၂၃၂။ မာတိကာ ဟိုတ်သ္ၚာကတဵုဒှ် ဒ္စာံသာ်
၃၇၉။ ယွံခမဳတအ် မာတိကာဟိုတ်သ္ၚာကတဵုဒှ်ဂမၠိုၚ် ဣဝွံ မၞုံဒ္စာံသာ်အိုတ်ရ။ ကဵုဒါန်ဗွဲမပိုၚ်အခြာ၊ ကဵုဒါန် ဗွဲကတိဝတ်၊ ကဵုဒါန် ဗွဲဝတ်ပိဏ္ဍပါတ်၊ ကဵုဒါန် ကုသၚ်၊ ကဵုဒါန် ကုဥဘတော သၚ်၊ ကဵုဒါန် ကုသၚ်ဒၠိုက်ကတဵုနူဝသ်၊ ရန်တၟံတုဲကဵုဒါန်၊ ကဵုဒါန် ကုပူဂိုလ်ရ။
ကဵုဒါန် ဗွဲအပိုၚ်အခြာမ္ဂး၊ ယြဴခမဳဂမၠိုၚ်မၞုံဗၞတ်မွဲ ကၠုၚ်စိုပ်အပ္ဍဲသိမ်အိုတ်ရ၊ ခမဳဂမၠိုၚ် မၞုံဗၞတ်ဂှ် ဒးပါ်ပရအ်ရ။
ကဵုဒါန် ဗွဲကတိကဝတ်မ္ဂး၊ ဘာဂမၠိုၚ်မဂၠိုၚ် မၞုံကဵုလာဘ်တုပ်သၟဟ်အိုတ်ရ၊ ကဵုဒါန်ပ္ဍဲဘာမွဲမ္ဂး၊ ဒှ်ကဵုဒါန် ပ္ဍဲဘာသီုဖအိုတ်ရ။
ကဵုဒါန် ဗွဲဝတ်ပိဏ္ဍပါတ်မ္ဂး၊ ယြဴပ္ဍဲဘာမွဲ သ္ပတဴ ပွမကဵုဒါန်ပိဏ္ဍပါတ်လၟိုန်ဂမၠိုၚ် ကုသၚ်အိုတ်ရ၊ ကဵုဒါန် ပ္ဍဲဘာဂှ်ရ။
ကဵုဒါန် ကုသၚ်မ္ဂး၊ သၚ်မဒှ်ဂတမုက် ဒးပါ်ပရအ်ရ။
ကုဒါန် ဥဘတောသၚ်မ္ဂး၊ ခမဳတြုံနွံဗွဲမဂၠိုၚ်တုဲ ခမဳဗြဴမွဲဇကုဟေၚ်မ္ဂး၊ ဒးကဵုကဝက်ရ၊ ခမဳဗြဴနွံဗွဲမဂၠိုၚ်တုဲ ခမဳတြုံနွံမွဲဇကုဟေၚ်မ္ဂး၊ ဒးကဵုကဝက်ရ။
ကဵုဒါန် ကုသၚ်ဒၠိုက်ကတဵုနူဝသ်မ္ဂး၊ ယြဴခမဳဂမၠိုၚ်မၞုံဗၞတ်မွဲ ဒၠိုက်ကတဵုနူဝသ် ပ္ဍဲဘာဂှ်အိုတ်ရ၊ ခမဳဂမၠိုၚ်ဂှ် ဒးပါ်ပရအ်ရ။
ရန်တၟံတုဲကဵုဒါန်မ္ဂး၊ ခမဳမကဵုပိုဉ်ယာဂုဂမၠိုၚ်ကီု ခမဳမကဵုပိုဉ်ပိဏ္ဍပါတ်ဂမၠိုၚ်ကီု ခမဳမကဵုပိုဉ် စၞစ (ကွာန်ၜဲ) ဂမၠိုၚ်ကီု ခမဳမကဵုဒါန်သ္ၚာဂမၠိုၚ်ကီု ခမဳမပဒတဴ ပ္ဍဲဘာဇကုဂမၠိုၚ်ကီု ခမဳမကဵုဒါန်ဂဥုဲဂမၠိုၚ်ကီု (ရန်တၟံတုဲ ကဵုဒါန်ရ)။
ကဵုဒါန် ကုပူဂိုလ်မ္ဂး၊ “သ္ၚာဝွံ ကဵုဒါန်ကုတဳလပိုဉ်မၞုံယၟုဝွံရ” ရဴဝွံ (ကဵုဒါန် ကုပူဂိုလ်ရ)။
စဳဝကရက္ခန္ဓကတုဲရ။
