၂၁၄။ မပ္တံပွမသၟိတ်တိုက်ဂြပ်
၃၄၃။ ပ္ဍဲကာလမွဲအခိၚ် ခမဳဒေပ်စွံသ္ၚာဂှ် ဒေပ်စွံသ္ၚာ ပ္ဍဲကၞာထးကီု ပ္ဍဲသၟဝ်တမ်ဆုကီု ပ္ဍဲဒယူကီုရ၊ ကၞိဂမၠိုၚ် ကေုာံဂြုန်ဂမၠိုၚ် ကိတ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြအိုတ်ရ။ ယွံခမဳတအ် ဘာဖျေံစၟဳၜါလပါ်ကီု ဘာဖျေံစၟဳမွဲလပါ်ကီု ပြာသာဒ်ပန်ကၠၚ်ကီု ပြာသာဒ်ခၠုပ်ကီု ထီုဂိုဟ်ကီု သၚ်မၞုံပၟိက်ဂှ် ကဵုအခေါၚ် တၞဟ်နသၟိတ်တဴ ရဴဝွံမ္ဂးတိုက်ဂြပ်ရ။ ယွံခမဳတအ် ရဴဝွံ ဂပ်ဝ်ဒးသၟိတ်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ−
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်တဴ ဘာမၞုံယၟုဝွံ ရဴဝွံမ္ဂးတိုက်ဂြပ်ရ၊ ဣဝွံတုန် ပွမကဵုတီရ။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်တဴ ဘာမၞုံယၟုဝွံ ရဴဝွံမ္ဂးတိုက်ဂြပ်ရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသၟိတ်တဴ ဘာမၞုံယၟုဝွံ ရဴဝွံမ္ဂးတိုက်ဂြပ်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သၟိတ်တဴ ဘာမၞုံယၟုဝွံ ရဴဝွံမ္ဂးတိုက်ဂြပ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
ပ္ဍဲကာလမွဲအခိၚ် ပ္ဍဲတိုက်ဂြပ်သၚ် သ္ၚာသီုဟွံဂြောပ်ဗ္ဒန်ခိုၚ်ကၠိုက် ဒှ်ဒၟံၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဍိုက်ပေၚ်တဴကေုာံအၚ်္ဂမသုန်သာ်ဂှ် တၞဟ်နသၟိၚ်ရဴဝွံမ္ဂး ခမဳမၚ်မွဲတိုက်ဂြပ် ကဵုအခေါၚ်ရ၊ ယြဴခမဳမွဲ ဟွံဗက်ဆန္ဒာဂတိရ၊ ဟွံဗက်ဒေါသာဂတိရ၊ ဟွံဗက်မောဟာဂတိရ၊ ဟွံဗက်ဘယာဂတိရ၊ ဂြောပ်ဗ္ဒန် ဟွံဂြောပ်ဗ္ဒန်လေဝ် တီရ၊ ယွံခမဳတအ် ရဴဝွံ ဂပ်ဝ်ဒးသၟိတ်ရ၊ ဗွဲကိုပ်ကၠာ ဂပ်ဝ်အာတ်အခေါၚ် ခမဳရ၊ အာတ်အခေါၚ်တုဲမ္ဂး ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ−
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး၊ သၚ် သၟိတ်တဴ ခမဳမၞုံယၟုဝွံ ရဴဝွံမ္ဂးခမဳမၚ်မွဲတိုက်ဂြပ်ရ၊ ဣဝွံတုန် ပွမကဵုတီရ။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်တဴ ခမဳမၞုံယၟုဝွံ ရဴဝွံမ္ဂးခမဳမၚ်မွဲတိုက်ဂြပ်ရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသၟိတ်တဴ ခမဳမၞုံယၟု ရဴဝွံမ္ဂးခမဳမၚ်မွဲတိုက်ဂြပ်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သၟိတ်တဴ ခမဳမၞုံယၟုဝွံ ရဴဝွံမ္ဂးခမဳမၚ်မွဲတိုက်ဂြပ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
ပ္ဍဲမွဲအခိၚ်တေံ ခမဳဆဗ္ဗဂ္ဂဳဂမၠိုၚ် ပါဲကၠေံ ခမဳမၚ်မွဲတိုက်ဂြပ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်ပါဲကၠေံ ခမဳမၚ်မွဲတိုက်ဂြပ်ရ၊ ကုခမဳမကဵုပါဲကၠေံဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲကာလမွဲအခိၚ် ပ္ဍဲတိုက်ဂြပ်သၚ် သ္ၚာဂၠိုၚ်ဒၟံၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တၞဟ်နပါ်ပရအ် ကုသၚ်မၞုံဂတမုက်ဂှ် ကဵုအခေါၚ်ရ ရဴဝွံ (သ္ဂးရ)။
