂使烏白振動，神明閣較袂使搬徙（suá）位。送神了，拄好趁神明轉去天庭就來開始筅黗。「筅黗」是啥？筅黗就是將厝裡的神明佛像、佛祖龕、神明爐、神主牌仔、祖先的香爐、尪架桌全部清清拭拭予清氣。通常俺媽會叫阮小弟（peh）起去尪架桌頂，將神明佛像請出來，俺媽就會用神明專用的筅仔佮焦布勻聊仔替伊筅筅、清清、拭拭咧，將規冬的坱埃拭甲清清氣氣，是焦洗，無沐水喔！佛祖龕的雕刻足𠢕（gâu）卡腌臢，一定愛用筅仔筅予清氣。閣來，就是共香爐內的香跤拔拔（pue̍h）咧、香爐嘛愛清。香爐內底的香烌（hu）愛𣁳（khat）寡出來，袂使全部𣁳（khat）甲了，愛留欲一半通插香。香烌愛過濾、挓（thà）予鬆，抹予平，表示平安圓滿。古早人講：「香烌鬆，趁錢會輕鬆。」特別愛注意的是絕對袂使共香爐直接提起來倒，倒爐是會共運氣倒了了的。紲落來就是我的工課矣！阮兜的香爐是錫做的，經過一年，看起來黗黗，愛用布搵（ùn）錫油認真共推，推予金金，若新的仝款。俺媽將佛祖龕嘛清好以後就請神明、佛祖轉去坐，香爐覆位了，閣愛看坐有正無？全部確認以後，神明的部份算是完工矣！公媽的神主牌仔和香爐仝款照按呢清。