၁၆၀။ ဂဥုဲမသုန်သာ်
၂၆၀။ ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ကုခမဳဂမၠိုၚ် မတၟတ်ဒွံဒး နကဵုယဲကၠၚ်ကၟတ်မလေပ်ဒှ် ပ္ဍဲအခိၚ်ဂိတုကထိုန်ဂှ် ယာဂုမဂပ်ဝ် သုၚ်လေဝ် ဇအအ်တိတ်ရ၊ ပိဏ္ဍပါတ်မဂပ်ဝ်ပြဘိုဂ်လေဝ် ဇအအ်တိတ်ရ။
ခမဳဂမၠိုၚ်ဂှ် နမဇအအ်တိတ်သာ်ဂှ်ရ ဇြာဲသကှ်အိုတ်ရ၊ ဖျုန်ဆီဒေက်ခ္ဍေက်အိုတ်ရ၊ ရုပ်သာ်လီုလာ်အိုတ်ရ၊ မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ်အိုတ်ရ၊ မၞုံကဵုဇကုဓရံၚ် ဇာလတေၚ်မံၚ်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) အိုတ်ရ။ တဳလမၞုံပိုဉ်ကျာ်တြဲသ္ဂောံဆဵုညာတ်ကေတ် ခမဳဂမၠိုၚ် မဇြာဲသကှ် ဖျုန်ဆီဒေက်ခ္ဍေက် ရုပ်သာ်လီုလာ် မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ် မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်)ဂှ်တုဲ “ယွံအာနန္ဒ မုဟိုတ် ပ္ဍဲအခိၚ်လၟုဟ် ခမဳဂမၠိုၚ် ဇြာဲသကှ်အိုတ်ရော? ဖျုန်ဆီဒေက်ခ္ဍေက်အိုတ်ရော? ရုပ်သာ်လီုလာ်အိုတ်ရော? မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ်အိုတ်ရော? မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) အိုတ်ရော?” ရဴဝွံ သၟာန်တဳလပိုဉ်အာနန္ဒရ။
ယွံတဳလမၞုံပိုဉ် ပ္ဍဲအခိၚ်လၟုဟ် ကုခမဳဂမၠိုၚ် မတၟတ်ဒွံဒး နကဵုယဲကၠၚ်ကၟတ် မလေပ်ဒှ် ပ္ဍဲအခိၚ်ဂိတုကထိုန်ဂှ် ယာဂုမဂပ်ဝ်သုၚ်လေဝ် ဇအအ်တိတ်ရ၊ ပိဏ္ဍပါတ်မဂပ်ဝ်ပြဘိုဂ်လေဝ် ဇအအ်တိတ်ရ။ ခမဳဂမၠိုၚ်ဂှ် ဟိုတ်မဇအအ်တိတ်သာ်ဂှ်ရ ဇြာဲသကှ်အိုတ်ရ၊ ဖျုန်ဆီဒေက်ခ္ဍေက်အိုတ်ရ၊ ရုပ်သာ်လီုလာ်အိုတ်ရ၊ မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ်အိုတ်ရ၊ မၞုံကဵုဇကုဓရံၚ်ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) အိုတ်ရ ရဴဝွံ (ဂရၚ်ပတီရ)။
