၁၅၅။ ပွမပါဲကၠေံ စၞာံအိုတ်သီု
၂၅၅။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “တဳလမၞုံပိုဉ်ကျာ်တြဲ ပါဲကၠေံ သၞာမသၠုၚ်သၞာမပြဲဂမၠိုၚ်ရ” ရဴဝွံ ပကၚ်ရၚ်သုၚ်စောဲတဴ စၞာံဇၞော်ဂမၠိုၚ်မတွံဂး စၞာံဇာဒိသိုၚ် စၞာံကၠ စၞာံဗြန်အိုတ်ရ။
စၞာံဂမၠိုၚ်ဂှ် ကုတ်လဝ်ညဳသၟဟ်ကဵုဇံၚ်အိုတ်ရ၊ ညဳသၟဟ်ကဵုဂတဵုလေဝ် ကုတ်လဝ်အိုတ်ရ၊ ပ္ဍဲအပ္ဍဲဇံၚ်လေဝ် လးလဝ်အိုတ်ရ၊ ပ္ဍဲမ္ၚးဇံၚ်လေဝ် လးလဝ်အိုတ်ရ၊ ပ္ဍဲအပ္ဍဲဂတဵုလေဝ် လးလဝ်အိုတ်ရ၊ ပ္ဍဲမ္ၚးဂတဵုလေဝ် လးလဝ်အိုတ်ရ။
မၞိဟ်မဂေတ်ဂ္ၚေၚ်လၟေၚ်ဘာဂမၠိုၚ် ညာတ်ဒးတုဲ “တုပ်သၟဟ်ကဵုမၞိဟ်ဂမၠိုၚ် မဒုၚ်စသိုၚ်တသိုခ်ကာမဂုဏ်အိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ပကၚ်ရၚ်သုၚ်စောဲတဴ စၞာံဇၞော်ဂမၠိုၚ်မတွံဂး စၞာံဇာဒိသိုၚ် စၞာံကၠ စၞာံဗြန်အိုတ်ရ၊ ကုခမဳမပကၚ်ရၚ်သုၚ်စောဲဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “တဳလမၞုံပိုဉ်ကျာ်တြဲ ပါဲကၠေံ စၞာံဇၞော်ဂမၠိုၚ်ရ” ရဴဝွံ ပကၚ်ရၚ်တဴ စၞာံဂၠဴဂမၠိုၚ်အိုတ်ရ။ စၞာံဂၠဴဂမၠိုၚ်ဂှ် ကုတ်လဝ်ညဳသၟဟ်ကဵုဇံၚ်အိုတ်ရ၊ ညဳသၟဟ်ကဵုဂတဵုလေဝ် ကုတ်လဝ်အိုတ်ရ၊ ပ္ဍဲအပ္ဍဲဇံၚ်လေဝ် လးလဝ်အိုတ်ရ၊ ပ္ဍဲမ္ၚးဇံၚ်လေဝ် လးလဝ်အိုတ်ရ၊ ပ္ဍဲအပ္ဍဲဂတဵုလေဝ် လးလဝ်အိုတ်ရ၊ ပ္ဍဲမ္ၚးဂတဵုလေဝ် လးလဝ်အိုတ်ရ။
ခမဳမယုတ်မာမွဲဇကုဂှ် ဒှ်အ္စာမပြာပ်စဴသ္ၚိ ဥပးမယုတ်မာမွဲတၠရ။ ပ္ဍဲအခိၚ်ဂှ် ခမဳမယုတ်မာဂှ် ပ္ဍဲအခိၚ်နူဂယး ဗိုက်ပဠဗဝ်သ္ၚာတုဲ ဂိုၚ်ကေတ်ဗဗေၚ်သ္ၚာတုဲမ္ဂး ပြာပ်စဴအာသ္ၚိဥပးမယုတ်မာဂှ်တုဲ ဂဇအ်ဒၟံၚ်သၞာမလးပညပ်လဝ်ရ။ ပ္ဍဲအခိၚ်ဂှ် ဥပးမယုတ်မာဂှ် ပြာပ်ကၠုၚ်ဇရေၚ်ခမဳမယုတ်မာဂှ်တုဲ လ္ၚောဝ်သ္ပဝတ် ခမဳမယုတ်မာဂှ်မ္ဂး ဂဇအ်ဒၟံၚ် ပ္ဍဲဒၞါဲမွဲရ။
ပ္ဍဲအခိၚ်ဂှ် ကုဥပးမယုတ်မာဂှ် ကၠောန်ဂၠဴမဴတှ် ဍောတ်သွတ်ကျေဝ်ဂေါဝ်တုဲ ထေက်ကဵုဗဵုသ္ၚေဝ် မလေပ်ကတဵုဒှ်စိုတ်ဇြုၚ်ကေဝ် မစောန်ပြံၚ်ဍေံဍံက်ဍေန်တဴ ညံၚ်ရဴဗြန်သၟတ် (ကၠမပၞဟ်) နွံရ။
ပ္ဍဲအခိၚ်ဂှ် ခမဳမယုတ်မဴဂှ် မၠာ်သ္ၚေဝ်ရံၚ်တဴ ကောန်ဂၠဴမဴတှ်ဂှ် စေအ်စေအ်ရ။ ပ္ဍဲအခိၚ်ဂှ် ဥပးမယုတ်မာဂှ် “ယွံတဳလပိုဉ် တဳလပိုဉ် မုဟိုတ် မၠာ်သ္ၚေဝ်ရံၚ်ပစေအ်လဝ် ကောန်ဂၠဴမဴတှ်ဂှ်ရော?” ရဴဝွံ ဂရၚ်ပတီ ခမဳမယုတ်မာဂှ်ရ။ ယွံကောန်တၠ အဲ နွံပၟိက်ကဵုစၞာံ ကောန်ဂၠဴမဴတှ်ဝွံရ ရဴဝွံ (ဟီုသ္ဂးရ)။ ပ္ဍဲအခိၚ်ဂှ် ဥပးမယုတ်မာဂှ် ဂစိုတ်ထောံ ကောန်ဂၠဴမဴတှ်ဂှ်တုဲ သံက်သယျာစၞာံတုဲမ္ဂး ကဵုဒါန်ကုခမဳမယုတ်မာဂှ်ရ။
