၂၄၃။ စၞောန်ထ္ၜးကဵုနိယဿကမ်

၄၁၂။ ယွံခမဳတအ် ပ္ဍဲသာသနာဝွံ ခမဳဂှ် ဟွံတီ (ဝိနယ်သိက္ခာပိုဒ်) ရ၊ ဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာ) ပိုဒ်ရ၊ မၞုံကဵုအာပတ်ဂၠိုၚ်ရ၊ ဟွံမွဲကဵုအပိုၚ်အခြာအာပတ်ရ၊ ပဒတဴ သီုမနှဴရဴကေုာံခရှ်ဂမၠိုၚ် နမဆက်ဆောံခရှ် မဟွံဗဗွဲ ကုခမဳဂမၠိုၚ်ရ။ ပ္ဍဲဘာဂှ် “ယွံကောန်တၠတအ် ခမဳဝွံ ဟွံတီ (ဝိနယ်သိက္ခာပိုဒ်) ရ၊ ဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာ) ပိုဒ်ရ၊ မၞုံကဵုအာပတ်ဂၠိုၚ်ရ၊ ဟွံမွဲကဵုအပိုၚ်အခြာအာပတ်ရ၊ ပဒတဴ သီုမနှဴရဴ ကေုာံခရှ်ဂမၠိုၚ် နမဆက်ဆောံခရှ် မဟွံဗဗွဲ ကုခမဳဂမၠိုၚ်ရ။ ပ္ဍဲလၟုဟ် ပိုဲညးဂမၠိုၚ် သ္ပနိယဿကမ် ကုခမဳဂှ်အိုတ်စိုအ်” ရဴဝွံ ကသပ်ဒှ် ကုခမဳဂမၠိုၚ်ရ။ (ကြဴနူဂှ်) ခမဳဂမၠိုၚ်ဂှ် သီုမဒှ်ဂကောံပါ်ဒကးဂမၠိုၚ် နဟွံဗဗွဲဓရ် သ္ပနိယဿကမ် ကုခမဳဂှ်အိုတ်ရ။

ခမဳဂှ် နူဘာဂှ် အာဘာမွဲသအာၚ်ရ။ ပ္ဍဲဘာဂှ်လေဝ် “ယွံကောန်တၠတအ် ခမဳဝွံ ခမဳ သၚ်သ္ပလဝ်နိယဿကမ် သီုမဒှ်ဂကောံပါ်ဒကး နဟွံဗဗွဲဓရ်ရ၊ ပ္ဍဲလၟုဟ် ပိုဲညးဂမၠိုၚ် သ္ပနိယဿကမ် ကုခမဳဂှ်အိုတ်စိုအ်” ရဴဝွံ ကသပ်ဒှ် ကုခမဳဂမၠိုၚ်ရ။ ခမဳဂမၠိုၚ်ဂှ် သီုမဒှ်ညဳသာသၟဟ်သၟန် နဟွံဗဗွဲဓရ် သ္ပနိယဿကမ် ကုခမဳဂှ်အိုတ်ရ ။ ပ ။ သီုမဒှ်ဂကောံပါ်ဒကးဂမၠိုၚ် နဗဗွဲဓရ် ။ ပ ။ သီုမဒှ်ဂကောံပါ်ဒကးဂမၠိုၚ် နဓရ်ပတောံ ။ ပ ။ သီုမဒှ်ညဳသာသၟဟ်သၟန် နဓရ်ပတောံ ။ ပ ။

[ညံၚ်ရဴသ္ပဗ္ဂေတ်စက် ပ္ဍဲသၟတ်ကီု တုပ်သၟဟ်သာ်ဂှ် ဒးသ္ပဗ္ဂေတ်စက်ရ။]