၂၂၆။ ပါဲကၠေံဒ္ဂေတ်ဟွံဗိုက်ဗွိုက်လတက်

၃၇၀။ ပ္ဍဲကာလမွဲအခိၚ် ခမဳမွဲဇကု သီုဟွံဗိုက်ဗွိုက်လတက် ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲမ္ဂး “ယွံတဳလမၞုံပိုဉ် တဳလမၞုံပိုည်ကျာ်တြဲဂှ် နဟိုတ်မဂၠိုၚ်ဂၠၚ် မၞုံအလေံဟီုထိုၚ်တဴဂုဏ် ပွမပၟိက်အောန် ပွမအေၚ်သတှ်ေ (တရိုပ်စိုတ်) ပွမတှ်ေတြဳထောံကိလေသ ပွမခါလယှ်ထောံကိလေသ ပွမရၚ်တၠုၚ်ကဵုလျုၚ်ဇြုၚ်သ္ဍိုက် ပွမပလီုပလာ်ကၠေံကိလေသ ပွမပတိတ်ဇြဟတ်လွဳပရာရ။

ယွံတဳလမၞုံပိုဉ် ဒ္ဂေတ်မပဒတဴ သီုဟွံဗိုၚ်ဗွိုက်လတက်ဝွံ နဟိုတ်မဂၠိုၚ်ဂၠၚ် ဒှ်တဴ တၞဟ်နပွမပၟိက်အောန် တၞဟ်နပွမေၚ်သတှ်ေ တၞဟ်နပွမတှ်ေတြဳထောံကိလေသ တၞဟ်နပွမခါလယှ်ထောံကိလေသ တၞဟ်နပွမရၚ်တၠုၚ်ကဵုလျုၚ်ဇြုၚ်သ္ဍိုက် တၞဟ်နပွမပလီုပလာ်ကၠေံကိလေသ တၞဟ်နပွမပတိတ်ဇြဟတ်လွဳပရာရ။

ယွံတဳလမၞုံပိုည် အာတ်ပါန်အခေါၚ်ရ၊ တဳလမၞုံပိုဉ်ကျာ်တြဲ ဩဝ်ကဵုအခေါၚ် ဒ္ဂေတ်မဟွံဗိုက်ဗွိုက်လတက် ကဵုခမဳဂမၠိုၚ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။

တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံတြုံမလ္ၚုသၟး (နူမဂ်ဖိုလ်) (ပွဝွံ) ဟွံထေက် ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာခမဳတအ် ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ။ ယွံတြုံမလ္ၚုသၟး (နူမဂ်ဖိုလ်) တၠအဲ မုဟိုတ် ဒဂိုန်ဂိုၚ်ကေတ် ဒ္ဂေတ်မဟွံဗိုက်ဗွိုက်လတက် တဳဂမၠိုၚ်မဂပ်ဝ်ဒဂိုန်ဂိုၚ်ကေတ်ရော? ယွံတြုံမလ္ၚုသၟး (နူမဂ်ဖိုလ်) (ပွမတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး “ယွံခမဳတအ် ဟဂပ်ဝ်ဒဂိုန်ဂိုၚ်ေကတ် ဒ္ဂေတ်မဟွံဗိုၚ်ဗွိုက်လတက် တဳဂမၠိုၚ်မဂပ်ဝ်ဒဂိုန်ဂိုၚ်ကေတ်ရ၊ ယြဴခမဳမွဲ ဒဂိုန်ဂိုၚ်ကေတ်ရ၊ ကုခမဳဂှ် ဒးအာပတ်ထုလ္လစ္စယ်ရ ရဴဝွံ သ္ဒးကဵုခမဳဂမၠိုၚ်ရ။