၂၅။ ပရူညးကေၚ်ဒှ်တဳ
၈၆။ ပ္ဍဲကာလမွဲအခိၚ် ပြဘာဇ်ပသုရ ညးမကေၚ်ဒှ်တဳဂှ် အ္စာဥပဇ္ၛာယ် ဟီုဒၠောံဗတောန် ဗဗွဲကဵုဓရ်မ္ဂး ပတိုန်ဝါဒ ကုအ္စာဥပဇ္ၛာယ်တုဲ ပြံၚ်အာဗော်တဳဂှ်ဟေၚ်၇၊ ပြဘာဇ်ဂှ်ကလေၚ်ကၠုၚ် မွဲလှ်ေပၠန်တုဲ အာတ်ခမဳဂမၠိုၚ် ဒဒှ်ခမဳပယျၚ်ရ။ ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ညးမကေၚ်ဒှ်တဳဂှ် အ္စာဥပဇ္ၛာယ် ဟီုဒၠောံဗတောန် ဗဗွဲကဵုဓရ်မ္ဂး ပတိုန်ဝါဒ ကုအ္စာဥပဇ္ၛာယ်တုဲ ပြံၚ်အာဗော်တဳဂှ်ဟေၚ်ရ၊ ညးဂှ် ကလေၚ်ကၠုၚ်မွဲလှ်ေပၠန်မ္ဂး ဟဂပ်ဝ်ပကဵုခမဳပယျၚ်ရ။
ယွံခမဳတအ် ညးမကေၚ်ဒှ်တဳ မဒှ်မသအာၚ် (နူပသုရ) လေဝ် မိက်ကလိဂွံဒဒှ်ထပိုဲခမဳ ပ္ဍဲ ‘ဓမ္မဝိနယ’ သာသနာဝွံမ္ဂး၊ လုကဴပန်ဂိတုဂမၠိုၚ် ဒးကဵုတဴ ပွမပဒတဴပြဝး ကုညးဂှ်ရ။ ယွံခမဳတအ် ရဴဝွံ သ္ဒးကဵုရ၊ ဗွဲကိုပ်ကၠာ ကဵုကးပါဲကၠေံ သော်က္ဍိုပ်သော်သၟိပ်တုဲမ္ဂး ကဵုဗိုက်လတက်ယာတ်ဖျောန် ဍာ်လွံက်ဂမၠိုၚ်တုဲ ကဵုလ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပါဲမွဲလပါ်တုဲမ္ဂး ကဵုလ္ၚောဝ်ဂၠးဇိုၚ် ခမဳဂမၠိုၚ်တုဲ သီုမကဵုဂဇအ်ဒၟံၚ်လံက်ဂဇုန် ကဵုပၚ်ပတိုန်ခၠအ်သၟိပ်တဲတုဲမ္ဂး “ရဴဝွံ ဩဝ်သ္ဂးညိ” ရဴဝွံ ဒးဟီုရ။
“ပြာပ်ခသ္ပစ္ၜုဲစ္ၜော်သကအ်ဗ္ဒကဵုကျာ်တြဲရ၊ ပြာပ်ခသ္ပစ္ၜုဲစ္ၜော်သကအ်ဗ္ဒကဵုဓရ်ရ၊ ပြာပ်ခသ္ပစ္ၜုဲစ္ၜော်ဗ္ဒကဵုသၚ်ရ။ မရနုက်ကဵုၜါဝါလေဝ် ပြာပ်ခသ္ပစ္ၜုဲစ္ၜော်သကအ်ဗ္ဒကဵုကျာ်တြဲရ၊ မရနုက်ကဵုၜါဝါလေဝ် ပြာပ်ခသ္ပစ္ၜုဲစ္ၜော်သကအ်ဗ္ဒကဵုဓရ်ရ၊ မရနုက်ကဵုၜါဝါလေဝ် ပြာပ်ခသ္ပစ္ၜုဲစ္ၜော်ဗ္ဒကဵုသၚ်ရ။ မရနုက်ကဵုပိဝါလေဝ် ပြာပ်ခသ္ပစ္ၜုဲစ္ၜော်သကအ်ဗ္ဒကဵုကျာ်တြဲရ၊ မရနုက်ကဵုပိဝါလေဝ် ပြာပ်ခသ္ပစ္ၜုဲစ္ၜော်သကအ်ဗ္ဒကဵုဓရ်ရ၊ မရနုက်ကဵုပိဝါလေဝ် ပြာပ်ခသ္ပစ္ၜုဲစ္ၜော်ဗ္ဒကဵုသၚ်ရ” ရဴဝွံ (ဩဝ်သ္ဂးညိဂှ် ဒးဟီုရ)။
