၂၃၄။ ဝတ္ထုခမဳကဿပဂေါတ္တ
၃၈၀။ ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဇရေၚ်သြၚ်ကၟာ မၞုံယၟုဂဂ္ဂရာ ဇရေၚ်ဍုၚ်စမ္ပာဂှ် ပ္ဍဲဇနပိုဒ်ကာသိရးဂမၠိုၚ် ကွာန်မၞုံယၟုဝါသဘ နွံမွဲရ။
ပ္ဍဲကွာန်ဂှ် ခမဳမၞုံယၟုကဿပဂေါတ္တ ဒှ်ခမဳဂဇအ်ဘာရ၊ “ခမဳမသ္ဍိုက်ဆာန်သဳလ မဟွံကၠုၚ်စိုပ်ဏီဂမၠိုၚ် မုရဴသာ်လဵု ဂွံကၠုၚ်စိုပ်အိုတ်ရော? ခမဳမသ္ဍိုက်ဆာန်သဳလ မကၠုၚ်စိုပ်တုဲဂမၠိုၚ် မုရဴသာ်လဵု ဂွံပဒတဴဗွဲတသိုခ်အိုတ်ရော? ဘာဝွံလေဝ် မုရဴသာ်လဵု ဂွံအာစိုပ်ပွမဇၞော်မောဝ်ဂီုကၠီုလှဲလးရော?” ရဴဝွံ သ္ပဂဗုဓ်ဓဝိၚ်လၟိုန်တုဲ အာစိုပ်ပွမပတိတ်ဇြဟတ်ရ။
ပ္ဍဲအခိၚ်ဂှ် ခမဳဂမၠိုၚ်မဂၠိုၚ်ဂၠၚ် ဂေတ်ဂ္ၚေၚ်ပ္ဍဲကာသိရးအိုတ်မ္ဂး စိုပ်ကၠုၚ်ကွာန်ဝါသဘအိုတ်ရ၊ ခမဳမၞုံယၟုကဿပဂေါတ္တ သ္ဂောံညာတ်ကေတ် ခမဳဂမၠိုၚ်မက္ညကၠုၚ်နူဇမ္ၚောဲတုဲ လးသၞာဂဇအ်ရ၊ စွံပတန်လဝ် ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ်ရ၊ ဒစးဒုၚ်တၠုၚ်တရဴတုဲ ဟောဝ်ဂိုၚ်ဗဗေၚ်သ္ၚာရ၊ (နွံပၟိက်ဍာ်သုၚ်ဟာရဴဝွံ) သၟာန်တဴ နကဵုဍာ်သုၚ်ရ၊ သ္ပပွမပတိတ်ဇြဟတ် ပ္ဍဲပွမဟုမ်ဍာ်ရ၊ ပ္ဍဲယာဂုကီု ပ္ဍဲစၞစကီု ပ္ဍဲပိဏ္ဍပါတ်ကီု သ္ပပွမပတိတ်ဇြဟတ်ရ။ ပ္ဍဲအခိၚ်ဂှ် ခမဳအာဂန္တုကဂမၠိုၚ်ဂှ် “ယွံကောန်တၠတအ် ခမဳဂဇအ်ဘာဝွံ ခိုဟ်ကွေံရ၊ (သွက်ပိုဲညးဂမၠိုၚ်) သ္ပပွမပတိတ်ဇြဟတ် ပ္ဍဲပွမဟုမ်ဍာ်ရ၊ ပ္ဍဲယာဂုကီု ပ္ဍဲစၞစကီု ပ္ဍဲပိဏ္ဍပါတ်ကီု ပွမပတိတ်ဇြဟတ်လေဝ် သ္ပရ။ ယွံကောန်တၠတအ် ပ္ဍဲအခိၚ်လၟုဟ် ပ္ဍဲညးဂမၠိုၚ် ပ္ဍဲကွာန်ဝသဘဝွံဟေၚ် ပဒတဴအိုတ်စိုအ်” ရဴဝွံ ချပ်ဂၞန်ဟီုသ္ဂးတုဲပ္ဍဲကြဴ ပဒတဴပ္ဍဲကွာန်ဝါသဘဂှ်ဟေၚ်အိုတ်ရ။
