၆၅။ ဓရ်မဟဂပ်ဝ်ဒ္ဂေတ်သ္ပပန်ပြကာ

၁၂၉။ ပ္ဍဲကာလမွဲအခိၚ် ခမဳဂမၠိုၚ် ပကဵုပယျၚ်ခမဳမွဲဇကုတုဲ သၟေဟ်စွံလဝ်မွဲဇကုဓဝ်တုဲမ္ဂး စ္ဍးအာအိုတ်ရ။ ခမဳဂှ် လက်ကရဴမှ ကၠုၚ်တဴညးမွဲဓဝ်မ္ဂး ပ္ဍဲအကြာဂၠံၚ်တရဴ ညာတ်ဒးသမ္ဘာတြေံတုဲ “လၟုဟ် တၠအဲ ပဒၟံၚ်ခမဳဟာ” ရဴဝွံ သမ္ဘာတြေံဂှ် သၟာန်တုဲ ဍာံပြရ၊ အဲပဒၟံၚ်ခမဳရ ရဴဝွံ ကလေၚ်ဟီုသ္ဂးမ္ဂး ဒ္ဂေတ်မေထုန်ဂှ် ဇြိုၚ်ကဵုကလိဂွံ ကုခမဳဂမၠိုၚ်ရ၊ ဩဝ်ကၠုၚ်ညိ၊ ဩဝ်သွိုန်ဗပိုန် ဒ္ဂေတ်မေထုန်ညိ ရဴဝွံ ဟီုသ္ဂးရ။ ခမဳဂှ် သွိုန်ဗပိုန်ဒ္ဂေတ်မေထုန် ကုဗြဴဂှ်တုဲ လအ်လမှဂွံအာရ။ ခမဳဂမၠိုၚ် “ယွံကောန်တၠ တၠအဲ မုဟိုတ် လအ်တဴဗၞတ်လလအ်ဝွံရော?” ရဴဝွံ သၟာန်သၟုက်အိုတ်ရ။

ပ္ဍဲအခိၚ်ဂှ် ခမဳဂှ် ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သ္ပကဵုပယျၚ်တုဲမ္ဂး တၞဟ်နကဵုသကအ်ပွံၚ်ကီု တၞဟ်နကဵုမဟီုလဴ မဟဂပ်ဝ်ဒ္ဂေတ်သ္ပဂမၠိုၚ်ပန်ပြကာကီုဂှ် ကဵုအခေါၚ်ရ။

ခမဳမဒှ်ပယျၚ်တုဲဂှ် ပ္ဍဲတိရစ္ဆာန်ၝောံလေဝ် ဟဂပ်ဝ်သွိုန်ဗပိုန် ဒ္ဂေတ်မေထုန်ရ၊ ခမဳမသွိုန်ဗပိုန် ဒ္ဂေတ်မေထုန်ဂှ် ခမဳ ဟွံသေၚ်ရ၊ တၞောဝ်ကျာ်ကောန်သၟိၚ်သာကျဝၚ် ဟွံသေၚ်ရ၊ ဗွဲဥပမာတုန် တြုံက္ဍိုပ်ပိုတ်အာတုဲဂှ် ၜိုန်ကလေၚ်ဗ္ဂပ်ဖျပ်ဒက်စုတ် ခန္ဓဇကုကေုာံက္ဍိုပ်ဂှ်လေဝ် သၟဟ်ညံၚ်ရဴဟွံထေက်ကဵု တၞဟ်နဂျိုၚ်လမျီုကီု တုပ်သၟဟ်သာ်ဝွံဟေၚ် ခမဳဂှ် သွိုန်ဗပိုန်ဒ္ဂေတ်မေထုန်မ္ဂး ခမဳ ဟွံသေၚ်ရ၊ တၞောဝ်ကျာ်ကောန်သၟိၚ်သာကျဝၚ် ဟွံသေၚ်ရ၊ ဒ္ဂေတ်မေထုန်ဂှ် စဵုကဵုလအိတ်လမျီု (လုကဴကာလဗၞတ်သိက္ခာပိုဒ်တန်တဴပ္ဍဲဇကု) တၠအဲ ဟဂပ်ဝ်ဒ္ဂေတ်သ္ပရ။

