၃၉။ ဝတ္ထုဒိုဟ်က္ဍန်ဂြက်

၁၀၂။ ပ္ဍဲကာလမွဲအခိၚ် တဳလမၞုံပိုဉ်ကျာ်တြဲ လုကဴဂိတုဗြဲ လုကဴဂိတုမုဟ်ကျာ လုကဴဂိတုက္ညၚ် သ္ပဒတဴဒမံၚ် ပ္ဍဲဍုၚ်ရာဇဂြိုဟ်ဂှ်ဟေၚ်ရ။ မၞိဟ်ဂမၠိုၚ် “ကုခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဂှ် ဒိုဟ်ဂမၠိုၚ် က္ဍန်ဂြက်အိုတ်ရသွံ၊ ဒှ်ဒမၠုအိုတ်ရသွံ၊ ကုခမဳဂမၠိုၚ်ဝွံ ဒိုဟ်ဂမၠိုၚ် ဟွံရုမ်ဂပ်အိုတ်ရသွံ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် အခိၚ်မဂွံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ “ယွံအာနန္ဒ ဩဝ်အာညိ၊ ဂိုၚ်ကေတ်ပသဲတ္ၚံက် ‘ကောန်သကအ်’ တုဲ ကုခမဳဂမၠိုၚ်မၞုံဇၟာပ်ပြဝိုဏ်ဂှ် ယွံကောန်တၠတအ် တဳလမၞုံပိုဉ်ကျာ်တြဲ မိက်က္ညဂ္ၚေၚ်အာဒေသစာရိတ် ဇနပိုဒ်ဒက္ခိဏဂိရိရ၊ တဳလပိုဉ်မမိက်ဗက်အာဂှ် ဩဝ်ဗက်အာညိ” ရဴဝွံ ဩဝ်ဟီုညိဂှ် သ္ဂးကဵုတဳလပိုဉ်အာနန္ဒရ။

“ခိုဟ်သန်ရ ယွံကျာ်မၞုံပိုဉ်” ရဴဝွံ တဳလပိုဉ်အာနန္ဒ ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ဂိုၚ်ကေတ်ပသဲတ္ၚံက် ‘ကောန်ကသအ်’ တုဲ “ယွံကောန်တၠတအ် တဳလမၞုံပိုဉ်ကျာ်တြဲ မိက်က္ညဂ္ၚေၚ်အာဒေသစာရိတ် ဇနပိုဒ်ဒက္ခိဏာဂိရိရ၊ တဳလပိုဉ်မမိက်ဗအာအာဂှ် ဩဝ်ဗက်အာညိ” ရဴဝွံ ဟီုသ္ဂးကဵု ခမဳဂမၠိုၚ်မၞုံဇၟာပ်ပြဝိုဏ်ရ။

ခမဳဂမၠိုၚ် “ယွံကောန်တၠအာနန္ဒ တဳလမၞုံပိုဉ်ကျာ်တြဲဂှ် ပညပ်လဝ် လုကဴစှ်ဝသ်ဂမၠိုၚ် တၞဟ်နပွမပဒတဴ ကေုာံနိဿဲဗ္ဒာဲ ‘နိဿယ’ ခမဳမပေၚ်စှ်ဝသ်တုဲဂှ် တၞဟ်နပွမကဵုနိဿယရ၊ ပိုဲညးဂမၠိုၚ် ဗက်အာဇနပိုဒ်ဒက္ခိဏဂိရိမ္ဂး၊ ကြက်သ္ဒးဂိုၚ်ကေတ် နိဿယရ၊ ဂိုၚ်ကေတ်သာ်ဂှ်လေဝ် ကြက်ဂွံပဒတဴ ဗၞတ်မွဲခဏဍောတ်ရ၊ ကလေၚ်စဴကၠုၚ်မွဲလှ်ေပၠန်မ္ဂး ကြက်ဒးကလေၚ်ဂိုၚ်ကေတ်နိဿယပၠန်ရ။ အ္စာဥပဇ္ၛာယ်ပိုဲဍိက်တအ်ညးဂမၠိုၚ် ယဝ်ဗက်အာမ္ဂး ပိုဲဍိက်တအ်ညးဂမၠိုၚ်လေဝ် ကြက်ဗက်အာအိုတ်ရ၊ အ္စာဥပဇ္ၛာယ်ပိုဲဍိက်တအ်ညးဂမၠိုၚ် ယဝ်ဟွံဗက်အာမ္ဂး ပိုဲဍိက်တအ်ညးဂမၠိုၚ်လေဝ် ကြက်ဟွံဗက်အာအိုတ်ရ၊ ယွံကောန်တၠအာနန္ဒ ဒဒှ်စိုတ်သာသပအ်ဟေၚ် ကြက်ဒှ်ပြာကဋ် ကုပိုဲဍိက်တအ်ညးဂမၠိုၚ်ရ” ရဴဝွံ ဟီုသ္ဂးအိုတ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ် မၞုံလၟိဟ်မအောန်ဟေၚ် က္ညဂ္ၚေၚ်အာဒေသစာရိတ်ဇနပိုဒ်ဒက္ခိဏာဂိရိရ။