၁၄၁။ ပွမတန်ဒေါံပဝါရဏာ
၂၃၅။ ပ္ဍဲကာလမွဲအခိၚ် ခမဳဆဗ္ဗဂ္ဂဳဂမၠိုၚ် သီုမဒှ်တဴမွဲဟာန်ကေုာံအာပတ်ဂမၠိုၚ်ဂှ် သ္ပပဝါရဏာအိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဒှ်မွဲဟာန်ကေုာံ အာပတ်ဂှ် ဟဂပ်ဝ်သ္ပပဝါရဏာရ၊ ကုခမဳမသ္ပဂှ် ဒးအာပတ်ဒုက္ကဋ်ရ။ ယွံခမဳတအ် ဒှ်မွဲဟာန်ကေုာံအာပတ်တုဲ ကုခမဳမသ္ပပဝါရဏာဂှ် ကဵုသ္ပအခေါၚ်တုဲ တၞဟ်နစောဒနာ နအာပတ်ဂှ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် အာတ်အခေါၚ်မ္ဂး ဟွံမွဲပၟိက်တၞဟ်နကဵုအခေါၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကုခမဳမဟွံကဵုအခေါၚ်ဂှ် ကဵုအခေါၚ် တၞဟ်နတန်ဒေါံပဝါရဏာရ။ ယွံခမဳတအ် ရဴဝွံ ဒးတန်ဒေါံရ၊ ပ္ဍဲတ္ၚဲပဝါရဏာ မဒှ်စှ်ပန်တ္ၚဲဟွံသေၚ်မ္ဂး စှ်သုန်တ္ၚဲဂှ် ပ္ဍဲလဒေါဝ်သၚ်မဒှ်ဂတမုက် ပူဂိုလ်မဒှ်မွဲဟာန်ကေုာံအာပတ်ဂှ်-
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ပူဂိုလ်မၞုံယၟုဝွံ ဒှ်မွဲဲဟာန်ကေုာံအာပတ်ရ၊ ဟဂပ်ဝ် သ္ပပဝါရဏာ ပ္ဍဲဂတမုက်ပူဂိုလ်ဂှ်ရ ရဴဝွံ တန်ဒေါံပဝါရဏာ ကုပူဂိုလ်ဂှ်ရ” ရဴဝွံ ဟီုသ္ဂးမ္ဂး ဒှ်တန်ဒေါံပဝါရဏာရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “ခမဳမသ္ဍိုက်ဆာန်သဳလဂမၠိုၚ်ဂှ် တန်ဒေါံပဝါရဏာ ကုပိုဲညးဂမၠိုၚ် ဗွဲကိုပ်ကၠာအိုတ်ရ” ရဴဝွံ ဗွဲပြဟ်ပြဟ်ဟေၚ် သီုဟွံမွဲကဵုအမှုအရာ သီုဟွံမွဲကဵုဟိုတ် တန်ဒေါံပဝါရဏာ ကုခမဳဂမၠိုၚ် မသအးဇ္ၚးဟွံမွဲကဵု အာပတ်အိုတ်ရ၊ ကုခမဳမသ္ပပဝါရဏာတုဲဂမၠိုၚ်လေဝ် တန်ဒေါံပဝါရဏာအိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် သီုဟွံမွဲကဵုအမှုအရာ သီုဟွံမွဲကဵုဟိုတ် တန်ဒေါံပဝါရဏာ ကုခမဳဂမၠိုၚ် မသအးဇ္ၚး ဟွံမွဲကဵုအာပတ်ရ၊ ကုခမဳ မတန်ဒေါံပဝါရဏာဂှ် ဒးအာပတ်ဒုက္ကဋ်ရ။ ယွံခမဳတအ် ကုခမဳမသ္ပပဝါရဏာတုဲဂမၠိုၚ်လေဝ် ဟဂပ်ဝ်တန်ဒေါံပဝါရဏာရ၊ ကုခမဳ မတန်ဒေါံပဝါရဏာဂှ် ဒးအာပတ်ဒုက္ကဋ်ရ။
၂၃၆။ ယွံခမဳတအ် ရဴဝွံ ဒှ်တန်ဒေါံပဝါရဏာရ၊ ရဴဝွံ ဟွံဒှ်တန်ဒေါံပဝါရဏာရ။
ယွံခမဳတအ် မူရဴသာ်လဵု ဟဂပ်ဝ်တန်ဒေါံပဝါရဏာရော? ယွံခမဳတအ် ပဝါရဏာမၞုံကဵု ပွမဖ္ဍောတ်ပိအလန်ဂှ် ကဵုဖ္ဍောတ်သ္ဂးစိုပ်ဒတုဲတုဲမှ ယဝ်တန်ဒေါံပဝါရဏာမ္ဂး၊ ဟွံဒှ်တန်ဒေါံပဝါရဏာရ။ ယွံခမဳတအ် ပဝါရဏာမၞုံကဵုပွမဖ္ဍောတ်ၜါအလန်ဂှ်။ ယွံခမဳတအ် ပဝါရဏာမၞုံကဵုပွမဖ္ဍောတ်မွဲအလန်ဂှ်။ ယွံခမဳတအ် ပဝါရဏာမၞုံကဵု ပွမဖ္ဍောတ်ဝသ်တုပ်သၟဟ်မွဲဒမြိပ်ဂှ် ကဵုဖ္ဍောတ်သ္ဂးစိုပ်ဒတုဲတုဲမှ ယဝ်တန်ဒေါံပဝါရဏာမ္ဂး၊ ဟွံဒှ်တန်ဒေါံပဝါရဏာရ။ ယွံခမဳတအ် ရဴဝွံ ဟဂပ်ဝ်တန်ဒေါံပဝါရဏာရ။
ယွံခမဳတအ် မူရဴသာ်လဵု ဒှ်တန်ဒေါံပဝါရဏာရော? ယွံခမဳတအ် ပဝါရဏာမၞုံကဵု ပွမဖ္ဍောတ်ပိအလန်ဂှ် ဃောဖ္ဍောတ်သ္ဂးဟွံစိုပ်ဒတုဲဏီ ယဝ်တန်ဒေါံပဝါရဏာမ္ဂး၊ ဟွံဒှ်တန်ဒေါံပဝါရဏာရ။ ယွံခမဳတအ် ပဝါရဏာမၞုံကဵုပွမဖ္ဍောတ်ၜါအလန်ဂှ်။ ယွံခမဳတအ် ပဝါရဏာမၞုံကဵုပွမဖ္ဍောတ်မွဲအလန်ဂှ်။ ယွံခမဳတအ် ပဝါရဏာမၞုံကဵု ပွမဖ္ဍောတ်ဝသ်တုပ်သၟဟ်မွဲဒမြိပ်ဂှ် ဃောဖ္ဍောတ်သ္ဂးဟွံစိုပ်ဒတုဲဏီ ယဝ်တန်ဒေါံပဝါရဏာမ္ဂး၊ ဟွံဒှ်တန်ဒေါံပဝါရဏာရ။ ယွံခမဳတအ် ရဴဝွံ ဂပ်ဝ်တန်ဒေါံပဝါရဏာရ။
