Embedded Files
若問講你對冬節有啥物印象？我想大部份的回答應該攏是食圓仔！你愛食佗一款圓仔咧？『○冠湯圓』！有影啦，這馬大部份冬節的時陣，咱食著的是『○冠湯圓』，敢若食著有包餡的圓仔，就食著幸福的滋味。毋過，我一直咧想講，是對當時開始，我的冬節干焦賰『○冠湯圓』呢？
這時的冬節已經離我足遠、足遙遠矣！尤其是我的囡仔離開厝了後，敢若冬節這个節日就變甲無遐重要矣！
原本，我是一个足重節日的人。自細漢，不管是年仔、節仔，序大人攏足照起工，阮愛綴佇邊仔鬥、綴佇邊仔學，每一个節日逐項攏愛款甲齊勻，袂使有一項拍交落得(tsit)。冬節是一个足重要的節日，因為冬節若到，年就到矣！彼時的冬節是啥物款的？到底攏咧創啥呢？
佇阮兜，是冬節前一工暗時就食圓仔的。
阮母仔是做裁縫的，逐工攏足無閒，無閒咧做衫、拚經濟，逐工三頓雖然攏是伊親身款的，但是年節通常攏是阮母仔做衫的大月，當咧趕工課，哪有時間款冬節圓咧？較早無像咱這馬遮利便，啥物攏有地買，四界攏買會著便的。按呢是欲按怎較好咧？搪著重要節日，阮俺媽就會出手鬥相共。冬節就是重要節日，這時阮母仔會去糴(tia̍h)米，阮俺媽就負責𤆬阮這陣的囡仔疕挲圓仔。
阮兜過冬節大概佇冬節進前兩三工就開始準備矣！是按怎愛提早準備咧？一方面是因為較早𥴊(kám)仔店無咧賣挨好的秫米粉，厝裡無石磨的，攏著愛捾秫米去菜市仔請店頭鬥挨；另外一方面，阮兜蹛佇大菜市邊的巷仔裡，附近是臺南上鬧熱的所在，大多數的人是做生理的，無時間通家己挨米，攏是提秫米去菜市仔排隊。阮兜嘛無石磨，阮母仔會叫我用麵粉袋仔貯米，共囥佇拔桶內面，捾去菜市仔請店家鬥相共挨，通常愛排兩三工。你一定會感覺足奇怪的，捾米去菜市仔是欲按怎排隊呢？店家會專門攢一塊桌仔予需要挨米的人囥，只要佇拔桶頂懸寫名，店家就會共阮講啥物時陣去提，按呢就會使矣。上奇怪的是，從來就無人會提毋著去，嘛毋捌有米拍毋去。
挨米的時著愛加水，挨好的米漿倒佇麵粉袋仔內底，袋仔口束予絚、囥入拔桶內底，阮母仔才閣去共米漿捾轉來厝裡。捾轉來了後的米漿，阮俺媽會共囥佇咧灶跤的椅條頂懸，頂懸閣囥一塊較細塊的枋仔，紲落叫我去搬平常時囥佇壁角的石珠，共石珠鑢予清氣了後，硩佇柴枋仔頂懸，用索仔共石珠、米漿佮椅條縛予絚，予米漿沓沓仔滴水，有當時仔愛硩規工，才會當共米漿的水硩甲焦。毋是講共水硩予焦就會使矣，水硩焦的圓仔粞是袂堅規丸、會散去的，無法度直接用來挲做圓仔。阮俺媽會先煮粿酺，捻一塊圓仔粞共煮予熟，煮熟的粿酺有黏性，囥佇𥴊(kám)仔面頂慢慢仔摻圓仔粞做伙撋，一面摻、一面撋，那撋那大丸，原本研落就散的圓仔粞，經過伊的手凊彩撋撋咧，無一觸久仔就黏做伙。愛撋予齊勻，規个圓仔粞才會有黏性、袂散去，按呢才會使開始挲圓仔。敢按呢就會當開始挲圓仔？無喔！等咧！圓仔粞攏是白色的，無夠好吉兆，阮俺媽會共圓仔粞分做兩份，一份滴一兩滴仔紅花染，共染做粉紅仔色的，這个時陣圓仔粞才算是真正款好矣！
冬節前一暝，阮早早就食暗頓，暗頓食了後就會使準備挲圓仔矣！阮遮囡仔乖乖共手洗予清氣，手洗無清氣的人是不准挲圓仔的喔！桌仔頂囥兩个大𥴊(kám)仔，阮圍佇阮俺媽身軀邊，看伊捻一塊圓仔粞挲予長長，閣來捻做像指甲遐大塊。一塊、一塊囥佇咧𥴊(kám)仔頂懸，阮遮囡仔就開始比賽，比賽看啥人挲的較濟、啥人挲的較圓、啥人挲較齊勻。隨人挲的圓仔就囥佇家己的面頭前，阮俺媽做裁判，挲了緊、閣媠、又閣圓的人會使加食三粒圓仔喔！
可能是自細漢我就較捷予人叫去做工課，手較巧，共圓仔挲予圓這件代誌對我來講敢若無偌困難，我挲的圓仔足圓的喔！所以定定挲好的圓仔越頭就予小弟小妹偷徙過去的面頭前，實在又閣好氣又閣好笑。細漢的時陣感覺阮俺媽足厲害的，圓仔挲甲緊閣圓，而且伊會當一改挲五粒，逐粒圓仔攏挲甲平大粒、又閣圓棍棍，實在足厲害的。毋但按呢，伊閣會共圓仔粞捏做狗仔、兔仔、豬仔……這幾種無仝款的形體，實在足趣味的。阮一改干焦會當挲一粒圓仔，阮遮囡仔就會想欲一改挲兩粒，希望比賽會當贏。阮俺媽是按怎會當一改挲五粒呢？看伊表演，綴伊一步一步做，就按呢挲啊挲、挲啊挲，總算會當練甲一改挲兩粒，一改挲三粒，就感覺講阮俺媽足厲害的，我嘛足𠢕(gâu)的呢！
圓仔挲好差不多已經暗時八、九點矣，無閒規晡無食著圓仔哪會甘願去睏？阮母仔會先烰一鼎圓仔窒阮的喙空。阮兜的圓仔真簡單，就是清水煮圓仔，看著圓仔一粒一粒佇鼎裡咧浮，有白的、有粉的，歡喜的心情嘛綴咧浮起來。另外煮一鼎糖水，圓仔烰好了後撈入糖水內底，逐个人攏食三、五粒圓仔，表示阮欲過冬節矣，按呢才甘願去睏，通好等隔轉工過冬節。
冬節彼工，阮母仔透早就愛烰圓仔敬神、拜公媽。拜拜的時陣袂使干焦拜白色的圓仔，一定愛有粉紅色的，一碗一碗捀去尪架桌拜神明、拜祖先，閣來才有輪著拜阮的喙空。一人一碗，一面食、一面算，算看碗內的圓仔是奇的抑是雙的，若是雙的會當加食半碗喔！早頓食圓仔，食的是溫暖、食的是圓滿、食的是平安。食圓仔就加一歲矣，食了就歡歡喜喜揹冊包去讀冊。
經過三十冬，當當我做人的老母，阮兜的冬節佮阮後頭的冬節精差真濟，雖然真省時間，毋過心肝內煞感覺淡薄仔稀微。可能是時代進步，抑可能是工課無閒，無閣再固定佇冬節的前一暝挲圓仔。只要是冬節進前的假日就會使矣，無閣倩人挨米、撋圓仔粞遮的工課，直接去菜市仔買便的圓仔粞轉來予囡仔挲。有當時仔會招厝邊的囡仔做伙來阮兜挲圓仔，圓仔挲好順紲煮予𪜶(in)做點心。毋過，這時圓仔的煮法就無親像阮細漢的時遐簡單矣！毋是干焦清水摻糖，是用龍眼乾煮做湯，了後才共煮好的圓仔囥入去龍眼乾湯內底，有時閣會濫一寡紅豆仔、綠豆仔佮塗豆做伙食，毋但加真濟料，猶閣有龍眼乾的芳氣。
阮囝較大漢小可，讀國中、高中彼陣，我佮囡仔嘛無啥時間通挲圓仔，彼幾冬便若到冬節彼日，就會去一間老店，買摻紅豆的塗豆仁湯，家己煮一點仔圓仔，濫佇內底做伙食。紲落來，囡仔離開厝出外讀冊，阮兜冬節的圓仔變做口面的『○冠圓仔』，這兩冬連煮都無，換做外口咧賣的圓仔湯。仝款是食圓仔，猶毋過，圓仔已經無相矣！圓仔自細粒變大粒，對無餡的變做有餡的，對簡單的白糖水變甲真濟料、真豐沛，年節的味煞愈來愈薄矣！因為無閣有規家伙仔做伙挲圓仔、比賽啥人挲的較圓，啥人的圓仔較大粒，啥人的圓仔挲較濟，無閣有規家伙仔為著節日做伙做一項代誌，嘛已經無彼種過節的感覺矣！
猶原足愛佇冬節的時陣食圓仔，因為食圓仔就會想起做囡仔的時，規家伙仔箍做伙。喙食圓仔，就想著做囡仔的時挲圓仔的情景。 烰一鼎圓仔，想起彼時兄弟姐妹仝心合作佮家庭的溫暖，猶閣有彼段永遠袂退色的囡仔時代。
Google Sites
Report abuse