ညးမကေၚ်ဒှ်တဳဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပါဲမွဲလပါ်တုဲမ္ဂး လ္ၚောဝ်ဂၠးဇိုၚ် ခမဳဂမၠိုၚ်တုဲ သီုမဂဇအ်လံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး—
“ယွံတဳလပိုဉ်တအ် အဲဍိက်မကေၚ်ဒှ်တဳဂှ် မိက်ကလိဂွံဒဒှ်ခမဳပယျၚ် ပ္ဍဲသာသနာဝွံရ၊ ယွံတဳလပိုဉ်တအ် အဲဍိက်ဂှ် အာတ်သၚ် ပွမပဒတဴပြဝး လုကဴပန်ဂိတုဂမၠိုၚ်ရ” ရဴဝွံ သ္ဒးဂရၚ်ပတီရ။ မရနုက်ကဵုၜါဝါလေဝ် သ္ဒးအာတ်အခေါၚ်ရ၊ မရနုက်ကဵုပိဝါလေဝ် သ္ဒးအာတ်အခေါၚ်ရ။ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ညးမကေၚ်ဒှ်တဳမၞုံယၟုဝွံ မိက်ကလိဂွံဒဒှ်ခမဳပယျၚ် ပ္ဍဲသာသနာဝွံရ၊ ညးဂှ် အာတ်အခေါၚ် သၚ် ပွမပဒတဴပြဝး လုကဴပန်ဂိတုဂမၠိုၚ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ကဵုတဴပွမပဒတဴပြဝး လုကဴပန်ဂိတုဂမၠိုၚ် ကုညးမကေၚ်ဒှ်တဳ မၞုံယၟုဝွံရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်က္လၚ်ပၚ်မှိၚ် (ဂလာန်) အဲဍိက်ညိ၊ညးမကေၚ်ဒှ်တဳ မၞုံယၟုဝွံ မိက်ကလိဂွံဒဒှ်ခမဳပယျၚ် ပ္ဍဲသာသနာဝွံရ၊ ညးဂှ် အာတ်အခေါၚ် သၚ် ပွမပဒတဴပြဝး လုကဴပန်ဂိတုဂမၠိုၚ်ရ၊ သၚ် က၆ုတဴပွမပဒတဴပြဝး လုကဴပန်ဂိတုဂမၠိုၚ် ကုညးမကေၚ်ဒှ်တဳ မၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမကဵုတဴ ပွမပဒတဴပြဝး လုကဴပန်ဂိတုဂမၠိုၚ် ကုညးမကေၚ်ဒှ်တဳမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်ကဵုတဴပွမပဒတဴပြဝး လုကဴပန်ဂိတုဂမၠိုၚ် ကုညးမကေၚ်ဒှ်တဳ မၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
