၁၁၇။ ကတိကဝတ်ဟွံဓရ်ကရာ

၂၀၅။ ပ္ဍဲကာလမွဲအခိၚ် ပ္ဍဲဍုၚ်သာရဝှ် “ပ္ဍဲအပ္ဍဲဒဂိုန် ဟဂပ်ဝ်သ္ပကဵုထပိုဲခမဳရ” ရဴဝွံ သၚ်စွံလဝ် ကတိကဝတ် မၞုံသဘဴရဴဝွံရ။ ကောန်စဴ ဝိသာခါမၞုံယၟုမိဂါရမာတာ ပြာပ်အာဇရေၚ်ခမဳဂမၠိုၚ်တုဲမ္ဂး အာတ်ဒဒှ်ထပိုဲခမဳရ။ ခမဳဂမၠိုၚ် “ယွံကောန်တၠ ‘ပ္ဍဲအပ္ဍဲဒဂိုန် ဟဂပ်ဝ်သ္ပကဵုထပိုဲခမဳရ’ ရဴဝွံ သၚ်စွံလဝ် ကတိကဝတ် မၞုံသဘဴရဴဝွံရ၊ ယွံကောန်တၠ စဵုကဵုခမဳဂမၠိုၚ် လိုက်ဝှ်သှ်ပဝါ သြဝ်လၟတ်မၚ်ဒၟံၚ်ညိကၠာ၊ လိုက်ဝှ်မ္ဂး “ယွံကောန်တၠ သြဝ်ကၠုၚ်ညိ လၟုဟ် သြဝ်သ္ပထပိုဲခမဳညိ” ရဴဝွံ ဟီုသ္ဂးကဵု ကောန်စဴ ဝိသာခါမၞုံယၟုမိဂါရမာတာအိုတ်ရ။ ကောန်စဴဝိသာခါဂှ် “ယွံတဳလပိုဉ်တအ် ယဝ်အဲသ္ပဒးထပိုဲခမဳမ္ဂး၊ အဲဍိက် မိပ်လဟိၚ်ဒၟံၚ်ရ၊ ယွံတဳလပိုဉ်တအ် ပ္ဍဲအခိၚ်လၟုဟ် အဲဍိက် ဟွံသ္ပထပိုဲခမဳရ” ရဴဝွံ ဟီုသ္ဂးရ။ ဝိသာခါမၞုံယၟုမိဂါရမာတာဂှ် “မုဟိုတ် တဳလပိုဉ်ဂမၠိုၚ် ‘ပ္ဍဲအပ္ဍဲဒဂိုန် ဟဂပ်ဝ်သ္ပကဵုထပိုဲခမဳရ’ ရဴဝွံ သၚ်စွံလဝ် ကတိကဝတ် မၞုံသဘဴရဴဝွံအိုတ်ရော? မုရဴပ္ဍဲအခိၚ်မွဲ ဟဂပ်ဝ်ဒ္ဂေတ်ဓရ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်ဝိသာခါမၞုံယၟုမိဂါရမာတာ မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် “ပ္ဍဲအပ္ဍဲဒဂိုန် ဟဂပ်ဝ်သ္ပကဵုထပိုဲခမဳရ” ရဴဝွံ ဟဂပ်ဝ်သ္ပကတိကဝတ် မၞုံသဘဴရဴဝွံရ၊ ကုခမဳမသ္ပဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။