၁၈၇။ ကဵုအခေါၚ်ကထိုန်
၃၀၆။ ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳကောန်ညးပါဝေယျကရးဂမၠိုၚ် ဗၞတ်ပိစှော်ဇကု အလုမ်အိုတ်သီု ဒဂိုန်ဒ္ဂေတ် ဓုတၚ်ပိဏ္ဍပါတ် ဓုတၚ်ပံသုကူ ဓုတၚ်တိစဳဝရိက်အိုတ်ရ။ (ခမဳဂမၠိုၚ်ဂှ်) သွက်ဂွံဗဵုလ္ၚောဝ် တဳလမၞုံပိုဉ်ကျာ်တြဲ က္ညကၠုၚ်ဍုၚ်သာရဝှ် အိုတ်မ္ဂး ကြပ်ညောန် ကဵုလုပ်ဒဂိုန်ဒှ်တုဲ သွက်ဂွံဂတာပ်တ္ၚဲလုပ်ဒဂိုန် ပ္ဍဲဍုၚ်သာရဝှ်ဂှ် ဟွံသၟဟ်ရထအိုတ်ရ၊ ဒးပြာပ်လုပ်ဒ္ဂိုန် ပ္ဍဲဍုၚ်သာကေတ မဒှ်အကြာဂၠံၚ်တရဴအိုတ်ရ။
ခမဳဂမၠိုၚ်ဂှ် “နူဍုၚ်သာကေတ မဒှ်ဇရေၚ်ပိုဲညးဂမၠိုၚ်ဝွံ ပ္ဍဲဌာန်တြဴယောဇနာတေံ တဳလမၞုံပိုဉ်ကျာ်တြဲ သ္ပဒတဴဒၟံၚ်ရ၊ ပိုဲညးဂမၠိုၚ် ဟွံကလိဂွံအခေါၚ်ဗဵုလ္ၚောဝ် တဳလမၞုံပိုဉ်ကျာ်တြဲအိုတ်ရ” ရဴဝွံ သီုဟွံမိပ်လဟိၚ်ဂှ် ဒးပြာပ်လုပ်ဒဂိုန်အိုတ်ရ။
ပ္ဍဲဲကြနူဂှ် “နူဍုၚ်သာကေတ မဒှ်ဇရေၚ်ပိုဲညးဂမၠိုၚ်ဝွံ ပ္ဍဲဌာန်တြဴယောဇနာတေံ တဳလပိုဉ်ကျာ်တြဲ သ္ပဒတဴဒၟံၚ်ရ၊ ပိုဲညးဂမၠိုၚ် ဟွံကလိဂွံအခေါၚ်ဗဵုလ္ၚာဝ် တဳလပိုဉ်ကျာ်တြဲအိုတ်” ရဴဝွံ သီုဟွံမိပ်လဟိၚ်ဂှ် ဒးပြာပ်လုပ်ဒဂိုန်အိုတ်ရ။
ပ္ဍဲကြဴနူဂှ် ခမဳဂမၠိုၚ်ဂှ် ကလိလောန်အာပိဂိတုတုဲ အခိၚ်လိုက်ဝသ် သ္ပပဝါရဏာတုဲမ္ဂး ဗြဲဇၞော်ဂူတုဲ ပ္ဍဲလှိုက်သရီု မၞုံကဵုဍာဲခၠိုၚ်ဒၟံၚ်ဂှ် နကဵုသ္ၚာဂမၠိုၚ်မပေၚ်တဴနကဵုဍာ် သီုမၞုံသဘဴမဍောၚ်ၜိုတ် ပြာပ်အာဇရေၚ် ဌာန်တဳလမၞုံပိုဉ်ကျာ်တြဲမၞုံ ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဋ္ဌဳ ဇရေၚ်ဍုၚ်သာရဝှ်ဂှ်အိုတ်တုဲလ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲမ္ဂး