ခမဳမဒှ်ပယျၚ်တုဲဂှ် နကဵုဗွဝ်စိုတ်မမိက်ကၠတ် ဟဂပ်ဝ်ဂိုၚ်ကၠတ်ကေတ် ဂြပ်တၠညးဟွံကဵုရ၊ ဗွဲတွဵုမယုတ် သ္ပတမ်နူချောဲချာမွဲကရေက်တုဲ ဟဂပ်ဝ်ဂိုၚ်ကၠတ်ကေတ်ရ။ ယြဴခမဳမွဲ နကဵုဗွဝ်စိုတ် မမိက်ကၠတ် သီုတၠညးဟွံကဵုဂှ် ဂိုၚ်ကၠတ်ကေတ်မွဲမးကီု ဂြပ်မထေက်တန်မွဲမးကီု ဂြပ်မလောန်လတူမွဲမးကီုရ၊ ခမဳဂှ် ခမဳဟွံသေၚ်ရ၊ တၞောဝ်ကျာ်ကောန်သၟိၚ်သာကျဝၚ်ဟွံသေၚ်ရ။

ဗွဲဥပမာမ္ဂး တၞးဆုမဖျိုဟ်ပြဟ်စှ်ေနူတဝ်ဂှ် သၟဟ်ညံၚ်ရဴဟွံထေက်ကဵု တၞဟ်နကလေၚ်ဍိုပ်ဍဴ မွဲလှ်ေပၠန်ကီု တုပ်သၟဟ်သာ်ဝွံဟေၚ် ခမဳဂှ် နဗွဝ်စိုတ်မမိက်ကၠတ် သီုတၠညးဟွံကဵုဂှ် ဂိုၚ်ကၠတ်ကေတ် မွဲမးကီု ဂြပ်မထေက်ကဵုမွဲမးကီု ဂြပ်မလောန်လတူမွဲမးကီုမ္ဂး ခမဳဟွံသေၚ်ရ၊ တၞောဝ်ကျာ်ကောန်သၟိၚ်သာကျဝၚ် ဟွံသေၚ်ရ၊ ပွမကၠတ်ဂှ် စဵုကဵုလအိတ်လမျီု (လုကဴကာလဗၞတ်သိက္ခာပိုဒ် တန်တဴပ္ဍဲဇကု) တၠအဲ ဟဂပ်ဝ်ဒ္ဂေတ်သ္ပရ။

ခမဳမဒှ်ပယျၚ်တုဲဂှ် နကဵုစေတနာမမိက်ကဵုချိုတ် ‘မၞုံကဵုစေတနာဒှ်တုဲ’ ဟဂပ်ဝ်ပတုံဖျေံသတ် နူဇဳဝိတိန္ဒြဳရ၊ ဗွဲတွဵုမယုတ် သ္ပတမ်နူစၟဂြုန်, ခၟတ်အကၠေၚ်တုဲ ဟဂပ်ဝ်ပတုံဖျေံ နူဇဳဝိတိန္ဒြဳရ၊ ယြဴခမဳမွဲ မၞုံစေတနာမမိက်ကဵုချိုတ်ဒှ်တုဲ ဗွဲတွဵုမယုတ် သ္ပတမ်နူဂဥုဲဂဝ်ဂၞဴသရိုဟ်တုဲ ပတုံဖျေံညးမဒှ်ဇာတ်မၞိဟ် နူဇဳဝိတိန္ဒြဳမ္ဂး ခမဳဂှ် ခမဳဟွံသေၚ်ရ၊ တၞောဝ်ကျာ်ကောန်သၟိၚ်သာကျဝၚ် ဟွံသေၚ်ရ။

ဗွဲဥပမာမ္ဂး တၟံလးဇၞော် မဒးကးအာၜါလွးတုဲဂှ် သၟဟ်ညံၚ်ရဴကလေၚ်ဗ္ဂပ်ဖျပ်မွဲလှ်ေပၠန် ဟွံဂွံရကီု တုပ်သၟဟ်သာ်ဝွံဟေၚ်ခမဳဂှ် မၞုံကဵုစေတနာမမိက်ချိုတ်တုဲ ပတုံဖျေံဇကုညးမဒှ်ဇာတ်မၞိဟ်ဂှ် နူဇဳဝိတိန္ဒြဳမ္ဂး ခမဳဟွံသေၚ်ရ၊ တၞောဝ်ကျာ်ကောန်သၟိၚ်သာကျဝၚ်ဟွံသေၚ်ရ၊ ပွမဂစိုတ်လမျီုဂှ်စဵုကဵုလအိတ်လမျီု (လုကဴကာလဗၞတ်သိက္ခာပိုဒ် တန်တဴပ္ဍဲဇကု) တၠအဲဟဂပ်ဝ်ဒ္ဂေတ်သ္ပရ။