ပ္ဍဲအခိၚ်ဂှ် ကုတဳလပိုဉ်ကျာ်တြဲ ပြာပ်အာဌာန်လ္ၚုသ္ၚိတ်ဇြတုဲ မပဒတဴဒၟံၚ်ဗွဲမသ္ၚိတ်ဇြဂှ် “ပ္ဍဲအခိၚ်လၟုဟ် ကုခမဳဂမၠိုၚ် မတွတ်ဒွံဒး နကဳုယဲကၠၚ်ကၟတ် မလေပ်ဒှ် ပ္ဍဲအခိၚ်ဂိတုကထိုန်ဂှ် ။ ပ ။ မၞုံကဵုဇကုဓရံၚ်ဇာလတေၚ်မံၚ်ထေၚ်ဒၟံၚ်အိုတ်ရ၊ အဲမူရဴသာ်လဵု ဂွံကဵုအခေါၚ်ဂဥုဲ ကုခမဳဂမၠိုၚ်ရော? ဍေံဂှ် ဂဥုဲလေဝ်ဒှ်ရ၊ ဂကောံမၞိဟ်လေဝ် သၟိတ်ဂးဂဥုဲရ၊ ဖဵုအာဟာရလေဝ် စိုပ်ဒတုဲကဵုရ၊ စၞအာဟာမကြံၚ်မ္ၚိုဟ်လေဝ် ဟွံသေၚ်ရ” ရဴဝွံ ကသပ်စိုတ်ဒှ်ရ။
ပ္ဍဲကြဴနူဂှ် “ဂဥုဲဂမၠိုၚ်မသုန်သာ် မတွံဂးကၠေၚ်သွဟ် ကၠေၚ်တၟိ ကၠေၚ် ဍာ်သာဲ တၚ်လာဲဝွံ ဂဥုဲလေဝ်မ္ဂးအိုတ်ရ၊ ဂကောံမၞိဟ်လေဝ် သၟိတ်ဂးဂဥုဲရ၊ ဖဵုအာဟာရလေဝ် စိုပ်ဒတုဲကဵုအိုတ်ရ၊ စၞအာဟာမကြံၚ်မ္ၚိုဟ်လေဝ် ဟွံသေၚ်ရ၊ ဂဥုဲဂမၠိုၚ်မသုန်သာ်ဝွံ ဒုၚ်ဗဂိန် ပ္ဍဲအခိၚ်နူဂယးတုဲ တၞဟ်နစပ္ဍဲအခိၚ်နူဂယး အဲဂွံကဵုအခေါၚ် ကုခမဳဂမၠိုၚ်မ္ဂး ခိုဟ်သန်ရ” ရဴဝွံ ကသပ်ဒှ် ကုတဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဒၠိုက်ကတဵုနူဒၞဲါမသတၚ်ဒၟံၚ်တုဲ ဟိုတ်နူဟိုတ်အရာဝွံ တွံကဵုဂလာန်ဓရ်တုဲမ္ဂး “ယွံခမဳတအ် ကုအဲ ပြာပ်အာဌာန်လ္ၚုသ္ၚိတ်ဇြတုဲ ပဒတဴဒၟံၚ်ဗွဲမသ္ၚိတ်ဇြဂှ် ‘ပ္ဍဲအခိၚ်လၟုဟ် ကုခမဳဂမၠိုၚ် မတၟတ်ဒွံဒး နကဵုယဲကၠၚ်ကၟတ် မလေပ်ဒှ် ပ္ဍဲအခိၚ်ဂိတုကထိုန်ဂှ် ယာဂုမဂပ်ဝ်သုၚ်လေဝ် ဇအအ်တိတ်ရ၊ ပိဏ္ဍပါတ်မဂပ်ဝ်ပြဘိုဂ်လေဝ် ဇအအ်တိတ်ရ။ ခမဳဂမၠိုၚ်ဂှ် ဟိုတ်မဇအအ်တိတ်သာ်ဂှ်ရ ဇြာဲသကှ်အိုတ်ရ၊ ဖျုန်ဆီဒေက်ခ္ဍေက်အိုတ်ရ၊ ရုပ်သာ်လီုလာ်အိုတ်ရ၊ မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ်အိုတ်ရ၊ မၞုံကဵုဇကုဓရံၚ်ဇာလတေၚ်မံက်ထေၚ်ဒၟံၚ်အိုတ်ရ၊ အဲ မုရဴသာ်လဵု ဂွံကဵုအခေါၚ််ဂဥုဲ ကုခမဳဂမၠိုၚ်ရော? ဍေံဂှ် ဂဥုဲလေဝ် ဒှ်ရ၊ ဂကောံမၞိဟ်လေဝ် သၟိတ်ဂးဂဥုဲရ၊ ဖဵုအာဟာရလေဝ် စိုပ်ဒတုဲကဵုရ၊ စၞာအာဟာရ မကြံၚ်မ္ၚိုဟ်လေဝ် ဟွံသေၚ်ရ” ရဴဝွံ ကသပ်စိုတ်ဒှ်ရ။ ယွံခမဳတအ် ကုအဲဂှ် ။ ပ ။ ဂဥုဲဂမၠိုၚ် မသုန်သာ်ဝွံ ဒုၚ်ဗဂိန် ပ္ဍဲအခိၚ်နူဂယးတုဲ တၞဟ်စပ္ဍဲအခိၚ်နူဂယး အဲဂွံကဵုအခေါၚ် ကုခမဳဂမၠိုၚ်ဂှ်မ္ဂး ခိုဟ်သန်ရ” ရဴဝွံ ကသပ်ဒှ်ရ။ ယွံခမဳတအ် ဂဥုဲမဂမၠိုၚ်မသုန်သာ်ဂှ် ဒုၚ်ဗဂိန် ပ္ဍဲအခိၚ်နူဂယးဂှ်တုဲ တၞဟ်နပြဘိုဂ် ပ္ဍဲအခိၚ်နူဂယး ကဵုအခေါၚ်ရ” ရဴဝွံ (သ္ဂးရ)။ (သမ္တီ-ပ္ဍဲပါဠိဟွံခ္ဍန် ဗၟာခ္ဍန်လဝ်ရ)
၂၆၁။ ပ္ဍဲအခိၚ်ဂှ် ခမဳဂမၠိုၚ်ဂှ် ဂဥုဲဂမၠိုၚ်မသုန်သာ်ဂှ် ဒုၚ်ဗဂိန် ပ္ဍဲအခိၚ်နူဂယးတုဲ သ္ပပြဘိုဂ် ပ္ဍဲအခိၚ်နူဂယးအိုတ်ရ။ ကုခမဳဂမၠိုၚ်ဂှ် စၞစဂမၠိုၚ်မကြံၚ်မ္ၚိုဟ်မဒှ်စဒၟံၚ်ပကတိလၟိုန်ဂှ်လေဝ် ကဵုလ္ၚတ်လာဲဟွံမာန်အိုတ်ရ၊ စၞမဍိုန်ဍောတ်ဂမၠိုၚ်တုန် မုသ္ဇက်သ္ဂးနွံဏီရော? ခမဳဂမၠိုၚ်ဂှ် နကဵုယဲကၠၚ်ကၟတ် မလေပ်ဒှ် ပ္ဍဲအခိၚ်ဂိတုကထိုန်ဂှ်ကီု နပွမစစၞဟွံမိပ်ဝွံကီု တၟတ်ဒွံဒး နၜါပြကာဂမၠိုၚ်ဒှ်တုဲ လောန်လတူဂှ် ဇြာဲသကှ်အိုတ်ရ၊ ဖျုန်ဆီဒေက်ခ္ဍေက်အိုတ်ရ၊ ရုပ်သာ်လီုလာ်အိုတ်ရ၊ မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ်အိုတ်ရ၊ မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ်အိုတ်ရ။
တဳလမၞုံပိုဉ်ကျာ်တြဲ ညာတ်ကေတ် ခမဳဂမၠိုၚ် လောန်လတူဂှ် ။ ပ ။ မၞုံကဵုဇကုဓရံၚ်ဇာလတေၚ်မံက်ထေၚ်ဒၟံၚ်ဂှ်တုဲ “ယွံအာနန္ဒ မုဟိုတ် ပ္ဍဲအခိၚ်လၟုဟ် ခမဳဂမၠိုၚ် လောန်လတူဂှ် ဇြာဲသကှ်အိုတ်ရော? ။ ပ ။ မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ်အိုတ်ရော?” ရဴဝွံ သၟာန်တဳလပိုဉ်အာနန္ဒရ။
ယွံတဳလမၞုံပိုဉ် ပ္ဍဲအခိၚ်လၟုဟ် ခမဳဂမၠိုၚ် ဂဥုဲဂမၠိုၚ်မသုန်သာ် ဒုၚ်ဗဂိန်ပ္ဍဲအခိၚ်နူဂယးတုဲ သ္ပပြဘိုဂ် ပ္ဍဲအခိၚ်နူဂယးအိုတ်ရ။ ကုခမဳဂမၠိုၚ်ဂှ် စၞစဂမၠိုၚ်ကြံၚ်မ္ၚိုဟ် မဒှ်စဒၟံၚ်ပကတိလၟိုန်ဂှ်လေဝ် ကဵုလ္ၚတ်လာဲဟွံမာန်အိုတ်ရ၊ စၞမဍိုန်ဍောတ်ဂမၠိုၚ်တုန် မုသ္ဇက်သ္ဂးနွံဏီရော? ခမဳဂမၠိုၚ်ဂှ် နကဵုယဲကၠၚ်ကၟတ် မလေပ်ဒှ်ပ္ဍဲအခိၚ်ဂိတုကထိုန်ဂှ်ကီု နပွမစစၞဟွံမိပ်ဝွံကီု တၟတ်ဒွံဒး နၜါပြကာဂမၠိုၚ်ဒှ်တုဲ လောန်လတူဂှ် ဇြာဲသကှ်အိုတ်ရ၊ ဖျုန်ဆီဒေက်ခ္ဍေက်အိုတ်ရ၊ ရုပ်သာ်လီုလာ်အိုတ်ရ၊ မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ်အိုတ်ရ၊ မၞုံကဵုဇကုဓရံၚ် ဇာလတေၚ် မံက်ထေၚ်ဒၟံၚ်အိုတ်ရ ရဴဝွံ (ဂရၚ်ပတီရ)။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ဂဥုဲဂမၠိုၚ်မသုန်သာ်ဂှ် ဒုၚ်ဗဂိန်တုဲ ပ္ဍဲအခိၚ်နူဂယးကီု ပ္ဍဲအခိၚ်တ္ၚဲစေၚ်ကီု တၞဟ်နပြဘိုဂ်ဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။
၂၆၂။ ပ္ဍဲအခိၚ် ခမဳမဂိယဲဂမၠိုၚ် နွံပၟိက်ကဵုဂဥုဲဂမၠိုၚ် မဒှ်ကၠေၚ်အယိၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဂဥုဲဂမၠိုၚ်မဒှ်ကၠေၚ်အယိၚ်မတွံဂး ကၠေၚ်ကၟီ ကၠေၚ်က ကၠေၚ်ကဗံၚ်ဗှ် ကၠေၚ်ကၠိက် ကၠေၚ်ချးဂှ် ဒုၚ်ဗဂိန် ပ္ဍဲအခိၚ်နူဂယးမ္ဂး၊ ဖျိန်ပ္ဍဲအခိၚ်နူဂယးမ္ဂး၊ ခ္ဍိုဟ်ပ္ဍဲအခိၚ်နူဂယးမ္ဂး၊ တၞဟ်နသ္ပပြဘိုဂ် နပွမသ္ပပြဘိုဂ်မ္ဂးကၠေၚ်ဂှ် ကဵုအခေါၚ်ရ။ ယွံခမဳတအ် ဂဥုဲမဒုၚ်ဂိန် ပ္ဍဲအခိၚ်တ္ၚဲစေၚ်ဂှ် ပ္ဍဲအခိၚ်တ္ၚဲစေၚ်ဟေၚ် ဖျိန်တုဲ ခ္ဍိုဟ်တုဲ သ္ပပြဘိုဂ်မ္ဂး၊ ဒးအာပတ်ဒုက္ကဋ်ပိလ္စုတ်ရ။ ယွံခမဳတအ် ဂဥုဲမဒုၚ်ဗဂိန် ပ္ဍဲအခိၚ်နူဂယးဂှ် ပ္ဍဲအခိၚ်တ္ၚဲစေၚ် ဖျိန်တုဲ ခ္ဍိုဟ်တုဲ သ္ပပြဘိုဂ်မ္ဂး၊ ဒးအာပတ်ဒုက္ကဋ်ၜါလ္စုတ်ရ။ ယွံခမဳတအ် ဒုၚ်ဗဂိန် ပ္ဍဲအခိၚ်နူဂယးတုဲ ဂဥုဲမဖျိန် ပ္ဍဲအခိၚ်နူဂယးဟေၚ်ဂှ် ပ္ဍဲအခိၚ်တ္ၚဲစေၚ် ခ္ဍိုဟ်တုဲ သ္ပပြဘိုဂ်မ္ဂး၊ ဒးအာပတ်ဒုက္ကဋ်မွဲလ္စုတ်ရ။ ယွံခမဳတအ် ဂဥုဲမဒုၚ်ဗဂိန် ပ္ဍဲအခိၚ်နူဂယးဂှ် ပ္ဍဲအခိၚ်နူဂယးဟေၚ် ဖျိန်တုဲ ခ္ဍိုဟ်တုဲ သ္ပပြဘိုဂ်မ္ဂး၊ ဟွံဒးအာပတ်ရ ရဴဝွံ (သ္ဂးရ)။
