၁၂၇။ နဲဇအုဲဇဗဝဳဗလးအာပတ်သဘဴတုပ်သၟဟ်

၂၂၁။ ပ္ဍဲမွဲအခိၚ်တေံ ပ္ဍဲအပ္ဍဲဘာမွဲ ပ္ဍဲတ္ၚဲပဝါရဏာဂှ် သၚ်အိုတ်သီု အာစိုပ်အာပတ်မ္ဒးဟိုတ်နူဝတ္ထုသဘဴတုပ်သၟဟ်ရ။ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲဂှ် ‘ဟဂပ်ဝ်ဟီုလၟိၚ်ဒေသနာအာပတ် မ္ဒးဟိုတ်နူဝတ္ထုသဘဴတုပ်သၟဟ်ရ၊ ဟဂပ်ဝ်ဒုၚ်ဂိုၚ်ကေတ် အာပတ်မ္ဒးဟိုတ်နူဝတ္ထုသဘဴတုပ်သၟဟ်ရ’ ရဴဝွံ ပညပ်လဝ်ရ၊ သၚ်အိုတ်သီုဝွံလေဝ် အာစိုပ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ။ ပိုဲညးဂမၠိုၚ် မုရဴသာ်လဵုရော?” ရဴဝွံ ကသပ်ဒှ် ကုခမဳဂမၠိုၚ်ဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ပ္ဍဲအပ္ဍဲဘာမွဲ ပ္ဍဲတ္ၚဲပဝါရဏာဂှ် သၚ်အိုတ်သီု အာစိုပ်အာပတ်မ္ဒးဟိုတ်နူဝတ္ထုသဘဴတုပ်သၟဟ်ရ။ ယွံခမဳတအ် ခမဳဂမၠိုၚ်ဂှ် “ယွံကောန်တၠ ဩဝ်အာညိ၊ ဇအုဲဇဗဝဳဗလးအာပတ်ဂှ်တုဲ ဩဝ်ကၠုၚ်ညိ၊ ပိုဲညးဂမၠိုၚ် ကြက်ဇအုဲဇဗဝဳဗလးအာပတ်ဂှ် ပ္ဍဲဇရေၚ်တၠအဲအိုတ်ရ” ရဴဝွံ သ္ဒးဖအောဝ်ဗလးဏာ ခမဳမွဲဇကု ဘာဇရေၚ်ဗ္ဒာဲဂှ် သကဵုကလေၚ်စဴတ္ၚဲဂှ်ရ။ ကလိဂွံရဴဝွံမ္ဂး ဆာဲသန်ရ။ ယဝ်ဟွံကလိဂွံမ္ဂး၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ-

“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ်အိုတ်သီုဝွံ အာစိုပ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ၊ ပ္ဍဲအခိၚ်မညာတ်ခမဳမွဲဇကု မသ္အးဇ္ၚးဟွံမွဲကဵုအာပတ်ဂှ် ကြက်ဇအုဲဇဗဝဳဗလး အာပတ်ဂှ် ပ္ဍဲခမဳဂှ်အိုတ်ရ” ရဴဝွံ ဒးသ္ပပဝါရဏာ၊ ဟိုတ်နူဟိုတ်မတွံဂးအာပတ်ဂှ် မဟဂပ်ဝ်သ္ပအန္တရာယ် ပဝါရဏာဟေၚ်ရ ရဴဝွံ (သ္ဂးရ)။

ယွံခမဳတအ် ပ္ဍဲအပ္ဍဲဘာမွဲ ပ္ဍဲတ္ၚဲပဝါရဏာဂှ် သၚ်အိုတ်သီု မၞုံကဵုသၠေဟ်ပၟာ ပ္ဍဲအာပတ် မ္ဒးဟိုတ်နူဝတ္ထုသဘဴတုပ်သၟဟ် ဒှ်မ္ဂး၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ-

“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ်အိုတ်သီုဝွံ မၞုံကဵုသၠေဟ်ပၟာ အာစိုပ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ၊ ပ္ဍဲအခိၚ်စာ်စ္ဍးနူသၠေဟ်ပၟာဂှ် ကြက်ဇအုဲဇဗဝဳဗလး အာပတ်ဂှ်ရ” ရဴဝွံ သ္ဂးရ၊ ဟိုတ်နူဟိုတ်မတွံဂး ပွမသၠေဟ်ပၟာ ပ္ဍဲအာပတ်ဂှ် မဟဂပ်ဝ်သ္ပအန္တရာယ် ပဝါရဏာဟေၚ်ရ ရဴဝွံ (သ္ဂးရ)။

ခဏ်ပဌမတုဲရ။