ခမဳမဒှ်ပယျၚ်တုဲဂှ် ဟဂပ်ဝ်ဟီုကြီု ဓရ် (ၛာန်မဂ်ဖိုလ်) မသၠုၚ်ပြဲလတူဓရ်ကုသလကမ္မပထစှ် မဒှ်ဂြပ်မၞိဟ်ဂမၠိုၚ်ရ၊ ဗွဲတွဵုမယုတ် “မိပ်လဟိၚ် ပ္ဍဲဌာန်လ္ၚုသ္ၚိတ်ဇြရ” ရဴဝွံ ဟဂပ်ဝ်ဟီုရ။ ယြဴခမဳမွဲ မၞုံကဵုပၟိက်ယုတ်သဝ်ပရေအ်ဒှ်တုဲ ပၟိက်ပရေအ်မဂပ်ဝ်ပ္ဍဵုပ္ဍဵုက်ရာန်သကိုတ်ဒှ်တုဲ ဟီုကြီုပတိုန်စ (ရဴဝွံမ္ဂးအဲကလိဂွံရ အဲတီရ) ဓရ်ၛာန်ကီု ဓရ်ဝိမောက္ခကီု သမာဓိကီု သမာပတ်ကီု မဂ်ကီု ဖိုလ်ကီု မသၠုၚ်ပြဲလောန်လတူဓရ်ကုသလကမ္မပထစှ် မဒှ်ဂြပ်မၞိဟ်ဂမၠိုၚ် မဟွံမွဲပြာကဋ် မဟွံဍာံစၟတ်မ္ဂး၊ ခမဳဂှ် ခမဳဟွံသေၚ်ရ၊ တၞောဝ်ကျာ်ကောန်သၟိၚ်သာကျဝၚ် ဟွံသေၚ်ရ။

ဗွဲဥပမာမ္ဂး တၞံတာကအ်ပိုတ်အာတုဲဂှ် သၟဟ်ညံၚ်ရဴဟွံထေက်ကဵု တၞဟ်နပွမကလေၚ်ကၠုတ်ဍိုပ်ဍဴမွဲလှ်ေပၠန်ကီု တုပ်သၟဟ်သာ်ဝွံဟေၚ် ခမဳဂှ် မၞုံကဵုပၟိက်ယုတ်သဝ် ပရေအ်ဒှ်တုဲ ပၟိက်ပရေအ် မဂပ်ဝ်ဍဵုဍိုက်ရာန်သကိုတ်ဒှ်တုဲ ဟီုကြီုပတိုန်စဓရ်ၛာန်မဂ်ဖိုဟ် မသၠုၚ်ပြဲလောန်လတူဓရ်ကုသလကမ္မပထစှ် မဒှ်ဂြပ်မၞိဟ်ဂမၠိုၚ် မဟွံမွဲပြာကဋ် မဟွံဍာံစၟတ်မ္ဂး၊ ခမဳ ဟွံသေၚ်ရ၊ တၞောဝ်ကျာ်ကောန်သၟိၚ်သာကျဝၚ် ဟွံသေၚ်ရ၊ ပွမဟီုကြီုပတိုန်စ ဓရ်ၛာန်မဂ်ဖိုလ် စဵုကဵုလအိတ်လမျီု (လုကဴကာလဗၞတ်သိက္ခာပိုဒ် တန်တဴပ္ဍဲဇကု) တၠအဲ ဟဂပ်ဝ်ဒ္ဂေတ်သ္ပရ ရဴဝွံ ဂပ်ဝ်ဟီုဒၠောံဗတောန်ရ။

ဓရ်မဟဂပ်ဝ်ဒ္ဂေတ်သ္ပပြကာတုဲရ။