ပ္ဍဲအခိၚ်ဂှ် ခမဳမၞုံယၟုကဿပဂေါတ္တဂှ် “ကုခမဳအာဂန္တုကဂမၠိုၚ်ဝွံ ပွမဍောၚ်ၜိုတ်မစပ်ကဵုအာဂန္တုကဂှ် လလမ်အာတုဲရ၊ ခမဳအာဂန္တုကဂမၠိုၚ်ဂှ် ပ္ဍဲအခိၚ်လၟုဟ် တီကေတ်ဂၠံၚ် ပ္ဍဲကွာန် ဂ္ၚေၚ်ပိဏ္ဍပါတ်အဲအိုတ်ရ၊ ဗွဲစၟတ်တုန် ပ္ဍဲသ္ၚိညးသအာၚ်ဂမၠိုၚ် သွက်ဂွံသ္ပ ပွမသ္ပလွဳစဵုကဵုလအိတ်လမျီုဂှ် ဇြိုၚ်သန်ရ၊ ပွအာတ်ဂှ်လေဝ် မၞိဟ်ဂမၠိုၚ် ဟွံသ္ဍိုက်မၠိုက်ရ၊ အဲဂွံမံၚ်ထောံသီုဟွံသ္ပ ပွမလွဳပရာ ပ္ဍဲယာဂုကီု ပ္ဍဲစၞစကီု ပ္ဍဲပိဏ္ဍပါတ်ကီုမ္ဂး ခိုဟ်သန်ရ” ရဴဝွံ ချပ်တုဲပ္ဍဲကြဴ ပဒတဴသီုဟွံသ္ပ ပွမလွဳပရာ ပ္ဍဲယာဂုကီု ပ္ဍဲစၞစကီု ပ္ဍဲပိဏ္ဍပါတ်ကီုရ။
ကြဴနူဂှ် “ယွံကောန်တၠတအ် ခမဳဂဇအ်ဘာဝွံ ပ္ဍဲကိုပ်ကၠာတေံ (သွက်ပိုဲညးဂမၠိုၚ်) သ္ပပွမပတိတ်ဇြဟတ် ပ္ဍဲပွမဟုမ်ဍာ်ရ၊ ပ္ဍဲယာဂုကီု ပ္ဍဲစၞစကီု ပ္ဍဲပိဏ္ဍပါတ်ကီု သ္ပပွမပတိတ်ဇြဟတ်ရ။ ခမဳဂဇအ်အာဝွံ ပ္ဍဲအခိၚ်လၟုဟ် ဟွံသ္ပပွမလွဳပရာ ပ္ဍဲယာဂုကီု ပ္ဍဲစၞစကီု ပ္ဍဲပိဏ္ဍပါတ်ကီုရ၊ ယွံကောန်တၠတအ် ခမဳဂဇအ်ဘာဂှ် ပ္ဍဲအခိၚ်လၟုဟ် ဟွံခိုဟ်ရ၊ ယွံကောန်တၠတအ် ပ္ဍဲအခိၚ်လၟုဟ် ပိုဲညးဂမၠိုၚ် ဗက်ပတိတ်ထောံ ခမဳဂဇအ်ဘာဂှ် နူဘာဝွံအိုတ်စိုအ်” ရဴဝွံ ကသပ်ဒှ်ကၠုၚ် ကုခမဳအာဂန္တုကဂမၠိုၚ်ရ။
ပ္ဍဲအခိၚ်ဂှ် ခမဳအာဂန္တုကဂမၠိုၚ် ကောံဓရီုတုဲမ္ဂး “ယွံကောန်တၠတအ် တၠအဲ ပ္ဍဲကိုပ်ကၠာတေံ သ္ပပွမပတိတ်ဇြဟတ် ပ္ဍဲပွမဟုမ်ဍာ်ရ၊ ပ္ဍဲစၞစကီု ပ္ဍဲပိဏ္ဍပါတ်ကီု သ္ပပွမပတိတ်ဇြဟတ်လေဝ် သ္ပရ။ တၠအဲ ပ္ဍဲအခိၚ်လၟုဟ် ဟွံသ္ပပွမလွဳပရာ ပ္ဍဲယာဂု စၞစ ပိဏ္ဍပါတ်ဂမၠိုၚ်ရ၊ ယွံကောန်တၠ တၠအဲ အာစိုပ်အာပတ်ရ၊ ဩဝ်မၠာ်သ္ၚေဝ် အာပတ်ဂှ်ညိ” ရဴဝွံ ဟီုသ္ဂးကဵု ခမဳကဿပဂေါတ္တတုဲ (ခမဳကဿပဂေါတ္တဂှ်) ယွံကောန်တၠတအ် အာပတ်အဲဒးမၠာ်သ္ၚေဝ်ဂှ် ဟွံမွဲကုအဲရ ရဴဝွံ (သ္ဂးရ)။ ပ္ဍဲအခိၚ်ဂှ် ခမဳအာဂန္တုကဂမၠိုၚ် ဟိုတ်မဟွံမၠာ်သ္ၚေဝ်အာပတ်ဂှ် ဗက်ပတိတ်ထောံ ခမဳကဿပဂေါတ္တအိုတ်ရ။
