၁၄၃။ မပ္တံပွမစွံပတန်ဝတ္ထု

၂၃၉။ ယွံခမဳတအ် ခမဳဂှ် ပ္ဍဲတ္ၚဲပဝါရဏာဂှ် ပ္ဍဲလဒေါဝ်သၚ် “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ဟိုတ်အရာဝွံ ပြာကဋ်ရ။ ပူဂိုလ်ဂှ် ဟွံပြာကဋ်ရ၊ ကမ်မၞုံကဵု အခိၚ်မဗဗွဲ ကုသၚ် ယဝ်ဒှ်မ္ဂး၊ ပါဲကၠေံဟိုတ်အရာတုဲ သၚ် သ္ပပဝါရဏာရ” ရဴဝွံ ဟီုသ္ဂးမ္ဂး။ “ယွံကောန်တၠ တဳလမၞုံပိုဉ်ကျာ်တြဲဂှ် ပညပ်လဝ် ပဝါရဏာ ကုခမဳမသအးဇ္ၚးဂမၠိုၚ်ရ၊ ဟိုတ်အရာဟေၚ် ပြာကဋ်တုဲ ယဝ်ပူဂိုလ်ဟွံပြာကဋ်မ္ဂး၊ ပ္ဍဲလၟုဟ်ဟေၚ် ဩဝ်ဟီုသ္ဂး ပူဂိုလ်မၞုံကဵုသၠေဟ်ပၟာ နကဵုဟိုတ်အရာဂှ်ညိ” ရဴဝွံ (သ္ဒးဟီုသ္ဂး) ကဵုခမဳဂှ်ရ။

ယွံခမဳတအ် ခမဳဂှ် ပ္ဍဲအပ္ဍဲတ္ၚဲပဝါရဏာဂှ် ပ္ဍဲလဒေါဝ်သၚ် “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ပူဂိုလ်ဝွံ ပြာကဋ်ရ၊ ဟိုတ်အရာဂှ် ဟွံပြာကဋ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး ပါဲကၠေံပူဂိုလ်တုဲ သၚ် သ္ပပဝါရဏာ” ရဴဝွံ ဟီုသ္ဂးမ္ဂး။ “ယွံကောန်တၠ တဳလမၞုံပိုဉ်ကျာ်တြဲဂှ် ပညပ်လဝ်ပဝါရဏာ ကုခမဳမညဳသာသၟဟ်သၟန်ဂမၠိုၚ်ရ၊ ပူဂိုလ်ဟေၚ် ပြာကဋ်တုဲ ယဝ်ဟိုတ်အရာဟွံပြာကဋ်မ္ဂး၊ ပ္ဍဲလၟုဟ်ဟေၚ် ဩဝ်ဟီုသ္ဂးဒုဟ်ပူဂိုလ်ဂှ်ညိ” ရဴဝွံ (သ္ဒးဟီုသ္ဂး) ကဵုခမဳဂှ်ရ။

ယွံခမဳတအ် ခမဳဂှ် ပ္ဍဲအပ္ဍဲတ္ၚဲပဝါရဏာဂှ် ပ္ဍဲလဒေါဝ်သၚ် “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ဟိုတ်အရာဝွံ ပူဂိုလ်ကီု ပြာကဋ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ ပါဲကၠေံဟိုတ်အရာကီု ပူဂိုလ်ကီုတုဲ သၚ် သ္ပပဝါရဏာရ” ရဴဝွံ ဟီုသ္ဂးမ္ဂး။ “ယွံကောန်တၠ တဳလမၞုံပိုဉ်ကျာ်တြဲဂှ် ပညပ်လဝ် ပဝါရဏာ ကုခမဳမသအးဇ္ၚးဂမၠိုၚ်ကီု ကုခမဳမညဳသာသၟဟ်သၟန်ကီုရ၊ ယဝ်ဟိုတ်အရာကီု ပူဂိုလ်ကီု ပြာကဋ်မ္ဂး၊ ပ္ဍဲလၟုဟ်ဟေၚ် ဩဝ်ဟီုသ္ဂး ဟိုတ်အရာကေုာံပူဂိုလ်ဂှ်ညိ” ရဴဝွံ (သ္ဒးဟီုသ္ဂး) ကဵုခမဳဂှ်ရ။

ယွံခမဳတအ် ပ္ဍဲကၠာပဝါရဏာ ယဝ်ဟိုတ်အရာပြာကဋ်တုဲ လက်ကရဴပဝါရဏာမှ ပူဂိုလ်ပြာကဋ်မ္ဂး၊ ထေက်ကဵုတၞဟ်နစောဒနာရ။ ယွံခမဳတအ် ပ္ဍဲကၠာပဝါရဏာ ယဝ်ပူဂိုလ်ပြာကဋ်တုဲ လက်ကရဴပဝါရဏာမှ ဟိုတ်အရာပြာကဋ်မ္ဂး၊ ထေက်ကဵုတၞဟ်နစောဒနာရ။ ယွံခမဳတ် ပ္ဍဲကၠာပဝါရဏာ ဟိုတ်အရာကီု ပူဂိုလ်ကီု ယဝ်ပြာကဋ်မ္ဂး၊ သ္ပပဝါရဏာတုဲမှ ယဝ်ခ္ဍဟ်ကတဵု ပွမသ္ဂုတ်သွာတ်ဂှ်မ္ဂး ဒးအာပတ်ပါဲစိုတ် မဒှ်ဟိုတ်ပွမခ္ဍဟ်ကတဵုရ ရဴဝွံ (သ္ဂးရ)။