၅၃။ ဝတ်တ္ထုညးပလီုပလာ်ခမဳဗြဴ

၁၁၅။ ပ္ဍဲကာလမွဲအခိၚ် ခမဳဂမၠိုၚ်မဂၠိုၚ်ဂၠၚ် နူဍုၚ်သာကေတ သွိုန်ဗပိုန်တဴ တရဴအဓာန်မဂၠိၚ်သ္ၚောဲ ဍုၚ်သာရဝှ်အိုတ်ရ၊ ပ္ဍဲအကြာဂၠံၚ်တရဴ ကမၠတ်ဒမၠဂမၠိုၚ် တိတ်ကၠုၚ်တုဲ ပၠံၚ်ၜးကေတ် ခမဳဗြဴလ္ၚဵုဂမၠိုၚ်လ္ၚဵုအိုတ်ရ၊ ပလီုပလာ်တ်ထောံ ခမဳဗြဴလ္ၚဵုဂမၠိုၚ်အိုတ်ရ။ နူဍုၚ်သာရဝှ် တြုံသကအ်သၟိၚ်ဂမၠိုၚ် တိတ်ကၠုၚ်တုဲ ရပ်ဂွံကမၠတ်ဒမၠလ္ၚဵုဂမၠိုၚ်အိုတ်ရ၊ ကမၠတ်ဒမၠလ္ၚဵုဂမၠိုၚ် ဂြိပ်ဒဴအိုတ်ရ။ ကမၠတ်ဒမၠမဂြိပ်ဒဴဂမၠိုၚ်ဂှ် သ္ပခမဳ ပ္ဍဲဇရေၚ်ခမဳဂမၠိုၚ်အိုတ်ရ၊ ကမၠတ်ဒမၠရပ်ဂွံဂမၠိုၚ် ရၚ်တၠုၚ်ဏာ တၞဟ်နဂစိုတ်အိုတ်ရ။ ကမၠတ်ဒမၠ မဂြိပ်ဒဴတုဲပဒၟံၚ်ခမဳဂမၠိုၚ်ဂှ် ညာတ်ဒးကမၠတ်ဒမၠဂမၠိုၚ် မရၚ်တၠုၚ်ဏာ တၞဟ်နဂစိုတ်ဂှ်တုဲ “ပိုဲညးဂမၠိုၚ် ဂြိပ်ဒဴထောံဂှ် ခိုဟ်သန်ရ၊ ယဝ်ရပ်ဂွံပိုဲညးဂမၠိုၚ်အိုတ်လေဝ် ပိုဲညးဂမၠိုၚ်လေဝ် တုပ်သၟဟ်သာ်ဝွံဟေၚ် ဒးဒုၚ်ဂစိုတ်အိုတ်ရ” ရဴဝွံ ဟီုသ္ဂးအိုတ်ရ။

ခမဳဂမၠိုၚ် “ယွံကောန်တၠတအ် မၞးတအ်ညးဂမၠိုၚ် သ္ပတဴမုကမၠောန်ပွမွဲအိုတ်ရော?” ရဴဝွံ သၟာန်အိုတ်ရ။ ပ္ဍဲအခိၚ်ဂှ် ခမဳကမၠတ်ဒမၠဂမၠိုၚ်ဂှ် ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ညးပလီုပလာ်ခမဳ ဗြဴဂှ် ဟွံဒှ်ခမဳပယျၚ်ရ၊ ဟဂပ်ဝ်သ္ပကဵုခမဳပယျၚ်ရ၊ သ္ပဒးကဵုခမဳပယျၚ်မ္ဂး သ္ဒးပြာမ်ပၠေၚ်ကၠေံ (သ္ဒးပလီုပလာ်ကၠေံအယောၚ်အလာ) ရ” ရဴဝွံ (သ္ဂးရ)။

ယွံခမဳတအ် ညးပါ်ဒကးသၚ်ဂှ် ဟွံဒှ်ခမဳပယျၚ်ရ၊ ဟဂပ်ဝ်သ္ပကဵုခမဳပယျၚ်ရ၊ သ္ပဒးကဵုခမဳပယျၚ်မ္ဂး သ္ဒးပြာမ်ပၠေၚ်ကၠေံရ ရဴဝွံ (သ္ဂးရ)။

ယွံခမဳတအ် ညးသ္ပညံၚ်ဆီကျာ်ဂွံပ္ဍူအာဂှ် ဟွံဒှ်ခမဳပယျၚ်ရ၊ ဟဂပ်ဝ်သ္ပကဵုခမဳပယျၚ်ရ၊ သ္ဒးကဵုခမဳပယျၚ်မ္ဂး သ္ဒးပြာမ်ပၠေၚ်ကၠေံရ ရဴဝွံ (သ္ဂးရ)။ (၈—၉—၁၀)