ပ္ဍဲအခိၚ်ဂှ် “ဣဝွံတုန် အာပတ်ရ ရဴဝွံကီု အာပတ်ဟွံသေၚ်ရရဴဝွံကီု ဒးအာပတ်ရရဴဝွံကီု ဟွံဒးအာပတ်ရ ရဴဝွံကီု ထေက်ကဵုဗက်ပတိတ်ရ ရဴဝွံကီု ဟွံထေက်ကဵုဗက်ပတိတ်ရ ရဴဝွံကီု ဗဗွဲကဵုဓရ်ရ ရဴဝွံကီု ဟွံဗဗွဲကဵုဓရ်ရ ရဴဝွံကီု ကမ်မလီုလာ်ရ ရဴဝွံကီု ကမ်ဟွံလီုလာ်ရ ရဴဝွံကို ကမ်ဗဗွဲကုဟိုတ်ရ ရဴဝွံကီု ကမ်ဟွံဗဗွဲကုဟိုတ်ရ ရဴဝွံကီု အဲဟွံတီကေတ် ဟိုတ်ဂှ်ရ၊ အဲ အာဍုၚ်သမ္ပာတုဲမ္ဂး သ္ဂောံဂရၚ်ပတီသၟာန် ဟိုတ်ပရူပရာဝွံ ကုတဳလမၞုံပိုဉ်ကျာ်တြဲမ္ဂး ခိုဟ်သန်ရ” ရဴဝွံ ကသပ်ဒှ်ကၠုၚ် ကုခမဳကဿပဂေါတ္တရ။
ကြဴနူဂှ် ခမဳကဿပဂေါတ္တ လပှ်သီုဂိုၚ်ဒေပ် သၞာသတိက်သၞာဒၟံၚ်တုဲမ္ဂး ဂိုၚ်ကေတ်ဗဗေၚ်သ္ၚာတုဲ က္ညအာဍုၚ်စမ္ပာရ။ က္ညအာအတိုၚ်လၟေၚ်လၟေၚ်မ္ဂး ပြာပ်စိုပ်အာ ဇရေၚ်တဳလမၞုံပိုဉ်ကျာ်တြဲ ပ္ဍဲဍုၚ်စမ္ပာတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ်ပ္ဍဲဒၞါဲမွဲရ။
ပွမဟီုဂလာန်ဆက်မိတ် ဗွဲမမိပ်စိုတ်အိုဟ်တၟိုဟ် ကေုာံခမဳအာဂန္တုကဂမၠိုၚ် မွဲစွံဂှ် ဒှ်အခိုက်အလေံ တဳလမၞုံပိုဉ်ကျာ်တြဲဂမၠိုၚ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳ မိပ်ဇြိပ်ထတ်ယုက်ဟာ၊ ယိုပ်ယောပ်ဟာ၊ သီုဟွံဍောၚ်ၜိုတ်ဂှ် ဂွံကၠုၚ်တဴ တရဴအဓာန်မဂၠိၚ်သ္ၚောဲဟာ၊ ယွံခမဳ တၠအဲ မုရဴနူဌာန်မွဲ ကၠုၚ်ရော?” ရဴဝွံ သၟာန်တိုန် ခမဳကဿပဂေါတ္တရ။
မိပ်ဇြိပ်ထတ်ယုက်ရ ယွံကျာ်မၞုံပိုဉ်၊ ယိုပ်ယောပ်ရ ယွံကျာ်မၞုံပိုဉ်၊ အဲဍိက် သီုဟွံဍောၚ်ၜိုတ် ဂွံကၠုၚ်တရဴအဓာန် မဂၠိၚ်သ္ၚောဲရ၊ ယွံကျာ်မၞုံပိုဉ် ပ္ဍဲဇနပိုဒ်ကာသိရးဂမၠိုၚ် ကွာန်မၞုံယၟုဝါသဘနွံမွဲရ။ ယွံကျာ်မၞုံပိုဉ် အဲဍိက် ဒှ်ခမဳဂဇအ်ဘာ ပ္ဍဲကွာန်ဂှ်ရ၊ “ခမဳမသ္ဍိုက်ဆာန်သဳလ မဟွံကၠုၚ်စိုပ်ကၠုၚ်စိုပ်ဏီဂမၠိုၚ် မုရဴသာ်လဵု ဂွံကၠုၚ်စိုပ်အိုတ်ရော? ခမဳမသ္ဍိုက်ဆာန်သဳလ မကၠုၚ်စိုပ်တုဲဂမၠိုၚ် မုရဴသာ်လဵု ဂွံပဒတဴဗွဲတသိုခ်အိုတ်ရော? ဘာဝွံလေဝ် မုရဴသာ်လဵု ဂွံအာစိုပ်ပွမဇၞော်မောဝ်ဂီုကၠီုလှဲလးရော?” ရဴဝွံ သ္ပဂဗုဓ်ဓဝိၚ်လၟိုန်တုဲ အာစိုပ်ပွမပတိတ်ဇြဟတ်ရ။