ပ္ဍဲအခိၚ်ဂှ် ခမဳမယုတ်မာဂှ် ဂြောပ်ကၠေံစၞာံတုဲ နကဵုသိုပ်တုဲ အာရ။ ပ္ဍဲအခိၚ်ဂှ် ဂၠံၝောံယာဲမထၞေန်စပ်ကဵုကောန်ဂှ် ဗွဲလၟေၚ်ဗက်ကၠုၚ် နူလက်ကရဴ နူလက်ကရဴ ခမဳမယုတ်မာဂှ်ရ။ ခမဳဂမၠိုၚ် “ယွံကောန်တၠ မုဟိုတ် ဂၠဴၝောံဇၞော်ဝွံ ဗက်ကၠုၚ်စုက်စုက် နူလက်ကရဴ နူလက်ကရဴတၠအဲရော?” ရဴဝွံ သၟာန်အိုတ်ရ။
ယွံကောန်တၠတအ် အဲလေဝ် “မုဟိုတ် ဂၠဴၝောံဇၞော်ဝွံ ဗက်ကၠုၚ်စုက်စုက် နူလက်ကရဴ နူလက်ကရဴ အဲဂှ် ဟွံတီရ” ရဴဝွံ ဟီုသ္ဂးရ။ ပ္ဍဲအခိၚ်ဂှ် သကိုပ်သ္ၚာ ခမဳမယုတ်မာဂှ် ကၠေဝ်ဗာန်ဒၟံၚ်နကဵုဆီရ။ ခမဳဂမၠိုၚ် “ယွံကောန်တၠ တၠအဲ ပသာ်သ္ပလဝ် သကိုပ်သ္ၚာဝွံရော?” ရဴဝွံ သၟာန်အိုတ်၇။ ပ္ဍဲအခိၚ်ဂှ် ခမဳမယုတ်မာဂှ် ဟီုလဴဗ္စဟိုတ်ပရူပရာဂှ် ကုခမဳဂမၠိုၚ်ရ။ ယွံကောန်တၠ တၠအဲ ကဵုဒဂိုန်ဂိုၚ်ကေတ် ပ္ဍဲပွမဂစိုတ်လမျီုညးဟာ ရဴဝွံ သၟာန်အိုတ်ရ၊ ယွံကောန်တၠတအ် ကဵုဒဂိုန်ဂိုၚ်ကေတ်ရ ရဴဝွံ (ဟီုသ္ဂးရ)။
ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂှ် ကဵုဒဂိုန်ဂိုၚ်ကေတ် ပ္ဍဲပွမဂစိုတ်လမျီုညးရော? တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် ဂပ်ဝ်ဟီုဂရိုဟ်တဴ ပွမဂစိုတ်လမျီုညးရ ဟွံသေၚ်ဟာ၊ ဂပ်ဝ်ထိုၚ်သးတဴ ပွမဝေၚ်ပါဲကၠေံ နူပွမဂစိုတ်လျီုညးရ ဟွံသေၚ်ဟာ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုဂကောံခမဳ ကောံဓရီုတုဲမ္ဂး “ယွံခမဳ တၠအဲ ကဵုဒဂိုန်ဂိုၚ်ကေတ် ပ္ဍဲပွမဂစိုတ်လျီုရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် ခမဳမယုတ်မာဂှ်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တၠအဲ မုဟိုတ် ကဵုဒဂိုန်ဂိုၚ်ကေတ် ပွမဂစိုတ်လမျီုညးရော? ယွံတြုံမလ္ၚုသၟး (နူမဂ်ဖိုလ်) နဟိုတ်မဂၠိုၚ်ဂၠၚ် အဲ ဂပ်ဝ်ဟီုဂရိုဟ်တဴ ပွမဂစိုတ်လမျီုညးရ ဟွံသေၚ်ဟာ၊ ဂပ်ဝ်ထိုၚ်သးတဴ ပွမဝေၚ်ပါဲကၠေံ နူပွမဂစိုတ်လမျီုညးရ ဟွံသေၚ်ဟာ။
ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလနာ်ဓရ်တုဲမ္ဂး “ယွံခမဳတအ် ဟဂပ်ဝ်ကဵုဒဂိုန်ဂိုၚ်ကေတ် ပ္ဍဲပွမဂစိုတ်လမျီုညးရ၊ ကုခမဳမကဵုဒဂိုန်ဂိုၚ်ကေတ်ဂှ် ဂပ်ဝ်သ္ဂုတ်သွာတ်ဗွဲမဗဗွဲကဵုဓရ်ရ။ ယွံခမဳတအ် ဟဂပ်ဝ်ပကၚ်ရၚ်သုၚ်စောဲ စၞာံဂၠဴရ၊ ကုခမဳမပကၚ်ရၚ်သုၚ်စောဲဂှ် ဒးအာပတ်ဒုက္ကဋ်ရ။ ယွံခမဳတအ် ဟဂပ်ဝ်ပကၚ်ရၚ်သုၚ်စောဲ စၞာံမမိက်ကဵုမွဲမွဲရ၊ ကုခမဳမပကၚ်ရၚ်သုၚ်စောဲဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