၈၇။ ယွံခမဳတအ် ဒ္ဂေတ်တဴရဴဝွံမ္ဂး ညးမကေၚ်ဒှ်တဳဂှ် ဒှ်ကဵုသၚ် (သ္ဍိုက်မၠိုက်) ရ။ ဟွံဒ္ဂေတ်တဴ ရဴဝွံမ္ဂး ဟွံဒှ်ကဵုသၚ် (သ္ဍိုက်မၠိုက်) ရ။ ယွံခမဳတအ် မုရဴသာ်လဵု ညးမကေၚ်ဒှ်တဳဂှ် ဟွံဒှ်ကဵုသၚ် (သ္ဍိုက်မၠိုက်) ရော? ယွံခမဳတအ် ပ္ဍဲသာသနာဝွံ ညးမကေၚ်ဒှ်တဳဂှ် ဗွဲမပြဟ်လောန် လုပ်အာအပ္ဍဲကွာန်ရ၊ တ္ၚဲသၠုၚ်လောန်မှ ကလေၚ်စဴကၠုၚ်ဘာရ။ ယွံခမဳတအ် ရဴဝွံဟေၚ် ညးမကေၚ်ဒှ်တဳဂှ် ဟွံဒှ်ကဵုသၚ် (သ္ဍိုက်မၠိုက်) ရ။
ယွံခမဳတအ် သအာၚ်နူဂှ်ပၠန်လေဝ် ညးမကေၚ်ဒှ်တဳဂှ် မၞုံကဵုအရာဂေတ်ဂ္ၚေၚ်မတွံဂး ဗြဴစရာဲဍုၚ် ‘ဆက်ဆောံကဵုဗြဴစရာဲဍုၚ်’ ရ၊ မၞုံကဵုအရာဂေတ်ဂ္ၚေၚ် မတွံဂးဗြဴကၟာဲ ‘ဆက်ဆောံကဵုဗြဴကၟာဲ’ ရ၊ မၞုံကဵုအရာဂေတ်ဂ္ၚေၚ် မတွံဂးဝုတ်ဇၞော် ‘ဆက်ဆောံကဵုဝုတ်ဇၞော်’ ရ၊ မၞုံကဵုအရာဂေတ်ဂ္ၚေၚ်မတွံဂး ခမၞုဲ ‘ဆက်ဆောံကဵုခမၞုဲ’ ရ၊ မၞုံကဵုအရာဂေတ်ဂ္ၚေၚ်မတွံဂး ခမဳဗြဴ ‘ဆက်ဆောံကဵုခမဳဗြဴ’ ရ။ ယွံခမဳတအ် ရဴဝွံလေဝ် ညးမကေၚ်ဒှ်တဳဂှ် ဟွံဒှ်ကဵုသၚ် (သ္ဍိုက်မၠိုက်) ရ။
ယွံခမဳတအ် သအာၚ်နူဂှ်ပၠန်လေဝ် ညးမကေၚ်ဒှ်တဳဂှ် ပ္ဍဲကမၠောန်ကေၚ်ကာ ထေက်ကဵုဒးသ္ပဇၞော်သၟတ်ဂမၠိုၚ် သဟဓရ်ဂမၠိုၚ်ဂှ် ဟွံဆိုက်ဗ္ဒက်ရ၊ လၞုဟ်လၞန်ရ၊ ဟွံမွဲကဵုပွမဍိုက်ပေၚ်တဴကေုာံပညာမဒှ်ဟိုတ်စိုပ်ဒတုဲကဵု ပ္ဍဲကမၠောန်ကေၚ်ကာဂမၠိုၚ်ရ၊ ဟွံသၟဟ်ရထ တၞဟ်နသ္ပရ၊ ဟွံသၟဟ်ရထ တၞဟ်နစဳရေၚ်ရ။ ယွံခမဳတအ် ရဴဝွံလေဝ် ညးမကေၚ်ဒှ်တဳဂှ် ဟွံဒှ်ကဵုသၚ် (သ္ဍိုက်မၠိုက်) ရ။
ယွံခမဳတအ် သအာၚ်နူဂှ်ပၠန်လေဝ် ညးမကေၚ်ဒှ်တဳဂှ် ဟွံမွဲကဵုပၟိက်ဆန္ဒ မကေတ်သကာ ပ္ဍဲပွမကတ်ဗတောန် ပွမသၟာန်ဂၠိုၚ်ဂၠိုၚ်ကဵုဝါ သဳလမပြဲလောန် စိုတ်မပြဲလောန် ပညာမပြဲလောန်ရ။ ယွံခမဳတအ် ရဴဝွံလေဝ် ညးမကေၚ်ဒှ်တဳဂှ် ဟွံဒှ်ကဵုသၚ် (သ္ဍိုက်မၠိုက်) ရ။