၂၃၇။ ယွံခမဳတအ် ပ္ဍဲတ္ၚဲပဝါရဏာ ခမဳမွဲဇကုဂှ် တန်ဒေါံပဝါရဏာ ခမဳမွဲဇကုရ၊ ခမဳမတန်ဒေါံဂှ် “တဳလပိုဉ်ဝွံ မၞုံကဵုဒ္ဂေတ်ဇကုဟွံသအးဇ္ၚးရ၊ မၞုံကဵုဒ္ဂေတ်ပါၚ်ဟွံသအးဇ္ၚးရ၊ မၞုံကဵုပွမဂယျိုၚ်လမျီု ဟွံသအးဇ္ၚးရ၊ ဟွံတီကၠိုဟ်ခၠၚ် (ဝိနယ်သိက္ခာပိုဒ်) ရ၊ ဟွံံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်) ရ၊ ဂပ်ဝ်သၟာန်စၟဳစၟတ်မ္ဂး ဟွံသၟဟ်ရထ တၞဟ်နသှ်ကဵု သၟာန်ရ” ရဴဝွံ ခမဳသ္အာၚ်ဂမၠိုၚ် တီကေတ်အိုတ်မ္ဂး၊ “ယွံခမဳ ဟွံထေက်ရ၊ လ္ပသ္ပပွမကယျာန်ဓဝါတ်ကြဴမတ်ညိ၊ လ္ပသ္ပပွမကယျာန်ဓဝါတ်ဂတမတ်ညိ၊ လ္ပသ္ပပွမကယျာန်ဓဝါတ် သီုမဂိုၚ်ကေတ်စှ်ေစးညိ၊ လ္ပသ္ပပွမကယျာန်ဓဝါတ် ကဵုဇိုၚ်တဲညိ” ရဴဝွံ လၞိန်ဗပိန်ကၠေံ (နဂလာန်) တုဲ သၚ် ဒးသ္ပပဝါရဏာရ။
ယွံခမဳတအ် ပ္ဍဲတ္ၚဲပဝါရဏာ ခမဳမွဲဇကုဂှ် တန်ဒေါံပဝါရဏာ ခမဳမွဲဇကုရ၊ ခမဳမတန်ဒေါံဂှ် “တဳလပိုဉ်ဝွံ မၞုံကဵုဒ္ဂေတ်ဇကုသအးဇ္ၚးရ၊ မၞုံကဵုဒ္ဂေတ်ပါၚ်ဟွံသအးဇ္ၚးရ၊ မၞုံကဵုပွမဂယျိုၚ်လမျီု ဟွံသအးဇ္ၚးရ၊ ဟွံတီကၠိုဟ်ခၠၚ် (ဝိနယ်သိက္ခာပိုဒ်) ရ၊ ဟွံံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်) ရ၊ ဂပ်ဝ်သၟာန်စၟဳစၟတ်မ္ဂး ဟွံသၟဟ်ရထ တၞဟ်နသှ်ကဵု သၟာန်ရ” ရဴဝွံ ခမဳသ္အာၚ်ဂမၠိုၚ် တီကေတ်အိုတ်မ္ဂး၊ “ယွံခမဳ ဟွံထေက်ရ၊ လ္ပသ္ပပွမကယျာန်ဓဝါတ်ကြဴမတ်ညိ၊ လ္ပသ္ပပွမကယျာန်ဓဝါတ်ဂတမတ်ညိ၊ လ္ပသ္ပပွမကယျာန်ဓဝါတ် သီုမဂိုၚ်ကေတ်စှ်ေစးညိ၊ လ္ပသ္ပပွမကယျာန်ဓဝါတ် ကဵုဇိုၚ်တဲညိ” ရဴဝွံ လၞိန်ဗပိန်ကၠေံ (နဂလာန်) တုဲ သၚ် ဒးသ္ပပဝါရဏာရ။
ယွံခမဳတအ် ပ္ဍဲတ္ၚဲပဝါရဏာ ခမဳမွဲဇကုဂှ် တန်ဒေါံပဝါရဏာ ခမဳမွဲဇကုရ၊ ခမဳမတန်ဒေါံဂှ် “တဳလပိုဉ်ဝွံ မၞုံကဵုဒ္ဂေတ်ဇကုသအးဇ္ၚးရ၊ မၞုံကဵုဒ္ဂေတ်ပါၚ်သအးဇ္ၚးရ၊ မၞုံကဵုပွမဂယျိုၚ်လမျီု ဟွံသအးဇ္ၚးရ၊ ဟွံတီကၠိုဟ်ခၠၚ် (ဝိနယ်သိက္ခာပိုဒ်) ရ၊ ဟွံံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်) ရ၊ ဂပ်ဝ်သၟာန်စၟဳစၟတ်မ္ဂး ဟွံသၟဟ်ရထ တၞဟ်နသှ်ကဵု သၟာန်ရ” ရဴဝွံ ခမဳသ္အာၚ်ဂမၠိုၚ် တီကေတ်အိုတ်မ္ဂး၊ “ယွံခမဳ ဟွံထေက်ရ၊ လ္ပသ္ပပွမကယျာန်ဓဝါတ်ကြဴမတ်ညိ၊ လ္ပသ္ပပွမကယျာန်ဓဝါတ်ဂတမတ်ညိ၊ လ္ပသ္ပပွမကယျာန်ဓဝါတ် သီုမဂိုၚ်ကေတ်စှ်ေစးညိ၊ လ္ပသ္ပပွမကယျာန်ဓဝါတ် ကဵုဇိုၚ်တဲညိ” ရဴဝွံ လၞိန်ဗပိန်ကၠေံ (နဂလာန်) တုဲ သၚ် ဒးသ္ပပဝါရဏာရ။
ယွံခမဳတအ် ပ္ဍဲတ္ၚဲပဝါရဏာ ခမဳမွဲဇကုဂှ် တန်ဒေါံပဝါရဏာ ခမဳမွဲဇကုရ၊ ခမဳမတန်ဒေါံဂှ် “တဳလပိုဉ်ဝွံ မၞုံကဵုဒ္ဂေတ်ဇကုသအးဇ္ၚးရ၊ မၞုံကဵုဒ္ဂေတ်ပါၚ်သအးဇ္ၚးရ၊ မၞုံကဵုပွမဂယျိုၚ်လမျီု သအးဇ္ၚးရ၊ ဟွံတီကၠိုဟ်ခၠၚ် (ဝိနယ်သိက္ခာပိုဒ်) ရ၊ ဟွံံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်) ရ၊ ဂပ်ဝ်သၟာန်စၟဳစၟတ်မ္ဂး ဟွံသၟဟ်ရထ တၞဟ်နသှ်ကဵု သၟာန်ရ” ရဴဝွံ ခမဳသ္အာၚ်ဂမၠိုၚ် တီကေတ်အိုတ်မ္ဂး၊ “ယွံခမဳ ဟွံထေက်ရ၊ လ္ပသ္ပပွမကယျာန်ဓဝါတ်ကြဴမတ်ညိ၊ လ္ပသ္ပပွမကယျာန်ဓဝါတ်ဂတမတ်ညိ၊ လ္ပသ္ပပွမကယျာန်ဓဝါတ် သီုမဂိုၚ်ကေတ်စှ်ေစးညိ၊ လ္ပသ္ပပွမကယျာန်ဓဝါတ် ကဵုဇိုၚ်တဲညိ” ရဴဝွံ လၞိန်ဗပိန်ကၠေံ (နဂလာန်) တုဲ သၚ် ဒးသ္ပပဝါရဏာရ။
ယွံခမဳတအ် ပ္ဍဲတ္ၚဲပဝါရဏာ ခမဳမွဲဇကုဂှ် တန်ဒေါံပဝါရဏာ ခမဳမွဲဇကုရ၊ ခမဳမတန်ဒေါံဂှ် “တဳလပိုဉ်ဝွံ မၞုံကဵုဒ္ဂေတ်ဇကုသအးဇ္ၚးရ၊ မၞုံကဵုဒ္ဂေတ်ပါၚ်သအးဇ္ၚးရ၊ မၞုံကဵုပွမဂယျိုၚ်လမျီု သအးဇ္ၚးရ၊ မၞုံကဵုပညာရ၊ စဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်) ရ၊ ဂပ်ဝ်သၟာန်စၟဳစၟတ်မ္ဂး သၟဟ်ရထ တၞဟ်နသှ်ကဵု သၟာန်ရ” ရဴဝွံ ခမဳသ္အာၚ်ဂမၠိုၚ် တီကေတ်အိုတ်မ္ဂး၊ “ယွံကောန်တၠ တၠအဲ မူရဴ ဟိုတ်နူဝိပတ္တိမွဲ တန်ဒေါံပဝါရဏာ ကုခမဳဝွံရော? ဟိုတ်နူသဳလလီုလာ်ဂှ် တန်ဒေါံဟာ၊ ဟိုတ်နူဒ္ဂေတ်လီုလာ်ဂှ် တန်ဒေါံဟာ၊ ဟိုတ်နူကွေတ်လီုလာ်ဂှ် တန်ဒေါံဟာ” ရဴဝွံ ဒးသၟာန်သၟုက်ခမဳဂှ်ရ။
ခမဳဂှ် “ဟိုတ်နူသဳလလီုလာ်ဂှ် တန်ဒေါံရ၊ ဟိုတ်နူဒ္ဂေတ်လီုလာ်ဂှ် တန်ဒေါံရ၊ ဟိုတ်နူကွေတ်လီုလာ်ဂှ် တန်ဒေါံရ” ရဴဝွံ ယဝ်ဟီုသ္ဂးမ္ဂး၊ “တၠအဲ တီတဴ သဳလလီုလာ်ဟာ၊ တီတဴ ဒ္ဂေတ်လီုလာ်ဟာ၊ တီတဴ ကွေတ်လီုလာ်ဟာ” ရဴဝွံ ဒးသၟာန်သၟုက် ခမဳဂှ်ရ။
ခမဳဂှ် “အဲတီတဴ သဳလလီုလာ်ရ၊ တီတဴ ဒ္ဂေတ်လီုလာ်ရ၊ တီတဴ ကွေတ်လီုလာ်ရ” ရဴဝွံ ယဝ်ဟီုသ္ဂးမ္ဂး၊ “ယွံကောန်တၠ သဳလလီုလာ်ဂှ်တုန် ညးဍေံရော? ဒ္ဂေတ်လီုလာ်ဂှ်တုန် ညးဍေံရော? ကွေတ်လီုလာ်ဂှ်တုန် ညးဍေံရော? ရဴဝွံ ဒးသၟာန်သၟုကက် ခမဳဂှ်ရ။
ခမဳဂှ် “ပါရာဇ်ပန်ပြကာ ကေုာံသံဃာဒိသေသ်စှ်ပိဂမၠိုၚ်ဂှ် သဳလလီုလာ်မ္ဂးရ၊ အာပတ်ထုလ္လစ္စယ် ပါဲစိုတ် ပါဋိဒေသနိက် ဒုက္ကဋ် ဒုဗ္ဘာသိုတ်ဂမၠိုၚ်ဂှ် ဒ္ဂေတ်လီုလာ်မ္ဂးရ၊ မိစ္ဆာဒိဋ္ဌိကေုာံအန္တဂ္ဂါဟဳကာဒိဋ္ဌိ (သဿတဒိဋ္ဌိ ဥစ္ဆေဒဒိဋ္ဌိ) ဂမၠိုၚ်ဂှ် ကွေတ်လီုလာ်မ္ဂးရ” ရဴဝွံ ယဝ်ဟီုသ္ဂးမ္ဂး၊ “ယွံကောန်တၠ တၠအဲ တန်ဒေါံပဝါရဏာ ကုခမဳဝွံဂှ် နမညာတ်ကေတ်ဂှ် တန်ဒေါံဟာ၊ နမမိၚ်ကေတ်ဂှ် တန်ဒေါံဟာ၊ နမသၠေဟ်ပၟာဂှ် တန်ဒေါံဟာ” ရဴဝွံ ဒးသၟာန်သၟုက် ခမဳဂှ်ရ။
ခမဳဂှ် “နမညာတ်ကေတ်ဂှ် တန်ဒေါံရ၊ နမမိၚ်ကေတ်ဂှ် တန်ဒေါံရ၊ နမသၠေဟ်ပၟာဂှ် တန်ဒေါံရ” ရဴဝွံ ယဝ်ဟီုသ္ဂးမ္ဂး၊ “ယွံကောန်တၠ တၠအဲ နမညာတ်ကေတ်ဂှ် တန်ဒေါံပဝါရဏာ ကုခမဳဝွံမ္ဂး တၠအဲ ညာတ်ကေတ် မုမွဲရော? ပသာ် တၠအဲညာတ်ကေတ်ရော? မုရဴပ္ဍဲအခိၚ်မွဲ တၠအဲ ညာတ်ကေတ်ရော? မုရဴပ္ဍဲဌာန်မွဲ တၠအဲညာတ်ကေတ်ရော? ညာတ်ကေတ် အာစိုပ်အာပတ်ပါရာဇ်ဟာ၊ ညာတ်ကေတ် အာစိုပ်အာပတ်သံဃာဒိသေသ်ဟာ၊ ညာတ်ကေတ် အာစိုပ်အာပတ်ထုလ္လစ္စယ်ဟာ၊ ညာတ်ကေတ် အာစိုပ်အာပတ်ပါဲစိုတ်ဟာ၊ ညာတ်ကေတ် အာစိုပ်အာပတ်ပါဋိဒေသနိက်ဟာ၊ ညာတ်ကေတ် အာစိုပ်အာပတ်ဒုက္ကဋ်ဟာ၊ ညာတ်ကေတ် အာစိုပ်အာပတ်ဒုဗ္ဘာသိုတ်ဟာ၊ မုရဴပ္ဍဲဌာန်မွဲ တၠအဲနွံဒၟံၚ်ရော? မုရဴပ္ဍဲဌာန်မွဲ ခမဳဝွံ နွံဒၟံၚ်ရော? တၠအဲ သ္ပဒၟံၚ်မုကေၚ်ကာမွဲရော? ခမဳဝွံ သ္ပတဴမုကေၚ်ကာမွဲရော?” ရဴဝွံ ဒးသၟာန်သၟုက်ရ။
ခမဳဂှ် “ယွံကောန်တၠ အဲ နမညာတ်ကေတ်ဂှ် ဟွံတန်ဒေါံ ပဝါရဏာ ကုခမဳဝွံရ၊ ဗွဲစၟတ်တုန် နမမိၚ်ကေတ်ဂှ် တန်ဒေါံပဝါရဏာရ” ရဴဝွံ ယဝ်ဟီုသ္ဂးမ္ဂ:၊ “ယွံကောန်တၠ တၠအဲ နမမိၚ်ကေတ်ဂှ် တန်ဒေါံပဝါရဏာ ကုခမဳဝွံမ္ဂး တၠအဲ မိၚ်ကေတ် မုမွဲရော? ပသာ် တၠအဲ မိၚ်ကေတ်ရော? မုရဴဴပ္ဍဲအခိၚ်မွဲ တၠအဲ မိၚ်ကေတ်ရော? မုရဴပ္ဍဲဌာန်မွဲ တၠအဲ မိၚ်ကေတ်ရော? မိၚ်ကေတ် ရဴဝွံမ္ဂး ‘အာစိုပ်အာပတ်ပါရာဇ်’ဟာ၊ မိၚ်ကေတ် ရဴဝွံမ္ဂး ‘အာစိုပ်အာပတ်သံဃာဒိသေသ်’ဟာ၊ မိၚ်ကေတ် ရဴဝွံမ္ဂး ‘အာစိုပ်အာပတ်ထုလ္လစ္စယ်’ဟာ၊ မိၚ်ကေတ် ရဴဝွံမ္ဂး ‘ အာစိုပ်အာပတ်ပါဲစိုတ်’ဟာ၊ မိၚ်ကေတ် ရဴဝွံမ္ဂး ‘အာစိုပ်အာပတ်ပါဋိဒေသနိက်’ဟာ၊ မိၚ်ကေတ် ရဴဝွံမ္ဂး ‘အာစိုပ်အာပတ်ဒုက္ကဋ်’ဟာ၊ မိၚ်ကေတ် ရဴဝွံမ္ဂး ‘အာစိုပ်အာပတ်ဒုဗ္ဘာသိုက်’ဟာ၊ မိၚ်ကေတ် ဂလာန်ခမဳတြုံဟာ၊ မိၚ်ကေတ် ဂလာန်ခမဳဗြဴဟာ၊ မိၚ်ကေတ် ဂလာန်သိက္ခာမာန်ဟာ၊ မိၚ်ကေတ် ဂလာန်သာမဏဳတြုံဟာ၊ မိၚ်ကေတ် ဂလာန်သာမဏဳဗြဴဟာ၊ မိၚ်ကေတ် ဂလာန်ဥပးတြုံဟာ၊ မိၚ်ကေတ် ဂလာန်ဥပးဗြဴဟာ၊ မိၚ်ကေတ် ဂလာန်သၟိၚ်ဂမၠိုၚ်ဟာ၊ မိၚ်ကေတ် ဂလာန်အမာတ်သၟိၚ်ဂမၠိုၚ်ဟာ၊ မိၚ်ကေတ် ဂလာန်တဳဂမၠိုၚ်ဟာ၊ မိၚ်ကေတ် ဂလာန်ကွးတဳဂမၠိုၚ်ဟာ” ရဴဝွံ ဒးသၟာန်သၟုက်ရ။