ယွံကျာ်မၞုံပိုဉ် ပ္ဍဲအခိၚ်ဂှ် ခမဳဂမၠိၚ်မဂၠိုၚ်ဂၠၚ် ဂေတ်ဂ္ၚေၚ်ပ္ဍဲကာသိရးအိုတ်မ္ဂး စိုပ်ကၠုၚ်ကွာန်ဝါသဘအိုတ်ရ၊ ယွံကျာ်မၞုံပိုဉ် အဲဍိက် သ္ဂောံညာတ်ကေတ် ခမဳဂမၠိုၚ်မက္ညကၠုၚ်နူဇမ္ၚောဲတုဲ လးသၞာဂဇအ်ရ၊ စွံပတန်လဝ် ဍာ်ကြဴဇိုၚ် ဂတဵုပေါတ်ဇိုၚ် ကဝေတ်ပေါတ်ဇိုၚ်ရ၊ ဒစးဒုၚ်တၠုၚ်တရဴတုဲ ဟောဝ်ဂိုၚ်ဗဗေၚ်သ္ၚာရ၊ (နွံပၟိက်ဍာ်သုၚ်ဟာရဴဝွံ) သၟာန်တဴ နကဵုဍာ်သုၚ်ရ၊ သ္ပပွမပတိတ်ဇြဟတ် ပ္ဍဲပွမဟုမ်ဍာ်ရ၊ ပ္ဍဲယာဂုကီု ပ္ဍဲစၞစကီု ပ္ဍဲပိဏ္ဍပါတ်ကီု သ္ပပွမပတိတ်ဇြဟတ်ရ။ ယွံကျာ်မၞုံပိုဉ် ပ္ဍဲအခိၚ်ဂှ် ခမဳအာဂန္တုကဂမၠိုၚ်ဂှ် “ယွံကောန်တၠတအ် ခမဳဂဇအ်ဘာဝွံ ခိုဟ်ကွေံရ၊ (သွက်ပိုဲညးဂမၠိုၚ်) သ္ပပွမပတိတ်ဇြဟတ် ပ္ဍဲပွမဟုမ်ဍာ်ရ၊ ပ္ဍဲယာဂုကီု ပ္ဍဲစၞစကီု ပ္ဍဲပိဏ္ဍပါတ်ကီု ပွမပတိတ်ဇြဟတ်လေဝ် သ္ပရ။ ယွံကောန်တၠတအ် ပ္ဍဲအခိၚ်လၟုဟ် ပ္ဍဲညးဂမၠိုၚ်ပ္ဍဲကွာန်ဝါသဘဝွံဟေၚ် ပဒတဴအိုတ်စိုအ်” ရဴဝွံ ချပ်ဂၞန်ဟီုသ္ဂးတုဲပ္ဍဲကြဴ ပဒတဴပ္ဍဲကွာန်ဝါသဘဂှ်ဟေၚ်အိုတ်ရ။ ယွံကျာ်မၞုံပိုဉ် အဲဍိက်ဂှ် “ကုခမဳအာဂန္တုကဂမၠိုၚ်ဝွံ ပွမဍောၚ်ၜိုတ်မစပ်ကဵု အာဂန္တုကဂှ် လလမ်အာတုဲရ၊ ခမဳအာဂန္တုကဂမၠိုၚ်ဂှ် ပ္ဍဲအခိၚ်လၟုဟ် တီကေတ်ဂၠံၚ် ပ္ဍဲကွာန်ဂ္ၚေၚ်ပိဏ္ဍပါတ်အဲအိုတ်ရ၊ ဗွဲစၟတ်တုန် ပ္ဍဲသ္ၚိညးသအာၚ်ဂမၠိုၚ် သွက်ဂွံသ္ပ ပွမသ္ပလွဳစဵုကဵုလအိတ်လမျီုဂှ် ဇြိုၚ်သန်ရ၊ ပွမအာတ်ဂှ်လေဝ် မၞိဟ်ဂမၠိုၚ် ဟွံသ္ဍိုက်မၠိုက်ရ၊ ဂွံဂွံမံၚ်ထောံ သီုဟွံသ္ပ ပွမလွဳပရာ ပ္ဍဲယာဂုကီု ပ္ဍဲစၞစကီု ပ္ဍဲပိဏ္ဍပါတ်ကီုမ္ဂး ခိုဟ်သန်ရ” ရဴဝွံ ချပ်တုဲပ္ဍဲကြဴ ပဒတဴသီုဟွံသ္ပ ပွမလွဳပရာ ပ္ဍဲယာဂုကီု ပ္ဍဲစၞစကီု ပ္ဍဲပိဏ္ဍပါတ်ကီုရ။
ယွံကျာ်မၞုံပိုဉ် ကြဴနူဂှ် “ယွံကောန်တၠတအ် ခမဳဂ္ဇအ်ဘာဝွံ ပ္ဍဲကိုပ်ကၠာတေံ (သွက်ပိုဲညးဂမၠိုၚ်) သ္ပပွမပတိတ်ဇြဟတ် ပ္ဍဲပွမဟုမ်ဍာ်ရ၊ ပ္ဍဲယာဂုကီ ပ္ဍဲစၞစကီု ပ္ဍဲပိဏ္ဍပါတ်ကီု သ္ပပွမပတိတ်ဇြဟတ်ရ။ ခမဳဂဇအ်ဘာဂှ် ပ္ဍဲအခိၚ်လၟုဟ် ဟွံသ္ပပွမလွဳပရာ ပ္ဍဲယာဂုကီ ပ္ဍဲစၞစကီု ပ္ဍဲပိဏ္ဍပါတ်ကီုရ၊ ယွံကောန်တၠတအ် ခမဳဂဇအ်ဘာဝွံ ပ္ဍဲအခိၚ်လၟုဟ် ဟွံခိုဟ်ရ၊ ယွံကောန်တၠတအ် ပ္ဍဲအခိၚ်လၟုဟ် ပိုဲညးဂမၠိုၚ် ဗက်ပတိတ်ထောံ ခမဳဂဇအ်ဘာဂှ် နူဘာဝွံအိုတ်စိုအ်” ရဴဝွံ ကသပ်ဒှ်ကၠုၚ် ကုခမဳ အာဂန္တုကဂမၠိုၚ်ဂှ်ရ။
ယွံကျာ်မၞုံပိုဉ် ပ္ဍဲအခိၚ်ဂှ် ခမဳအာဂန္တုကဂမၠိုၚ်ဂှ် ကောံဓရီုတုဲမ္ဂး “ယွံကောန်တၠတအ် တၠအဲ ပ္ဍဲကိုပ်ကၠာတေံ သ္ပပမပတိတ်ဇြဟတ် ပ္ဍဲပွမဟုမ်ဍာ်ရ၊ ပ္ဍဲယာဂုကီ ပ္ဍဲစၞစကီု ပ္ဍဲပိဏ္ဍပါတ်ကီု ပွမပတိတဇြဟတ်လေဝ် သ္ပရ။ တၠအဲ ပ္ဍဲအခိၚ်လၟုဟ် ဟွံသ္ပပွမလွဳပရာ ပ္ဍဲယာဂုကီ ပ္ဍဲစၞစကီု ပ္ဍဲပိဏ္ဍပါတ်ကီုဂမၠိုၚ်ရ၊ ယွံကောန်တၠ တၠအဲ အာစိုပ်အာပတ်ရ၊ ဩဝ်မၠာ်သ္ၚေဝ် အာတ်ဂှ်ညိ” ရဴဝွံ ဟီုသ္ဂးကဵု အဲဍိက်တုဲ (အဲဍိက်ဂှ်) ယွံကောန်တၠတအ် အာပတ်အဲဒးမၠာ်သ္ၚေဝ်ဂှ် ဟွံမွဲကုအဲရ ရဴဝွံ (သ္ဂးရ)။ ယွံကျာ်မၞုံပိုဉ် ပ္ဍဲအခိၚ်ဂှ် ခမဳအာဂန္တုကဂမၠိုၚ် ဟိုတ်မဟွံမၠာ်သ္ၚေဝ်အာပတ်ဂှ် ဗက်ပတိတ်ထောံ အဲဍိက်အိုတ်ရ။
ယွံကျာ်မၞုံပိုဉ် ပ္ဍဲအခိၚ်ဂှ် “ဣဝွံတုန် အာပတ်ရရဴဝွံကီု အာပတ်ဟွံသေၚ်ရ ရဴဝွံကီု ဒးအာပတ်ရ ရဴဝွံကီု ဟွံဒးအာပတ်ရ ရဴဝွံကီု ထေက်ကဵုဗက်ပတိတ်ရ ရဴဝွံကီု ဟွံထေက်ကဵုဗက်ပတိတ်ရ ရဴဝွံကီု ဗဗွဲကဵုဓရ်ရ ရဴဝွံကီု ဟွံဗဗွဲကဵုဓရ်ရ ရဴဝွံကီု ကမ်မလီုလာ်ရ ရဴဝွံကီု ကမ်ဟွံလီုလာ်ရ ရဴဝွံကို