ယွံခမဳတအ် သအာၚ်နူဂှ်ပၠန် ညးမကေၚ်ဒှ်တဳဂှ် ယြဴနူဘာတဳ အ္စာမွဲ ပြံၚ်ကၠုၚ်ရ၊ ဟီုသ္ဂးဂလာန်မသက္ကုဂုဏ် ဂလာန်ဂရိုဟ်အ္စာဂှ်ကီု ကွေတ်အ္စာဂှ်ကီု သဘဴသ္ဍိုက်မၠိုက်ကြိုက်စိုတ်အ္စာဂှ်ကီု ပွမသ္ဍိုက်မၠိုက်ဒးဂၞပ်အ္စာဂှ်ကီု တၚ်ရန်တၟံအ္စာဂှ်ကီုမ္ဂး ထေဲပၞောတ်ရ၊ ဟွံမိပ်စိုတ်ရ၊ မၞုံကဵုစိုတ်မဟွံသ္ဍိုက်မၠိုက်ရ။ ဟီုသ္ဂးဂလာန်မသက္ကုဂုဏ် ဂလာန်ဂရိုဟ်ကျာ်ကီု, ဓရ်ကီု, သၚ်ကီုမ္ဂး သ္ဍိုက်မၠိုက်ရ၊ မိပ်စိုတ်ရ၊ မၞုံကဵုစိုတ်မသ္ဍိုက်မၠိုက်ရ။ ယြဴနူဘာတဳ အ္စာမွဲလေဝ် ပြံၚ်ကၠုၚ်ရ၊ ဟီုသ္ဂးဂလာန်ဂုဏ် ဂလာန်ထိုၚ်သးအ္စာဂှ်ကီု ကွေတ်အ္စာဂှ်ကီု သဘဴသ္ဍိုက်မၠိုက်ကြိုက်စိုတ်အ္စာဂှ်ကီု ပွမသ္ဍိုက်မၠိုက် ဒးဂၞပ်အ္စာဂှ်ကီု တၚ်ရန်တၟံအ္စာဂှ်ကီုမ္ဂး သ္ဍိုက်မၠိုက်ရ၊ မိပ်စိုတ်ရ၊ မၞုံကဵုစိုတ် မသ္ဍိုက်မၠိုက်ရ။ ဟီုသ္ဂးဂုဏ်ကျာ်ကီု, ဓရ်ကီု, သၚ်ကီုမ္ဂး ထေဲပၞောတ်ရ၊ ဟွံမိပ်စိုတ်ရ၊ မၞုံကဵုစိုတ် မဟွံသ္ဍိုက်မၠိုက်ရ။ ယွံခမဳတအ် ဣဝွံတုန် လက္ချဏ်ဟိုတ်ဂွံစၟတ်သမ္တီ ပ္ဍဲပွမဟွံကဵုသၚ် (သ္ဍိုက်မၠိုက်) ညးမကေၚ်ဒှ်တဳရောၚ်။ ယွံခမဳတအ် ရဴဝွံဟေၚ် ညးမကေၚ်ဒှ်တဳဂှ် ဟွံဒှ်ကဵုသၚ် (သ္ဍိုက်မၠိုက်) ရ။ ယွံခမဳတအ် ရဴဝွံ ညးမကေၚ်ဒှ်တဳ မတွံလေပ်ကဵုသၚ်သ္ဍိုက်မၠိုက်ဂှ် ကၠုၚ်မ္ဂး ဟဂပ်ဝ်ပကဵုခမဳပယျၚ်ရ။
ယွံခမဳတအ် မုရဴသာ်လဵု ညးမကေၚ်ဒှ်တဳဂှ် ဒှ်ကဵုသၚ် (သ္ဍိုက်မၠိုက်) ရော? ယွံခမဳတအ် ပ္ဍဲသာသနာဝွံ ညးမကေၚ်ဒှ်တဳဂှ် ဗွဲဟွံပြဟ်လောန် လုပ်အာအပ္ဍဲကွာန်ရ၊ ကၠာတ္ၚဲသၠုၚ်လောန် ကလေၚ်စဴကၠုၚ်ဘာရ။ ယွံခမဳတအ် ရဴဝွံလေဝ် ညးမကေၚ်ဒှ်တဳဂှ် ဒှ်ကဵုသၚ် (သ္ဍိုက်မၠိုက်) ရ။