ဂဇအ်ဒၟံၚ်ပ္ဍဲဒၞဲါမွဲအိုတ်ရ။ ပွမဟီုဂလာန်ဆက်မိတ် ဗွဲမမိပ်စိုတ်အိုဟ်တၟိုဟ် ကေုာံခမဳအာဂန္တုကဂမၠိုၚ်မွဲစွံဂှ် ဒှ်အခိုက်အလေံ တဳလမၞုံပိုဉ်ကျာ်တြဲဂမၠိုၚ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳတအ် မိပ်ဇြိပ်ထတ်ယုက်အိုတ်ဟာ၊ ယိုပ်ယာပ်အိုတ်ဟာ၊ ညဳသာသၟဟ်သၟန် မိပ်စိုတ်အိုဟ်တၟိုဟ် သီုဟွံကယျာန်ဓဝါတ်သေက်ဇဵုဂမၠိုၚ်ဂှ် သ္ဂောံပြာပ်လုပ်ဒဂိုန် ဗွဲတသိုခ်အိုတ်ရဟာ၊ သွက်ပိဏ္ဍပါတ်လေဝ် သီုဟွံဒှ်လၟောၚ်ဍောၚ်ၜိုတ် နွံအိုတ်ရဟာ” ရဴဝွံ သၟာန်တိုန် ခမဳဂမၠိုၚ်ဂှ်−
မိပ်ဇြိပ်ထတ်ယုက်အိုတ်ရ ယွံကျာ်မၞုံပိုဉ်၊ ယိုပ်ယာပ်အိုတ်ရ ယွံကျာ်မၞုံပိုဉ်၊ ညဳသာသၟဟ်သၟန် မိပ်စိုတ်အိုဟ်တၟိုဟ် သီုဟွံကယျာန်ဓဝါတ်သေက်ဇဵုဂမၠိုၚ်ဂှ် သ္ဂောံပြာပ်လုပ်ဒဂိုန် ဗွဲတသိုခ်အိုတ်ရ ယွံကျာ်မၞုံပိုဉ်၊ သွက်ပိဏ္ဍပါတ်လေဝ် သီုဟွံဒှ်လၟောၚ်ဍောၚ်ၜိုတ် နွံအိုတ်ရ ယွံကျာ်မၞုံပိုဉ်၊ ပ္ဍဲအခိၚ်လၟုဟ် ပိုဲဍိက်တအ်ညးဂမၠိုၚ် မဒှ်ကောန်ညးပါဝေယျကရးဂမၠိုၚ် ဗၞတ်ပိစှော်ဇကု သွက်ဂွံဗဵုလ္ၚောဝ် တဳလမၞုံပိုဉ်ကျာ်တြဲ က္ညကၠုၚ်ဍုၚ်သာရဝှ်အိုတ်မ္ဂး ကြပ်ညောန်ကဵုလုပ်ဒဂိုန်တုဲ သွက်ဂွံဂတာပ်တ္ၚဲလုပ်ဒဂိုန် ဍုၚ်သာရဝှ်ဂှ် ဟွံသၟဟ်ရထအိုတ်ရ၊ ဒးပြာပ်လုပ်ဒဂိုန် ဍုၚ်သာကေတ မဒှ်အကြာဂၠံၚ်တရဴအိုတ်ရ။
ယွံကျာ်မၞုံပိုဉ် ပိုဲဍိတက်တအ်ညးဂမၠိုၚ်ဂှ် “နူဍုၚ်သာကေတ မဒှ်ဇရေၚ်ပိုဲညးဂမၠိုၚ်ဝွံ ပ္ဍဲဌာန်တြဴယောဇနာတေံ တဳလမၞုံပိုဉ်ကျာ်တြဲ သ္ပဒတဴဒၟံၚ်ရ၊ ပိုဲညးဂမၠိုၚ် ဟွံကလိအခေါၚ်ဗဵုလ္ၚောဝ် တဳလမၞုံပိုဉ်ကျာ်တြဲအိုတ်ရ” ရဴဝွံ သီုဟွံမိပ်လဟိၚ်ဂှ် ဒးပြာပ်လုပ်ဒဂိုန်အိုတ်ရ။ ယွံကျာ်မၞုံပိုဉ် ပ္ဍဲအခိၚ်ဂှ် ပိုဲဍိက်တအ်ညးဂမၠိုၚ် ကလိလောန်အာပိဂိတု ပ္ဍဲအခိၚ်လိုက်ဝှ် သ္ပပဝါဏာတုဲမ္ဂး ဗြဲဇၞော်ဂူတုဲ ပ္ဍဲလှိုက်သရီု မၞုံကဵုဍာ်ခၠိုၚ်ဒၟံၚ်ဂှ် နကဵုသ္ၚာမပေၚ်တဴနကဵုဍာ် သီုမၞုံကဳုသဘဴမဍောၚ်ၜိုတ်အိုတ်ဂှ် သ္ဒးကၠုၚ်တဴ တရဴအဓါန်ဂၠိၚ်သ္ၚောဲအိုတ်ရ” ရဴဝွံ (ဂရၚ်ပတီအိုတ်ရ)။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲအိုတ်မ္ဂး “ယွံခမဳတအ် ကုခမဳမဒၠိုက်ကတဵုနူဝသ်ဂှ် ကဵုအခေါၚ် တၞဟ်နလလးကထိုန်ရ၊ ယွံခမဳတအ် ကုခမဳမလလးကထိုန်တုဲဂမၠိုၚ်ဂှ် သီုဟွံဂရၚ်ပတီ ခမဳနွံတဴပြာကဋ်တုဲ ပွမက္ညအာသ္ၚိဒကာမာန်၊ သီုဟွံဂိုၚ်ကေတ် သ္ၚာပတိုန်လဝ် အဓိဌာန်တိစဳဝရိက်ဂှ် ပွမက္ညအာမာန်၊ ပွမစဂဏဘောဇိုန်မာန်၊ အတိုၚ်နွံပၟိက် ပွမပကၚ်ရၚ်သ္ၚာမဟွံသ္ပအဓိဌာန်ဝိကပ္ပနမာန်၊ ဇၟာပ်သ္ၚာမကတဵုဒှ်ကၠုၚ် ပ္ဍဲဘာလလးကထိုန်ဂှ် ပွမဒးဒှ် ကုခမဳမလလးကထိုန်တုဲဂမၠိုၚ် ကလိဂွံအာနိသံသဂမၠိုၚ်မသုန်သာ်ဝွံအိုတ်ရ ရဴဝွံ ဟီုတွံရ။
ယွံခမဳတအ် ကုခမဳမလလးကထိုန်တုဲဂမၠိုၚ် ကြက်ကလိဂွံ ဖဵုဂမၠိုၚ်မသုန်သာ်ဝွံအိုတ်ရ ယွံခမဳတအ် ရဴဝွံ သ္ဒးလလးကထိုန်အိုတ်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ−
၃၀၇။ “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ယာတ်သ္ၚာလလးကထိုန်ဝွံ ကတဵုဒှ်ကၠုၚ် ကုသၚ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ တၞဟ်နလလးကထိုန် သၚ်ကဵုတဴ ယာတ်သ္ၚာလလးကထိုန်ဝွံ ကုခမဳမၞုံယၟုဝွံရ၊ ဣဝွံတုန် ပွမကဵုတီရ။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ယာတ်သ္ၚာလလးကထိုန်ဝွံ ကတဵုဒှ်ကၠုၚ် ကုသၚ်ရ၊ တၞဟ်နလလးကထိုန် သၚ်ကဵုတဴ ယာတ်သ္ၚာလလးကထိုန်ဝွံ ကုခမဳ မၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက်တၞဟ်နလလးကထိုန် ပွမကဵုတဴယာတ်သ္ၚာလလးကထိုန်ဝွံ ကုခမဳ မၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
တၞဟ်နလလးကထိုန် သၚ် ဂပ်ဝ်ကဵုတဴ ယာတ်သ္ၚာလလးကထိုန်ဝွံ ကုခမဳမၞုံယၟုဝွံ တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
၃၀၈။ ယွံခမဳတအ် အတိုၚ်သ္ဂးကၠုၚ်တုဲဝွံ လလးမ္ဂး ဒှ်လလးကထိုန်ရ၊ အတိုၚ်ကြက်သ္ဂးဂတဝွံ လလးမ္ဂး ဟွံဒှ်လလးကထိုန်ရ။ ယွံခမဳတအ် မုရဴသာ်လဵု လလးမ္ဂးဂှ် ဟွံဒှ်လလးကထိုန်ရောမ္ဂးဂှ်တုန်− နအယာံမာတ်ဂိုၚ်ကေတ် ဗၞတ်ဗ္ၜတ်ဇမၠိၚ် အနာံဂှ် ဟွံဒှ်လလးကထိုန်ရ။
နအယာံမာတ်မလပိုက်ကြဴကြာတ်ဂှ် ဟွံဒှ်လလးကထိုန်ရ။
နအယာံမာတ်မစဳရေၚ် မပ္တံကဵုမသုန်ခဏ် ထပှ်ခဏ် ပ္ဍဲကဵုသ္ၚာဂှ် ဟွံဒှ်လလးကထိုန်ရ။
နအယာံမာတ်မရေက်ကုတ်ဂှ် ဟွံဒှ်လလးကထိုန်ရ။
နအယာံမာတ်မကၞောတ်လဝ်ယာတ်ဂှ် ဟွံဒှ်လလးကထိုန်။
နအယာံမာတ်မဇိၚ်ဇၟိၚ်မဗက်အာလၟေၚ်မကၞောတ်လဝ်ယာတ်ဂှ် ဟွံဒှ်လလးကထိုန်ရ။
နအယာံမာတ်မဇိၚ်အုတ်စုတ်ယာတ်ဂၠးဂှ် ဟွံဒှ်လလးကထိုန်ရ။
နအယာံမာတ်မဖျပ်ဂၠးၜါဂှ် ဟွံဒှ်လလးကထိုန်ရ။
နအယာံမာတ်မထပ်အမာတ်ဇၠိၚ်ဂှ် ဟွံဒှ်လလးကထိုန်ရ။
နအယာံမာတ်မထပ်အမာတ်အနာံဂှ် ဟွံဒှ်လလးကထိုန်ရ။
နအယာံမာတ်မပတိုန်ဂၠးအာဂန္တုကဂှ် ဟွံဒှ်လလးကထိုန်ရ။
နအယာံမာတ်မဖျောန်ဍာ်လွံက်ဗၞတ်မွဲဝါဂှ်ဟေၚ် ညံၚ်သာ်ဒြၚ်စိၚ်ဂှ် ဟွံဒှ်လလးကထိုန်ရ။
နအယာံမာတ်မသ္ပနိမိတ် ရဴဝွံမ္ဂး လလးနကဵုယာတ်ဝွံဏောဝ်ဂှ် ဟွံဒှ်လလးကထိုန်ရ။
နကဵုယာတ် ဟီုသ္ဂးပြယာယ်တုဲ ကလိဂွံဂှ် ဟွံဒှ်လလးကထိုန်ရ။
နကဵုယာတ်မဂၠေံနၚ်ဂှ် ဟွံဒှ်လလးကထိုန်ရ။
ပ္ဍဲတ္ၚဲစိုပ်ကၠုၚ်ဂှ်ဟေၚ် ဟွံကဵုပူဂိုလ်လေပ်လလး ဟွံဇိၚ်၊ နကဵုယာတ်မဒေပ်စွံလဝ်ဂှ် ဟွံဒှ်လလးကထိုန်ရ။
နမကလိလောန်အာဗ္တံဂှ် ဟွံဒှ်လလးကထိုန်ရ။
နကဵုသ္ၚာ မဟွံထပက်ကပ္ပဗိန္ဒုဂှ် ဟွံဒှ်လလးကထိုန်ရ။
ဝေၚ်ကၠေံသကိုပ်တုဲ ဟွံဒှ်လလးကထိုန်ရ။
ဝေၚ်ကၠေံသ္ၚာတုဲ ဟွံဒှ်လလးကထိုန်ရ။
ဝေၚ်ကၠေံသပိုၚ်တုဲ ဟွံဒှ်လလးကထိုန်ရ။
ပ္ဍဲတ္ၚဲစိုပ်ကၠုၚ်ဂှ်ဟေၚ် ဝေၚ်ကၠံသ္ၚာမသုန်ခဏ်ကီု သ္ၚာမလောန်လတူမသုန်ခဏ်ကီု မဒှ်မွဲဟာန်ကေုာံဗၞဳအဝဏ်ဇၞော်ဗၞဳအဝဏ်ဍောတ် မဂပ်ဝ်ကုတ်လဝ်တုဲ ဟွံဒှ်လလးကထိုန်ရ။
ဝေၚ်ကၠေံ ပူဂိုလ်တုဲ ဟွံဒှ်လလးကထိုန်ရ။
ယဝ်ဒှ် လလးကထိုန် ဗွဲမ္ဒးရးမ္ဂး၊ ကထိုန် မလလးဗွဲမ္ဒးရးဂှ် ယဝ်ခမဳတန်တဴဒၟံၚ် ပ္ဍဲမ္ၚးသိမ် သ္ပအနုမောဒနာမ္ဂး၊ သ္ပတဴရဴဝွံမ္ဂး ဟွံဒှ်လလးကထိုန်ရ။
ယွံခမဳတအ် ရဴသာ်ဝွံ လလးမ္ဂး ဟွံဒှ်လလးကထိုန်ရ။
၃၀၉။ ယွံခမဳတအ် မုရဴသာ်လဵု ဒှ်လလးကထိုန်ရောမ္ဂးတုန်−
လလး နကဵုယာတ်တၟိမ္ဂး ဒှ်လလးကထိုန်ရ။
လလး နကဵုယာတ်မတုပ်ကေုာံယာတ်တၟိ မကေၚ်လပိုက်လဝ်မွဲၜါဝါဟေၚ်မ္ဂး ဒှ်လလးကထိုန်ရ။
လလး နကဵုယာတ်တြေံမ္ဂး ဒှ်လလးကထိုန်ရ။
လလး နကဵုယာတ်ပံသုကူမ္ဂး ဒှ်လလးကထိုန်ရ။
လလး နကဵုယာတ်မကလိဂွံနၚ်သ္ၚိဖျာမ္ဂး ဒှ်လလးကထိုန်ရ။
လလး နကဵုယာတ်မကလိဂွံ သီုဟွံသ္ပနိမိတ်မ္ဂး ဒှ်လလးကထိုန်ရ။
လလး နကဵုယာတ်မကလိဂွံ သီုဟွံဟီုသ္ဂးပြယာယ်မ္ဂး ဒှ်လလးကထိုန်ရ။
လလး နကဵုယာတ်ဟွံဂၠေံနၚ်မ္ဂး ဒှ်လလးကထိုန်ရ။
လလး နကဵုယာတ်ဟွံဒေပ်စွံလဝ်မ္ဂး ဒှ်လလးကထိုန်ရ။
လလး နကဵုယာတ်ဟွံလောန်ၜက်ဗ္တံမ္ဂး ဒှ်လလးကထိုန်ရ။
