၃၀။ ဝတ္ထုကမၠတ်မလလောၚ်တြးလဝ်

၉၃။ ပ္ဍဲကာလမွဲအခိၚ် တြုံဂှ် သ္ပပွမကမၠတ်တုဲ ဂြိပ်အာတုဲမ္ဂး သ္ပခမဳ ပ္ဍဲဇရေၚ်ခမဳဂမၠိုၚ်ရ၊ ကမၠတ်ဂှ်လေဝ် “ပ္ဍဲဌာန်ညာတ်ဂှ် ဂစိုတ်ထောံညိ” ရဴဝွံ လလောၚ်တြးလဝ် ပ္ဍဲအပ္ဍဲနန်သၟိၚ်ဇၞော်ရ။ မၞိဟ်ဂမၠိုၚ် ညာတ်ဒးအိုတ်မ္ဂး “ခမဳဝွံတုန် ကမၠတ်မဂပ်ဝ်လလောၚ်တြးရ၊ ပ္ဍဲလၟုဟ် ပိုဲညးဂမၠိုၚ် ရပ်ခမဳဂှ်အိုတ်စိုအ်” ရဴဝွံ ဟီုသ္ဂးအိုတ်ရ။

ညးလ္ၚဵုဂမၠိုၚ်ဂှ် ယွံနာဲတအ် လ္ပဟီုရဴဝွံအိုတ်ညိ၊ သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးဂှ် “ယြဴညးဂမၠိုၚ် သ္ပထပိုဲခမဳ ပ္ဍဲဇရေၚ်ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်အိုတ်ရ၊ ကုညးဂမၠိုၚ်ဂှ် ဟဂပ်ဝ်ကလိဂွံ တၞဟ်နပွမသ္ပ (ဒုဟ်) မမိက်ကဵုမွဲမွဲရ၊ ဂပ်ဝ်တွံလဝ်ဓရ်ဗွဲမ္ဒးရးတုဲရ၊ တၞဟ်နသ္ပကၠေံလအိတ်ဒဒိုခ်ဝဋ် ဩဝ်ကဵုဒ္ဂေတ်လ္ၚတ် ဒ္ဂေတ်မပြဲ ဗွဲမ္ဒးရးအိုတ်ညိ ရဴဝွံ ကဵုလဝ်အခေါၚ်ရ” ရဴဝွံ သ္ဂးအိုတ်ရ။

မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ဒှ်ဒၟံၚ်မသက်ကုဘဲအိုတ်ရ၊ ကုညးဂမၠိုၚ်ဝွံ ဟဂပ်ဝ်ကလိဂွံ တၞဟ်နပွမသ္ပ (ဒုဟ်) မမိက်ကဵုမွဲမွဲရ၊ မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် သ္ပကဵုခမဳ ကမၠတ်မဂပ်ဝ်လလောၚ်တြးလဝ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ဟဂပ်ဝ်သ္ပကဵုထပိုဲခမဳ ကမၠတ်မဂပ်ဝ်လလောၚ်တြးလဝ်ရ၊ ယြဴခမဳမွဲ သ္ပကဵုထပိုဲခမဳမ္ဂး၊ ကုခမဳဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။