ယွံခမဳတအ် သအာၚ်နူဂှ်ပၠန်လေဝ် ညးမကေၚ်ဒှ်တဳဂှ် ဟွံမွဲကဵုအရာဂေတ်ဂ္ဂေၚ်မတွံဂး ဗြဴစရာဍုၚ် ‘ဟွံဆက်ဆောံကဵုဗြဴစရာဲဍုၚ်’ ရ၊ ဟွံမွဲကဵုအရာဂေတ်ဂ္ၚေၚ်မတွံဂး ဗြဴကၟာဲ ‘ဟွံဆက်ဆောံကဵုဗြဴကၟာဲ’ ရ၊ ဟွံမွဲကဵုအရာဂေတ်ဂ္ၚေၚ်မတွံဂး ဝုတ်ဇၞော် ‘ဟွံဆက်ဆောံကဵုဝုတ်ဇၞော်’ ရ၊ ဟွံမွဲကဵုအရာဂေတ်ဂ္ၚေၚ်မတွံဂး ခမၞုဲ ‘ဟွံဆက်ဆောံကဵုခမၞုဲ’ ရ၊ ဟွံမွဲကဵုအရာဂေတ်ဂ္ၚေၚ်မတွံဂး ခမဳဗြဴ ‘ဟွံဆက်ဆောံကဵုခမဳဗြဴ’ ရ။ ယွံခမဳတအ် ရဴဝွံလေဝ် ညးမကေၚ်ဒှ်တဳဂှ် ဒှ်ကဵုသၚ် (သ္ဍိုက်မၠိုက်) ရ။
ယွံခမဳတအ် သအာၚ်နူဂှ်ပၠန်လေဝ် ညးမကေၚ်ဒှ်တဳဂှ် ပ္ဍဲကမၠောန်ကေၚ်ကာ ထေက်ကဵုဒးသ္ပဇၞော်သၟတ်ဂမၠိုၚ် သဟဓရ်ဂမၠိုၚ်ဂှ် ဆိုက်ဗ္ဒက်ရ၊ လၞုဟ်လၞန်ရ၊ မၞုံကဵုပွမဍိုက်ပေၚ်တဴကေုာံပညာမဒှ်ဟိုတ်စိုပ်ဒတုဲကဵု ပ္ဍဲကမၠောန်ကေၚ်ကာဂမၠိုၚ်ရ၊ သၟဟ်ရထ တၞဟ်နသ္ပရ၊ သၟဟ်ရထ တၞဟ်နစဳရေၚ်ရ။ ယွံခမဳတအ် ရဴဝွံလေဝ် ညးမကေၚ်ဒှ်တဳဂှ် ဒှ်ကဵုသၚ် (သ္ဍိုက်မၠိုက်) ရ။
ယွံခမဳတအ် သအာၚ်နူဂှ်ပၠန်လေဝ် ညးမကေၚ်ဒှ်တဳဂှ် မၞုံကဵုပၟိက်ဆန္ဒ မကေက်သကာ ပ္ဍဲပွမကတ်ဗတောန် ပွမသၟာန်ဂၠိုၚ်ဂၠိုၚ်ကဵုဝါ သဳလမပြဲလောန် စိုတ်မပြဲလောန် ပညာမပြဲလောန်ရ။ ယွံခမဳတအ် ရဴဝွံလေဝ် ညးမကေၚ်ဒှ်တဳဂှ် ဒှ်ကဵုသၚ် (သ္ဍိုက်မၠိုက်) ရ။
ယွံခမဳတအ် သအာၚ်နူဂှ်ပၠန်လေဝ် ညးမကေၚ်ဒှ်တဳဂှ် ယြဴနူဘာတဳ အ္စာမွဲ ပြံၚ်ကၠုၚ်ရ၊ ဟီုသ္ဂးဂလာန်မသက္ကုဂုဏ် ဂလာန်ဂရိုဟ်အ္စာဂှ်ကီု ကွေတ်အ္စာဂှ်ကီု သဘဴသ္ဍိုက်မၠိုက်ကြိုက်စိုတ်အ္စာဂှ်ကီု ပွမသ္ဍိုက်မၠိုက်ဒးဂၞပ်အ္စာဂှ်ကီု တၚ်ရန်တၟံအ္စာဂှ်ကီုမ္ဂး သ္ဍိုက်မၠိုက်ရ၊ မိပ်စိုတ်ရ၊ မၞုံကဵုစိုတ်မသ္ဍိုက်မၠိုက်ရ။ ဟီုသ္ဂးဂလာန်မသက္ကုဂုဏ် ဂလာန်ဂရိုဟ် ကျာ်ကီု, ဓရ်ကီု, သၚ်ကီုမ္ဂး