လလး နကဵုယာတ်မထပက်ကပ္ပဗိန္ဒုမ္ဂး ဒှ်လလးကထိုန်ရ။
လလး နကဵုသကိုပ်မ္ဂး ဒှ်လလးကထိုန်ရ။
လလး နကဵုသ္ၚာမ္ဂး ဒှ်လလးကထိုန်ရ။
လလး နကဵုသပိုၚ်မ္ဂး ဒှ်လလးကထိုန်ရ။
ပ္ဍဲတ္ၚဲစိုပ်ကၠုၚ်ဂှ်ဟေၚ် လလး နကဵုသ္ၚာမသုန်ခဏ်ကီု သ္ၚာမလောန်လတူမသုန်ခဏ်ကီု မဒှ်မွဲဟာန်ကေုာံဗၞဳအဝဏ်ဇၞော်ဗၞဳအဝဏ်ဍောတ် မဂပ်ဝ်ကုတ်လဝ်တုဲမ္ဂး ဒှ်လလးကထိုန်ရ။
လလးတဴ နပွမလလးပူဂိုလ်မ္ဂး ဒှ်လလးကထိုန်ရ။
ယဝ်ဒှ် လလးကထိုန် ဗွဲမ္ဒးရးမ္ဂး ဒှ်လလးကထိုန်ရ၊ ကထိုန် မလလးဗွဲမ္ဒးရးဂှ် ယဝ်ခမဳတန်တဴဒၟံၚ် ပ္ဍဲအပ္ဍဲသိမ် သ္ပအနုမောဒနာမ္ဂး၊ သ္ပတဴရဴဝွံမ္ဂး ဒှ်လလးကထိုန်ရ။ ယွံခမဳတအ် ရဴသာ်ဝွံ လလးမ္ဂး ဒှ်လလးကထိုန်ရ။
၃၁၀။ ယွံခမဳတအ် မုရဴသာ်လဵု ဒှ်ပိုက်နုက်ကထိုန်ရောမ္ဂးတုန်−
ယွံခမဳတအ် မာတိကာပွမပိုက်နုက်ကထိုန်ဂမၠိုၚ် ‘ပက္ကမနန္တိက’ ပွမပိုက်နုက်ကထိုန် မၞုံလအိတ်မ္ဂး ပွမစ္ဍးအာ၊ ‘နိဋ္ဌာနန္တိက’ ပွမပိုက်နုက်ကထိုန် မၞုံလအိတ်မ္ဂး သ္ၚာစိုပ်ဒတုဲအာ၊ ‘သန္နိဋ္ဌာနန္တိက’ ပွမပိုက်နုက်ကထိုန်မၞုံလအိတ်မ္ဂး ပွမသ္ဂုတ်သွာတ်စိုတ်၊ ‘နာသနန္တိက’ ပွမပိုက်နုက်ကထိုန် မၞုံလအိတ်မ္ဂး ပွမကၠေံလေၚ် ပွမလီုလာ်၊ ‘သဝနန္တိက’ ပွမပိုက်နုက်ကထိုန် မၞုံလအိတ်မ္ဂး ပွမမိၚ်ကေတ် ရဴဝွံမ္ဂးပိုက်နုက်ကထိုန်တုဲရ၊ ‘အာသာဝစ္ဆေဒိက’ ပွမပိုက်နုက်ကထိုန် မၞုံလအိတ်မ္ဂး အလယ်ပိုတ်အာ၊ ‘သဳမာတိက္ကန္တိက’ ပွမပိုက်နုက်ကထိုန် မၞုံလအိတ်မ္ဂး ပွမကလိလောန်အပိုၚ်အခြာသိမ်၊ ‘သဟုဗ္ဘာရ’ ပွမပိုက်နုက်ကထိုန်မ္ဂး ပွမပိုက်နုက်ကေုာံခမဳဂမၠိုၚ်မွဲစွံ ဣဝွံ မၞုံဒ္စာံသာ်အိုတ်ရ ရဴဝွံ (သ္ဂးရ)။