ကမ်ဗဗွဲကုဟိုတ်ရ ရဴဝွံကီု ကမ်ဟွံဗဗွဲကုဟိုတ်ရ ရဴဝွံကီု အဲဟွံတီကေတ် ဟိုတ်ဂှ်ရ၊ အဲ အာဍုၚ်သမ္ပာတုဲမ္ဂး သ္ဂောံဂရၚ်ပတီသၟာန် ဟိုတ်ပရူပရာဝွံ ကုတဳလမၞုံပိုဉ်ကျာ်တြဲမ္ဂး ခိုဟ်သန်ရ” ရဴဝွံ ကသပ်ဒှ်ကၠုၚ် ကုအဲဍိက်ရ။ ယွံကျာ်မၞုံပိုဉ် အဲဍိက် ကၠုၚ်နူကွာန်ဝါသဘဂှ်ရ ရဴဝွံ (ဂရၚ်ပတီရ)။
ယွံခမဳ ဣဝွံဂှ် အာပတ်ဟွံသ္ဂးရ၊ ဣဝွံဂှ် အာပတ်ဟွံသေၚ်ရ၊ ဒှ်ဟွံဒးအာပတ်ရ၊ ဒးအာပတ်ဟွံသေၚ်ရ၊ ဒှ်ဟွံထေက်ကဵုဗက်ပတိတ်ထောံရ၊ ထေက်ကဵုဗက်ပတိတ်ထောံ ဟွံသေၚ်ရ၊ နကဵုကမ် မဟွံဗဗွဲဓရ်မလီုလာ် မဟွံဗဗွဲကဵုဟိုတ်ဂှ် ဗက်ပတိတ်ထောံ တၠအဲရ။ ယွံခမဳ ဩဝ်အာညိ၊ တၠအဲ ဩဝ်ပဒတဴ ပ္ဍဲကွာန်ဝါသဘဂှ်ဟေၚ်ညိ ရဴဝွံ (သ္ဂးရ)။
“ခိုဟ်ရ ယွံတဳလမၞုံပိုဉ်” ရဴဝွံ ခမဳကဿပဂေါတ္တ ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ဒၠိုက်တဵုနူဒၞါဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သ္ပရှ်ေသှ်ေရဴဂဴကၠာ က္ညစ္ဍးအာရ။
၃၈၁။ ကြဴနူဂှ် “ကုပိုဲညးဂမၠိုၚ် ဟွံကလိဂွံဂုဏ်ဂမၠိုၚ်မပ္တံၛာန်အိုတ်ရသွံ၊ ကုပိုဲညးဂမၠိုၚ် ကလိဂွံဒဒှ် ခမဳ ဗွဲဟွံဒးရးအိုတ်ရသွံ၊ ပိုဲညးဂမၠိုၚ် ဂပ်ဝ်ကလိဂွံ (သာသနာ) ဗွဲဟွံဒးရးအိုတ်ရ၊ ပိုဲညးဂမၠိုၚ် ဂပ်ဝ်ကလိဂွံ (သာသနာ) ဗွဲမ္ဒးရး ဟွံသေၚ်အိုတ်ရ၊ ဟိုတ်ဍေံဟီုဂှ် ယြဴပိုဲညးဂမၠိုၚ် သီုဟွံမွဲကဵုဝတ္ထု သီုဟွံမွဲကဵုဟိုတ်ဂှ် ဗက်ပတိတ်ဒး ခမဳမသအးဇ္ၚး မဟွံဒးအာပတ်အိုတ်ရ၊ ယွံကောန်တၠတအ် ပ္ဍဲအခိၚ်လၟုဟ်ဝွံ ပိုဲညးဂမၠိုၚ် အာဍုၚ်စမ္ပာတုဲမ္ဂး ဗွဲမဗဗွဲကဵုဒဟ် ကလအ်ဒုၚ်ဂုဏ် ပ္ဍဲဇရေၚ်တဳလမၞုံပိုဉ်ကျာ်တြဲအိုတ်စိုအ်” ရဴဝွံ ပွမစံၚ်တူဗွဲကြဴ ပွမသၠိုက်သ္ၚောံစိုတ် ဒှ်အာကုခမဳအာဂန္တုကဂမၠိုၚ်ရ။
