၁၂၃။ မပ္တံကဠောဂမၠိုၚ်ရပ်ကေတ်

၁၁၄။ ပ္ဍဲကာလမွဲအခိၚ်တေံ ပ္ဍဲတ္ၚဲပဝါရဏာ ကဠောမသဂမၠိုၚ် ရပ်ကေတ်ခမဳမွဲဇကုအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပ္ဍဲသာသနာဝွံ ပ္ဍဲတ္ၚဲပဝါရဏာ ကဠောမသဂမၠိုၚ် ရပ်ကေတ်ခမဳအိုတ်ရ၊ ခမဳဂမၠိုၚ် “ယွံဒကာတအ် အာတ်ပါန်အခေါၚ်ရ၊ စဵုကဵုသ္ပပဝါရဏာ မၞးတအ်ညးဂမၠိုၚ် သြဝ်ဗလးကဵုခမဳဝွံ ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုကဠောမသဂမၠိုၚ်ဂှ်ရ။ အတိုၚ်အာတ်ပါန်အခေါၚ် ရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး၊ ခမဳဂမၠိုၚ် “ယွံဒကာတအ် အာတ်ပါန်အခေါၚ်ရ၊ စဵုကဵုခမဳဝွံ ပပဝါရဏာတုဲ မၞးတအ်ညးဂမၠိုၚ် သြဝ်ပဒတဴ ပ္ဍဲဌာန်မဗဗွဲ ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုကဠောမသဂမၠိုၚ်ဂှ်ရ။ အတိုၚ်ဟီုသ္ဂး ရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး၊ ခမဳဂမၠိုၚ် “ယွံဒကာတအ် အာတ်ပါန်အခေါၚ်ရ၊ စဵုကဵုသ္ပသံဃပဝါရဏာတုဲ မၞးတအ်ညးဂမၠိုၚ် သြဝ်ရၚ်တၠုၚ်ပတိတ် ခမဳဝွံမ္ၚးသိမ် ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုကဠောမသဂမၠိုၚ်ဂှ်ရ။ အတိုၚ်ဟီုသ္ဂး ရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး၊ သၚ်မဒှ်ဝဂ် ‘ဂကောံပါ်ဒကး’ဂှ် ဟဂပ်ဝ်သ္ပပဝါရဏာဟေၚ်ရ၊ ယဝ်သ္ပပဝါရဏာမ္ဂး၊ ဒးအာပတ်ဒုက္ကဋ်ရ။

ယွံခမဳတအ် ပ္ဍဲသာသနာဝွံ ပ္ဍဲတ္ၚဲပဝါရဏာ သၟိၚ်ဂမၠိုၚ် ရပ်ကေတ်ခမဳအိုတ်ရ ။ ပ ။ ကမၠတ်ဒမၠဂမၠိုၚ် ရပ်ကေတ်အိုတ်ရ။ သၟာသၟုၚ်လဗၚ်သုရာဂမၠိုၚ် ရပ်ကေတ်အိုတ်ရ။ ခမဳသၞဂမၠိုၚ် ရပ်ကေတ်အိုတ်ရ။ ခမဳဂမၠိုၚ် “ယွံတဳလပိုဉ်တအ် အာတ်ပါန်အခေါၚ်ရ၊ စဵုကဵုသ္ပပဝါရဏာ မၞးတအ်ညးဂမၠိုၚ် သြဝ်ဗလးကဵုခမဳဝွံ ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုခမဳသၞဂမၠိုၚ်ဂှ်ရ။ အတိုၚ်အာတ်ပါန်အခေါၚ် ရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး၊ ခမဳဂမၠိုၚ် “ယွံတဳလပိုဉ်တအ် အာတ်ပါန်အခေါၚ်ရ၊ စဵုကဵုခမဳဝွံ ပပဝါရဏာတုဲ မၞးတအ်ညးဂမၠိုၚ် သြဝ်ပဒတဴ ပ္ဍဲဌာန်မဗဗွဲ ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုခမဳသၞဂမၠိုၚ်ဂှ်ရ။ အတိုၚ်ဟီုသ္ဂး ရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး၊ ခမဳဂမၠိုၚ် “ယွံတဳလပိုဉ်တအ် အာတ်ပါန်အခေါၚ်ရ၊ စဵုကဵုသ္ပသံဃပဝါရဏာတုဲ မၞးတအ်ညးဂမၠိုၚ် သြဝ်ရၚ်တၠုၚ်ပတိတ် ခမဳဝွံမ္ၚးသိမ် ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုခမဳသၞဂမၠိုၚ်ဂှ်ရ။ အတိုၚ်ဟီုသ္ဂး ရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး၊ သၚ်မဒှ်ဝဂ် ‘ဂကောံပါ်ဒကး’ဂှ် ဟဂပ်ဝ်သ္ပပဝါရဏာဟေၚ်ရ၊ ယဝ်သ္ပပဝါရဏာမ္ဂး၊ ဒးအာပတ်ဒုက္ကဋ်ရ ရဴဝွံ (သ္ဂးရ)။