၁၂၅။ နဲဇအုဲဇဗဝဳဗလးအာပတ်

၁၁၉။ ပ္ဍဲကာလမွဲအခိၚ် ခမဳမွဲဇကု ပ္ဍဲတ္ၚဲပဝါရဏာဂှ် ဒးအာပတ်ရ။ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲ ‘မွဲဟာန်ကေုာံ အာပတ် ဟဂပ်ဝ်သ္ပပဝါရဏာရ’ ရဴဝွံ ပညပ်လဝ်ရ၊ အဲလေဝ် ဒးအာပတ်ရ၊ မုရဴသာ်လဵု အဲသ္ဂောံဒ္ဂေတ်ရော?” ရဴဝွံ ကသပ်ဒှ် ကုခမဳဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ခမဳဂှ် ပ္ဍဲတ္ၚဲပဝါရဏာ ဒးအာပတ်ရ၊ ယွံခမဳတအ် ခမဳဂှ် ပြာပ်အာဇရေၚ် ခမဳမွဲဇကုတုဲ လ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပါဲမွဲလ္ပါ်တုဲမ္ဂး သီုဂဇအ်ဒၟံၚ်ဗွဲလံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး “ယွံကောန်တၠ အဲဍိက် အာစိုပ်အာပတ် မၞုံယၟုဝွံရ၊ ဟီုလၟိၚ်အာပတ်ဂှ်ရ” ရဴဝွံ သ္ဒးဟီုရ။ ခမဳ မဒုၚ်ဒေသနာဂှ် “ဩဝ်မၠာ်သ္ၚေဝ် အာပတ်ညိ” ရဴဝွံ သ္ဒးဟီုရ။ “ခိုဟ်ရ မၠာ်သ္ၚေဝ်ရ” ရဴဝွံ (ခမဳမဒးအာပတ်ဂှ်) သ္ဒးဟီုရ။ “ပ္ဍဲကာလကြဴလေဝ် ဩဝ်သ္ၚဳလလမ်မၚ်မွဲညိ” ရဴဝွံ (ခမဳမဒုၚ်ဒေသနာဂှ် သ္ဒးဟီုရ)။

ယွံခမဳတအ် ခမဳဂှ် ပ္ဍဲတ္ၚဲပဝါရဏာ မၞုံကဵုသၠေဟ်ပၟာ ပ္ဍဲအာပတ်ရ၊ ယွံခမဳတအ် ခမဳဂှ် ပြာပ်အာဇရေၚ် ခမဳမွဲဇကုတုဲ လ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပါဲမွဲလ္ပါ်တုဲမ္ဂး သီုဂဇအ်ဒၟံၚ်ဗွဲလံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး “ယွံကောန်တၠ အဲဍိက် မၞုံကဵုသၠေဟ်ပၟာ ပ္ဍဲအာပတ် မၞုံယၟုဝွံရ၊ ယြဴပ္ဍဲအခိၚ်မွဲ စာ်စ္ဍးနူသၠေဟ်ပၟာဒှ်မ္ဂး၊ ပ္ဍဲအခိၚ်ဂှ် ကြက်ဇအုဲဇဗ အာပတ်ဂှ်ရ” ရဴဝွံ သ္ဂးတုဲ ဒးသ္ပပဝါရဏာရ၊ ဟိုတ်နူပွမသၠေဟ်ပၟာဂှ် ဟဂပ်ဝ်သ္ပအန္တရာယ် ပဝါရဏာဟေၚ်ရ ရဴဝွံ (သ္ဂးရ)။