၃၇။ ဝတ္ထုယဲဇဳဆာံ (ယဲရုဲဍုန်)

၁၀၀။ ပ္ဍဲကာလမွဲအခိၚ် ဂကူမွဲဂကူဂှ် ချိုတ်အာ နကဵုယဲ ‘အဟိဝါတက’ ယဲဇဳဆာံ (ယဲရုဲဍုန်) ရ၊ ပ္ဍဲဂကူဂှ် ကောန်ကဵုအပါညးၜါတၠဂမၠိုၚ်ဟေၚ် သှ်ေသၟေဟ်အိုတ်ရ၊ ညးဂမၠိုၚ်ဂှ် သ္ပခမဳ ပ္ဍဲဇရေၚ်ခမဳဂမၠိုၚ်တုဲ ဂေတ်ဂ္ၚေၚ်ပိဏ္ဍပါတ်မွဲစွံအိုတ်ရ။

ပ္ဍဲအခိၚ်ဂှ် လံၚ်ကဵုပိဏ္ဍပါတ် ကုအပါဂှ်မ္ဂး ကောန်ၚာ်ဂှ် ဂြိပ်ကၠုၚ်တုဲ “ယွံအပါအံက် ကုအဲလေဝ် ဩဝ်ကဵုညိ၊ ယွံအပါအံက် ကုအဲလေဝ် ဩဝ်ကဵုညိ” ရဴဝွံ ဟီုသ္ဂးရ။ မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ဒ္ဂေတ်တဴ ဒ္ဂေတ်မဟွံပြဲအိုတ်ရ။ ကောန်ၚာ်ဝွံတုန် ၜံၚ်သၠးတိတ် နူခမဳဗြဴဂမၠိုၚ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။

ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ဟဂပ်ဝ်သ္ပကဵုထိပိုဲ ကောန်ၚာ်မဟွံပေၚ်အာယုက်စှ်သုန်သၞာံရ၊ ကုခမဳမသ္ပကဵုထပိုဲဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။

ပ္ဍဲအခိၚ်ဂှ် ဂကူ (ဒကာ) ကၠောန်ၜိုတ်ဥပကာ တဳလပိုဉ်အာနန္ဒ မၞုံကဵုဓရ်သဒ္ဓါတုဲ မလျုၚ်ဇြုၚ်သ္ဍိုက်ဂှ် ချိုတ်အာ နကဵုယဲ ‘အဟိဝါတက’ ယဲဇဳဆာံ (ယဲရုဲဍုန်) မ္ဂး ကောန်ၚာ်ဂမၠိုၚ်ၜါတၠဟေၚ် သှ်ေသၟေဟ်ဒၟံၚ်အိုတ်ရ၊ ကောန်ၚာ်ဂမၠိုၚ်ဂှ် ဗွဲဒ္ဂေတ်လ္ၚတ်အလိုက်ကိုပ်ကၠာ အခိၚ်မညာတ်ခမဳဂမၠိုၚ်ဂှ် ဂြိပ်ကၠုၚ်မ္ဂး ခမဳဂမၠိုၚ် ရာန်သကုိတ် ‘ပရာန်လဟုက်’ အိုတ်ရ၊ ကောန်ၚာ်ဂမၠိုၚ်ဂှ် ခမဳဂမၠိုၚ် ပရာန်ဟုက်မ္ဂး လရိုအ်ယာံအိုတ်ရ။ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲဂှ် ‘ဟဂပ်ဝ်ပကဵုထပိုဲ ကောန်ၚာ်မဟွံပေၚ်အာယုက်စှ်သုန်သၞာံရ’ ရဴဝွံ ပညပ်လဝ်ရ၊ ကောန်ၚာ်ဂမၠိုၚ်ဝွံလေဝ် ဟွံပေၚ်အာယုက်စှ်သုန်သၞာံအိုတ်ဏီရ၊ နဟိုတ်သာ်လဵု ကောန်ၚာ်ဂမၠိုၚ်ဝွံ ဟဂွံလီုလာ်အိုတ်ဂှ်ရော?” ရဴဝွံ ကသပ်ဒှ် ကုတဳလပိုဉ်အာနန္ဒရ။

ပ္ဍဲအခိၚ်ဂှ် တဳလပိုဉ်အာနန္ဒ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံအာနန္ဒ ကောန်ဂမၠိုၚ်ဂှ် တၞဟ်နဘပဠကလိုက်ခ္ဍာ်ဂမၠိုၚ် သၟဟ်စောံအိုတ်ဟာ ရဴဝွံ (သၟာန်ရ)။ ယွံတဳလမၞုံပိုဉ် သၟဟ်စောံအိုတ်ရ ရဴတွံ (ဂရၚ်ပတီရ)။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ၜိုန်ဟွံပေၚ်အာယုက်စှ်သုန်သၞာံလေဝ် ကောန်ၚာ်မသၟဟ်စောံ တၞဟ်နဘပဠကလိုက်ခ္ဍာ်ဂှ် ကဵုအခေါၚ်တၞဟ်နပကဵုထပိုဲရ” ရဴဝွံ သ္ဂးကဵုခမဳဂမၠိုၚ်ရ။