ပ္ဍဲကာလမွဲအခိၚ် သၚ်ပါ်ပရအ်သ္ၚာမ္ဂး သ္ပကၞုက်ကၞာဲညာန်ညေဲရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဍိုက်ပေၚ်တဴကေုာံအၚ်္ဂမသုန်သာ်ဂှ် တၞဟ်နသၟိတ်ရဴဝွံမ္ဂး ခမဳပါ်ပရအ်သ္ၚာ ကဵုအခေါၚ်ရ၊ ယြဴခမဳမွဲ ဟွံဗက်ဆန္ဒာဂတိရ၊ ဟွံဗက်ဒေါသာဂတိရ၊ ဟွံဗက်မောဟာဂတိရ၊ ဟွံဗက်ဘယာဂတိရ၊ ထေက်ကဵုပါ်ပရအ် ဟွံထေက်ကဵုပါ်ပရအ်လေဝ် တီရ၊ ယွံခမဳတအ် ရဴဝွံ ဂပ်ဝ်ဒးသၟိတ်ရ၊ ဗွဲကိုပ်ကၠာ ဂပ်ဝ်အာတ်အခေါၚ်ခမဳရ၊ အာတ်အခေါၚ်တုဲမ္ဂး ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ−
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်တဴ ခမဳမၞုံယၟုဝွံ ရဴဝွံမ္ဂးခမဳလေပ်ပါ်ပရအ်သ္ၚာရ၊ ဣဝွံတုန် ပွမကဵုတီရ။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်တဴ ခမဳမၞုံယၟုဝွံ ရဴဝွံမ္ဂးခမဳလေပ်ပါ်ပရအ်သ္ၚာရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသၟိတ်တဴ ခမဳမၞုံယၟုဝွံ ရဴဝွံမ္ဂးခမဳလေပ်ပါ်ပရအ်သ္ၚာရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵု ပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သၟိတ်တဴ ခမဳမၞုံယၟုဝွံ ရဴဝွံမ္ဂးခမဳလေပ်ပါ်ပရအ်ရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
ကြဴနူဂှ် ကုခမဳမလေပ်ပါ်ပရအ်သ္ၚာဂမၠိုၚ် “မုရဴသာ်လဵု သ္ဂောံပါ်ပရအ်သ္ၚာရော?” ရဴဝွံ ကသပ်ဒှ်ကၠုၚ်ရ။ ဂရၚ်ပတိ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဗွဲကိုပ်ကၠာ ရုဲစှ် (မပ္တံတီုကြဳ အနာံဇမၠိုၚ်) တုဲ ချိၚ်ၚုဟ်တုဲ သ္ပမၞုံကဵုၚုဟ်မ္ဂးတုပ်သၟဟ်တုဲ ရိုဟ်လၟိဟ်ခမဳဂမၠိုၚ်တုဲမ္ဂး တၞဟ်နစွံသွက်သ္ၚာ ကဵုအခေါၚ်ရ ရဴဝွံ (သ္ဂးရ)။
ကြဴနူဂှ် ကုခမဳမပါ်ပရအ်သ္ၚာဂမၠိုၚ် “မုရဴသာ်လဵု သ္ဂောံကဵုသွက်သ္ၚာ ကုသာမဏဳဂမၠိုၚ်ရော?” ရဴဝွံ ကသပ်ဒှ်ကၠုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကုသမဏဳဂမၠိုၚ် တၞဟ်နကဵုသွက်သ္ၚာ ကဝက်ဂှ် ကဵုအခေါၚ်၇ ရဴဝွံ (သ္ဂးရ)။
ပ္ဍဲကာလမွဲအခိၚ် ခမဳမွဲဇကု ဂိုၚ်ကေတ်သွက်သ္ၚာဇကုတုဲ မိက်ကွာ်တရဴရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကုခမဳမိက်ကွာ်တရဴဂှ် တၞဟ်နကဵုသွက်ဇကု ကဵုအခေါၚ်ရ ရဴဝွံ (သ္ဂးရ)။
ပ္ဍဲမွဲအခိၚ်တေံ ခမဳမွဲဇကု ဂိုၚ်ကေတ်သွက်သ္ၚာ မလောန်လတူသွက်သ္ၚာညးသအာၚ်ဂမၠိုၚ်တုဲ မိက်ကွာ်တရဴရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုကဵုစၞး မပဵုလောန်တုဲမ္ဂး တၞဟ်နကဵုသွက် မလောန်လတူသွက်သ္ၚာညးသအာၚ်ဂမၠိုၚ် ကဵုအခေါၚ်ရ ရဴဝွံ (သ္ဂးရ)။
ကြဴနူဂှ် ခမဳမပါ်ပရအ်သ္ၚာဂမၠိုၚ် “မုရဴသာ်လဵု သ္ဂောံကဵုသွက်သ္ၚာရော? ဒးကဵုဗွဲလၟေၚ်အတိုၚ်မကၠုၚ်စိုပ်ဟာ၊ ယာံဆဂှ်ဟွံသေၚ်မ္ဂး ဒးကဵုဗွဲလၟေၚ်ထေရ်ဇၞော်ဟာ” ရဴဝွံ ကသပ်ဒှ်ကၠုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုသ္ဍိုက်မၠိုက် ‘ပြေစိုတ်’ ခမဳသ္ၚာဒေက်ခ္ဍေက်ဂမၠိုၚ်တုဲမ္ဂး ကဵုအခေါၚ် ပွမဖျေံမာဲရ ရဴဝွံ (သ္ဂးရ)။