ထေဲပၞောတ်ရ၊ ဟွံမိပ်စိုတ်ရ၊ မၞုံကဵုစိုတ်မဟွံသ္ဍိုက်မၠိုက်ရ။ ယြဴနူဘာတဳ အ္စာမွဲလေဝ် ပြံၚ်ကၠုၚ်ရ၊ ဟီုသ္ဂးဂလာန်ဂုဏ် ဂလာန်ထိုၚ်သးအ္စာဂှ်ကီု ကွေတ်အ္စာဂှ်ကီု သဘဴသ္ဍိုက်မၠိုက်ကြိုက်စိုတ်အ္စာဂှ်ကီု ပွမသ္ဍိုက်မၠိုက်ဒးဂၞပ်အ္စာဂှ်ကီု တၚ်ရန်တၟံအ္စာဂှ်ကီုမ္ဂး ထေဲပၞောတ်ရ၊ ဟွံမိပ်စိုတ်ရ၊ မၞုံကဵုစိုတ် မဟွံသ္ဍိုက်မၠိုက်ရ။ ဟီုသ္ဂးဂုဏ်ကျာ်ကီု ဓရ်ကီု သၚ်ကီုမ္ဂး သ္ဍိုက်မၠိုက်ရ၊ ၊ မိပ်စိုတ်ရ၊ မၞုံကဵုစိုတ် မဟွံသ္ဍိုက်မၠိုက်ရ။ ယွံခမဳတအ် ဣဝွံတုန် လက္ချဏ်ဟိုတ်ဂွံစၟတ်သမ္တီ ပ္ဍဲပွမဟွံကဵုသၚ် (သ္ဍိုက်မၠိုက်) ညးမကေၚ်ဒှ်တဳရောၚ်။ ယွံခမဳတအ် ရဴဝွံဟေၚ် ညးမကေၚ်ဒှ်တဳဂှ် ဒှ်ကဵုသၚ် (သ္ဍိုက်မၠိုက်) ရ။ ယွံခမဳတအ် ရဴဝွံ ညးမကေၚ်ဒှ်တဳ မလေပ်ကဵုသၚ်သ္ဍိုက်မၠိုက်ဂှ် ကၠုၚ်မ္ဂး ဂပ်ဝ်ပကဵုခမဳပယျၚ်ရ။
ယွံခမဳတအ် ညးမကေၚ်ဒှ်တဳဂှ် ယဝ်ကၠုၚ်ဂၞံၚ်ဂၞါတ်လဝ်ဇကုသၟး ‘ဟွံမွဲကဵုဗွိုတ်လတက်’ ဂှ်မ္၈း၊ သ္ပသကိုပ်သကကဵုဥပဇ္ၛာယ်တုဲ သ္ဒးဂၠာဲသ္ၚေဝ်သ္ၚာရ။ ယဝ်ကၠုၚ်သီုမဟဂွံကးလဝ်သော်မ္ဂး၊ တၞဟ်နကးသော် သ္ဒးပါန်အခေါၚ်သၚ်ရ။ ယွံခမဳတအ် ရသိဂမၠိုၚ်မကၠောန်ၜိုတ်ပၟတ်ဂှ် ယဝ်ကၠုၚ်အိုတ်မ္ဂး သ္ဒးသ္ပကဵုခမဳပယျၚ်ရ၊ ဟဂပ်ဝ်ကဵုပြဝး ကုရသိဂမၠိုၚ်ဂှ်ရ၊ ပွမဟွံဒးကဵုသၚ်ဂှ် မုဟိုတ်ရောဟီုမ္ဂး ယွံခမဳတအ် ရသိဂမၠိုၚ်ဂှ် ဒှ်ကမ္မဝါဒဳ ကြိယဝါဒဳဂမၠိုၚ်အိုတ်ရ။ ယွံခမဳတအ် ဗွဲဂကူညးမကေၚ်ဒှ်တဳ မဒှ်ဂကူသၟိၚ်သာကျဝၚ်ဂှ် ယဝ်ကၠုၚ်မ္ဂး၊ သ္ဒးပကဵုခမဳပယျၚ် ညးဂှ်ရ၊ ဟဂပ်ဝ်ကဵုပြဝး ကုညးမဒှ်ဂကူသၟိၚ်သာကျဝၚ်ဂှ်ရ။ ယွံခမဳတအ် အဲ ကဵုအခေါၚ်အဝဵု မဒှ်တၞဟ်ခြာကုကဠောဂကူဂမၠိုၚ်ရ ရဴဝွံ (သ္ဂးရ)။
ခဏ်သတ္တမ ဒှ်အရာထ္ၜးကဵုပရူညးကေၚ်ဒှ်တဳတုဲရ။