ခမဳဂှ် “ယွံကောန်တၠ အဲ နမမိၚ်ကေတ်ဂှ် ဟွံတန်ဒေါံပဝါရဏာ ကုခမဳဝွံရ၊ ဗွဲစၟတ်တုန် နမသၠေဟ်ပၟာကေတ်ဂှ် တန်ဒေါံပဝါရဏာရ” ရဴဝွံ ယဝ်ဟီုသ္ဂးမ္ဂး၊ “ယွံကောန်တၠ တၠအဲ နမသၠေဟ်ပၟာကေတ်ဂှ် တန်ဒေါံပဝါရဏာ ကုခမဳဝွံမ္ဂး သၠေဟ်ပၟာကေတ် မုမွဲရော? ပသာ် သၠေဟ်ပၟာကေတ်ရော? မုရဴဴပ္ဍဲအခိၚ်မွဲ သၠေဟ်ပၟာကေတ်ရော? မုရဴပ္ဍဲဌာန်မွဲ သၠေဟ်ပၟာကေတ်ရော? သၠေဟ်ပၟာကေတ် ရဴဝွံမ္ဂး ‘အာစိုပ်အာပတ်ပါရာဇ်’ဟာ၊ သၠေဟ်ပၟာကေတ် ရဴဝွံမ္ဂး ‘အာစိုပ်အာပတ်သံဃာဒိသေသ်’ဟာ၊ သၠေဟ်ပၟာကေတ် ရဴဝွံမ္ဂး ‘အာစိုပ်အာပတ်ထုလ္လစ္စယ်’ဟာ၊ သၠေဟ်ပၟာကေတ် ရဴဝွံမ္ဂး ‘ အာစိုပ်အာပတ်ပါဲစိုတ်’ဟာ၊ သၠေဟ်ပၟာကေတ် ရဴဝွံမ္ဂး ‘အာစိုပ်အာပတ်ပါဋိဒေသနိက်’ဟာ၊ သၠေဟ်ပၟာကေတ် ရဴဝွံမ္ဂး ‘အာစိုပ်အာပတ်ဒုက္ကဋ်’ဟာ၊ သၠေဟ်ပၟာကေတ် ရဴဝွံမ္ဂး ‘အာစိုပ်အာပတ်ဒုဗ္ဘာသိုက်’ဟာ၊ မိၚ်ဂလာန်ခမဳတြုံတုဲ သၠေဟ်ပၟာဟာ၊ မိၚ်ဂလာန်ခမဳဗြဴတုဲ သၠေဟ်ပၟာဟာ၊ မိၚ်ဂလာန်သိက္ခာမာန်တုဲ သၠေဟ်ပၟာဟာ၊ မိၚ်ဂလာန်သာမဏဳတြုံတုဲ သၠေဟ်ပၟာဟာ၊ မိၚ်ဂလာန်သာမဏဳဗြဴတုဲ သၠေဟ်ပၟာဟာ၊ မိၚ်ဂလာန်ဥပးတြုံတုဲ သၠေဟ်ပၟာဟာ၊ မိၚ်ဂလာန်ဥပးဗြဴတုဲ သၠေဟ်ပၟာဟာ၊ မိၚ်ဂလာန်သၟိၚ်ဂမၠိုၚ်တုဲ သၠေဟ်ပၟာဟာ၊ မိၚ်ဂလာန်အမာတ်သၟိၚ်ဂမၠိုၚ်တုဲ သၠေဟ်ပၟာဟာ၊ မိၚ်ဂလာန်တဳဂမၠိုၚ်တုဲ သၠေဟ်ပၟာဟာ၊ မိၚ်ဂလာန်ကွးတဳဂမၠိုၚ်တုဲ သၠေဟ်ပၟာဟာ” ရဴဝွံ ဒးသၟာန်သၟုက်ရ။