ကြဴနူဂှ် ခမဳအာဂန္တုကဂမၠိုၚ်ဂှ် လပှ်သီုဂိုၚ်ဒေပ် သၞာသတိက်သၞာဒၟံၚ်တုဲမ္ဂး ဂိုၚ်ကေတ်ဗဗေၚ်သ္ၚာတုဲ က္ညအာဍုၚ်စမ္ပာအိုတ်ရ။ က္ညအာအတိုၚ်လၟေၚ်လၟေၚ်မ္ဂး ပြာပ်စိုပ်အာ ဇရေၚ်တဳလမၞုံပိုဉ်ကျာ်တြဲ ပ္ဍဲဍုၚ်စမ္ပာတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ်ပ္ဍဲဒၞါဲမွဲအိုတ်ရ။
ပွမဟီုဂလာန်ဆက်မိတ် ဗွဲမမိပ်စိုတ်အိုဟ်တၟိုဟ် ကေုာံခမဳအာဂန္တုကဂမၠိုၚ် မွဲစွံဂှ် ဒှ်အခိုက်အလေံ တဳလမၞုံပိုဉ်ကျာ်တြဲဂမၠိုၚ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳတအ် မိပ်ဇြိပ်ထတ်ယုက်ဟာ၊ ယိုပ်ယောပ်ဟာ၊ သီုဟွံဍောၚ်ၜိုတ်ဂှ် ဂွံကၠုၚ်တဴ တရဴအဓာန်မဂၠိၚ်သ္ၚောဲဟာ၊ ယွံခမဳတအ် မၞးတအ်ညးဂမၠိုၚ် မုရဴနူဌာန်မွဲ ကၠုၚ်ရော?” ရဴဝွံ သၟာန်တိုန် ခမဳဂမၠိုၚ်ဂှ်ရ။
မိပ်ဇြိပ်ထတ်ယုက်ရ ယွံကျာ်မၞုံပိုဉ်၊ ယိုပ်ယောပ်ရ ယွံကျာ်မၞုံပိုဉ်၊ ပိုဲဍိက်တအ် သီုဟွံဍောၚ်ၜိုတ် ဂွံကၠုၚ်တရဴအဓာန်မဂၠိၚ်သ္ၚောဲအိုတ်ရ၊ ယွံကျာ်မၞုံပိုဉ် ပ္ဍဲဇနပိုဒ်ကာသိရးဂမၠိုၚ် ကွာန်မၞုံယၟုဝါသဘနွံမွဲရ။ ယွံကျာ်မၞုံပိုဉ် ပိုဲဍိက်တအ်ညးဂမၠိုၚ် နူကွာန်ဂှ်အိုတ်ရ ရဴဝွံ (ဂရၚ်ပတီအိုတ်ရ)။ ယွံခမဳတအ် မၞးတအ်ညး၈မၠိုၚ် ဗက်ပတိတ်ထောံ ခမဳဂဇအ်ဘာဂှ်အိုတ်ဟာ၊ ရဴဝွံ (သၟာန်ရ)။ ယွံကျာ်မၞုံပိုဉ် ဗက်ပတိတ်ဒးဂှ် ဍာံပြရ ရဴဝွံ (ဂရၚ်ပတီအိုတ်ရ)။ ယွံခမဳတအ် မုရဴဟိုတ်နူဝတ္ထုမွဲ မုရဴဟိုတ်နူဟိုတ်မွဲ (ဗက်ပတိတ်ထောံအိုတ်ရော?) ရဴဝွံ (သၟာန်ရ)။ ယွံကျာ်မၞုံပိုဉ် သီုဟွံမွဲကဵုဝတ္ထု သီုဟွံမွဲဟိုတ်ဂှ် ဗက်ပတိတ်ဒးအိုတရ ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံခမဳတအ် (ပွဝွံ) ဟွံထေက်ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာအရာခမဳတအ် ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် သီုဟွံမွဲကဵုဝတ္ထု သီုဟွံမွဲကဵုဟိုတ်ဂှ် ဗက်ပတိတ်ထောံ ခမဳမသအးဇ္ၚး မဟွံဒးအာပတ်အိုတ်ရော? ယွံတြုံမလ္ၚုသၟး (နူမဂ်ဖိုလ်) (ပွမၞးတအ်ညးဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး “ယွံခမဳတအ် သီုဟွံမွဲကဵုဝတ္ထု သီုဟွံမွဲကဵုဟိုတ်ဂှ် ဟဂပ်ဝ်ဗက်ပတိတ်ထောံ ခမဳမသအးဇ္ၚး မဟွံဒးအာပတ်ရ၊ ကုခမဳမဗက်ပတိတ်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
ကြဴနူဂှ် ခမဳဂမၠိုၚ်ဂှ် ဒၠိုက်ကတဵုနူဒၞါဲတုဲမ္ဂး လ္ၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ်တုဲ မာဖျေံက္ဍိုပ် ပ္ဍဲဇိုၚ်တဳလမၞုံပိုည်ကျာ်တြဲဂမၠိုၚ်တုဲ “ယွံတဳလမၞုံပိုဉ် အတိုၚ်မဒိုဟ်ဓီု အတိုၚ်မဝိဝိၚ် အတိုၚ်ဟွံဍိုဟ်ကေက် ဒုဟ်ဓလီုဍိုက်ဒး ပိုဲဍိက်တအ်ညးဂမၠိုၚ်တုဲရ၊ ယွံတဳလမၞုံပိုဉ် ဒုဟ်ပိုဲတအ်ညးဂမၠိုၚ် ဗက်ပတိတ်ဒးခမဳ မသအးဇ္ၚး ဟွံမွဲကဵုအာပတ် သီုဟွံမွဲကဵုဝတ္ထု သီုဟွံမွဲကဵုဟိုတ်ဂှ် ဗွဲအစောံဒုဟ် တၞဟ်နသ္ၚဳလလမ်မၚ်မွဲ ပ္ဍဲကာလကြဴ တဳလမၞုံပိုဉ်ကျာ်တြဲ ဩဝ်အေၚ်ဒုၚ်ညိကျာ် ရဴဝွံ (ဂရၚ်ပတီအိုတ်ရ)။
ယွံခမဳတအ် ခိုဟ်ရ တၠအဲ အတိုၚ်မဒိုဟ်ဓီု အတိုၚ်မဝိဝိၚ် အတိုၚ်ဟွံဍိုဟ်ကေက် ဒုဟ်ဓလီုဍိုက်ဒး မၞးတအ်ညးဂမၠိုၚ်တုဲရ၊ မၞးတအ်ညးဂမၠိုၚ် ဗက်ပတိတ်ဒးခမဳ မသအးဇ္ၚး ဟွံမွဲကဵုအာပတ် သီုဟွံမွဲကဵုဝတ္ထု သီုဟွံမွဲကဵုဟိုတ်ရ၊ ယွံခမဳတအ် ညာတ်ကေတ်ဒုဟ် ဗွဲအစောံဒုဟ်တုဲ ဟိုတ်မဇအုဲဇဗကၠေံ ဗွဲမဗဗွဲကဵုဓရ်ဂှ်ရ ဒုဟ်မၞးတအ်ညးဂမၠိုၚ်ဂှ် (ဒုဟ်ရ) ရဴဝွံ ပိုဲအေၚ်ဒုၚ်အိုတ်ရ။ ယွံခမဳတအ် ပ္ဍဲသာသနာအဲကျာ် ယြဴခမဳမွဲ ညာတ်ဒုဟ် ဗွဲအစောံဒုဟ်တုဲ ဇအုဲဇဗကၠေံ ဗွဲမဗဗွဲကဵုဓရ်ရ၊ ပ္ဍဲကာလကြဴလေဝ် အာစိုပ်ပွမသ္ၚဳလလမ်မၚ်မွဲရ၊ ပွမအာစိုပ် သ္ၚဳလလမ်မၚ်မွဲ ညးဂှ်ဝွံ ပ္ဍဲသာသနာ ဒၠောံဗတောန်ကျာ်အရဳဂှ် ဒှ်ဟိုတ်ပွမဇၞော်မောဝ်တဴတက်ရ ရဴဝွံ (သ္ဂးရ)။