ခမဳဂှ် “ယွံကောန်တၠ အဲ နမသၠေဟ်ပၟာကေတ်ဂှ် ဟွံတန်ဒေါံပဝါရဏာ ကုခမဳဝွံရ၊ ဗွဲစၟတ်တုန် မုဟိုတ် အဲဂွံတန်ဒေါံပဝါရဏာ ကုခမဳဝွံရော? ရဴဝွံ အဲလေဝ် ဟွံတီရ” ရဴဝွံ ယဝ်ဟီုသ္ဂးမ္ဂး၊ ယွံခမဳတအ် ခမဳမလေပ်စောဒနာဂှ် နမသၟာန်စၟဳစၟတ် ယဝ်ကဵုသ္ဍိုက်မၠိုက်စိုတ် သဟဓရ်မၞုံကဵုပညာဂမၠိုၚ်မ္ဂး၊ “ခမဳမဂပ်ဝ်(ဒးဒုၚ်)စောဒနာဂှ် ဒှ်မွဲဟာန်ကေုာံဒုဟ် မဂပ်ဝ်ဟီုဂရိုဟ်ရ (ဂပ်ဝ် ပွမစောတ်စောဲရ)” ရဴဝွံ ထေက်ကဵုတၞဟ်သ္ဂးရ။
ယွံခမဳတအ် ခမဳမလေပ်စောဒနာဂှ် ယဝ်ဒုၚ်ဝန် မစောတ်စောဲ နအာပတ်ပါရာဇ် မဟွံမွဲကဵုရိုဟ်ကၞက် (ပွမညာတ် ပွမမိၚ် ပွမသၠေဟ်ပၟာ) မ္ဂး၊ ပတိုန်အာပတ်သံဃာဒိသေသ်တုဲ သၚ် ဒးသ္ပပဝါရဏာရ။
ယွံခမဳတအ် ခမဳမလေပ်စောဒနာဂှ် ယဝ်ဒုၚ်ဝန် မစောတ်စောဲ နအာပတ်သံဃာဒိသေသ် မဟွံမွဲကဵုရိုဟ်ကၞက် (ပွမညာတ် ပွမမိၚ် ပွမသၠေဟ်ပၟာ) မ္ဂး၊ ကဵုဇအုဲဇဗ ဗွဲမဗဗွဲကုဓရ်တုဲ သၚ် ဒးသ္ပပဝါရဏာရ။
ယွံခမဳတအ် ခမဳမလေပ်စောဒနာဂှ် ယဝ်ဒုၚ်ဝန် မစောတ်စောဲ နအာပတ်ထုလ္လစ္စယ် မဟွံမွဲကဵုရိုဟ်ကၞက် (ပွမညာတ် ပွမမိၚ် ပွမသၠေဟ်ပၟာ) မ္ဂး၊ ကဵုဇအုဲဇဗ ဗွဲမဗဗွဲကုဓရ်တုဲ သၚ် ဒးသ္ပပဝါရဏာရ။
ယွံခမဳတအ် ခမဳမဂပ်ဝ်စောဒနာဂှ် ယဝ်ဒုၚ်ဝန် ရဴဝွံမ္ဂး “အာစိုပ်အာပတ်ပါရာဇ်”မ္ဂး၊ ပလီုပလာ်ကၠေံတုဲ ‘ကဵုရာံတိတ်ခရှ်တုဲ’ သၚ် ဒးသ္ပပဝါရဏာရ၊ ယွံခမဳတအ် ခမဳမဂပ်ဝ်စောဒနာဂှ် ယဝ်ဒုၚ်ဝန် ရဴဝွံမ္ဂး “အာစိုပ်အာပတ်သံဃာဒိသေသ်ရ”မ္ဂး၊ ပတိုန်အာပတ်သံဃာဒိသေသ်တုဲ သၚ် ဒးသ္ပပဝါရဏာရ။ ယွံခမဳတအ် ခမဳ မဂပ်ဝ်စောဒနာဂှ် ယဝ်ဒုၚ်ဝန် ရဴဝွံမ္ဂး “အာစိုပ်အာပတ်ထုလ္လစ္စယ်ရ။ ပါဲစိုတ်။ ပါဋိဒေသနိက်။ ဒုက္ကဋ်။ ဒုဗ္ဘာသိုတ်ရ”မ္ဂး၊ ကဵုဇအုဲဇဗ ဗွဲမဗဗွဲကုဓရ်တုဲ သၚ် ဒးသ္ပပဝါရဏာရ။
